Read Da'a Kaili MATIUS 27 Bible Online

MATIUS 27 - Da'a Kaili bible

MATIUS 27

¹Kampadondo njiina balengga-balengga topanggeni agama bo totu'a-totu'a nto Yahudi nasiromu nolibu nompakatantu Yesus kana rapatesi.

²Ira nombaso'o I'a pade nanggeni I'a mpaka ri ja'i Gubernur Pilatus. Narata ri setu Yesus niwai ira ka i Pilatus.

³Tempo Yudas to nompobalu Yesus nanggita Yesus nipakatantu kana rapatesi, nanjoso raramo i'a. Nalaumo i'a mpaka ri ja'i balengga-balengga topanggeni agama pade nipopanjilina ka ira tolumpulu mpeka doi salaka.

⁴Niulina ka ira, “Nasilakamo aku e'i! Aku nompobalu samba'a tau da'a ria salana sampe I'a kana rapatesi!” Nesonomo ira, “Etu da'a urusa kami! Urusamu mboto!”

⁵Nangepe etu Yudas nantajiaka doi salaka etu riara Sapo Mpepue pade nalaimo i'a neloe.

⁶Balengga-balengga topanggeni agama nantirunaka doi salaka etu pade niuli ira, “Doi e'i doi oli nu lei. Da'a namala rapasanggani ante doi nipasiromu ri Sapo Mpepue.”

⁷Jadi nipakatantu ira doi etu rapake mangoli salimpu tana to niuli “Tana Ntopowia Kura” majadi tana rapombatana tau-tau da'a to Yahudi to mamate ri ngata Yerusalem.

⁸Etu sampe tana etu niuli “Tana Nikabubu Nu Lei” sampe we'i-we'i.

⁹Ante powia etu nadupamo tesa nabi Yeremia nggaolu to nanguli iwe'i: “Olina to nipakatantu to Israel tolumpulu mpeka doi salaka. Pade doi etu nipake ira nangoli tana ntopowia kura. Etu najadi nantuki to niparenta i Pue ka aku.” [60]

¹⁰

¹¹Tempo Yesus nantingayo Gubernur Pilatus nekutanamo Gubernur ka I'a, “Komimo Magau nto Yahudi?” Nesonomo Yesus, “Ewa to niuli komi etu, Uma, nakono.”

¹²Tapi tempo balengga-balengga topanggeni agama bo totu'a-totu'a nto Yahudi nompangadu I'a, da'a ria I'a nenjui.

¹³Etu sampe Gubernur Pilatus nekutana ka I'a, “Da'a niepemu pura-pura tesa ira nompangadu Komi?”

¹⁴Tapi Yesus da'a ntoto nesono kamba sambela sampe nasumara mpu'u rara Gubernur.

¹⁵Butu-butu mpae tempo Eo Bete Paska Gubernur nabiasa nombakabasaka samba'a tau to nitarunggu nantuki dota ntau dea.

¹⁶Mpae etu naria samba'a tau nitarunggu to ninjani ntau dea, sangana Yesus Barabas.

¹⁷Jadi tempo i Pilatus nombatangara Yesus tau dea nasiromu. Pade nekutanamo i Pilatus ka ira, “Isema rapodota komi kukabasaka ka komi? Yesus Barabas atau Yesus to niuli Kristus?”

¹⁸Niuli i Pilatus iwetu apa ninjaninamo topanggeniaka nto Yahudi nombawai Yesus ka i'a sabana nasiriati rara ira.

¹⁹Tempo i Pilatus nekatoko ri peto'o mpotangara etu, naratamo samba'a tau nanggeni tesa nggari ja'i rongo i Pilatus to nanguli iwe'i: “Ne'e mombagalo urusa tau to nanoana etu! Sabana nggari I'a aku nombarata pangipi to nompakasusa raraku iwengi.”

²⁰Tapi balengga-balengga topanggeni agama bo totu'a-totu'a nto Yahudi nompakapane rara ntau dea ala ira merapi Pilatus mombakabasaka ka ira i Barabas pade mombasuku Yesus kana mamate.

²¹Nekutanamo i Pilatus ka tau dea, “Nggari ira romba'a isema rapodota komi kukabasaka ka komi?” Nesonomo ira, “Barabas!”

²²Pade nekutana wo'umo i Pilatus, “Ane iwetu, nuapa kupowia ante Yesus to niuli Kristus?” Nesonomo ira, “Paku I'a ri kayu parika!”

