Read Da'a Kaili MARKUS 1 Bible Online

MARKUS 1 - Da'a Kaili bible

MARKUS 1

¹Tesa e'imo pamulana Kareba Belo to nombatesa Yesus Kristus, Ana nu Alatala.

²Naria tesa Alatala to nitulisi nabi Yesaya nggaolu iwe'i: “Kita we'i! Aku nompakau batuaku mokolu nggari ja'imu ala i'a mompakasadia jala ka Komi. [1]

³Naria samba'a tau nongare-ngare ri karawa baina iwe'i: ‘Pakasadiamo jala ka i Pue! Pakanoa jala to ratukina!’ ” [2]

⁴Ewa to nitulisi etu iwetu wo'u Yohanes Topediu neumba ri karawa baina. I'a nompatuduki tau dea iwe'i: “Kajeamo komi nggari pokainggumu to naja'ana. Pade komi kana radiu ala silaka-silakamu raampungi nu Alatala.”

⁵Pade naratamo tau-tau ri ja'ina nggari njumaongu Bagia Yudea bo pura-pura pue ngata Yerusalem. Ira pura-pura nompangaku silaka ira pade nidiu Yohanes ri Binangga Yordan ewa tandaina najeamo ira nggari silaka ira etu.

⁶Pakea Yohanes nikawia nggari wulu nu unta pade sulepena nikawia nggari kulimba, pade panggonina nggaboro bo ue wani.

⁷I'a nompatolele tesa ka tau dea iwe'i: “Damariapa ngena to maratana nggari puriku to neliu nggakuasa nggari aku. Nau aga motungga mombawole lui sapatuna aku e'i da'a ntoto masipato.

⁸Aku e'i nombadiu komi ante ue ewa tandaina najeamo komi nggari silakamu. Tapi I'a kana mombadiu komi ante Nosa Nagasa nu Alatala.”

⁹Tempo etu naratamo Yesus nggari ngata Nazaret ri Bagia Galilea, pade I'a nidiu Yohanes ri Binangga Yordan.

¹⁰Iwetu Yesus nesore nggari ue nikitana langi natebea pade Nosa Nagasa nu Alatala nana'u ri ja'ina ewa samba'a tonji banggebodo.

¹¹Pade naria suara nggari suruga nanguli, “Ikomo Anaku to nipotoweku. Ikomo to nikonoa raraku.”

¹²Naopu etu kaliu-liu Nosa Nagasa nu Alatala nanggeni Yesus mpaka ri karawa baina.

¹³Pade Yesus neto'o ri setu patampulu mbengi kasaena nipesoba Magau nu Seta. I'a nosanggani-nggani ante binata-binata naila ri setu, pade malaeka-malaeka i Pue narata nantulungi I'a.

¹⁴Naliu Yohanes Topediu nitarunggu, nalaumo Yesus mpaka ri Bagia Galilea nompatolele Kareba Belo nggari ja'i Alatala.

¹⁵Niulina, “Naratamo tempona to nipakatantu Alatala. Namosumo tempona Alatala moparenta ri dunia e'i ewa magau. Kajeamo komi nggari pokainggu komi to naja'ana, pade parasayamo Kareba Belo nggari ja'i Alatala!”

¹⁶Tempona Yesus nolumako ri wiwi Rano Galilea I'a nanggita i Simon ante tua'ina Andreas. Tempo etu ira nantendeaka jala nompemala bau ri rano etu sabana ira topompemala bau.

¹⁷Nangulimo Yesus ka ira, “Kamaimo, tukimo Aku, pade Aku mompatuduki komi mangelo tau majadi topantuki Alatala.”

¹⁸Nangepe tesa etu kaliu-liu ira romba'a nompalasi jala ira ri setu pade nalau nantuki Yesus.

¹⁹Naopu etu Yesus nompapola polumakona sakedi pade nikitana Yakobus, ana i Zebedeus, bo tua'ina Yohanes riara saongu sakaya nompakabelo jala ira.

²⁰Iwetu Yesus nanggita ira nangulimo I'a ka ira, “Kamaimo, tukimo Aku.” Nangepe etu ira romba'a nompalasi uma ira riara sakaya nosanggani-nggani ante tau-tau to nigajina, pade nalaumo ira nantuki Yesus.

²¹Naopu etu naratamo Yesus ante topantuki-topantuki I'a ri ngata Kapernaum. Pade ri Eo Mpenonto nesuamo I'a ri sapo mpodade nto Yahudi pade nopaguru ri setu.

²²Nasumara mpu'u tau-tau to nangepe pepatudukina sabana akalana nopaguru nakuasa mpu'u, da'a ewa guru-guru agama.

