Read Da'a Kaili MATIUS 20 Bible Online

MATIUS 20 - Da'a Kaili bible

MATIUS 20

¹Yesus nanguli, “Tempo Alatala moparenta I'a masimbayu ewa porapa e'i: Naria samba'a tau to naria tinalu nipotuja anggur. Nasadondo mpu'u i'a nesuwu nggari sapona nalau mangelo tau ragajina mokarajaa ri tinaluna.

²I'a nomposirata bara sakuya mba'a topokarajaa pade niulina ka ira, ‘Kalaumo komi mokarajaa ri tinaluku ria, pade kuwai ka komi simbau sampeka doi salaka majadi gajimu saeo.’ Nasitujumo ira, pade i'a nompakau ira malau mokarajaa ri tinaluna.

³Tinti sasio mpadondona nalau wo'umo pue ntinalu etu mopaelo topokarajaa ntanina. Nikitana bara sakuya mba'a tau ri potomu aga nekatoko-toko wa'amo.

⁴Niulina ka ira, ‘Kalaumo komi mokarajaa ri tinaluku ria, damo kuwai ka komi gaji to masipatona.’ Jadi nalau mpu'umo ira nokarajaa.

⁵Tinti sampulu rongu nalau wo'umo pue ntinalu etu mopaelo topokarajaa ntanina. Niulina ka ira, ‘Kalau komi mokarajaa ri tinaluku, damo kuwai ka komi gaji to masipatona.’ Pade wa'a wo'u nipowiana tinti toluongu ngguwiana.

⁶Kira-kira tinti alima ngguwiana nalau wo'umo pue ntinalu etu mopaelo topokarajaa ntanina. Niposiratana bara sakuya mba'a tau aga nekatoko-toko da'a ria pokarajaana. Nekutanamo i'a ka ira, ‘Nokuya komi aga nekatoko njaneo, da'a nokarajaa?’

⁷Nesonomo ira, ‘Da'a naria tau nombagaji kami.’ Pade nanguli pue ntinalu etu, ‘Ane iwetu, kalaumo komi mokarajaa ri tinaluku.’ Nangepe etu nalaumo ira.

⁸Sangga nasolopa eo nangulimo pue ntinalu etu ka mandorona, ‘Pokio puramo topokarajaa pade bayari puramo gaji ira mompamula nggari ira to lako nompamula nokarajaa tinti alima ngguwiana sampe marata ri ja'i ira to nokarajaa nggari mpadondona.’

⁹Naratamo topokarajaa to nompamula nokarajaa tinti alima ngguwiana, pade ira niwai simbau sampeka doi salaka.

¹⁰Iwetu wo'u sampe narata ri ja'i topokarajaa to nokarajaa nggari mpadondona. Ira nompekiri riara nta'i iwe'i: ‘Natantumo kami kana rawai meliu nggadea sabana kami nokarajaa njaneo.’ Tapi gaji to niwai ka ira nasimbayu ante tau ntanina etu, aga simbau sampeka doi salaka.

¹¹Naopu ira nantarima gaji nompamulamo ira nongua-ngua ka pue ntinalu etu ante nanguli,

¹²‘Tau-tau topokarajaa to narata ngguwiana nokarajaa aga sajaa lau. Kami e'i nokarajaa ntomo njaneo ri kapanena, tapi komi nombawai gaji ka ira nasimbayu ante kami!’

¹³Nangulimo pue ntinalu ka samba'a nggari tatongo ira, ‘Sampesuwu, aku da'a nasala ri ja'i komi. Nikasitujutamo gajimu kana sampeka doi salaka saeo.

¹⁴Jadi alamo gaji komi pade panjilimo. Aku madota mombawai gaji ka tau to narata ri purina nasimbayu ewa to niwaiku ka komi.

¹⁵Natantu aku namala mowia nantuki dotaku ante doiku mboto! Bara nasiriati rara komi nanggita aku mowia nabelo ri ja'i tau ntanina?’ ”

¹⁶Pade Yesus nompakaopu porapa etu ante nanguli, “Iwetu wo'umo banepiana tau-tau to ri purina we'i-we'i kana majadi ri koluna. Pade tau-tau to ri koluna we'i-we'i kana majadi tau-tau to ri purina.”

