Read Da'a Kaili MATIUS 18 Bible Online

MATIUS 18 - Da'a Kaili bible

MATIUS 18

¹Tempo etu naratamo anaguru Yesus ri ja'ina nompekutana I'a, “Guru, isema to meliu nggalanga katuwuna riara Poparenta nu Alatala banepia?”

²Nangepe etu Yesus nompokio samba'a ngana nggedi pade nipopekanggorena ri tatongo anaguruna,

³pade niulina ka ira, “Aku mpu'u-mpu'u notesa ka komi, ane komi da'a majea bo majadi nasimbayu ewa ngana nggedi e'i, komi da'a mamala majadi todea riara Poparenta nu Alatala.

⁴Jadi tau to mompakaede rarana pade majadi ewa ngana nggedi e'i, i'amo to meliu nggalanga katuwuna riara Poparenta nu Alatala.

⁵Pade isema-sema mantarima samba'a ngana nggedi ewa e'i sabana i'a nantuki Aku i'a wo'u mantarima Aku.

⁶Tapi isema-sema mombabagiu samba'a ngana nggedi sampe i'a mowia silaka, nabelopa ane saongu watu bete raso'o ri tambolona pade i'a ratajiaka riara ntasi to nandalana.

⁷Nandasamo tau-tau ri dunia sabana nadeamo to nompakanawu ira riara silaka. Kana maria to manawu riara silaka tapi mandasa mpu'umo tau to mompakanawu ira.

⁸Jadi ane palemu atau kadamu manggeni komi mowia silaka agina pale atau kadamu etu ratompo pade ratajiaka. Nabelopa komi mesua matuwu mabelo riara suruga ante pale bara kada mapudu iwetu pade ratajiaka riara apu to najela sampe ri kasae-saena ante palemu bo kadamu magana.

⁹Pade ane matamu manggeni komi mowia silaka agina rasu'i tajiaka ongu matamu. Nabelopa komi mesua matuwu mabelo riara suruga ante momata sabingga pade ratajiaka riara apu naraka ante mata to maganana.

¹⁰Jadi pakabelo-belo, ne'e manjauru ngana nggedi ewa ngana e'i. Sabana kuuli ka komi malaeka-malaeka to nombajagai ira bate-batena naria ri ngayo Umaku ri suruga. [

¹¹Pade Aku, Ana nu Manusia narata ri dunia ala mompakasalama tau-tau to natontona.”]

¹²“Rapana maria samba'a tau nompatuwu bimba satu onguna pade naria saongu bimba natonto nuapa rapowiana? Iwenu pombaratamu? Natantumo i'a kana mompalasi bimbana siompulu bo sasio etu ri buluna pade malau mangelo bimbana saongu to natonto etu.

¹³Parasayamo Aku, ane raratana bali bimba etu meliu nggadamba rarana manggita saongu bimba etu pade manggita siompulu bo sasio bimba to da'a natonto.

¹⁴Iwetu wo'u Uma komi ri suruga da'a madota samba'a nggari tatongo ngana nggedi e'i malipo pomparasayana.”

¹⁵“Ane maria sampesuwumu mowia sala ri ja'imu, kalau komi ri ja'ina pade tesamo pakanoto ka i'a salana. Kawiamo etu nggalino, aga komi romba'a. Ane i'a mantarima pantesamu kasintuwumu ante i'a kana mabelo bali.

¹⁶Tapi ane i'a da'a madota mantarima pantesamu keni wo'umo samba'a atau romba'a roamu majadi sabi pantesamu ante i'a. Sabana riara Buku Nagasa naria nitulisi iwe'i: ‘Ane maria tau nipangadu kana maria romba'a atau tolumba'a sabi motesa mompakanoto kasalana.’ [38]

¹⁷Ane i'a da'a madota mantarima pantesa ira, kenimo i'a ri ngayo ntodea topomparasaya. Pade ane i'a da'a madota mantarima tesa belo nggari ja'i todea etu, i'a kana rareke komi nasimbayu ewa tau da'a nosinjani ante Alatala bo tau-tau topomperapi balasitee to naja'ana.

