Read Da'a Kaili MARKUS 10 Bible Online

MARKUS 10 - Da'a Kaili bible

MARKUS 10

¹Naopu etu Yesus nompalasi peto'o etu pade nalau mpaka ri Bagia Yudea bo bagia sambote Binangga Yordan. Ri setu nadea wo'u tau narata nantaguni I'a, pade ewa kabiasana Yesus nompatuduki ira.

²Naria bara sakuya mba'a tau to Parisi narata ri ja'i Yesus ala mompesoba I'a. Nekutanamo ira ka Yesus, “Nantuki Atura-atura agamata mamala samba'a langgai mombasompo rongona besi?”

³Nesonomo Yesus, “Nuapa to niparenta nabi i Musa ka komi?”

⁴Nesono ira, “Musa nompaloga posompo porongo ane langgai mombawai sura tala ka rongona besi.”

⁵Nanguli wo'umo Yesus ka ira, “Atura etu nitulisi i Musa ka komi sabana nako'o gaga rara komi!

⁶Tapi da'a iwetu ri lamba pamulana tempo Alatala nompajadi dunia. I'a nompajadi manusia langgai bo besi.

⁷Etumo sabana samba'a langgai kana mompalasi indo umana pade maroo ri ja'i rongona besi,

⁸pade ira romba'a kana majadi samba'a. Ira mana rauli romba'a, tapi damo samba'a.

⁹Sabana etu nuapa to nipakasaongu Alatala, ne'e rapopoga'a manusia!”

¹⁰Tempo ira raranjapomo nekutana wo'umo anaguru Yesus ka I'a ewa pepatudukina pani'a.

¹¹Nangulimo Yesus ka ira, “Isema-sema mombasompo rongona besi pade momporongo besi ntanina, i'a nireke nebualo.

¹²Pade ane besi moga'a ante rongona langgai pade raporongo langgai ntanina, i'a wo'u nireke nebualo.”

¹³Naopu etu naratamo tau-tau nanggeni ana-ana ira mpaka ri ja'i Yesus ala I'a mombadika palena ri koro ira pade mombagane ira. Tapi anaguru-anaguruna nanggarau tau-tau etu.

¹⁴Nanggita etu naraumo rara Yesus sampe niulina ka anaguru-anaguruna, “Pakambamo ngana-ngana etu marata ri ja'iku! Ne'e ratagi ira, sabana aga tau-tau to noinggu ewa ngana-ngana e'i to masipato majadi todea riara Poparenta nu Alatala.

¹⁵Aku mpu'u-mpu'u notesa ka komi, da'a ria samba'a tau namala majadi todea riara Poparenta nu Alatala ane i'a da'a mekou ri ja'i Alatala nasimbayu ewa ngana-ngana e'i.”

¹⁶Pade nisalungguna ngana-ngana etu samba'a bo samba'a pade nidikana palena ri koro ira ala mombagane ira.

¹⁷Tempo Yesus nompapola polumakona, naria samba'a tau nangowa nantotoaka I'a. Nekadedemo i'a ri ngayo Yesus ante nanguli, “Guru to nabelona, nuapa masipato kupowia ala mombarata katuwua mabelo sampe ri kasae-saena?”

¹⁸Nesonomo Yesus, “Nokuya komi nanguli Aku nabelo? Da'a ria tau ntanina to nabelona, aga Pue Alatala.

¹⁹Natantu ninjanimu parenta-parenta Alatala to nanguli, ‘Ne'e mepatesi, ne'e mogau sala ante tau da'a rongomu mboto, ne'e mangangga, ne'e modawa ri ngayo ntopotangara, ne'e mebagiu, pade bilamo indo umamu.’ ”

²⁰Nesonomo tau etu, “Guru, parenta-parenta etu nitukiku puramo nggari kakediku.”

