Read Da'a Kaili MATIUS 7 Bible Online

MATIUS 7 - Da'a Kaili bible

MATIUS 7

¹“Ne'e komi sakedi-sakedi mompakasala tau ala ne'e komi rapakasala Alatala.

²Sabana iwenu komi mompakasala roamu iwetu wo'u Alatala mompakasala komi. Komi kana rabalasi nantuki potimba to nipake komi mboto ante tau ntanina.

³Nokuya komi nanggita mpuli ri mata roamu, tapi baloti ri matamu mboto da'a ria nikitamu?

⁴Iwenu komi nanguli ka roamu, ‘Kamai kukaliaka mpuli nggari matamu,’ tapi ri matamu mboto naria baloti?

⁵Komi aga nagasi nompakasala roamu! Kaliaka ntanimo ruru baloti nggari matamu mboto pade komi mamala manggita ante manoto ala manggaliaka mpuli nggari mata roamu!”

⁶“Ne'e rawai ka asu anu to nagasana ala ne'e ira megoli manggiki komi. Pade ne'e rawai ka wawu mutiara to nasuli olina ala ne'e ira aga mombalonggo-longgo bayangi.”

⁷“Perapimo nggari ja'i Alatala pade komi kana rawai, elomo pade komi kana mombarata, tinggedemo pewobo pade pewobo kana rabea ka komi.

⁸Sabana isema-sema merapi i'a kana rawai, isema-sema mopaelo i'a kana mombarata, pade isema-sema mantinggede pewobo, i'a kana rabea ka pewobo.

⁹Natantu da'a ria samba'a uma nggari tatongo komi to mombawai watu ka anana ane i'a merapi roti!

¹⁰Pade da'a wo'u naria uma to mombawai ule ka anana ane i'a merapi bau.

¹¹Naupa komi tau to naja'a ninjani komi mombawai nuapa to nabelona ka ana-ana komi mboto. Ne'epa rauli Uma komi ri suruga. Natantumo I'a wo'u kana mombawai anu nabelo ka isema-sema merapi ri ja'ina.”

¹²“Jadi nuapa-nuapa to mupodota rapowia ntau ka komi, iwetu wo'u komi mowia ri ja'i ira. Sabana parenta etumo isi to napokona nggari njumaongu Atura-atura i Musa bo pepatuduki nu nabi-nabi nggaolu.

¹³Pesuamo ri pewobo to napii, sabana pewobo bo jala mpaka ri naraka naluo, pade nadea wo'u tau to nantuki ri setu.

¹⁴Tapi napiimo pewobo bo jala mombarata katuwua mabelo, pade sakedi lau tau to nombaratana.”

¹⁵“Komi kana mainga ri ja'i nabi-nabi topodawa. Ira narata ri ja'i komi notimoni-moni nalusu rarana ewa bimba, tapi kakonona riara nta'i ira naja'a mpu'u ewa asulako to nasoana.

¹⁶Nggari pokainggu ira komi mamala mangginjani isema nabi topodawa. Natantu lemo ntasi da'a nowua lonja, pade walaa winti manu da'a nowua ntimu.

¹⁷Iwetu wo'u kayu to nabelona kana mowua mabelo, tapi kayu da'a nabelo da'a wo'u mowua mabelo.

¹⁸Da'a ria kayu to nabelona to da'a nowua nabelo. Pade da'a wo'u naria kayu da'a nabelo to nowua nabelo.

¹⁹Butu-butu kayu to da'a nowua nabelo kana ratowo pade ratajiaka riara apu.

²⁰Jadi iwetu wo'u ante nabi-nabi topodawa. Ira manoto ranjani komi nggari pokainggu ira.

²¹Da'a pura-pura tau to nekakai ka Aku ‘Pue, Pue,’ mamala majadi todea riara Poparenta nu Alatala, aga tau to nompowia dota nu Umaku ri suruga.

²²Ri kaopu nu dunia banepiana kana madea tau manguli ka Aku, ‘Pue, Pue, kami nompasimbayu tesamu ka tau ntanina riara sangamu, pade riara sangamu wo'u kami nompopalai seta-seta nggari ja'i ntau. Pade nadeamo kabaraka to nipowia kami riara sangamu.’

²³Tapi Aku kana mombasono ira iwe'i: ‘Da'a ninjaniku komi! Palaimo nggari se'i, komi to nompowia kaja'ana!’ ”

²⁴“Jadi isema-sema to nangepe tesaku pade nantuki tesa etu i'amo nasimbayu ewa tau to nanoto to nompowia sapona ri bunggu watu to narosona.

²⁵Sangga naratapa uja, nanggabuntumo ue pade sapo etu niburu mpoiri naramboso. Tapi da'a ria mokuya-kuya sapo etu sabana nipowia ri bunggu watu to narosona.

²⁶Tapi isema-sema to nangepe tesaku pade da'a nantuki tesa etu, i'amo nasimbayu ewa tau to nadoyona to nompowia sapona ri bunggu bone.

²⁷Sangga naratapa uja, nanggabuntumo ue pade sapo etu niburu mpoiri naramboso. Pade nadunggamo sapo etu sampe nagero puramo.”

²⁸Sangga naopupa Yesus nompatuduki etu pura-pura ka todea, nasumara mpu'umo ira,

²⁹sabana akalana nopaguru nakuasa mpu'u, da'a ewa guru-guru agama ira.