Read Da'a Kaili MARKUS 11 Bible Online

MARKUS 11 - Da'a Kaili bible

MARKUS 11

¹Tempo Yesus ante anaguruna namosumo ante ngata Yerusalem, naratamo ira ri ngata Betfage bo ngata Betania ri kente nu Bulu Zaitun. Ri setu Yesus nompakau romba'a anaguruna mokolu ka I'a.

²Niulina ka ira, “Kalaumo komi mpaka ri ngata to namosuna ri setu. Tempona komi mesua rara ngata komi kana mombarata saongu ana keledai nitataka ri setu to da'apa sanggani nipesawi ntau. Wolemo ana keledai etu nggari potatakana pade umbumo wemai.

³Pade ane maria tau mompekutana komi, ‘Nokuya komi nombawole ana keledai etu?’ uli ka tau etu, ‘Pue paraluu mompake ana keledai e'i. Damo rapopanjilina ngina.’ ”

⁴Jadi nalaumo ira romba'a etu pade nirata ira mpu'u saongu ana keledai nitataka ri wiwi jala namosu pewobo saongu sapo. Pade niwole iramo ana keledai etu nggari potatakana.

⁵Tempo etu nekutanamo bara sakuya mba'a tau to nenggore ri setu, “Nuapa nipowia komi? Nokuya komi nombawole ana keledai etu?”

⁶Pade nesonomo ira nantuki tewai to nitesa Yesus ka ira. Nangepe etu tau-tau etu nompaloga ira nanggeni ana keledai nggari setu.

⁷Jadi ana keledai etu niumbu ira mpaka ri ja'i Yesus. Narata ri setu nilampi ira ante buya, pade nesawimo Yesus ri bungguna.

⁸Nadea tau ri setu nombajini buya ira ri jala pade naria wo'u tau nombatale rangga-rangga kayu nggedi to nanggamatana to niala ira nggari pampa ewa tandai pebila ira ka Yesus.

⁹Pade nongare-ngaremo pura-pura tau, nabeloka ira ri koluna, nabeloka ira ri purina. Ira nanguli, “Ratoiyata Alatala! Perapi Pue mombagane Magau to narata niposumba Alatala! [15]

¹⁰Perapi Pue mombagane poparenta nu Magau to maratana, etumo poparenta Muli nu umata Magau Daud. Ratoiyata Alatala ri suruga!”

¹¹Tempo Yesus nesua riara ngata Yerusalem nalaumo I'a mpaka ri Sapo Mpepue nanggita pura-pura nuapa to naria ri setu. Naopu etu nalaimo I'a mpaka ri ngata Betania nosanggani ante anaguruna sampulu romba'a sabana nangguwiamo.

¹²Kaeona mpadondo tempo ira nalai nggari ngata Betania, naoromo ta'i Yesus.

¹³Pade danggawao I'a nanggita sampu'u kayu ara to noroyamo. Jadi nalaumo I'a nompakamosu kayu etu ala manggita ane maria wuana. Tapi tempona I'a narata ri setu da'a ria kamba saongu wuana niratana aga tawana bayangi, sabana da'apa tempo mpowuana.

¹⁴Pade I'a nombajanjiaka kayu ara etu ante nanguli, “Ne'e mana maria wuamu rakoni ntau sampe ri kasae-saena.” Tesana etu niepe anaguruna.

¹⁵Pade naratamo ira ri ngata Yerusalem. Sangga naratapa ri setu nesuamo Yesus riara Sapo Mpepue, pade nompamulamo I'a nompopalai topotomu nggari setu. Nisumbolinakana meja-meja ntoposinjula doi bo kadera-kadera ntopobalu tonji banggebodo.

¹⁶Pade da'a nipalogana kamba samba'a manggeni mbara-mbara nantuki jala moliu ri lalowo Sapo Mpepue.

¹⁷Pade nipatudukina tau dea ri setu iwe'i: “Riara Buku Nagasa naria nitulisi iwe'i: ‘Sapoku kana rauli sapo mposambaya tau njumangata.’ [16] Tapi komi e'i nompajadi Sapo Mpepue e'i peto'o parampo!”

¹⁸Balengga-balengga topanggeni agama bo guru-guru agama nangepe kajadia etu. Jadi nompamulamo ira mangelo jala mompatesi Yesus sabana naekamo rara ira ri ja'ina nanggita pura-pura tau nogumaa nangepe pepatudukina.

¹⁹Tempo ntora mawengimo nalai wo'umo Yesus ante anaguruna nggariara ngata etu.

²⁰Kaeona mpadondo tempo ira noliu ri jala mpaka ri ngata Yerusalem nikita ira kayu ara to nijanjiaka Yesus yowi. Nangau puramo sampe ri kalena.

²¹Pade natetoramo rara i Petrus kajadia yowi ante kayu etu. Niulina ka Yesus, “Kitamo, Guru. Kayu ara to nijanjiaka Komi yowi nangau puramo!”

²²Nangulimo Yesus, “Parasayamo ri ja'i Alatala!

²³Aku mpu'u-mpu'u notesa ka komi, komi mamala manguli ka bulu e'i, ‘Polinjamo, potingganawu riara ntasi.’ Pade etu kana majadi ane komi da'a morompenga pekirimu pade manjarumaka nuapa to niuli komi etu kana majadi.

²⁴Sabana etu kuuli ka komi, ane komi merapi sangele ka Pue Alatala, parasayamo pomperapimu etu kana madupa, pade nuapa to niperapimu etu kana ratarima komi.

²⁵Pade tempo komi mekanggore mosambaya ane maria kasala roamu ri ja'imu, ampungi ntani ruru i'a ala Umamu to naria ri suruga wo'u mombaampungi sala-salamu. [

²⁶Tapi ane komi da'a mombaampungi roamu, natantumo Umamu ri suruga wo'u da'a mombaampungi sala-salamu.”]

²⁷Pade narata wo'umo ira ri ngata Yerusalem. Tempona Yesus nolumako ri lalowo Sapo Mpepue naratamo balengga-balengga topanggeni agama, guru-guru agama bo totu'a-totu'a nto Yahudi.

²⁸Nekutanamo ira ka I'a, “Ante kuasa nggari umba Komi nompopalai topotomu nggari Sapo Mpepue yowi? Isema nombawai kuasa etu ka Komi?”

²⁹Nesonomo Yesus, “Naria wo'u sangaya kupekutana ka komi ntani ruru. Sonomo pompekutanaku e'i pade Aku manguli ka komi ante kuasa nggari umba Aku nowia mpengaya-ngaya etu.

³⁰Ulimo ka Aku, isema nombawai kuasa ka Yohanes Topediu nombadiu tau? Alatala atau manusia?”

³¹Pade nosimpekutanamo ira samba'a bo samba'a, “Iwenu kita mombasono I'a? Ane kita manguli kuasa Yohanes nggari ja'i Alatala natantumo I'a kana manguli ka kita iwe'i: ‘Ane iwetu nokuya komi da'a nomparasaya Yohanes?’

³²Tapi da'a mamala kita manguli kuasa Yohanes nggari ja'i manusia!” Niuli ira iwetu apa naeka ira ri ja'i ntau dea, sabana tau dea nomparasaya Yohanes mpu'u-mpu'u samba'a nabi.

³³Jadi nesonomo ira ka Yesus, “Da'a ninjani kami nggari umba kuasana.” Pade nangulimo Yesus ka ira, “Ane iwetu da'a wo'u kutesa ka komi ante kuasa nggari umba Aku nowia mpengele-ngele etu.”