¹⁸Aku mpu'u-mpu'u notesa ka komi, nuapa to nitagi komi ri dunia e'i, etu nitagi wo'u ri suruga. Pade nuapa to nipaloga komi ri dunia e'i, nipaloga wo'u ri suruga.

¹⁹Pade kuuli wo'u ka komi ane maria romba'a komi ri dunia e'i mosaongu rara mosambaya merapi sangele, posambaya komi etu kana rapoiyo Umaku ri suruga.

²⁰Sabana ri umba-umba tau nasiromu riara sangaku nau aga romba'a atau tolumba'a, Aku mboto naria ri setu nosanggani-nggani ante ira.”

²¹Naopu etu naratamo i Petrus nompekutana Yesus, “Pue, ane maria sampesuwuku mowia sala ri ja'iku, sampe sakuya nggani aku kana mombaampungi i'a? Bara sampe pitunggani?”

²²Nesonomo Yesus, “Da'a aga pitunggani, tapi sampe noatu nggani. [39]

²³Sabana Pue Alatala nasimbayu ewa magau riara porapa e'i: Naria samba'a magau to madota momparesa inda-inda nu batuana.

²⁴Tempo i'a nompamula nomparesa inda ira, naria samba'a batua niposintingayo ante i'a to noinda juta-juta rupia. [40]

²⁵Tapi batua etu da'a nompakule mombabayari indana etu. Jadi nangulimo magau, ‘Ane iwetu pobalumo batua etu mpasanggani-nggani ante rongona, ana-anana bo pura-pura mbara-mbara riara njapona rapombabayari indana ri ja'iku etu!’

²⁶Nangepe etu nekadedemo batua etu ri ngayo magau nerapi ante mpu'u-mpu'u rarana, ‘Magau, posabara ntanimo ruru ri ja'iku. Pura-pura indaku etu kana kubayari mpakaopu!’

²⁷Nangepe etu, naasimo mata magau nanggita batuana etu. Jadi nikabasakana batua etu pade indana etu nipakaopunamo.

²⁸Tempo batua etu nesuwu ri sawalikuna i'a nosintomu ante roana to noinda ri ja'ina bara sakuya atu njobu rupia. [41] Nisokona tambolo roana etu pade nikojena ante nanguli, ‘Bayari puramo indamu ri ja'iku!’

²⁹Pade nekadedemo roana etu ri ngayona nerapi ante mpu'u-mpu'u rarana, ‘Posabara ntanimo ruru, wega. Indaku pura-pura etu kana kubayari mpakaopu.’

³⁰Tapi batua etu da'a madota mantarima pomperapi roana etu. I'a aga nalau nombasuaraka roana riara tarunggu sampe pura-pura indana etu rabayarina mpakaopu.

³¹Tempo batua-batua ntanina nanggita nuapa to nipowia batua etu ka roana, nasusa mpu'umo rara ira. Jadi nalaumo ira mpaka ri ja'i magau nantesa ka i'a pokainggu batuana pane'a.

³²Sangga nangepe tesa etu, magau nompokio batua to naja'a powiana etu pade niulina, ‘Iko samba'a batua to naja'a mpu'u! Pura-pura indamu to nadea mpu'u etu nipakaopukumo sabana iko nerapi ri ja'iku.

³³Nokuya iko da'a naasi matamu nanggita roamu nasimbayu ewa aku naasi mataku nanggita iko?’

³⁴Jadi nabilisi mpu'u rara magau ri ja'i batuana etu. Niwaina batua etu ka topeboba riara tarunggu sampe i'a mombabayari mpakaopu pura-pura indana.”

³⁵Yesus nompakaopu tesana ante nanguli, “Iwetu wo'u Umaku ri suruga mompowia ka komi ane komi da'a mombaampungi sampesuwumu ante mpu'u-mpu'u raramu!”