²¹Pade Yesus nombalele mata tau etu ante towena, pade niulina ka i'a, “Aga sangelepa to nakura ri ja'imu. Kalau pobalu puramo kakalumanamu pade palelemo doina ka tau-tau nakasiasi ala murata kakalumana ri suruga. Maopu etu kamai, tukimo Aku.”

²²Nangepe tesa Yesus etu nabalimo lenje ntau etu sampe nalaimo i'a ante nasusa rara, sabana nadea mpu'u kakalumanana.

²³Naopu etu Yesus nanggita anaguru-anaguruna to nantalili I'a pade niulina ka ira, “Nakaja mpu'u tau nakalumana majadi todea riara Poparenta nu Alatala.”

²⁴Nangepe etu natekaja mpu'umo rara anaguruna etu. Tapi Yesus nompapola tesana ka ira, “Ana-anaku, nakaja mpu'u tau majadi todea riara Poparenta nu Alatala.

²⁵Nagampapa saongu binata to nabetena ewa unta mesua ri bolo jaru pade samba'a tau nakalumana majadi todea riara Poparenta nu Alatala.”

²⁶Nangepe etu nantambai naingu anaguruna sampe ira notesa samba'a bo samba'a, “Ane iwetu natantumo da'a ria samba'a tau to mamala rapakasalama!” [14]

²⁷Yesus nombalele mata ira pade nanguli, “Ane aga nggari manusia, natantu da'a mamala majadi. Tapi da'a iwetu ante Alatala. Sabana pura-pura mamala majadi ane I'a madota.”

²⁸Naopu etu nangulimo i Petrus ka Yesus, “Kita we'i, Pue. Kami e'i nompalasi pura-pura nuapa to naria ri ja'i kami pade nantuki Komi.”

²⁹Nangulimo Yesus, “Aku mpu'u-mpu'u notesa ka komi, butu mba'a tau to nompalasi sapona bara sampesuwuna, bara indo umana, bara anana bo tinaluna sabana nantuki Aku bo nanggeni Kareba Belo,

³⁰natantumo i'a kana mombarata bali riara nggatuwuna we'i-we'i satu nggani kadeana nggari nuapa to nipalasina. I'a kana mombarata sapo bo sampesuwu langgai ante sampesuwu besi, indo, ngana-ngana bo tinalu, nau ante pepandasa. Pade ri tempo nggapurina i'a kana mombarata katuwua mabelo sampe ri kasae-saena.

³¹Tapi nadea tau to nalanga katuwuna we'i-we'i kana majadi tau to naede katuwuna banepia. Pade nadea wo'u tau to naede katuwuna we'i-we'i kana majadi tau to nalanga katuwuna banepia.”

³²Tempo Yesus ante anaguruna riara mpolumako ira mpaka ri ngata Yerusalem Yesus nolumako njamba'ana ri koluna. Nakini-kini rara anaguruna nompekiri nuapa majadi ri ja'i Yesus ri setu, pade naeka wo'u rara tau-tau ntanina to nantuki ira nggari purina. Pade sangganipa Yesus nompokio anaguruna sampulu romba'a ri ja'ina pade nompamulamo I'a notesa ka ira nuapa to majadi ri ja'ina.

³³Niulina, “Epemo mpakabelo-belo! We'i-we'i kita mantende mpaka ri ngata Yerusalem. Ri setu Aku, Ana nu Manusia kana rapobalu ka balengga-balengga topanggeni agama bo guru-guru agama. Pade ira mompakatantu riara potangara Aku kana rapatesi. Pade Aku kana rawai ka tau-tau da'a to Yahudi,

³⁴pade Aku kana rapongei-ngei bo ratailu ira. Pade Aku kana raporo ira mpakandasa pade kaopuna rapatesi ira. Tapi ri eo katolueona Aku kana matuwu bali.”

³⁵Naopu etu Yakobus bo Yohanes ana i Zebedeus nompakamosu Yesus pade nanguli, “Guru, nisarumaka kami nuapa raperapi kami kana rapoiyo Komi.”

