Read Da'a Kaili MATIUS 8 Bible Online

MATIUS 8 - Da'a Kaili bible

MATIUS 8

¹Sangga notuapa Yesus nggari bunggu nu bulu, nadeamo tau nantuki I'a.

²Tempo etu naratamo samba'a tau naju'a bete notimbakotu nombasomba Yesus, pade niulina, “Pue, ane Komi madota, Komi mamala mompakabelo ju'aku e'i.”

³Nangepe etu Yesus nangojo palena nanjoko tau etu ante nanguli, “Aku madota. Nabelomo ju'amu!” Pade kaliu-liu nabelomo ju'a ntau etu.

⁴Pade nangulimo Yesus ka i'a, “Tora-tora, ne'e mutesa ka isema-sema nuapa to najadi ri ja'imu. Tapi kalaumo komi mompopokita koromu ka topanggeni agama ala rakitana nabelomo ju'amu. Pade waimo ka Alatala pesomba ewa to niparenta i Musa ala mompopokita ka tau pura-pura nabelomo ju'amu.” [20]

⁵Tempo Yesus nesua ri ngata Kapernaum naratamo samba'a balengga tantara Roma mpaka ri ja'ina. I'a nerapi ante mpu'u-mpu'u rarana ka Yesus,

⁶“Pue, batuaku naju'a ntomo ri sapoku ria. I'a aga naturu ri setu sabana napunggu, pade nandasa mpu'u niepena.”

⁷Nangulimo Yesus ka i'a, “Aku malau mompakabelo i'a.”

⁸Tapi nangulimo balengga tantara etu, “Uma, aku e'i da'a masipato mantarima Komi riara njapoku. Aga ulimo sambela rombela pade batuaku etu kana mabelo.

⁹Ninjaniku etu sabana aku wo'u samba'a tau to natundu ri ja'i balenggaku. Pade naria anabua-anabuaku to natundu ri ja'iku wo'u. Ane aku manguli ka samba'a anabuaku, ‘Kalaumo,’ i'a kana malau. Pade ane aku manguli ka anabuaku ntanina, ‘Kamaimo ri se'i,’ i'a kana momai. Pade ane aku manguli ka batuaku, ‘Powiamo etu,’ i'a kana mowia etu.”

¹⁰Sangga nangepe tesa etu nasumaramo Yesus, pade niulina ka tau dea to nantuki I'a, “Aku mpu'u-mpu'u notesa ka komi, nau ri ja'i ntau to Yahudi da'a ria sanggani nirataku pomparasaya ntau to naroso ewa pomparasaya ntau e'i!

¹¹Kuuli ka komi, tempo banepia madea tau da'a to Yahudi kana majadi todea nu Alatala. Ira marata nggari sabingga kamataeona bo kasolona pade mekatoko manggoni madamba-damba mpasanggani-nggani ante Abraham, Ishak bo Yakub riara Poparenta nu Alatala.

¹²Tapi tau-tau to Yahudi mboto to masipato majadi todea riara Poparenta nu Alatala da'a mamala. Ira aga ratajiaka ri karumauna makawao nggari ja'i Alatala, pade ri setu ira aga mageo-geo bo mosinggiki baga ante kasusa rara.”

¹³Pade nangulimo Yesus ka balengga tantara etu, “Panjilimo. Nuapa to niparasayamu etu kana majadi.” Pade ri tempo etu wo'u nabelomo ju'a nu batuana.

¹⁴Naopu etu nalaumo Yesus mpaka ri sapo i Petrus. Ri setu nikitana matu'a besi i Petrus aga noturu sabana naju'a pane.

¹⁵Nanggita etu Yesus nanjoko pale nu besi etu pade kaliu-liu nabelomo ju'ana. Naopu etu nembangumo besi etu nalau nangala panggoni nikenina ka Yesus.

