Read Da'a Kaili MATIUS 19 Bible Online

MATIUS 19 - Da'a Kaili bible

MATIUS 19

¹Naopu Yesus nombatesa etu pura-pura nalaimo I'a nompalasi Bagia Galilea nalau mpaka ri Bagia Yudea ri sambote Binangga Yordan.

²Nadea mpu'u tau nantuki I'a pade ri setu I'a nompakabelo ju'a-ju'a ira.

³Pade naratamo bara sakuya mba'a tau to Parisi madota mangelo sala Yesus. Ira nompekutana I'a iwe'i: “Nantuki Atura-atura agamata mamala samba'a langgai mombasompo rongona besi ante mpengele-ngele sabana?”

⁴Nesonomo Yesus, “Iwenumo? Da'apa nibasa komi to nitulisi riara Buku Nagasa nggaolu? Ri lamba pamulana Topompajadi manusia nompajadi samba'a langgai bo samba'a besi.

⁵Pade naopu etu niulina, ‘Etumo sabana langgai kana mompalasi indo umana pade malau maroo ri ja'i rongona besi, pade ira romba'a kana majadi samba'a.’ [42]

⁶Jadi riara mpanggita Alatala ira romba'a etu da'a mana romba'a tapi samba'a. Sabana etu nuapa to nipakasaongu Alatala, ne'e rapopoga'a manusia.”

⁷Pade nekutana wo'umo tau-tau to Parisi ka I'a, “Ane iwetu, nuapa sabana i Musa nompakau langgai mombawai sura tala ka rongona besi pade mombasompo i'a?”

⁸Nesonomo Yesus, “Musa nompaloga komi mombasompo rongomu iwetu sabana nako'o gaga rara komi. Tapi ri lamba pamulana da'a iwetu.

⁹Jadi epe komi tesaku e'i. Isema-sema mombasompo rongona besi pade momporongo besi ntanina naupa rongona pamulana etu da'a nogau sala ante langgai ntanina, tau etu nireke nebualo.”

¹⁰Naopu etu anaguru-anaguru Yesus nanguli ka I'a, “Ane iwetu kasusana atura mporongo nabelopa ane tau da'a morongo!”

¹¹Nesonomo Yesus, “Da'a pura-pura tau mamala mantarima pantesa etu, aga ira to nipakatantu Alatala.

¹²Sabana naria tau da'a namala morongo sabana da'a nagana sipana nesuwu nggariara indona. Naria wo'u tau da'a namala morongo sabana nitunggai nigero ntau sipana. Pade naria wo'u tau da'a norongo sabana dotana mboto, ala ira maloga mantui bago i Pue. Isema-sema mompakule mantarima pepatuduki e'i kana ratarimana.”

¹³Naria sanggani nadea mpu'u tau nanggeni ana-ana ira mpaka ri ja'i Yesus ala I'a mombadika palena ri koro ira pade mosambaya ka ira. Tapi anaguru-anaguru Yesus nanggarau tau-tau etu.

¹⁴Nanggita etu nangulimo Yesus ka anaguru-anaguruna, “Pakambamo ngana-ngana etu marata ri ja'iku! Ne'e ratagi ira, sabana aga tau to noinggu ewa ngana-ngana e'i to masipato majadi todea riara Poparenta nu Alatala.”

¹⁵Pade nidikana palena ri balengga ngana-ngana etu ala mombagane ira. Naopu etu nalaimo I'a nggari setu.

¹⁶Naria saeo samba'a tau nompakamosu Yesus pade nekutana, “Guru, powia nuapa to nabelona to masipato kupowia ala aku mamala matuwu mabelo sampe ri kasae-saena?”

¹⁷Nesonomo Yesus, “Nuapa sabana komi nompekutana Aku ewa powia to nabelona? Da'a ria ntanina to nabelo aga Pue Alatala. Ane komi madota matuwu mabelo sampe ri kasae-saena, tukimo parenta-parenta Alatala.”

¹⁸Pade nekutana wo'umo tau etu, “Parenta-parenta umbana?” Nesonomo Yesus, “Ne'e mepatesi, ne'e mogau sala ante tau da'a rongomu mboto, ne'e mangangga, ne'e modawa ri ngayo ntopotangara,

¹⁹bilamo indo bo umamu, pade potowemo sanggamanusiamu nasimbayu ewa komi nompotowe koromu mboto.”

²⁰Nangulimo tau etu ka Yesus, “Parenta-parenta etu nitukiku puramo. Nuapapa wo'u to masipato kukawia?”

²¹Nesono Yesus, “Ane komi madota majadi mabelo ntoto, kalau pobalu puramo mbara-mbaramu pade palelemo doi olina etu ka tau-tau nakasiasi ala murata kakalumana ri suruga. Maopu etu kamai, tukimo Aku!”

²²Nangepe tesa Yesus etu nalaimo tau etu ante nasusa rarana, sabana i'a samba'a tau to nakalumana mpu'u.

²³Naopu etu nangulimo Yesus ka anaguru-anaguruna, “Aku mpu'u-mpu'u notesa ka komi, nakaja mpu'u tau nakalumana majadi todea riara Poparenta nu Alatala.

²⁴Pade kuuli wo'u ka komi, nagampapa saongu binata to nabetena ewa unta mesua ri bolo jaru pade samba'a tau nakalumana majadi todea riara Poparenta nu Alatala.”

²⁵Sangga nangepe pantesa Yesus etu, natekaja mpu'umo rara anaguruna sampe ira nanguli, “Ane iwetu natantumo da'a ria samba'a tau to mamala rapakasalama!” [43]

²⁶Yesus nompenaa ira pade nanguli, “Ane aga nggari manusia, natantu da'a mamala majadi. Tapi ane nggari Alatala pura-pura mamala majadi.”

²⁷Pade nangulimo i Petrus, “Kita we'i, Pue. Kami e'i nompalasi pura-pura nuapa to naria ri ja'i kami pade nantuki komi. Nuapa rarata kami banepia?”

²⁸Nesonomo Yesus ka ira, “Aku mpu'u-mpu'u notesa ka komi, tempo Alatala mompakabou mpengele-ngele banepia, Aku, Ana nu Manusia kana mekatoko ri pekatoko magau to nagayana. Pade tempo etu wo'u komi to nantuki Aku kana mekatoko ri sampulu rongu pekatoko magau ntanina mombatangara muli nu sampulu romba'a ana Israel.

²⁹Isema-sema to nompalasi sapona bara sampesuwuna, bara indo umana, bara ana-anana, bara tinaluna sabana nantuki Aku, tau etu kana mombarata bali satu nggani kadeana. Pade i'a wo'u mombarata katuwua mabelo sampe ri kasae-saena.

³⁰Tapi nadea tau to nalanga katuwuna we'i-we'i kana majadi tau to naede katuwuna banepia. Pade nadea wo'u tau to naede katuwuna we'i-we'i kana majadi tau to nalanga katuwuna banepia.”