Read Da'a Kaili MARKUS 12 Bible Online

MARKUS 12 - Da'a Kaili bible

MARKUS 12

¹Pade nompamulamo Yesus notesa ka topanggeniaka-topanggeniaka nto Yahudi ante porapa. Niulina, “Naria samba'a tau nombatuja anggur ri tinaluna. Naopu etu tinalu etu niwala ntikuna, pade nikaena saongu lowu peto'o parewa rapompea wua anggur. Nikawiana wo'u sou panggatono tinalu. Naopu etu nipajana tinalu etu ka bara sakuya mba'a topokarajaa pade nalaimo i'a mpaka ri ngata ntanina.

²Sangga naratapa tempona mompui wua anggur nipakaunamo samba'a batua malau mpaka ri ja'i ntopokarajaa tinaluna etu ala mantarima bagiana nggari asele tinalu nipotuja anggur etu.

³Tapi ira aga nombasoko batua etu pade nombaboba i'a pade nompakau i'a manjili ante pale ntoya.

⁴Naopu etu pue ntinalu nompakau wo'umo samba'a batuana ntanina mpaka ri ja'i ntopokarajaa tinalu. Tapi i'a wo'u niboba ira sampe nabela balenggana, pade i'a mpu'u-mpu'u nipakaeya ira.

⁵Naliu etu pue ntinalu etu nompakau wo'umo batua to santanina mpaka ri ja'i ntopokarajaa tinalu. Tapi i'a aga nipatesi ira. Pade iwetu wo'u to nipowia ira ante batua-batua ntanina. Naria to niboba ira, pade naria ntanina to nipatesi ira.

⁶Kaopuna naboli damo samba'a lau ri ja'i pue ntinalu, etumo anana mboto to nipotowena. Anana etu nipakauna mpaka ri ja'i ntopokarajaa tinalu. Nipekirina, ‘Natantumo ira kana mekou ri ja'i anaku mboto.’

⁷Tapi iwetu nanggita ana nu pue ntinalu etu, nangulimo topokarajaa etu samba'a bo samba'a, ‘Kitamo! Etumo ana pue ntinalu to majadi pue ntinalu banepia. Kamaimo kita mompatesi i'a ala tinalu e'i raalata majadi bagiata.’

⁸Jadi nisoko iramo ana pue ntinalu etu pade i'a nipatesi ira, pade watabakuna nitajiaka ira ri sawaliku tinalu etu.”

⁹Pade nekutanamo Yesus ka topanggeniaka nto Yahudi etu, “Jadi nuapa to rapowia pue ntinalu etu? Natantumo i'a kana marata mompatesi topokarajaa tinalu etu pade mombapaja tinalu etu ka tau-tau ntanina.

¹⁰Natantumo nibasa komi tesa riara Buku Nagasa to nanguli iwe'i: ‘Watu to nitajiaka ntopowia sapo watu etumo to najadi palo mpondasi to neliu nggaroso.

¹¹Etu nipowia i Pue, sangele powia to nipogumaa matata.’ ” [17]

¹²Nangepe etu topanggeniaka nto Yahudi etu nompasimbuku mangelo jala manjoko Yesus, sabana ninjani ira porapa Yesus etu nipawela ka ira. Tapi ira naeka ka tau dea. Jadi nalaimo ira nompalasi I'a.

¹³Naopu etu topanggeniaka-topanggeniaka nto Yahudi etu nompakau bara sakuya mba'a to Parisi ante bara sakuya mba'a anabua Magau Herodes malau mangelo kasala tesa Yesus.

¹⁴Sangga naratapa ira ri ja'i Yesus nangulimo ira, “Guru, ninjani kami Komi samba'a tau to nanoana. Komi da'a ntoto naeka ka isema-sema sabana Komi da'a nompoposisala manusia. Komi batena nompatuduki ante nanoto pokainggu nuapa to masipato riara mpanggita Alatala. Jadi tulungi ulimo ka kami nantuki Atura-atura agama masipato mombabayari balasitee ka Magau Kaisar bara da'a?

¹⁵Masipato kami mombabayari etu bara da'a?” Tapi ninjani Yesus patuju ira aga mebagiu. Jadi niulina ka ira, “Nokuya komi mangelo kasala tesaku? Keni ka Aku wemai sampeka doi salaka ala kukita!”

¹⁶Pade nikeni ira mpu'umo sampeka doi etu. Pade nekutanamo I'a ka ira, “Gambara ante sanga isema to naria ri doi e'i?” Nesonomo ira, “Gambara ante sanga Magau Kaisar.”

¹⁷Pade nangulimo Yesus ka ira, “Ane iwetu, waimo ka Magau Kaisar to masipato rawai ka Magau Kaisar, pade waimo ka Alatala to masipato rawai ka Alatala!” Nangepe pesono Yesus etu, nogumaamo ira.

¹⁸Naopu etu naratamo bara sakuya mba'a tau to Saduki ri ja'i Yesus. Iramo tau-tau to Yahudi to nomparasaya tau namate da'a mana matuwu bali banepia. Jadi nekutanamo ira ka Yesus,

¹⁹“Guru, nabi i Musa nantulisi atura e'i ka kita: ‘Ane maria samba'a langgai norongo pade da'apa rongona noana namatemo i'a, sampesuwuna mboto kana momporongo baluna etu ala muli ira romba'a majadi muli sampesuwuna to namatena etu.’ [18]

²⁰Naria ira nosampesuwu pitumba'a langgai bayangi. Ulumbuana norongomo, tapi da'apa ira njamboko noana namatemo i'a.