¹⁶Sangga nangguwiapa naratamo tau nanggeni roa ira to nipesua seta mpaka ri ja'i Yesus. Ante nanguli sambela I'a nompopalai seta-seta nggari ja'i ntau. Pade pura-pura tau to naju'ana wo'u nipakabelona.

¹⁷Etu najadi ala madupamo tesa Alatala to niboto nabi Yesaya nggaolu iwe'i: “I'amo to nanggolo kasusata bo nompakabelo ju'a-ju'ata.” [21]

¹⁸Naria saeo nadea tau nantalili Yesus. Nanggita etu nangulimo I'a ka anaguruna, “Kamaimo kita mpaka ri sambote rano.”

¹⁹Tempo etu naria samba'a guru agama to narata to ja'i Yesus ante nanguli, “Guru, ri umba-umba rakalau Komi aku kana mantuki Komi.”

²⁰Nangulimo Yesus ka i'a, “Asulako naria bolona rapaturuna bo tonji naria jumuna, tapi Aku, Ana nu Manusia da'a ria peto'o kupaturu.”

²¹Naopu etu nangulimo samba'a topantuki I'a ntanina, “Pue, paloga ntanimo ruru aku manjili mombatana umaku. Naopu etu pade aku momai mantuki Komi.”

²²Tapi nangulimo Yesus ka i'a, “Tukimo Aku! Waikamo tau-tau namate mombatana tau to namatena.”

²³Naopu etu Yesus nesawi sakaya mpasanggani-nggani ante anaguruna, pade nalaimo ira nosakaya.

²⁴Tempo ira nosakaya sampegoli naratamo poiri naramboso nompakabete balumba ri rano sampe sakaya ira nibungu nu balumba. Tapi tempo etu Yesus naturu nalumpi.

²⁵Jadi nalaumo anaguruna nombalike I'a ante nanguli, “Pue, tulungimo! Mamatemo kita!”

²⁶Nangulimo Yesus ka ira, “Nokuya komi naeka? Komi tanu tau to nakura pomparasaya!” Naopu etu nekanggoremo I'a pade nanguli, “Poiri ante balumba, penontomo!” Pade kaliu-liu naoto puramo rano etu.

²⁷Nanggita kajadia etu nasumara puramo anaguruna sampe ira nanguli, “Isema tanu kakonona tau e'i sampe poiri bo balumba natundu ri ja'ina?”

²⁸Naopu etu naratamo ira ri sambote rano ri bagia nto Gadara. Naratapa ira ri setu nesuwumo romba'a tau nggari tatongo dayo-dayo nosintomu ka Yesus. Ira romba'a etu nipesua seta. Nagila mpu'umo ira sampe da'a ria tau nabia moliu ri setu.

²⁹Nongare-ngaremo ira romba'a, “O, Ana nu Alatala! Nuapa urusamu ante kami, mai mompandasa kami nau da'apa tempona?”

³⁰Da'a nakawao nggari setu nadea wawu nangelo panggonina.

³¹Jadi seta-seta to nesua riara ntau romba'a etu nerapi ka Yesus, “Ane Komi mompopalai kami nggari ja'i ntau e'i, palogamo kami mesua ri ja'i wawu-wawu etu!”

³²Nangulimo Yesus ka seta-seta etu, “Palaimo!” Jadi nesuwumo seta-seta nggari ja'i ntau romba'a etu pade nolinja nesua ri ja'i nu wawu-wawu. Iwetu nipesua seta-seta nangowa puramo wawu etu notingganawu nggari wiwi bingge mpaka riara rano sampe namate natala riara rano.

³³Sangga nanggita kajadia etu nalaimo tau-tau topanggatono wawu mpaka riara ngata. Pade nitesa ira puramo nuapa to najadi ri ja'i wawu ira bo ri ja'i ntau romba'a to nipesua seta pane'a.

³⁴Nangepe etu nalaumo pura-pura pue ngata mosirata ka Yesus. Sangga naratapa ri ja'i Yesus nerapimo ira ante mpu'u-mpu'u rara ala I'a mompalasi bagia ira etu.