Read Da'a Kaili MATIUS 9 Bible Online

MATIUS 9 - Da'a Kaili bible

MATIUS 9

¹Naopu etu nesawi sakayamo Yesus nanjili mpaka ri sambote rano sampe narata ri ngata to nipeto'ona.

²Ri setu naratamo bara sakuya mba'a tau nombakowa roa ira to napunggu naturu ri ompa paturuna mpaka ri ja'i Yesus. Sangga nanggita karoso nu pomparasaya ira, nangulimo Yesus ka topunggu etu, “Anaku, pakaroso raramu. Silaka-silakamu niampungimo.”

³Nangepe tesa Yesus etu bara sakuya mba'a guru agama ri setu nompekiri riara nta'i ira, “Tau e'i nompakakedi Alatala!”

⁴Tapi ninjani Yesusmo pompekiri ira. Etu sampe I'a nanguli ka ira, “Nokuya komi nompekiri naja'a iwetu riara nta'imu?

⁵Umba to neliu nggamuda rauli, ‘Silakamu niampungimo,’ atau manguli, ‘Pekanggore pade polumakomo?’ Natantu neliu nggamuda manguli, ‘Silakamu niampungimo.’

⁶Tapi Aku mompopokita ka komi Aku, Ana nu Manusia nakuasa mombaampungi silaka-silaka manusia ri dunia e'i.” Pade nangulimo I'a ka topunggu etu, “Pekanggoremo! Onggotaka ompa paturumu pade patinggulimo!”

⁷Nangepe etu nekanggoremo topunggu etu, pade nanjilimo i'a mpaka ri sapona mboto.

⁸Nanggita kajadia etu naekamo rara ntau dea ri setu. Pade ira nantoiya Alatala sabana I'a nombawai kuasa to nabetena ewa etu ka manusia.

⁹Naopu etu nalaimo Yesus nggari setu. Tempo I'a noliu ri ngata etu nikitana samba'a topomperapi balasitee nekatoko riara kantorona. Sangana i Matius. Nangulimo Yesus ka i'a, “Kamaimo, tukimo Aku!” Nangepe etu nekanggoremo Matius pade nalaumo i'a nantuki Yesus.

¹⁰Naopu etu Yesus ante anaguruna nalau nanggoni ri sapo i Matius. Pade ri setu nadea wo'u topomperapi balasitee bo tau-tau ntanina to nasilaka nasiromu nanggoni mpasanggani ante ira.

¹¹Sangga nanggita etu nangulimo bara sakuya mba'a tau to Parisi ka anaguru Yesus, “Nokuya gurumu nanggoni mpasanggani-nggani ante topomperapi balasitee bo tau-tau to nasilaka?”

¹²Tesa ira etu niepe Yesus. Jadi niulina ka ira, “Da'a tau to naroso korona paraluu rapakuli dokutoro, aga tau to naju'ana.

¹³Kau pegurumo batua nu tesa Alatala to nanguli iwe'i: ‘To nipodotaku ala komi maasi mata ri ja'i tau ntanina. Da'a nipodotaku binata-binata rakeni rasambale ka Aku.’ [22] Sabana patuju karataku ri dunia e'i da'a mompokio tau-tau to nanoa rarana, tapi ala mompokio tau-tau nasilaka.”

¹⁴Naliu etu naratamo bara sakuya mba'a topantuki Yohanes Topediu mpaka ri ja'i Yesus. Nekutanamo ira ka I'a, “Kami bo tau-tau to Parisi naoso napuasa nantuki ada-ada agamata. Nokuya anaguru Komi da'a napuasa?”

¹⁵Nesonomo Yesus ka ira ante porapa iwe'i: “Masipato torata mapuasa bo masusa rara ri posusa mponika tempo boti langgai danosanggani ante ira? Natantumo da'a! Tapi kana marata tempona boti langgai raala nggari ja'i ira. Tempo etu pade ira mapuasa.”

¹⁶Nanguli wo'umo Yesus, “Da'a ria samba'a tau nombatampala baju to narantana ante tampala kae to nabouna. Sabana tampala kae to nabouna etu kana mosimpakuru mompakaseri baju to narantana etu sampe mantambai kaja'ana seri nu baju etu.

