Read Da'a Kaili MATIUS 15 Bible Online

MATIUS 15 - Da'a Kaili bible

MATIUS 15

¹Naopu etu naratamo bara sakuya mba'a tau to Parisi bo guru-guru agama Yahudi nggari ngata Yerusalem mpaka ri ja'i Yesus, pade nekutanamo ira,

²“Nokuya anagurumu nombaliunaka ada-ada ntotu'ata nggaolu? Tempo nanggoni ira da'a norama pale ntani nantuki ada-adata!”

³Nesonomo Yesus ka ira, “Nokuya wo'u komi nombaliunaka parenta-parenta nu Alatala ante nantuki ada-ada ntotu'a komi nggaolu?

⁴Sabana Alatala nanguli, ‘Bilamo indo umamu,’ pade niulina wo'u, ‘Isema-sema manguli sinja'i umana bara indona i'a kana rapatesi.’

⁵Tapi komi nompatuduki iwe'i: Ane tau manguli ka indo umana, ‘Pura-pura nuapa to masipato kuwai ka komi naopumo nipesombaku ka Alatala,’

⁶tau etu da'a mana paraluu mombabila indo umana. Jadi ante nantuki ada-ada ntotu'a komi nggaolu iwetu komi nombasapuaka Tesa nu Alatala!

⁷Komi tanu tau-tau aga nabelo ri lenje! Nakono mpu'u Tesa nu Alatala to nipasimbayu nabi Yesaya nggaolu iwe'i:

⁸‘Tau-tau e'i aga nombabila Aku ri sumba, tapi da'a ante mpu'u-mpu'u rara ira.

⁹Da'a ntoto ria gunana ira mepue ka Aku, sabana pepatuduki to nipatuduki ira aga ada-ada nu manusia.’ ” [34]

¹⁰Naopu etu Yesus nompokio tau dea pade niulina ka ira, “Epemo mpakabelo-belo ala ranjani komi tesaku e'i.

¹¹Nuapa-nuapa to nesua ri ngangata da'a mompakatantoru manusia riara mpanggita Alatala. Tapi nuapa-nuapa to nesuwu nggari sumbata, etumo to mompakatantoru manusia riara mpanggita Alatala.”

¹²Naopu etu naratamo anaguru-anaguruna nompakamosu Yesus pade nanguli, “Guru, ninjani Komi tau-tau to Parisi nakedi rara nangepe tesa Komi pane'a?”

¹³Nesonomo Yesus, “Palambamo tau-tau to Parisi etu. Sabana pura-pura anu da'a nituja Umaku ri suruga kana rarebuna. Tau-tau to Parisi etu ewa topanggeniaka naburo. Ane tau naburo nombanini roana toburo, natantumo ira romba'a kana manawu sanggani ralowu.”

¹⁵Pade nangulimo i Petrus ka Yesus, “Guru, tulungi pakanoto ka kami batuana porapa pane'a.”

¹⁶Nesonomo Yesus, “Iwenumo? Da'apa ninjani komi wo'u?

¹⁷Da'apa ninjani komi panggoni to nesua ri ngangata napola mpaka ri ta'ita pade nggari setu aga niote wa'amo?

¹⁸Tapi tesa-tesa to naja'a to neumba nggariara nta'ita pade to nesuwu nggari sumbata, etumo to nompakatantoru kita riara mpanggita Alatala.

¹⁹Sabana nggariara nta'i neumba mpengele-ngele pompekiri to naja'ana, sampe naria tau nompatesi roana, nebualo, nogau sala ante tau da'a rongona mboto, nangangga, nodawa ri ngayo ntopotangara, pade nanguli sinja'i.

²⁰Pokainggu etumo to nompakatantoru manusia riara mpanggita Alatala. Tapi nanggoni ante da'a morama pale, etu da'a nompakatantoru tau riara mpanggita Alatala.”

²¹Naliu etu nalaimo Yesus nompalasi peto'o etu pade nalaumo I'a mpaka ri bagia namosu ngata Tirus bo ngata Sidon.

