Read Da'a Kaili MATIUS 26 Bible Online

MATIUS 26 - Da'a Kaili bible

MATIUS 26

¹Sangga naopupa Yesus nompatuduki etu pura-pura nangulimo I'a ka anaguru-anaguruna,

²“Ninjani komimo damo nepua Eo Bete Paska. Pade Aku, Ana nu Manusia kana rawai ka baliku ala rapaku ri kayu parika.”

³Tempo etu nasiromumo balengga-balengga topanggeni agama bo totu'a-totu'a nto Yahudi ri sapo nu Balengga Topanggeni Agama to nosanga ka i Kayafas.

⁴Ira nasintuwu manjoko Yesus nggalino pade mompatesi I'a.

⁵Tapi nanguli ira samba'a ka roana, “Ne'e kita mowia etu tempo Eo Bete ala ne'e majadi kakanano ri tatongo ntau dea.”

⁶Tempo Yesus ante anaguru-anaguruna naria ri ngata Betania ira nesai ri sapo ntau nosanga ka i Simon to naju'a bete bopia.

⁷Tempo ira ri setu naratamo samba'a besi nanggeni saongu botolo nipowia nggari watu to niisi minya wongi to nasuli mpu'u olina. Tempo Yesus nekatoko nanggoni naratamo besi etu nombatoli minya wongi etu ri balengga Yesus ewa tandai pebilana ka I'a.

⁸Tapi sangga nanggita powia besi etu naraumo rara anaguru-anaguru Yesus. Ira nanguli, “Nokuya minya wongi etu aga nipakarugi sinja'i?

⁹Kakonona minya wongi etu mamala rapobalu ante olina to nadea pade doi olina rawai ka tau-tau nakasiasi!”

¹⁰Yesus nangginjani pompekiri ira, jadi niulina ka ira, “Nokuya komi nompakasusa besi e'i? Nuapa to nipowiana ka Aku nabelo.

¹¹Tau-tau nakasiasi bate-batena maria ri tatongo komi, tapi Aku da'a batena mosanggani ante komi.

¹²Ante nombatoli minya e'i ri ja'iku i'a nompakasadia koroku ratana banepia.

¹³Aku mpu'u-mpu'u notesa ka komi, ri umba-umba ri dunia Kareba Belo rapatolele, powia nu besi e'i kana ratesa wo'u ala mombatora i'a.”

¹⁴Naopu etu samba'a nggari sampulu romba'a anaguru Yesus to nosanga ka Yudas Iskariot nalau mpaka ri ja'i balengga-balengga topanggeni agama

¹⁵pade niulina, “Ane aku mombawai Yesus riara mpale komi, nuapa rawai komi ka aku?” Nangepe etu ira nombawai ka i'a tolumpulu mpeka doi salaka.

¹⁶Pade nompamula nggari tempo etu Yudas nangelo loga to nabelona mombawai Yesus riara mpale balina.

¹⁷Ri eo pamulana Posusa Roti Da'a Nidika Ragi naratamo anaguru-anaguru Yesus nompekutana I'a, “Guru, ri umba peto'o mupokono rakalau kami ala mompakasadia panggoni Posusa Paska ka Komi?”

¹⁸Nesonomo I'a, “Kalaumo komi mpaka ri ngata Yerusalem ri ja'i yanu, pade ulimo ka i'a iwe'i: ‘Guru nanguli, mana masaeka Aku ri se'i. Aku madota mantuki Eo Bete Paska ri sapomu mpasanggani-nggani ante anaguru-anaguruku.’ ”

¹⁹Pade nalaumo anaguru-anaguruna nompowia ewa to nipakau Yesus ka ira, pade nipakasadia iramo panggoni Posusa Paska.

²⁰Tempo nawengimo nekatokomo Yesus nanggoni mpasanggani-nggani ante sampulu romba'a anaguruna.

²¹Tempo ira nanggoni nangulimo Yesus, “Aku mpu'u-mpu'u notesa ka komi, samba'a nggari tatongo komi kana mompobalu Aku ka baliku.”

