Read Da'a Kaili MATIUS 22 Bible Online

MATIUS 22 - Da'a Kaili bible

MATIUS 22

¹Yesus nombatesa porapa ntanina ka topanggeniaka nto Yahudi. Niulina,

²“Tempo Alatala moparenta namala rarapaka ewa samba'a magau to nompowia posusa mponika anana langgai.

³I'a nompakau batua-batuana malau mompokio pura-pura tau to nigagana mantuki posusa etu. Tapi ira pura-pura to nigaga etu da'a nadota nalau.

⁴Jadi magau etu nompakau batua-batua ntanina ante tewai iwe'i: ‘Kau uli ka ira to nigagaku, nasadia puramo. Japi bo ana-ana japi to naboyana naopumo nisambale, pade nasadia puramo. Kamaimo mantuki posusaku e'i!’

⁵Tapi ira pura-pura to nipokio iwetu da'a ntoto nompariara pegaga etu. Ira aga mbau nalau nompowia bagona mboto. Naria to nalau mpaka ri tinalu pade naria ntanina nalau nombaurusi podagana,

⁶naria sanupa nanjoko batua-batua to nipakau magau etu pade nombaboba bo nompatesi ira.

⁷Sangga nangepe nuapa to najadi etu, narau mpu'umo rara magau etu. I'a nompakau tantara-tantarana malau mompatesi topepatesi-topepatesi etu pade mompalabu ngata ira.

⁸Naopu etu nipokiona wo'umo batua-batuana pade niulina ka ira, ‘Nasadiamo posusa mponika anaku, tapi ira to nigagaku da'a masipato momai ri posusa e'i.

⁹Jadi kalaumo komi mpaka ri jala-jala jama pade isema-sema raposirata komi, pokiomo ira momai ri posusata e'i.’

¹⁰Jadi nalaumo batua-batuana mpaka ri jala-jala jama nompasiromu pura-pura tau to niposirata ira, nabeloka tau-tau to nabelo rarana, nabeloka tau-tau naja'a sampe kaopuna naponu puramo sapo posusa etu ante torata.

¹¹Pade nesuamo magau manggita torata-torata. Ri tatongo torata ri setu nikitana samba'a tau da'a nopakea pakea mposusa.

¹²Nekutanamo magau ka tau etu, ‘Wega, nokuya komi nesua ri se'i da'a nopakea mposusa?’ Tapi tau etu da'a ria notingo.

¹³Pade nangulimo magau ka batuana, ‘So'omo palena bo kadana pade tajiakamo i'a ri sawalikuna ri peto'o narumau. Ri setu i'a kana mageo bo mosinggiki baga ante kasusana.’ ”

¹⁴Pade Yesus nompakaopu porapana iwe'i: “Nadea tau nipokio tapi nakura to nipelisi.”

¹⁵Naopu etu nalaumo tau-tau to Parisi mowia sintuwu iwenu ira mamala mangelo kasala tesa Yesus.

¹⁶Ira nompakau bara sakuya mba'a topantuki ira nosanggani ante bara sakuya mba'a tau to nosabingga ante Magau Herodes malau mpaka ri ja'i Yesus. Naratapa ri setu nangulimo ira to nipakau etu ka Yesus, “Guru, ninjani kami Komi samba'a tau to nanoa rara. Komi nompatuduki ante nanoto pokainggu to masipato riara mpanggita Alatala. Komi da'a naeka ri ja'i isema-sema sabana Komi da'a nompoposisala manusia.

¹⁷Jadi tulungi tesa ka kami pombarata Komi. Nantuki Atura-atura agama masipato mombabayari balasitee ka Magau Kaisar bara da'a?”

¹⁸Tapi Yesus nangginjani patuju ira to naja'ana. Etu sampe I'a nanguli, “Umba komi, topebagiu! Nokuya komi nompasimbuku mangelo kasala tesaku?

¹⁹Popokita ka Aku sampeka doi salaka to nipake komi mombabayari balasitee.” Jadi ira nompopokita ka I'a sampeka doi salaka.

²⁰Pade nekutanamo Yesus, “Gambara bo sanga isema to naria ri doi e'i?”

²¹Nesonomo ira, “Gambara bo sanga Magau Kaisar.” Jadi nangulimo Yesus ka ira, “Ane iwetu, waimo ka Magau Kaisar to masipato rawai ka Magau Kaisar, pade waimo ka Alatala to masipato rawai ka Alatala!”

