Read Da'a Kaili MATIUS 28 Bible Online

MATIUS 28 - Da'a Kaili bible

MATIUS 28

¹Naliu eo Mpenonto da'apa nebulu eo ri eo Aka, nalaumo i Maria Magdalena bo i Maria ntanina manggita dayo Yesus.

²Sampegoli naria lingu bete sabana malaeka i Pue nana'u nggari suruga nombaluliaka watu nipompiku dayo. Pade naopu etu nekatokomo i'a ri bunggu watu etu.

³Lenjena nenggila ewa kila, pakeana damo naputi nju'u.

⁴Tantara-tantara to nanggatono ri setu naeka mpu'u sampe nolalete-lete koro ira, pade nadunggamo ira najadi ewa tomate.

⁵Pade nangulimo malaeka etu ka besi-besi etu, “Ne'e maeka. Ninjaniku komi mangelo Yesus to namate nipaku ri kayu parika.

⁶Tapi I'a mana ria ri se'i. Natuwu balimo I'a ewa niulina bopia. Kamaimo manggita peto'o pombaboli watabakuna.

⁷Pade kalaumo masalisa uli ka anaguru-anaguruna natuwu balimo I'a. I'a mokolu ka komi mpaka ri Bagia Galilea. Ri setumo komi kana manggita I'a. Toramo nuapa to nitesaku ka komi!”

⁸Jadi nompari-mparimo besi-besi etu nalai nggari dayo etu. Naekamo ira tapi nadamba wo'u rara ira. Nangowamo ira ala manguli ka anaguru-anaguru Yesus nuapa to najadi.

⁹Sampegoli ri setumo Yesus nosintomu ka ira pade nanguli, “Tabe.” Ira nompakamosu I'a pade nanggalipui kadana mombasomba I'a.

¹⁰Nangulimo Yesus ka ira, “Ne'e maeka. Kau uli ka anaguru-anaguruku malau mpaka ri Bagia Galilea. Ri setumo ira kana manggita Aku.”

¹¹Sangga nalaipa besi-besi, nalaumo bara sakuya mba'a tantara topanggatono dayo etu mpaka ri ngata notesa ka balengga-balengga topanggeni agama nuapa to najadi ri dayo pane'a.

¹²Nangepe tesa ira balengga-balengga topanggeni agama nasiromu nolibu ante totu'a-totu'a nto Yahudi. Pade ira nompakatantu mombawai doi madea ka tantara-tantara etu.

¹³Niuli ira ka tantara-tantara etu, “Uli komi iwe'i: ‘Ntongo wengi pangane naratamo topantuki Yesus nompangangga watabakuna tempo kami napisi.’

¹⁴Ane Gubernur mangepe tesa etu, damo kami motesa ka i'a ala da'a mokuya-kuya komi.”

¹⁵Jadi tantara-tantara nantarima doi etu pade nitesa-tesa ira ewa to nipakau ka ira. Pade tesa tantara-tantara etu batena nipatolele ri tatongo nto Yahudi sampe we'i-we'i.

¹⁶Pade nalaumo sampulu samba'a anaguru Yesus mpaka ri saongu bulu ri Bagia Galilea to nipakatantu Yesus ka ira.

¹⁷Sangga nanggita I'a nekadedemo ira nombasomba I'a. Tapi danaria to norongu rara.

¹⁸Yesus nompakamosu ira pade nanguli ka ira, “Pura-pura kuasa ri langi bo dunia niwai ka Aku.

¹⁹Sabana etu kalaumo komi mpaka ri umba-umba ri dunia, mompatuduki pura-pura tau majadi topomparasaya Aku. Diumo ira riara sanga Umata Pue Alatala bo Aku, Anana bo Nosa Nagasana ewa tandaina ira topomparasaya Aku.

²⁰Patudukimo ira mantuki pura-pura to niparentaku ka komi. Pade toramo! Aku kana mosanggani ka komi sampe ri kaopu nu dunia.”