²²Nangepe etu nasusa mpu'umo rara ira, pade nekutanamo ira samba'a bo samba'a ka I'a, “Pue, da'a aku e'i to nipatujumu?”

²³Nesonomo Yesus, “Tau to mombatome roti riara tubu mpasanggani-nggani ante Aku, i'amo to mompobalu Aku.

²⁴Aku, Ana nu Manusia kana mamate ewa to nitulisi riara Buku Nagasa. Tapi mandasa mpu'umo tau to mompobalu Aku etu! Nabelopa ane tau etu da'a niote ri dunia.”

²⁵Naopu etu nekutanamo Yudas to mompobalu Yesus ngina, “Guru, da'a aku e'i to nipatujumu?” Nesonomo Yesus, “Iwetu pangulimu.”

²⁶Tempo ira nanggoni Yesus nangala roti pade nanguli tarima kasi ka Alatala. Naopu etu nibingga-binggana roti etu pade niwaina ka anaguru-anaguruna ante nanguli, “Alamo roti e'i, pade konimo. E'imo koro bataku.”

²⁷Naopu etu nialana wo'u saongu sanggiri panginu, niulina tarima kasi ka Pue Alatala, pade niwaina ka ira ante nanguli, “Inu komi puramo panginu e'i,

²⁸sabana e'imo leiku to rapatiti ka tau dea ngina ala mompakaasa Pojanji Alatala ante manusia. Leiku e'i rapatiti ka tau dea ala silaka-silaka ira mamala raampungi.

²⁹Parasayamo tesaku e'i. Nompamula we'i-we'i Aku mana manginu anggur sampe marata tempona banepia Aku manginu anggur to nabouna mpasanggani-nggani ante komi riara Poparenta Umaku.”

³⁰Naopupa ira nodade nombatoiya Alatala nalaumo ira mpaka ri Bulu Zaitun.

³¹Pade nangulimo Yesus ka anaguru-anaguruna, “Wengi e'i komi pura-pura kana mokanggaura momparasaya tempo manggita nuapa to majadi ri ja'iku, sabana naria Tesa Alatala to nitulisi riara Buku Nagasa iwe'i: ‘Aku kana mompatesi topoewu sampe bimba-bimbana mosimpotatare.’ [57]

³²Tapi tempo Aku matuwu bali Aku mokolu ka komi mpaka ri Bagia Galilea.”

³³Nangepe etu nangulimo i Petrus, “Naupa ira pura-pura mokanggaura momparasaya tempo manggita nuapa to majadi ri ja'imu, aku e'i da'a!”

³⁴Tapi nangulimo Yesus ka i'a, “Aku mpu'u-mpu'u notesa ka iko, wengina e'i wo'u da'apa manu mora'o, tolungganimo iko mombasapu Aku.”

³⁵Nesonomo i Petrus, “Nau aku mamate mpasanggani ante Komi aku da'a ntoto mombasapu Komi!” Pade iwetu wo'u to niuli pura-pura anaguruna ntanina.

³⁶Naopu etu naratamo Yesus ante anaguru-anaguruna ri saongu peto'o to nosanga ka Getsemani. Narata ri setu nangulimo I'a ka ira, “Pekatokomo ri se'i. Aku malau ri sa'a mosambaya.”

³⁷Nikenina i Petrus bo romba'a ana i Zebedeus mpasanggani-nggani. Pade nompamulamo I'a nasusa bo nandasa rarana.

³⁸Niulina ka ira, “Nasusa mpu'umo raraku, ewa mamate nirasaiku! Popeamo ri se'i, pade komi kana mainga-inga mpasanggani-nggani ante Aku!”

³⁹Naopu etu napolamo Yesus sakedi pade nekadede I'a sampe ri tana pade nosambaya. Niulina, “Uma, ane mamala kuperapi ala kasusa bo kapari e'i ne'e rapawela ka Aku e'i. Tapi ne'e dotaku majadi, aga dotamu mboto!”

⁴⁰Naopu etu nanjilimo I'a ri ja'i anaguruna tolumba'a etu. Niratana ira pura-pura napisi. Pade niulina ka i Petrus, “Kitamo! Da'a nipakule komi mosanggani ka Aku nau aga sajaa?