¹⁷Iwetu wo'u ante ue anggur. Da'a ria samba'a tau nombaisi ue anggur to nabouna riara pombolina to nasae. Sabana ane iwetu ue anggur to nabouna kana morende mompakaposo pombolina etu sampe masowe wetumo ue anggur pade marugi pombolina. Ue anggur to nabouna kana raisi riara pomboli to nabouna wo'u. Ante iwetu pura-pura kana mabelo, nabeloka ue anggur, nabeloka pombolina.” [23]

¹⁸Tempo Yesus danotesa, naratamo samba'a topanggeniaka ri sapo mpodade nto Yahudi. Nekadedemo i'a ri ngayo Yesus ante nanguli, “Anaku besi lako-lakopa namate. Tapi kamaimo mpaka ri sapoku, dikamo palemu ri korona pade i'a kana matuwu bali.”

¹⁹Nangepe etu nekanggoremo Yesus nalau nantuki tau etu. Pade anaguruna wo'u nantuki I'a.

²⁰Ri tatongo jala naria samba'a besi to sampulu rompaemo nangote lei. I'a nompakamosu Yesus nggari talikuna pade nikabena tampa nu baju Yesus,

²¹sabana nipekirina, “Nau aga bajuna kukabe kana mabelomo ju'aku.”

²²Tempona etu Yesus nompeili nanggita besi etu. Pade niulina ka i'a, “Anaku, pakaroso raramu. Sabana iko nomparasaya Aku, nabelomo ju'amu.” Pade tempo etu wo'u nabelomo ju'a nu besi etu.

²³Naopu etu napolamo Yesus mpaka ri sapo topanggeniaka ri sapo mpodade pane'a. Narata ri setu nikitana tau nantawui sasuli bo tau dea nakanano.

²⁴Niulina ka ira, “Palaimo komi pura-pura! Ngana besi etu da'a namate. I'a aga napisi.” Nangepe tesa etu, ira aga nompongiri-ngiri Yesus.

²⁵Tapi naopu ira pura-pura nipopalaina, nesuamo Yesus ri ja'i ngana besi, nisokona palena pade kaliu-liu natuwu balimo i'a.

²⁶Naopu etu natolelemo kareba kajadia etu sampe ri njumaongu ngata ri bagia etu.

²⁷Tempona Yesus nompapola polumakona nggari setu ri tatongo jala naria romba'a toburo nantuki I'a ante nongare-ngare, “Muli i Daud! Potowemo kami!”

²⁸Tempo Yesus nesua riara saongu sapo, nesua wo'umo toburo romba'a etu nompakamosu I'a. Pade nekutanamo I'a ka ira, “Niparasaya komi Aku nakuasa mompakabelo matamu?” Nesono ira, “Niparasaya kami, Pue.”

²⁹Naopu etu Yesus nanggabe mata ira ante nanguli, “Majadimo nantuki nuapa to niparasaya komi!”

³⁰Kaliu-liu nabelomo mata ira romba'a. Pade Yesus nantagi ira ante mpu'u-mpu'u. Niulina, “Ne'e ntoto ratesa ka tau-tau ntanina nuapa to najadi ri ja'imu etu.”

³¹Tapi sangga nalaipa nggari setu ira nompatolele kareba Yesus ri njumaongu bagia etu.

³²Sangga nalaipa romba'a toburo pane'a, naria wo'umo samba'a tau nikeni mpaka ri ja'i Yesus. Tau etu nabobomo sabana nipesua seta.

³³Jadi tempo seta etu nipopalai Yesus nggari ja'ina nasowamo i'a notesa. Nanggita kajadia etu nasumara mpu'umo todea sampe ira nanguli, “Kajadia ewa etu da'apa sanggani nikita ntau ri tana Israel e'i.”

³⁴Tapi nangulimo tau-tau to Parisi ri setu, “A, tau e'i aga nompopalai seta ante kuasa nggari ja'i Magau nu Seta mboto!”

³⁵Naopu etu nalaumo Yesus nompebutu ngata. I'a nopaguru ri sapo-sapo mpodade ira bo nompatolele Kareba Belo to nanguli iwenumo ane Alatala moparenta ri dunia. Pade nipakabelona pura-pura tau to naju'a bo nalente korona.

³⁶Tempo I'a nanggita todea, naasi mpu'umo matana, sabana nandasamo ira pade da'a ria tau nantulungi ira ewa bimba da'a ria topoewuna.

³⁷Pade nangulimo Yesus ka anaguruna, “Nadeamo tau nasadia mantarima Kareba Belo. Ira nasimbayu ewa pae to natasamo, namalamo rakato. Tapi tau topokato da'a nadeaka.

³⁸Sabana etu komi kana merapi ka Pue ntinalu etu ala I'a mompakau tau malau mokato.”