¹⁷Tempo etu Yesus riara mpolumakona mpaka ri ngata Yerusalem. Riara mpolumakona I'a nanggeni sampulu romba'a anaguruna mompatani nggari ja'i ntau dea pade niulina ka ira,

¹⁸“Epemo mpakabelo-belo! We'i-we'i kita e'i mantende mpaka ri ngata Yerusalem. Ri setu Aku, Ana nu Manusia kana rawai ka balengga-balengga topanggeni agama bo guru-guru agama. Pade ira mompakatantu riara potangara Aku kana rapatesi.

¹⁹Maopu etu Aku kana rawai ka tau-tau da'a to Yahudi pade rapongei-ngei ira bo raporo mpakandasa. Pade kaopuna Aku kana rapaku ira ri kayu parika sampe mamate. Tapi ri eo katolueona Aku kana matuwu bali.”

²⁰Naliu etu naratamo rongo i Zebedeus ntalianana ri ja'i Yesus. Nekadedemo i'a ri ngayo Yesus sabana naria sangele pomperapina.

²¹Nekutanamo Yesus ka i'a, “Indo, nuapa nipodotamu?” Nesonomo indo etu, “Tempo Komi majadi Magau palogamo ana-anaku e'i mekatoko moparenta mpasanggani-nggani ante Komi, samba'a ri pangganamu, pade samba'a ri panggeimu.”

²²Tapi nesonomo Yesus ka ira, “Da'a ninjani komi nuapa niperapi komi. Iwenumo? Rapakule komi manggolo pepandasa nasimbayu ewa pepandasa to rapawela ka Aku?” Nesonomo ira, “Rapakule!”

²³Pade nanguli Yesus ka ira, “Nakono komi kana manggolo pepandasa nasimbayu ewa to rapawela ka Aku. Tapi da'a Aku to nakuasa mompakatantu isema masipato mekatoko ri pangganaku bara ri panggeiku. Peto'o etu bagia ira to nipakatantu Umaku.”

²⁴Tempo sampulu mba'a anaguru Yesus ntanina nangepe pomperapi etu, narau mpu'umo rara ira ri ja'i romba'a to nosampesuwu etu.

²⁵Etu sampe Yesus nompokio ira pura-pura pade niulina ka ira, “Ninjani komi mbotomo topoparenta-topoparenta tau-tau da'a to Yahudi nomparenta todea ira ante nasombo, pade topanggeniaka-topanggeniaka ira nompandasa todea ira.

²⁶Tapi da'a masipato komi moinggu iwetu! Kakonona kana iwe'i: isema-sema nggari tatongo komi to madota malanga panggana i'a etu kana majadi topantulungi roana.

²⁷Pade isema-sema madota majadi to nalanga katuwuna kana majadi batua komi

²⁸nasimbayu ewa Aku, Ana nu Manusia. Aku da'a narata ri dunia e'i ala ratulungi ntau tapi ala mantulungi tau, pade ala mombawai koroku rapatesi mantolo silaka-silaka ntau dea.”

²⁹Tempo Yesus ante anaguru-anaguruna nompalasi ngata Yerikho, nadea mpu'u tau nantuki I'a.

³⁰Ri setumo naria romba'a tau naburo nekatoko ri wiwi jala. Tempo ira nangepe lele Yesusmo to noliu ri jala etu, nongare-ngaremo ira, “Pue, Muli i Daud! Potowemo kami!”

³¹Tapi tau dea to nantuki Yesus nangontiaka ira romba'a ante nanguli, “Ne'e makanano! Pekalinomo!” Tapi tau-tau naburo etu nantambai nongare ante suara to namangga, “Pue, Muli i Daud! Potowemo kami!”

³²Nangepe ira nongare-ngare nenontomo Yesus, pade nipokiona ira. Pade nekutanamo I'a ka ira, “Nuapa to rapodota komi kupowia ka komi?”

³³Nesono ira romba'a, “Pue, to nipodota kami ala mata kami mamala mekita.”

³⁴Naasi mpu'u mata Yesus nanggita ira romba'a. Jadi niojona palena nanggabe mata ira. Pade kaliu-liu nabelomo mata ira. Pade nalaumo ira romba'a nantuki Yesus.