⁴¹Komi kana mainga bo mosambaya ala ne'e komi mawela pesoba! Riara nta'imu naria dota mompowia to nabelona, tapi koromu da'a nompakule.”

⁴²Naopu etu nalau wo'umo Yesus njamba'ana karongganina nosambaya. Niulina, “Uma, ane kasusa bo kapari e'i kana rapawela ka Aku pade da'a namala rapakakawao nggari ja'iku, pakambamo dotamu majadi.”

⁴³Naopu etu narata wo'umo I'a ri ja'i anaguruna. Niratana ira aga napisi wo'umo sabana naluru mpu'u mata ira.

⁴⁴Pade sangganipa wo'u I'a nompalasi ira pade nalau nosambaya katolungganina. Posambayana nasimbayu ante posambayana pane'a.

⁴⁵Naopu nosambaya narata wo'umo I'a ri ja'i anaguruna pade niulina ka ira, “Iwenumo? Danapisi bo nangosaraka komi? Kitamo! Naratamo tempona Aku, Ana nu Manusia rawai riara mpale tau-tau nasilaka.

⁴⁶Pembangumo! Kitamo! Naratamo tau to nompobalu Aku! Kamaimo kita mantomunaka i'a.”

⁴⁷Tempo Yesus danotesa naratamo Yudas, samba'a nggari sampulu romba'a anaguruna. Pade nosanggani ante i'a naria tau dea nanggeni guma bo pato to nipakau balengga-balengga topanggeni agama bo totu'a-totu'a nto Yahudi.

⁴⁸Da'apa ira nomai Yudas nompakatantu ka ira tandaina ala ranjani ira ri umbana Yesus. Niulina, “Isema ngina kueki, etumo I'a. Soko komimo I'a!”

⁴⁹Jadi sangga naratapa Yudas ri setu i'a kaliu-liu nompakamosu Yesus pade nanguli, “Tabe, Guru!” Pade niekina Yesus.

⁵⁰Nangulimo Yesus ka i'a, “Umba, wega, etumo patujumu nomai ri se'i?” [58] Pade kaliu-liu tau dea etu nompakamosu Yesus pade nanjoko I'a.

⁵¹Nanggita etu samba'a nggari anaguru to nosanggani ante Yesus nangosu gumana nantimbe batua nu Balengga Topanggeni Agama sampe napudu talingana.

⁵²Nangulimo Yesus ka anaguruna etu, “Boli mpanjilimo gumamu ri peto'ona! Sabana isema-sema mantimbe ante guma kana mamate ratimbe ante guma wo'u.

⁵³Iwenumo? Da'a ninjanimu ane Aku merapi tulungi nggari ja'i Umaku I'a nasalisa mompakau njobu-njobu malaekana mantulungi Aku? [59]

⁵⁴Tapi ane etu majadi da'a madupa tesa to nitulisi riara Buku Nagasa nggaolu to nanguli e'i pura-pura kana majadi ri ja'iku.”

⁵⁵Pade ri tempo etu nangulimo Yesus ka tau dea ri setu, “Iwenumo? Niuli komi Aku e'i samba'a parampo sampe komi kana marata ante guma bo pato manjoko Aku? Eo-eo Aku nekatoko nopaguru ri Sapo Mpepue. Nokuya komi da'a nanjoko Aku tempo etu?

⁵⁶Tapi pura-pura etu kana majadi ala madupa tesa to nitulisi nabi-nabi nggaolu ri Buku Nagasa.” Naopu etu nalaimo pura-pura anaguruna nompalasi I'a.

⁵⁷Pade ira to nanjoko Yesus nanggeni I'a mpaka ri sapo nu Balengga Topanggeni Agama to nosanga ka i Kayafas. Tempo etu guru-guru agama bo totu'a-totu'a nto Yahudi nasiromu nolibu ri setu.