³⁶Nekutana Yesus ka ira, “Nuapa to nipodota komi ala kupowia ka komi?”

³⁷Nesonomo ira, “Palogamo kami mekatoko moparenta mpasanggani-nggani ante Komi tempo Komi moparenta ante nakuasa ewa magau banepia, samba'a ri pangganamu pade samba'a ri panggeimu.”

³⁸Nangulimo Yesus ka ira, “Da'a ninjani komi nuapa to niperapi komi etu. Iwenumo? Rapakule komi manggolo pepandasa nasimbayu ewa pepandasa to rapawela ka Aku, pade manta'amaka kasusa ewa to kurasai banepia?”

³⁹Nesonomo ira, “Rapakule!” Pade nangulimo Yesus ka ira, “Natantumo komi kana manggolo pepandasa nasimbayu ewa pepandasa to rapawela ka Aku, pade komi kana mombarasai nuapa to kurasai.

⁴⁰Tapi da'a Aku to nakuasa mompakatantu isema masipato mekatoko ri pangganaku bara ri panggeiku. Peto'o etu bagia ira to nipakatantu Umakumo.”

⁴¹Nangepe nuapa to niperapi Yakobus bo Yohanes sampulu mba'a anaguru Yesus ntanina nanggarau ira romba'a etu.

⁴²Tapi Yesus nompokio ira pura-pura mpaka ri ja'ina pade niulina ka ira, “Ninjani komi mbotomo ira to nireke topoparenta tau-tau da'a nosinjani ante Alatala nabiasa nomparenta todea ira ante nasombo. Pade topanggeniaka-topanggeniaka ira nompandasa todea ira.

⁴³Tapi da'a masipato komi moinggu iwetu! Kakonona kana iwe'i: Isema-sema nggari tatongo komi to madota malanga panggana i'a etu kana majadi topantulungi roana.

⁴⁴Pade isema-sema to madota majadi to nalanga katuwuna kana majadi batua komi pura-pura.

⁴⁵Sabana Aku, Ana nu Manusia mboto da'a narata ri dunia e'i ala ratulungi ntau tapi ala mantulungi tau, pade ala mombawai koroku rapatesi mantolo silaka-silaka ntau dea.”

⁴⁶Naopu etu naratamo Yesus ante anaguruna ri ngata Yerikho. Tempo Yesus nesuwu nggari ngata etu nosanggani ante anaguruna bo nadea mpu'u tau ntanina, ri setu naria samba'a toburo nosanga ka i Bartimeus, ana i Timeus, nekatoko nerapi-rapi ri wiwi jala.

⁴⁷Tempo i'a nangepe lele Yesus to Nazaret noliu ri setu, nompamulamo i'a nongare, “Yesus, Muli i Daud, potowemo aku e'i!”

⁴⁸Nadea tau nangontiaka i'a ante nanguli, “Ne'e makanano! Pekalinomo iko!” Tapi i'a aga nantambai nongare ante suara to namangga, “Muli i Daud, potowemo aku!”

⁴⁹Nangepe etu nenontomo Yesus, pade niulina ka tau ri setu, “Pokiomo i'a wemai.” Jadi ira nompokio toburo etu ante nanguli, “Pakaroo raramu! Pekanggoremo. I'a nompokio iko.”

⁵⁰Nangepe etu nipalewanamo buyana pade nompari-mpari nekanggore nalau nantotoaka Yesus.

⁵¹Pade nekutanamo Yesus ka i'a, “Nuapa to mupodota kupowia ka iko?” Nesonomo toburo etu, “Guru, to nipodotaku ala mataku mamala mekita!”

⁵²Pade nangulimo Yesus ka i'a, “Panjilimo. Nabelomo matamu sabana iko nomparasaya.” Kaliu-liu nabelomo mata ntoburo etu. Pade nalaumo i'a nantuki Yesus riara mpolumakona.