²²Ri setu naria samba'a besi to Kanaan tau da'a to Yahudi. I'a narata mpaka ri ja'i Yesus ante nongare-ngare iwe'i: “Pue, Muli i Daud! Potowemo aku e'i! Anaku besi nipesua seta sampe nandasa mpu'umo i'a nabaya!”

²³Tapi Yesus da'a notingo nombasono besi etu. Pade anaguru-anaguruna nompakamosu I'a ante nerapi ka I'a, “Guru, agina pakaumo besi etu malai. I'a aga nongare-ngare nantuki purita.”

²⁴Nesonomo Yesus, “Aku e'i nipakau mantulungi aga muli Israel to natonto nasimbayu ewa bimba-bimba.”

²⁵Tapi naratamo besi etu nekadede ri ngayo Yesus pade niulina, “Pue, tulungimo aku!”

²⁶Nesonomo Yesus, “Da'a nabelo mangala panggoni ngana-ngana ratajiaka ka asu.” [35]

²⁷Nanguli besi etu, “Nakono to niuli Komi, Pue. Tapi asu wo'u nabiasa nanggoni rombo-rombo mpanggoni to nanawu nggari bunggu meja puena.”

²⁸Naopu etu nangulimo Yesus, “Indo, naroso mpu'u pomparasayamu! Sabana etu nuapa to niperapimu etu kana majadi.” Pade tempo etu wo'u nabelo balimo ana nu besi etu.

²⁹Naopu etu nalai wo'umo Yesus nompalasi peto'o etu nolumako nosale wiwi Rano Galilea. Pade nantendemo I'a ri saongu bulu pade nekatoko.

³⁰Naopu etu nadea mpu'u tau narata mpaka ri ja'ina nanggeni roa ira to napungguna, tau to nakejo kadana, tau naburo, tau nabobo pade nadea tau ntanina to naju'ana. Ira nikeni ri ngayo Yesus pade I'a nompakabelo ira pura-pura.

³¹Nanggita etu nogumaa mpu'umo tau dea sabana tau-tau nabobo namala notesa, tau-tau nakejo kadana nipakabelo, tau-tau napunggu namala nolumako pade tau-tau naburo namala nekita. Etu sampe tau dea nombabila bo nantoiya Alatala to nipesomba nto Israel.

³²Naopu etu Yesus nompokio anaguru-anaguruna pade niulina ka ira, “Naasi mpu'umo mataku nanggita tau dea etu, sabana tolumbengimo kasaena ira nosanggani-nggani ante Aku pade we'i-we'i mana ria panggoni ira. Aku da'a madota mompakau ira manjili ante maoro ta'i. Ne'e-ne'e ira maleto pade madungga ri jala.”

³³Nesonomo anaguruna, “Nggari umba raratata panggoni rawai ka tau iwetu kadeana? Peto'o e'i nakalinoa.”

³⁴Pade nekutanamo Yesus ka ira, “Sakuya ongu roti to naria ri ja'i komi?” Nesonomo ira, “Pituongu, pade naria wo'u bara sakuya mba'a bau nggedi.”

³⁵Nangepe etu Yesus nompakau tau dea nekatoko puramo ri tana.

³⁶Pade nialana roti pituongu bo bau-bau nggedi etu pade niulina tarima kasi ka Pue Alatala. Naopu etu nitubi-tubina roti bo bau etu pade niwaina ka anaguruna. Pade ira nombatibo-tibo panggoni etu ka tau dea.

³⁷Ira pura-pura nanggoni sampe nabosu. Naopu etu anaguru Yesus nompasiromu labi-labi mpanggoni ntau dea etu, naponupa pitu karanji.

³⁸Tau nanggoni tempo etu patanjobu mba'a langgai, da'a nibila besi-besi bo ngana-ngana.

³⁹Naopu etu Yesus nompakau tau dea manjili. Pade I'a mboto nesawi sakaya nggari setu nalau mpaka ri Bagia Magadan.