⁵⁸Petrus nantuki ira nggawao sampe narata ri lalowo sapo Balengga Topanggeni Agama. Narata ri setu nesuamo i'a nekatoko mpasanggani-nggani ante topojaga-topojaga sabana i'a madota mangginjani nuapa majadi ante Yesus.

⁵⁹Tempo etu balengga-balengga topanggeni agama bo pura-pura Topolibu Bete Agama nto Yahudi etu nompasimbuku mangelo tau modawa mompakanoto kasala Yesus ala I'a mamala rasuku mamate.

⁶⁰Tapi naupa nadea tau narata nodawa ala mombanawusaka I'a da'a ria nirata ira kasalana. Kaopuna naria romba'a tau nantingayo Polibu Bete etu

⁶¹pade nanguli, “Naria sanggani tau e'i nanguli iwe'i: ‘Aku nompakule mombagero Sapo Mpepue e'i pade mombabangu mpanjili sapo etu riara tolumbengi.’ ”

⁶²Naopu etu nekanggoremo Balengga Topanggeni Agama nanguli ka Yesus, “Iwenumo? Naria pesonomu ewa tesa-tesa nu sabi e'i to nanguli Komi atau da'a?”

⁶³Tapi naupa da'a ria salana Yesus aga nekalino. Pade sangganipa Balengga Topanggeni Agama nanguli ka I'a, “Ante sanga Alatala to Natuwuna, aku nompakau Iko ulimo ka kami ane Iko Magau to Mompakasalama, Ana nu Alatala!”

⁶⁴Nesonomo Yesus, “Ewa niuli komi nakono. Pade kuuli ka komi, kana marata tempona banepia komi kana manggita Aku, Ana nu Manusia mekatoko ri sabingga nggana nu Alatala to Nakuasana. Pade komi kana manggita Aku mana'u nggari langi riara kulimu.”

⁶⁵Nangepe etu Balengga Topanggeni Agama nombaseri pakeana tandaina narau mpu'u rarana. Pade niulina ka Topolibu Bete, “I'a nompakakedi Alatala! Rapokuya kita mangelo sabi-sabi ntanina? Niepe komi mbotomo tesana nompakakedi Alatala!

⁶⁶Iwenu pombarata komi?” Nesonomo ira Topolibu Bete, “I'a masipato rasuku mamate!”

⁶⁷Naopu etu tau-tau ri setu nantailu lenje Yesus pade nombajaguru I'a. Naria sanupa to nanjapa I'a

⁶⁸ante nanguli, “E, Magau to Mompakasalama, ulimo isema nombasapa Iko!”

⁶⁹Tempo etu i Petrus nekatoko ri sawalikuna ri lalowo sapo etu. Tempo i'a ri setu samba'a batua besi nompakamosu i'a pade nanguli, “Iko wo'u samba'a tau nosanggani ante Yesus to Galilea etu!”

⁷⁰Tapi i Petrus nesapu ri ngayo ira pura-pura, “Da'a nakono! Da'a ninjaniku patuju tesamu!”

⁷¹Naopu etu i Petrus nalau ri pewobo wala lalowo. Ri setu samba'a batua besi ntanina nanggita i'a pade nanguli ka tau-tau ri setu, “Tau e'i wo'u nosanggani-nggani ante Yesus to Nazaret etu.”

⁷²Tapi i Petrus nesapu wo'umo ante metunda, “Da'a ninjaniku tau etu!”

⁷³Da'a nasae kaolona tau-tau to nenggore ri setu nompakamosu i Petrus pade nanguli ka i'a, “Natantumo iko samba'a roana, sabana nanoto nggari tesamu iko wo'u to Galilea!”

⁷⁴Pade nompamulamo i Petrus netunda bo nojanji. Niulina, “Da'a ntoto ninjaniku tau etu!” Pade iwetu i Petrus notesa kaliu-liu nora'omo manu.

⁷⁵Nangepe etu natetoramo rarana ewa tesa Yesus pane'a to nanguli, “Da'apa manu mora'o ngina, tolungganimo iko mombasapu Aku.” Pade nesuwumo i Petrus nggari setu nalau nageo nakanjodu-njodu ante nasusa mpu'u rarana.