²³Tempo etu riara sapo mpodade etu naria samba'a tau to nipesua seta. Sampegoli nongaremo i'a ante suara namangga,

²⁴“E, Yesus to Nazaret! Nuapa madota mupowia ka kami? Komi narata mompakaropu kami? Ninjaniku isema Komi. Komimo to Nagasana nggari ja'i Alatala!”

²⁵Tapi Yesus nanggarau seta etu, “Pekalino! Palaimo nggari ja'i ntau etu!”

²⁶Nangepe etu seta etu nombagagoya-goya mpakagai tau etu pade nesuwumo i'a nggari ja'i ntau etu ante nongare-ngare.

²⁷Nanggita etu nasumara puramo tau ri setu sampe ira nosimpekutana samba'a bo samba'a, “Hai! Nuapa e'i? Sangele pepatuduki to nabouna. Ante kuasana I'a nomparenta seta-seta malai pade seta-seta etu natundu nantuki parentana!”

²⁸Naopu etu nasalisa natolele kareba ewa Yesus sampe ri njumaongu Bagia Galilea.

²⁹Sangga nesuwupa nggari sapo mpodade etu nalaumo Yesus mpasanggani-nggani ante Yakobus bo Yohanes mpaka ri sapo i Simon bo Andreas.

³⁰Riara njapo etu matu'a besi i Simon naturu ri paturuna sabana naju'a pane. Iwetu Yesus nesua rara njapo notesamo tau ri setu ka I'a, “Guru, naju'a we'i matu'a besi i Simon.”

³¹Jadi nalaumo Yesus nompakamosu besi etu. Nisokona palena pade nitulungina besi etu nembangu. Kaliu-liu nabelomo ju'ana, pade nompamulamo i'a nangala panggoni nikenina ka ira.

³²Ulungguwia etu tempo nasolomo eo, naratamo tau dea nanggeni roa-roa ira to naju'a bo tau-tau nipesua seta mpaka ri ja'i Yesus.

³³Pura-pura pue ngata etu nasiromu ri ngayo sapo to nipeto'o Yesus etu.

³⁴Pade Yesus nompakabelo nadea tau to nawela mpengele-ngele ju'a, pade nadea seta nipopalaina nggari ja'i ntau dea. Da'a nipalogana seta-seta etu notesa sabana ninjani ira isema I'a.

³⁵Dakampadondo njiina kaeona etu nembangumo Yesus nompalasi sapo etu. Pade nalaimo I'a mpaka ri saongu peto'o to nakalinoana pade nosambaya ri setu.

³⁶Simon bo roa-roana nalau nangelo I'a.

³⁷Sangga nirata irapa Yesus, nangulimo ira ka I'a, “Guru, pura-pura tau nangelo Komi.”

³⁸Nangulimo Yesus ka ira, “Kamaimo kita mompapola polumakota mpaka ri ngata-ngata ntanina ala Aku mamala mompatolele Kareba Belo ka tau-tau ri setu wo'u, sabana etumo patuju karataku e'i.”

³⁹Jadi nalaumo I'a nompatolele Kareba Belo ri sapo-sapo mpodade ri njumaongu Bagia Galilea. Pade I'a wo'u nompopalai seta-seta nggari ja'i tau-tau to nipesua seta.

⁴⁰Naopu etu naratamo samba'a tau to naju'a bete mpaka ri ja'i Yesus. Nekadedemo i'a ri ngayona pade nerapi ante mpu'u-mpu'u, “Pue, ane Komi madota, Komi mamala mompakabelo ju'aku e'i.”

⁴¹Nanggita tau etu naasi mpu'umo mata Yesus. I'a nangojo palena nanjoko koro ntau etu, pade niulina ka i'a, “Aku madota. Kabelomo ju'amu!”

⁴²Kaliu-liu nalinomo ju'a ntau etu pade nabelo balimo korona.

⁴³Pade Yesus nompakau i'a nalai ante nompopatora i'a iwe'i:

⁴⁴“Tora-tora, ne'e mutesa ka isema-sema nuapa to najadi ri koromu. Tapi kalaumo komi mompopokita koromu ka topanggeni agama ala rakitana nabelomo ju'amu. Pade waimo pesomba ka Alatala ewa to niparenta i Musa ala mompopokita ka tau pura-pura nabelomo ju'amu.”

⁴⁵Tapi nalaumo tau etu nompatolele kajadia etu ka tau-tau ri umba-umba sampe Yesus mana namala mesua nggamata-mata riara ngata. I'a aga neto'o ri sawaliku ngata ri peto'o nakalinoana. Tapi naupa iwetu tau dea danarata ri ja'ina nggari umba-umba ngata.