Read Da'a Kaili MATIUS 14 Bible Online

MATIUS 14 - Da'a Kaili bible

MATIUS 14

¹Tempo etu topoparenta ri Bagia Galilea Magau Herodes. [33] I'a nangepe kareba to nantesa powia Yesus

²pade niulina ka pangga-pangga bete to nomporoa i'a, “Natantumo I'a etu Yohanes Topediu! Natuwu balimo i'a nggari kamatena! Etu sampe I'a nakuasa nompowia kabaraka-kabaraka!”

³Iwetumo pompekiri Magau Herodes sabana bopia i'a nompakau tau nanjoko Yohanes bo nombaso'o i'a pade nombasuaraka i'a riara tarunggu. Herodes nowia iwetu sabana kajadia ante i Herodias, rongo i Filipus, sampesuwu i Herodes mboto to niala niporongo i Herodes.

⁴Tapi Yohanes nangontiaka i Herodes. Niulina, “Nantuki Atura-atura agamata da'a masipato komi nomporongo i Herodias!”

⁵Tempo etu i Herodes madota mompatesi Yohanes, tapi i'a naeka ka tau dea, sabana Yohanes nireke ira samba'a nabi.

⁶Tempo posusa eo jadi i Herodes, ana randoo i Herodias nojoge ri ngayo pura-pura toposusa etu. Nadamba mpu'u rara i Herodes nanggita i'a nojoge

⁷sampe i'a nojanji ante netunda ka randoo etu nuapa-nuapa raperapina kana rawaina ka i'a.

⁸Nangepe tesa i Herodes randoo etu nerapi ka i'a nantuki pompakau indona iwe'i: “Wai ka aku ri se'i balengga Yohanes Topediu raboli riara santonga dula.”

⁹Nangepe pomperapi etu nasusamo rara i Herodes. Tapi naupa iwetu nipakauna tau nompowia nuapa to niperapi randoo etu, sabana i'a nojanji ri ngayo toposusa to nanggoni mpasanggani-nggani ante i'a.

¹⁰Nipakaunamo tantarana malau ri tarunggu mombatompo tambolo Yohanes.

¹¹Pade balenggana niboli ira riara santonga dula nikeni niwai ka ngana randoo etu. Naopu etu randoo etu nanggeni balengga etu niwaina ka indona.

¹²Sangga nangepepa nuapa to najadi, naratamo topantuki Yohanes nangala watabakuna, pade nitana iramo ri dayo. Naopu etu nalaumo ira notesa ka Yesus nuapa to najadi.

¹³Tempo Yesus nangepe kareba kamate Yohanes nesawi sakayamo I'a njamba'ana nompalasi peto'o etu nalau mpaka ri peto'o nakalinoa. Tapi tempo tau dea nangepe Yesus nalaimo, ira wo'u nompalasi ngata-ngata ira nalau nantuki I'a. Aga ira nolumako ri kabatana.

¹⁴Tempo Yesus nana'u nggariara sakaya nikitana nadea mpu'u tau nompopea I'a. Naasi mpu'umo matana nanggita ira, pade I'a nompakabelo ira to naju'a.

¹⁵Sangga nangguwiamo da'a mana masaeka mawengi, naratamo anaguru-anaguru Yesus ri ja'ina pade nangulimo ira ka I'a, “Guru, peto'o e'i nakalinoa, pade mana masaeka mawengi. Agina tau dea etu rapakau matingguli ala ira mamala malau mpaka ri ngata-ngata namosu nggari se'i mangoli panggoni.”

¹⁶Tapi nangulimo Yesus ka anaguruna, “Da'a paraluu ira malau. Komimo mombawai ka ira panggoni.”

¹⁷Nesonomo anaguru-anaguruna, “To naria ri ja'i kami e'i aga limaongu roti pade romba'a bau.”

¹⁸Nangulimo Yesus, “Keni ri se'imo roti bo bau etu.”

¹⁹Naopu etu nipakauna tau dea nekatoko ri bunggu nggawoko. Pade nialanamo limaongu roti bo romba'a bau etu pade nantingoa langi nosambaya nanguli tarima kasi ka Alatala. Naopu etu nitubi-tubina roti etu pade niwaina ka anaguru-anaguruna ala ratibo-tibo ira ka tau dea.

²⁰Ira pura-pura nanggoni sampe nabosu. Naopu etu anaguruna nompasiromu bali labi panggoni to naboli, naponupa sampulu rotonda.

²¹Kadea ira to nanggoni ri setu kira-kira limanjobu mba'a langgai, da'a nibila besi-besi ante ngana-ngana.

²²Naopu etu Yesus nompakau anaguru-anaguruna mesawi sakaya mokolu ka I'a mpaka ri sambote rano, pade nipakauna tau dea manjili mpaka ri ngata ira mboto.

²³Naopu I'a nompakau tau dea manjili, nantendemo I'a njamba'ana mpaka ri saongu bulu ala mosambaya. Tempo nawengimo I'a danaria ri setu njamba'ana.

²⁴Tapi tempo etu sakaya to nipesawi anaguru-anaguruna nakawaomo nggari kabatana ri tatongo rano. Sakaya etu nakalenga-lenga nikeni balumba bete sabana nantomu poiri bete.

²⁵Kira-kira tinti toluongu nggawengina naratamo Yesus nompakamosu ira nolumako ri bunggu ue rano.

²⁶Tempo anaguru-anaguruna nanggita I'a nolumako ri bunggu nu ue naeka mpu'umo rara ira. Nangulimo ira, “Etumo mboa!” Pade nongare-ngaremo ira ante naeka rara.

²⁷Tapi kaliu-liu Yesus nanguli ka ira, “Pakaroo rara komi! Aku Yesusmo e'i! Ne'e maeka!”

²⁸Pade nangulimo i Petrus, “Pue, ane mpu'u-mpu'u Komi, pokiomo aku mpaka ri ja'imu molumako ri bunggu ue.”

²⁹Nesonomo Yesus, “Kamaimo!” Jadi nana'umo i Petrus nggariara sakaya, pade nolumakomo i'a ri bunggu ue mompakamosu Yesus.

³⁰Tapi tempo i'a nanggita karoso nu poiri bete naekamo rarana. Nompamulamo i'a natala riara ue rano etu. Pade nongaremo i'a, “Pue, tulungimo aku!”

³¹Jadi kaliu-liu Yesus nangojo palena nanjoko i Petrus. Pade niulina ka i Petrus, “Nakura mpu'u pomparasayamu! Nokuya komi nolengga-lengga rara?”

³²Tempo ira romba'a nesawimo riara sakaya kaliu-liu nenontomo poiri bete etu.

³³Pade naratamo anaguru-anaguruna riara sakaya etu nekadede mombasomba I'a. Nanguli ira, “Mpu'u-mpu'u Komimo Ana nu Alatala!”

³⁴Sangga naratapa ira ri sambote rano nana'umo ira ri Bagia Genesaret.

³⁵Tempo pue ngata ri setu nangginjani tau to narata etu Yesus, kareba etu nipatolele ira mpaka ri umba-umba ngata ri bagia etu sampe pura-pura tau naju'a ri setu nikeni mpaka ri ja'i Yesus.

³⁶Ira nerapi ka Yesus ala ira rapaloga aga manggabe tampa nu bajuna. Pade isema-sema to nanggabe tampa nu bajuna nabelo pura nggari ju'a ira.