Read Da'a Kaili MATIUS 17 Bible Online

MATIUS 17 - Da'a Kaili bible

MATIUS 17

¹Onombengi kaliuna Yesus nanggeni i Petrus, Yakobus ante sampesuwuna Yohanes nalau nantende mpaka ri saongu bulu to nalangana. Aga Yesus ante ira tolumba'a to naria ri setu.

²Tempo ira ri setu sampegoli nabalimo lenje Yesus ri ngayo ira. Lenjena nareme mpu'u ewa kareme nu mata eo, pade pakeana nabula damo nenggila.

³Sampegoli anaguru Yesus nanggita romba'a nabi nggaolu nenggore ri setu notesa-tesa ante Yesus. Ira etumo nabi i Musa bo nabi Elia.

⁴Sangga nanggitapa etu nangulimo i Petrus ka Yesus, “Pue, nasana mpu'u kami ri se'i. Ane Pue madota aku mowia toluongu pakumpa ri se'i, saongu ka Komi, saongu ka i Musa pade saongu ka Elia.”

⁵Tempo Petrus danotesa ante Yesus, naratamo kulimu to nareme nombabungu ira, pade nggariara kulimu etu naria suara nanguli, “E'imo Anaku to nipotoweku. I'amo to nikonoa raraku. Epe komimo tesana!”

⁶Tempo anaguru Yesus nangepe suara etu naeka mpu'umo rara ira sampe notatungga ira narapa ri tana.

⁷Tapi Yesus nompakamosu ira pade nanggabe ira ante nanguli, “Pembangumo. Ne'e mana maeka!”

⁸Tempo ira nantingara to nikita ira aga Yesus njamba'ana. Da'a mana naria tau ntanina nikita ira.

⁹Tempo ira notua nggari buluna etu Yesus nombatagi ira, “Ne'e ratesa ka isema-sema nuapa to nikita komi pane'a ane Aku, Ana nu Manusia da'apa rapakatuwu bali nggari kamateku.”

¹⁰Pade nekutanamo anaguruna ka I'a, “Nuapa sabana guru-guru agama nanguli nabi Elia kana mokolu marata pade Magau to Mompakasalama?”

¹¹Nesonomo Yesus, “Nakonomo tesa etu. Nabi Elia kana mokolu marata sabana i'amo to mompakasiayu mpengele-ngele.

¹²Tapi kuuli ka komi, kakonona naratamo nabi Elia, aga i'a da'a ninjani ntau. Tau-tau etu aga nompowia ri ja'ina dota ira to naja'a. Pade iwetu wo'u Aku, Ana nu Manusia kana rapandasa ira.”

¹³Nangepe tesa etu nanotomo ka anaguruna Yohanes Topediu to nipatuju Yesus ante tesana to nantesa nabi Elia.

¹⁴Tempo Yesus ante tolumba'a anaguruna nosirata ka tau dea naratamo samba'a tau nekadede ri ngayo Yesus ante nanguli,

¹⁵“Pue, potowemo anaku! I'a naju'a nadola, nandasa mpu'u i'a. I'a naoso nadungga ri apu pade naoso wo'u nadungga ri ue.

¹⁶I'a nikeniku ri ja'i anaguru Komi tapi ira da'a namala mompakabelo ju'ana etu.”

¹⁷Pade nesonomo Yesus, “Iwenu tanu komi? Komimo tanu tau mpu'u-mpu'u da'a nomparasaya pade topesapuaka! Sakuyapa kasaena Aku kana mosanggani ante komi! Sakuyapa kasaena Aku kana mosabara ri ja'i komi! Kenimo wemaimo ngana etu!”

¹⁸Sangga naratapa ngana etu ri ngayona Yesus nompopalai seta to nompakaju'a i'a. Pade nalai mpu'umo seta etu nggari ja'ina. Pade tempo etu wo'u nabelomo ju'a ngana etu.

¹⁹Naliu etu naratamo anaguru-anaguru Yesus ri ja'ina tempo ira mana ri tatongo ntau dea, pade nipekutana ira ka I'a, “Iwenu sampe kami da'a namala nompopalai seta etu pane'a?”

²⁰Nesonomo Yesus, “Sabana nakura pomparasaya komi. Aku mpu'u-mpu'u notesa ka komi, ane pomparasaya komi aga sakedi lau ewa wua kayu to neliu nggakedi, da'a ria to da'a mamala rapowia komi. Komi mamala manguli ka bulu etu, ‘Polinja gu sa'amo,’ pade bulu etu kana molinja gu sa'a. [

²¹Tapi seta ewa etu pane'a aga namala rapopalai ante mosambaya bo mapuasa.”]

²²Tempo Yesus ante anaguruna nasiromu mpasanggani-nggani ri Bagia Galilea, nangulimo I'a ka ira, “Aku, Ana nu Manusia da'a mana masaeka kana rawai ka baliku,

²³pade Aku kana rapatesi ira. Tapi ri eo katolueona Aku kana rapakatuwu bali.” Sangga nangepe tesa etu nasusa mpu'umo rara anaguruna pura-pura.

²⁴Sangga naratapa Yesus bo anaguruna ri ngata Kapernaum naratamo samba'a topomperapi balasitee Sapo Mpepue nompekutana i Petrus, “Gurumu nabiasa nombabayari balasitee Sapo Mpepue atau da'a?”

²⁵Nesonomo i Petrus, “Iyo, nibayarina.” Naopu etu nanjilimo i Petrus mpaka ri sapo to nipeto'o ira. Narata ri setu da'apa i'a notesa nuapa-nuapa nekutanamo Yesus ka i'a, “Simon, iwenu pombaratamu? Isema kakonona masipato mombabayari balasitee bara kasowia ka magau-magau ri dunia e'i? Todeana mboto atau pue ngata to nikuasaina etu?”

²⁶Nesonomo i Petrus, “Natantu pue ngata to nikuasaina to masipato mombabayari.” Nangulimo Yesus, “Ane iwetu, todeana mboto da'a masipato mombabayari balasitee etu.

²⁷Tapi naupa iwetu, ne'e kita mompakakedi rara ntau etu. Agina komi malau mome'i ri rano. Alamo bau pamulana to murata. Riara ngangana kana murata saongu doi to nagana mombabayari balasitee kita romba'a. Kenimo doi etu pade bayarimo balasiteeta ka tau topomperapi balasitee etu.”