Read Da'a Kaili MATIUS 24 Bible Online

MATIUS 24 - Da'a Kaili bible

MATIUS 24

¹Naopu etu nalaumo Yesus nompalasi Sapo Mpepue. Tempo etu naratamo anaguruna nompopokita ka I'a kagaya nu pura-pura Sapo Mpepue.

²Tapi nangulimo Yesus ka ira, “Nikita komi sapo-sapo e'i? Aku mpu'u-mpu'u notesa ka komi, kana marata tempona banepia pura-pura to nikita komi e'i kana ragero sanggani sampe da'a mana maria watu e'i rapakamba mosisunju, nau kamba saongu. Pura-pura kana ragero.”

³Naopu etu nalaumo Yesus mpaka ri Bulu Zaitun. Tempo I'a nekatoko ri setu naratamo anaguru-anaguruna ri ja'ina ala mompekutana I'a nggalino. Niuli ira, “Tulungi ulimo ka kami, nepia pura-pura to nitesa Komi pane'a majadi, pade nuapa tandaina karatamu bo kaopu nu dunia e'i?”

⁴Nesonomo Yesus ka ira, “Pakabelo-belo ala ne'e komi rabagiu!

⁵Sabana madea tau kana marata mompobalu sangaku. Ira manguli, ‘Akumo Magau to Mompakasalama!’ Pade madea tau rabagiu ira.

⁶Komi kana mangepe wamba ntau mosipatesi pade raepe komi wo'u lele ntau mosipatesi. Tapi ne'e komi maeka, sabana etu pura-pura kana majadi ntani ruru. Tapi etu da'apa tandaina kaopu nu dunia.

⁷Tempo etu tau-tau nggari sangata kana mosibali ka tau-tau to sangatana, pade magau simbau magau wo'u kana mosiewa. Pade ri umba-umba ri dunia kana maria kamateoro bo lingu.

⁸Tapi kajadia etu pura-pura aga kasusa pamulana, ewa ju'a besi ntora moana.

⁹Tempo etu komi kana rasoko pade rawai ka tau to mompandasa komi pade mompatesi komi. Komi kana raporau rara ntau nggari umba-umba ri dunia sabana komi nomparasaya Aku.

¹⁰Pade tempo etu madea tau kana mokanggaura momparasaya Aku. Maria to mombawai roa ira topomparasaya ka bali ira. Pade madea tau mosiporau rara samba'a bo samba'a.

¹¹Pade madea nabi topodawa kana meumba pade mombabagiu tau dea.

¹²Ri tempo etu kaja'ana kana mantambai kadeana sampe madea tau mana mosimpotowe.

¹³Tapi isema-sema to maroo momparasaya sampe ri kaopuna kana rapakasalama.

¹⁴Pade Kareba Belo ewa Poparenta nu Alatala kana rapatolele ri njumaongu dunia ala pura-pura manusia mamala mangepe. Maopu etu pade marata kaopu nu dunia.”

¹⁵“Pade komi kana manggita to niuli ‘Kaja'ana to Mompakatantoru’ mekanggore ri Sapo Mpepue, ewa to niboto nabi i Daniel nggaolu. [56] (Isema-sema mombabasa tesa e'i pekiri mbotomo batuana.)

¹⁶Tempo komi manggita etu, tau-tau to naria ri Bagia Yudea kana mangowa malai mpaka ri buluna.

¹⁷Ane tau-tau to nompamaya ka poiri ri bunggu nu sapona, ne'e mana ira mesua rara njapo mangala bara nuapa-nuapa.

¹⁸Ane tau-tau ri tinaluna, ne'e mana ira manjili ri ngata mangala pakeana. Palaimo masasinta!

¹⁹Ri eo etu mandasa mpu'umo besi-besi to matiana bo ira to danompatomi.

²⁰Pekakaimo ka Alatala ala tempo komi mangowa malai etu da'a mawela tempo leni bara Eo Mpenonto.

²¹Sabana ri eo etu maja'a mpu'u kasusa bo kapari to mawela manusia. Nggari lamba pamulana sampe we'i-we'i da'apa sanggani najadi kasusa bo kapari to naja'a ewa etu, pade da'a mana maria ri tempo marata.

²²Ane tempo kasusa etu da'a masasinta rapakaopu i Pue, natantumo da'a kamba samba'a mamala matuwu. Tapi nggari towe Alatala ka todea topomparasaya, tempona etu kana masasinta rapakaopuna.

²³Ri tempo etu ane maria tau manguli ka komi, ‘Kitamo! Ri se'imo Magau to Mompakasalama,’ bara manguli, ‘Ri setumo I'a,’ ne'e raparasaya komi tesana.

²⁴Sabana kana meumba tau topodawa to mompangaku iramo Magau to Mompakasalama, pade meumba wo'u nabi-nabi topodawa to mompowia tandai-tandai to nipogumaa bo kabaraka-kabaraka ala mombabagiu tau. Ane mamala nau tau-tau to nipelisi Alatala rabagiu ira wo'u!

²⁵Toramo! Da'apa etu pura-pura najadi nibotoku mamimo ka komi!