²²Sangga nangepe pesono Yesus etu, nogumaamo ira. Jadi kaopuna nalaimo ira nompalasi I'a.

²³Ri eo etu wo'u naria bara sakuya mba'a tau to Saduki narata ri ja'i Yesus. Ane to Saduki, iramo tau-tau to Yahudi to nomparasaya tau namate da'a mana matuwu bali banepia.

²⁴Jadi ira nompekutana Yesus, “Guru, nabi i Musa nompatuduki iwe'i: ‘Ane maria samba'a langgai namate da'a noana, sampesuwuna langgai kana momporongo besi baluna etu ala ana ira romba'a etu majadi muli sampesuwuna to namatena etu.’ [50]

²⁵Naria ri tatongo kami ira nosampesuwu pitumba'a langgai bayangi. Ulumbuana norongomo tapi da'apa ira njamboko noana namatemo i'a. Naopu etu baluna etu niporongo tua'ina.

²⁶Tapi da'apa ira noana tua'ina etu wo'u namate. Pade iwetumo najadi ante katolumba'ana sampe ri sampesuwuna kapitumba'ana.

²⁷Kaopuna besi etu wo'u namate.

²⁸Jadi tempo tau namate matuwu bali banepia, besi etu rongo isema nggari ira pitumba'a, sabana i'a niporongo ira pura-pura?”

²⁹Nesonomo Yesus, “Nasala pompekiri komi sabana da'a ninjani komi isi Buku Nagasa, pade da'a wo'u ninjani komi kuasa nu Alatala.

³⁰Tempo tau namate matuwu bali banepia, katuwu ira kana masimbayu ewa malaeka-malaeka ri suruga, ira mana morongo bara raporongo.

³¹Iwenumo? Da'apa nibasa komi nuapa to nitesa Alatala ka komi riara Buku Nagasa ewa tau namate matuwu bali? I'a nanguli iwe'i:

³²‘Akumo Alatala Abraham, Alatala Ishak bo Alatala Yakub.’ [51] Ninjanita Pue Alatala da'a Alatala ntau to namatena, tapi I'a Alatala ntau to natuwuna. Jadi nanotomo Abraham, Ishak bo Yakub mana namate.”

³³Sangga nangepepa pepatuduki Yesus etu, nogumaa puramo tau dea.

³⁴Tempo tau-tau to Parisi nangepe lele tau-tau to Saduki nekalino mbotomo sabana nidagi Yesus, nasiromumo ira ri ja'ina.

³⁵Pade samba'a nggari tatongo ira, etumo samba'a guru agama, nompasimbuku nangelo kasala tesa Yesus ante nekutana iwe'i:

³⁶“Guru, nggari pura-pura parenta ri Atura-atura agamata umbana to neliu nggapokona?”

³⁷Nesonomo Yesus, “ ‘Potowemo Pue Alatalamu ante mpu'u-mpu'u raramu, ante pura-pura katuwumu, pade ante pura-pura pekirimu.’ [52]

³⁸Etumo parenta pamulana to neliu nggapokona.

³⁹Pade parenta karongelena to nasimbayu ante parenta pamulana iwe'i: ‘Potowemo sanggamanusiamu nasimbayu ewa komi nompotowe koromu mboto.’ [53]

⁴⁰Rongele parenta etu pu'u nu pura-pura Atura Agama bo pepatuduki nu nabi-nabi nggaolu.”

⁴¹Tempo tau-tau to Parisi danasiromu ri setu, nekutanamo Yesus ka ira,

⁴²“Iwenu pombarata komi ewa Magau to Mompakasalama to nijanji Alatala? Muli isema I'a?” Nesonomo ira, “Muli Magau Daud.”

⁴³Nangulimo Yesus, “Ane iwetu, nuapa sabana i Daud nompokio I'a Puena? Sabana ante pekeniaka Nosa Nagasa nu Alatala i Daud nanguli iwe'i:

⁴⁴‘Pue Alatala nanguli ka Pueku, kamai pekatokomo ri sabingga ngganaku sampe Aku mompowia pura-pura balimu mekou ri ja'imu.’ [54]

⁴⁵Jadi ane Magau to Mompakasalama niuli i Daud Puena, iwenu sampe I'a nireke aga muli i Daud?”

⁴⁶Da'a ria samba'a tau namala mombasono Yesus. Pade nompamula nggari eo etu da'a mana naria tau nabia mompekutana I'a.