²³Pade nekutana wo'umo i Pilatus, “Nokuya? Kaja'ana nuapa ntoto to nipowiana?” Tapi ira aga nantambai nongare ante suara to neliu nggamangga, “Paku I'a ri kayu parika!”

²⁴Kaopuna nanotomo ka i Pilatus da'a ria gunana mompapola motesa ka ira, sabana ira aga nantambai nongare-ngare, sakedika majadi kakanano. Jadi nialana ue niramana palena ri ngayo ntau dea ewa tandaina da'a i'a to nasala ane Yesus rapatesi. Pade niulina ka ira, “Aku da'a mombatanggu kamate ntau e'i. Etu kana ratanggu komi!”

²⁵Nesonomo tau dea, “Wa'a mamimo! Damo kami bo muli-muli kami mombatanggu kamatena!”

²⁶Naopu etu i Pilatus nombakabasaka ka ira i Barabas. Pade nipakauna tantarana mombaporo Yesus pade mombapaku I'a ri kayu parika.

²⁷Naopu etu tantara nu Gubernur nanggeni Yesus riara sapo Gubernur pade nipokio ira pura-pura roa ira nasiromu nantalili I'a.

²⁸Niwonju iramo pakea Yesus pade nipopasua ka I'a baju nalei ewa to nipake magau.

²⁹Nipowia ira songgo nggari karui pade nipoposonggo ka I'a. Niwai ira ka I'a sampeka lembau ri pale ngganana ewa lembau nisoko samba'a magau. Pade nekadedemo ira ri ngayona nompongei-ngei I'a ante nanguli, “Ratoiyata Magau nto Yahudi!”

³⁰Ira nantailu I'a pade lembau ri palena niala ira nipombaboba balenggana.

³¹Sangga naopupa ira nompongei-ngei I'a iwetu, niwonju iramo baju nalei etu pade nipopasua bali ka I'a pakeana mboto. Naopu etu I'a nikeni ira mpaka ri sawaliku ngata ala rapaku ri kayu parika.

³²Ri tatongo jala ira nosintomu ka samba'a tau nggari ngata Kirene to nosanga ka i Simon. I'a nisoko ira pade nipasu'u ira nanjumbuaka kayu pomparika Yesus.

³³Napolamo ira sampe narata ri peto'o nosanga ka Golgota, batuana “Peto'o Wuku Balengga.”

³⁴Narata ri setu Yesus nipopoinu ka anggur nigalo ante pakuli to napa'i. Tapi iwetu nipetamina sakedi mana nadota I'a nanginu.

³⁵Ri setumo ira nombapaku Yesus ri kayu parika. Naopu etu ira nombabagi pakeana ante nompenoa nowia nomoro. Isema nawela nomoro i'a nombarata pakea etu.

³⁶Naopu etu nekatokomo ira ri setu nombajagai I'a.

³⁷Ri ntoto balenggana ri kayu parika etu nipataka ira dopi to nitulisi tesa pebata to nipawela ka I'a iwe'i: E'IMO YESUS, MAGAU NTO YAHUDI.

³⁸Ri setu naria wo'u romba'a parampo nipaku ri kayu parika ntanina mpasanggani-nggani ante Yesus, samba'a ri sabingga ngganana, pade samba'apa ri sabingga njidina.

³⁹Tau-tau to noliu ri setu nanguli sinja'i I'a pade nombawiri mata ka I'a.

⁴⁰Ira nanguli, “Niulimu Iko mamala mombagero Sapo Mpepue pade mombabanguna mpanjili riara tolu eo! Ane Iko mpu'u-mpu'u Ana nu Alatala, pakasalama koromu mboto! Pana'umo nggari kayu parika etu!”

⁴¹Iwetu wo'u balengga-balengga topanggeni agama bo guru-guru agama ante totu'a-totu'a nto Yahudi nompongei-ngei I'a. Niuli ira,

⁴²“Tau ntanina namala nipakasalamana. Tapi kita we'i! Korona mboto da'a namala nipakasalamana! Ane I'a mpu'u-mpu'u Magau nto Israel, agina I'a mana'u nggari kayu parika pade kami momparasaya I'a!

⁴³I'a nanjarumaka Alatala pade niulina I'a Ana nu Alatala! Jadi kamaimo kita manggita ane Alatala madota mompakasalama I'a we'i-we'i!”