²⁶Jadi ane maria tau manguli ka komi, ‘Kitamo! Magau to Mompakasalama naria ri karawa baina,’ ne'e komi malau! Ane ira manguli, ‘Kitamo! Ri setumo I'a rara njapo,’ ne'e raparasaya komi tesa ira!

²⁷Sabana tempo Aku, Ana nu Manusia marata bali ri dunia e'i, karataku kana matekita ri umba-umba ri dunia, nasimbayu ewa kila neumba ri kamataeona pade norea sampe ri kasolona.

²⁸Ane rakita komi tonji kolaa masiromu manggoni, natantumo nanoto ri setu naria binata namate. Iwetu wo'u ante karataku. Natantumo etu manoto ka pura-pura tau.”

²⁹“Ane maopumo tempo kasusa bo kapari etu, kaliu-liu mata eo kana majadi marumau pade wula mana mewanta. Betu'e-betu'e kana manawu nggari langi pade kuasa-kuasa to naria ri langi kana ragagoya pura.

³⁰Ri tempo etu kana meumba tandaina ri langi to mompakanoto karataku, Ana nu Manusia. Pade pura-pura manusia ri dunia kana mageo mpajea. Ira kana manggita Aku, Ana nu Manusia mana'u riara kulimu ante kuasa bo karemeku to nipogumaa.

³¹Kololio to nabetena kana rapopomoni pade malaeka-malaekaku kana kupakau malau mompasiromu pura-pura tau to nipelisiku nggari umba-umba ri dunia.”

³²“Pariaramo pepatuduki nggari kayu ara. Ane komi manggita rangga-ranggana nompamula nangura bo tawana nompamula noroya, natantu ninjani komi namosumo tempo eo mapane.

³³Iwetu wo'u ane komi manggita kajadia-kajadia to nitesaku pani'a, kana ranjani komi namosumo tempo karataku. Damo mompopea tempona.

³⁴Aku mpu'u-mpu'u notesa ka komi, kajadia-kajadia etu kana majadi da'apa pura-pura tau to natuwu we'i-we'i mamate.

³⁵Langi bo dunia kana malipo tapi tesaku kana maroo sampe ri kasae-saena.”

³⁶“Tapi eo bo tempo karataku etu da'a ria samba'a nangginjani, nabeloka malaeka-malaeka ri suruga, nabeloka Ana nu Alatala mboto. Aga Umaku mboto to nangginjanina.

³⁷Tempo Aku, Ana nu Manusia marata banepia pokainggu manusia kana masimbayu ante pokainggu manusia tempo nabi Nuh nggaolu.

³⁸Tempo etu da'apa njumaongu dunia nipakalodo ue bete manusia nakanjalia. Ira aga nanggoni bo nanginu pade norongo bo nosiporongo ewa biasa sampe nabi Nuh nesua riara sakaya betena.

³⁹Da'a ninjani ntau dea nuapa rapawela ka ira sampe pura-pura ue ri dunia nanggabuntu sanggani bo ira nalome puramo. Iwetu wo'u tempo Aku, Ana nu Manusia marata. Manusia bate-batena makanjalia iwetu.

⁴⁰Ri tempo etu kana maria romba'a langgai manggawia mpasanggani ri tinalu. Samba'a kana kuala, pade samba'a kana kuboli setu.

⁴¹Pade ane maria besi romba'a mogili mpasanggani-nggani, samba'a kana kuala pade samba'a wo'u kana kuboli ri setu.

⁴²Etu sampe kuuli, komi kana mainga, sabana da'a ninjani komi nepia karata Pue komi.”

⁴³“Toramo tesa e'i! Ane rapana samba'a pue njapo nangginjani tinti sakuya nggawengina topangangga marata, natantumo i'a kana mainga-inga. I'a da'a mompalamba topangangga mesua rara njapona.

⁴⁴Iwetu wo'u komi kana mainga mompopea karataku, sabana Aku, Ana nu Manusia kana marata ante da'a ranjani-njani komi.”

⁴⁵“Rapana maria samba'a batua to nanoto to natutu nantuki dota madikana. Natantu i'amo to raonggotaka madikana majadi topombaurusi pura-pura batua rara njapo. I'amo to mombaurusi panggoni ka batua-batua ntanina ri tempona.

⁴⁶Mabelo mpu'umo batua etu ane madikana manjili pade manggita i'a mompowia panggawia to niparasaya ka i'a.

⁴⁷Aku mpu'u-mpu'u notesa ka komi, batua etu kana raonggotaka madikana majadi topombaurusi pura-pura mbara-mbarana.

⁴⁸Tapi mandasa mpu'u ane rapana batua etu maja'a pokaingguna pade i'a mompekiri riara nta'ina iwe'i: ‘Damasaepa madikaku manjili.’

⁴⁹Pade i'a mompamula mombaboba batua-batua ntanina pade i'a aga manggoni manginu mpasanggani-nggani ante tau nakalangu.

⁵⁰Tapi tempo batua etu makanjalia iwetu, madikana kana manjili ri eo bo tempo to da'a ninjanina.

⁵¹Pade batua etu kana rapatesi. I'a kana ratajiaka riara naraka mpasanggani-nggani ante tau-tau aga nabelo ri lenje. Ri setu ira mageo-geo bo mosinggiki baga ante masusa mpu'u rara.”