Read Da'a Kaili MATIUS 2 Bible Online

MATIUS 2 - Da'a Kaili bible

MATIUS 2

¹Yesus niote ri ngata Betlehem ri Bagia Yudea tempo Magau Herodes noparenta. Naopu etu naratamo tau-tau topande nanggita betu'e nggari sabingga kamataeona mpaka ri ngata Yerusalem,

²pade nekutanamo ira, “Ri umbamo ngana to niote etu to majadi Magau nto Yahudi? Kami nanggita betu'e to nompakanoto pesuwuna nebulu ri pebuluna pade naratamo kami mombasomba I'a.”

³Sangga nangepe tesa etu natekajamo Magau Herodes, pade wa'a wo'u pura-pura pue ngata Yerusalem.

⁴Jadi Magau Herodes nompasiromu pura-pura balengga topanggeni agama bo guru-guru agama pade nipekutanana ka ira, “Ri umba ngata pesuwu Magau to Mompakasalama to nijanji Alatala?”

⁵Nesonomo ira, “Ri ngata Betlehem ri Bagia Yudea, sabana naria tesa nitulisi nabi nggaolu iwe'i:

⁶‘Iko ngata Betlehem ri Bagia Yudea, iko da'a ntoto ngata to neliu nggakedi nggari ngata-ngata ri bagia Yudea. Sabana nggari ja'imu kana meumba samba'a topanggeniaka to manggeniaka todeaku Israel.’ ” [3]

⁷Naopu etu Herodes nompokio nggalino tau-tau nggari kamataeona etu pade nipekutanana mpakabelo-belo tempo pebulu nu betu'e to nikita ira etu.

⁸Naopu etu nipakauna ira mpaka ri ngata Betlehem. Niulina ka ira, “Kalaumo komi mangelo ngana etu mpakabelo-belo. Pade ane rarata komi I'a, uli ka aku, ala aku wo'u mamala malau mombasomba I'a.”

⁹Sangga nangepe tesa magau etu nanggaliwomo ira. Pade kitamo! Betu'e to nikita ira ri kamataeona nokolu ka ira sampe nenonto ri ntoto sapo to nipeto'o Ngana nggedi etu.

¹⁰Tempo ira nanggita betu'e etu nadamba mpu'umo rara ira.

¹¹Sangga nesuapa ira rara njapo etu nikita iramo Ngana nggedi etu ante indona i Maria. Pade notimbakotumo ira nombasomba I'a. Naopu etu nibuka iramo peti pomboli mbara-mbara ira, pade nipesomba ira ka I'a pewai-pewai ira, etumo bulawa, bo rongele wongi to nasuli mpu'u olina to niuli kemenyan bo mur.

¹²Naopu etu Alatala nompopanjani ka ira riara mpangipi ala ne'e manjili mpaka ri ja'i Magau Herodes. Jadi nanjilimo ira nantuki jala ntanina.

¹³Sangga nanggaliwopa tau-tau topande nanggita betu'e etu naratamo samba'a malaeka i Pue nompopokita korona ka Yusuf riara mpangipina pade nanguli, “Pembangumo, kenimo masalisa Ngana etu ante indona mpaka ri tana Masir. Peto'omo ri setu sampe aku marata motesa wo'u ka iko. Sabana Magau Herodes nopatuju mangelo mompatesi Ngana etu.”

¹⁴Jadi nembangumo Yusuf pade wengi etu wo'u nikenina Ngana etu ante indona nalau mpaka ri tana Masir.

¹⁵Pade neto'omo ira ri setu sampe Magau Herodes namate. Ante iwetu nadupamo tesa i Pue to niboto nabi nggaolu iwe'i: “Aku nompokio Anaku ala I'a momai nggari tana Masir.” [4]

¹⁶Tempo nanotomo ka Magau Herodes i'a niakala tau-tau topande nanggita betu'e etu, narau mpu'umo rarana. Pade nipakauna tantarana malau mompatesi pura-pura ngana langgai noumuru rompae mpana'u ri ngata Betlehem bo bagia ri ntalilina. Umuru ngana to nipatesi etu nantuki kasaena pebulu betu'e to ninjanina nggari ja'i tau-tau topande nanggita betu'e etu.

¹⁷Ante kajadia etu nadupamo tesa i Pue to niboto nabi Yeremia nggaolu iwe'i:

¹⁸“Ri ngata Rama natiepe suara notumangi bo nageo mpajea. Etumo i Rahel nantangi ana-anana. I'a da'a madota rapakawoe rarana sabana anana mana ria.” [5] [6]

¹⁹Sangga namatepa Magau Herodes, naratamo samba'a malaeka i Pue ri tana Masir nompopokita korona ka Yusuf riara mpangipina.

²⁰Niulina, “Pembangumo, kenimo Ngana etu ante indona bo panjilimo komi mpaka ri tana Israel, sabana namatemo tau-tau to madota mompatesi I'a.”

²¹Jadi nembangumo Yusuf pade nikeninamo Ngana etu ante indona nanjili mpaka ri tana Israel.

²²Tapi tempo i'a nangepe lele Arkhelaus, ana Magau Herodes nanjambei umana noparenta ri Bagia Yudea, naekamo rarana mapola ri setu. Naopu i'a nangepe popatora nggari ja'i Alatala riara mpangipina, nalaumo ira mpaka ri Bagia Galilea.

²³Pade neto'omo ira ri ngata to nosanga ka ngata Nazaret. Ante iwetu nadupamo tesa to niboto nabi-nabi nggaolu ewa Magau to Mompakasalama iwe'i: “I'a kana rauli tau to Nazaret.”