⁴⁴Pade parampo-parampo to nipaku ri kayu parika mpasanggani ante Yesus wo'u nanguli sinja'i I'a iwetu.

⁴⁵Nompamula nggari katongo nu eo narumaumo eo ri njumaongu tana etu sampe ri tinti toluongu ngguwiana.

⁴⁶Kira-kira tinti toluongu ngguwiana etu, nongaremo Yesus ante suara namangga, “Eli, Eli, lama sabakhtani?” Batuana, “Alatalaku, Alatalaku, nokuya Komi nompalasi Aku?”

⁴⁷Sangga nangepe etu nangulimo bara sakuya mba'a tau ri setu, “I'a nompokio nabi Elia!”

⁴⁸Pade nangowamo samba'a nggari tatongo ira nasalisa nangala sangele wunga to nasimbayu ante lumu nibanggana riara anggur napoi. Naopu etu niumpuna ante wolo nipopoinuna ka Yesus.

⁴⁹Tapi naria tau ntanina nanguli, “Ne'epa ruru! Rakitata ane nabi Elia marata mompakasalama I'a!”

⁵⁰Naopu etu nongare wo'umo Yesus ante suara namangga, pade nalaimo nosana.

⁵¹Ri tempo etu wo'u naseri ntongomo kae powombo ri Sapo Mpepue nggari ba'ana narata ri wayona. Pade naria wo'u lingu bete bo watu-watu bete natebingga.

⁵²Dayo-dayo natebuka pade nadea topomparasaya to namatena natuwu bali

⁵³pade nesuwu nggariara dayo-dayo etu. Pade naopu Yesus natuwu bali nesuamo ira riara ngata Yerusalem, ngata to nagasana, pade nadea tau ntanina nanggita ira.

⁵⁴Tempo balengga tantara bo tantara-tantarana to nombajagai Yesus ri setu nangepe lingu bete etu pade nanggita nuapa-nuapa to najadi ri setu, naeka mpu'umo rara ira. Niuli ira, “Mpu'u-mpu'u tau e'i Ana nu Alatala!”

⁵⁵Ri setu naria wo'u nadea besi to nenggore neantoaka nggawao. Iramo besi-besi to nantuki Yesus pade nantulungi I'a nompamula nggari bagona ri Bagia Galilea.

⁵⁶Ri tatongo ira naria i Maria Magdalena pade i Maria indo Yakobus bo Yusuf, pade indo ana-ana i Zebedeus.

⁵⁷Tempo ntora nasolomo eo naratamo samba'a tau nasugi nggari ngata Arimatea to nosanga ka Yusuf. Yusuf e'i wo'u samba'a topomparasaya Yesus.

⁵⁸Nalaumo i'a mpaka ri ja'i Pilatus nerapi watabaku Yesus. Nangepe pomperapi etu i Pilatus nompakau tantarana nombawai watabaku Yesus ka Yusuf.

⁵⁹Pade Yusuf nangala watabaku Yesus etu, nisompuna ante kae gandisi to nalusuna

⁶⁰pade nibolina riara dayona mboto to lako nipa'a ri saongu bulu watu. Naopu etu niluliakana wo'u saongu watu bete nipombapiku pewobo dayo etu, pade nalaimo i'a.

⁶¹Tempo etu i Maria Magdalena ante i Maria ntanina nekatoko ri ngayo dayo etu.

⁶²Naeompadondona ri Eo Mpenonto nalaumo balengga-balengga topanggeni agama bo tau-tau to Parisi mpaka ri ja'i Pilatus.

⁶³Narata ri setu nangulimo ira, “Uma, nitora kami tesa topebagiu etu tempo I'a danatuwu. Niulina, ‘Ri eo katolueona Aku kana matuwu bali.’

⁶⁴Jadi etu sampe kami merapi ala komi mompakau tantara-tantara malau manggatono dayona ria sampe eo katolueona ala ne'e-ne'e anaguruna malau mangala watabakuna pade manguli ka tau dea, ‘Natuwu balimo I'a!’ Ane etu majadi bagiu kaopuna meliu nggaja'a nggari bagiuna pamulana.”

⁶⁵Nesonomo i Pilatus, “Etumo tantara-tantara. Kenimo ira manggatono dayo mpakabelo-belo.”

⁶⁶Jadi nalaumo ira nombamere watu nipompiku dayo ala ne'e rabuka ntau. Pade nipakau ira tantara-tantara manggatono ri setu.