Read Da'a Kaili MATIUS 6 Bible Online

MATIUS 6 - Da'a Kaili bible

MATIUS 6

¹“Toramo, ne'e komi mompowia ada-ada to nipakatantu riara Atura-atura agama ri ngayo ntau dea ala rakita ira. Sabana ane iwetu pokainggu komi, powiamu etu da'a ntoto rabalasi Umamu ri suruga.

²Jadi tempo komi mombawai doi petulungi ka tau nakasiasi, ne'e rapatolele powiamu etu ewa kabiasa ntau tumoni-moni nabelo rarana. Ira nombawai ka tau nakasiasi ri ngayo ntau dea riara sapo-sapo mpodade pade ri jala-jala rara ngata ala ratoiya ntau. Aku mpu'u-mpu'u notesa ka komi, nitarima iramo pura-pura balasi nu powia ira.

³Tapi ane komi mombawai doi petulungi ka tau-tau nakasiasi waimo nggalino. Ne'e rapopanjani ka tau ntanina. Pade Umamu ri suruga to nanggita powiamu nggalino etu kana mombabalasi kabelomu etu.”

⁵“Tempo komi mosambaya, ne'e moinggu ewa tau-tau tumoni-moni nabelo. Ira nompokono nenggore mosambaya riara sapo-sapo mpodade pade ri sidu-sidu nu jala jama ala rakita ntau dea. Aku mpu'u-mpu'u notesa ka komi, nitarima iramo pura-pura asele nu posambaya ira.

⁶Tapi ane komi mosambaya, pesuamo riara ntombimu pade pikumo pewobo. Posambayamo ka Umamu to da'a nikita. Pade Umamu to nanggita komi nosambaya nggalino kana mombabalasi komi.

⁷Pade tempo komi mosambaya ne'e mompakandate posambayamu ante mombasili-sili tesa nasimbayu ewa kabiasa ntau da'a nosinjani ante Alatala. Ira nompekiri ante mosambaya mandate posambaya ira ratarima Alatala.

⁸Jadi ne'e mompasiala pokainggu ira etu! Sabana ninjani Umamu mamimo nuapa to niparaluumu da'apa komi merapi nggari ja'ina.

⁹Jadi posambayamo komi iwe'i: ‘Uma kami to naria riara suruga, rabila kami sangamu.

¹⁰Karatamo Komi moparenta ri dunia e'i, kajadimo dotamu ri dunia nasimbayu ewa ri suruga.

¹¹Waimo ka kami panggoni butu-butu eona.

¹²Pade ampungimo silaka kami ewa kami wo'u nombaampungi tau-tau nowia sala ri ja'i kami.

¹³Ne'e rapakamba kami rapesoba, tapi kabasakamo kami nggari kuasa Magau nu Seta. [Sabana Komimo Magau to nabaraka bo nakuasa sampe ri kasae-saena. Amin!’]

¹⁴Ane komi mombaampungi tau-tau to nompowia sala ri ja'imu, Umamu ri suruga wo'u kana mombaampungi silaka komi.

¹⁵Tapi ane komi da'a mombaampungi tau-tau to nompowia sala ri ja'imu, Umamu ri suruga da'a wo'u mombaampungi silaka komi.”

¹⁶“Ane komi mapuasa ne'e mompopokita lenje ewa tau nandasa ewa kabiasa ntau tumoni-moni nabelo. Ira tunggai nombabali lenje ira ala manoto ka tau ntanina ira napuasa. Aku mpu'u-mpu'u notesa ka komi, nirata iramo pura-pura balasi nggari powia ira etu.

¹⁷Tapi ane komi mapuasa, pendo'umo bo salagamo wo'omu

¹⁸ala ne'e ranjani tau ntanina komi mapuasa, aga ranjani Umamu ri suruga to da'a nikita. I'amo to manggita powiamu nggalino etu pade mombabalasi komi.”

¹⁹“Ne'e komi mompasiromu kakalumana ka koromu mboto ri dunia e'i. Sabana kakalumanamu ri dunia namala rakoni saipa bara tagara, pade peto'o pomboli kakalumanamu mamala ragero bo kakalumanamu etu rapangangga ntau.

²⁰Agina komi mompasiromu kakalumana ka koromu mboto ri suruga. Sabana ri setu kakalumanamu da'a namala rakoni saipa bara tagara, pade peto'o pomboli kakalumanamu da'a namala ragero bo rapangangga ntau.

²¹Jadi ne'e mompasiromu kakalumana ri dunia, sabana ri umba kakalumanamu ri setu wo'u pekirimu.

²²Matamu nasimbayu ewa poindo nu koromu. Ane matamu mabelo, kana mareme sanggani njumaongu koromu.

²³Tapi ane matamu magawu, marumau sanggani njumaongu koromu. Jadi ane reme to naria riara nta'imu marumau, marumau mpu'u pura-pura katuwumu. [19]

²⁴Da'a ria samba'a tau mamala majadi batua nggari romba'a madika. Sabana i'a kana magigi rarana ri ja'i madika to samba'ana pade mompotowe madika ntanina etu. Bara i'a kana mombabila madika to samba'ana pade momporau rara madika ntanina etu. Iwetu wo'u ane komi. Da'a mamala komi mepue sanggani ka Alatala bo manjarumaka mbara-mbara ri dunia e'i.”

²⁵“Sabana etu kuuli ka komi, ne'e makini-kini rara mompekiri katuwu komi, bara nuapa rakoni komi atau rainu komi. Ne'e makini-kini mompekiri koro komi mboto bara pakea nuapa rapake komi. Sabana to napokona riara nggatuwuta da'a aga panggoni bo pakea.

²⁶Kitamo tonji-tonji ri laerawa! Ira da'a notuja pae, da'a nokato bara nomboli pae riara logo. Tapi naupa iwetu Uma komi ri suruga nombawai ka ira panggoni. Pade riara mpanggita Alatala katuwu komi neliupa nggari tonji-tonji.

²⁷Da'a ria gunana komi makini rara. Da'a ria samba'a nggari tatongo komi to nompakule mantambai umuruna nau aga sambengi ante makini-kini rarana.

²⁸Pade da'a wo'u naria gunana komi makini-kini mompekiri pakeamu. Kitamo bunga-bunga to natuwu ranggawoko. Bunga etu da'a nanggawia bara nantanu.

²⁹Tapi naupa iwetu kuuli ka komi, Magau Salomo to nakalumana mpu'u da'a ria pakeana to narambana ewa bunga-bunga etu!

³⁰Ane Alatala mompakaramba bunga-bunga ranggawoko to natuwu sampalai lau pade nipalabu riara apu, natantumo I'a kana mombawai ka komi pakea to niparaluu komi. Komi mpu'u-mpu'u tau to nakura pomparasaya!

³¹Jadi ne'e komi makini-kini ante manguli, ‘Nuapa rakonita, nuapa rainuta, bara pakea nuapa rapaketa?’

³²Pura-pura etu wo'u nielo tau-tau to da'a nomparasaya Alatala. Tapi pura-pura to niparaluu komi etu ninjani Umamu ri suruga.

³³Jadi pekoumo ruru ri ja'i Alatala pade tunggai mowia dotana pade pura-pura etu kana rapakagana ka komi.

³⁴Sabana etu ne'e makini-kini mompekiri bara nuapa majadi naile, sabana naile naria mboto kasusana. Kasusana eo e'i naganamo rapekirita eo e'i.”