²¹Pade tua'ina karomba'ana nomporongo baluna etu. Tapi da'apa ira noana i'a wo'u namate. Pade wa'a wo'u to najadi ante katolumba'ana

²²sampe ri kapapitumba'ana. Da'a ria samba'a ira nomboli ngana ka besi etu. Kaopuna besi etu wo'u namate.

²³Jadi to rapekutana kami ka Guru iwe'i: Tempona tau-tau namate matuwu bali banepia, besi etu rongo isema, sabana i'a niporongo ira pitumba'a?”

²⁴Nesonomo Yesus ka ira, “Nasalamo pompekiri komi sabana da'a ninjani komi isi Buku Nagasa pade da'a wo'u ninjani komi kuasa nu Alatala.

²⁵Tempo tau namate matuwu bali banepia, katuwu ira kana masimbayu ewa malaeka-malaeka ri suruga. Ira mana morongo bo mana raporongo.

²⁶Iwenumo? Da'apa nibasa komi nuapa to nitesa riara Buku nabi i Musa ewa tau namate matuwu bali? Ri ayat-ayat to nantesa kajadia ante santungu gumbu to najelana da'a nikoni nu apu, Alatala nanguli ka i Musa, ‘Akumo Alatala Abraham, Alatala Ishak bo Alatala Yakub.’ [19]

²⁷Ninjanita Pue Alatala da'a Alatala ntau to namatena, tapi I'a Alatala ntau to natuwuna. Jadi nanotomo Abraham, Ishak bo Yakub mana namate. Nasalanjalamo pompekiri komi etu!”

²⁸Tempo etu naratamo samba'a guru agama ri ja'i Yesus. Niepenamo tesa Yesus ante tau-tau Saduki pani'a pade niepena pesono Yesus nabelo mpu'u. Jadi nekutanamo i'a ka Yesus, “Guru, parenta Alatala umbana to neliu nggapokona?”

²⁹Nesonomo Yesus, “To neliu nggapokona iwe'i: ‘Umba komi tau-tau to Israel, Pue Alatalata, Pueta samba'a lau.

³⁰Potowemo Pue Alatalamu ante mpu'u-mpu'u raramu, pade ante pura-pura katuwumu, pade ante pura-pura pekirimu, pade ante pura-pura karoso koromu.’ [20]

³¹Pade parenta karongelena iwe'i: ‘Potowemo sanggamanusiamu nasimbayu ewa komi nompotowe koromu mboto.’ [21] Da'a ria parenta ntanina to neliu nggapokona nggari rongele parenta etu.”

³²Pade nangulimo guru agama etu ka I'a, “Nakono mpu'u, Guru. Nakonomo tesa komi nanguli Alatala aga samba'a lau pade da'a ria to ntanina, aga I'a.

³³Pade ewa niuli komi manusia kana mompotowe Alatala ante mpu'u-mpu'u rarana, ante pura-pura pekirina pade ante pura-pura karoso korona. Pade masipato kita mompotowe sanggamanusiata ewa korota mboto. Etu neliu nggabelo nggari mombawai pesomba to nitunu bo pewai-pewai ntanina ka Alatala.”

³⁴Sangga nangepe guru agama etu notesa ante nanoto iwetu, nangulimo Yesus ka i'a, “Komi ntoramo najadi todea riara Poparenta nu Alatala.” Nompamula nggari setu mana ria samba'a to nabia nompekutana Yesus.

³⁵Tempo Yesus nopaguru ri Sapo Mpepue nekutanamo I'a ka tau dea ri setu, “Iwenu sampe guru-guru agama nanguli Magau to Mompakasalama aga muli i Daud?

³⁶Magau Daud mboto ante pekeniaka Nosa Nagasa nu Alatala nanguli iwe'i: ‘Pue Alatala nanguli ka Pueku, kamai pekatokomo ri sabingga ngganaku sampe Aku mompowia pura-pura balimu mekou ri ja'imu.’ [22]

³⁷Jadi ane Magau to Mompakasalama niuli i Daud Puena, iwenu sampe I'a nireke aga muli i Daud?” Sangga nangepe tesa Yesus etu nadamba mpu'umo rara ntau dea.

³⁸Tempo Yesus nopaguru I'a nanguli, “Pakabelo-belo ala ne'e komi moinggu ewa guru-guru agama. Ira aga nompokono manjayo-njayo nompake baju ndoe ala rapogumaa ntau, pade ira aga nompokono rabila ntau riara potomu.

³⁹Ira aga nompokono mekatoko ri peto'o to nibilana riara sapo mpodade bara ri peto'o ntotu'a ri posusa.

⁴⁰Ira nombabagiu tobalu-tobalu besi ala mombarata sapo ira. Pade ira nantabuniaka pokainggu ira to naja'ana etu ante nosambaya nasae-sae. Etu sampe meliu nggatomo pesuku to rapawela ka ira banepia!”

⁴¹Naria sanggani Yesus nekatoko nantingayo peti mpesomba ri Sapo Mpepue pade nompariara iwenu tau mombasuaraka doi ira riara peti etu. Nadea tau to nasugina narata nombasuaraka doi ira riara peti mpesomba etu. Nadea mpu'u pewai ira.

⁴²Pade narata wo'u samba'a besi tobalu to nakasiasi mpu'u nombasuaraka doina rompeka doi tambaga to nakura mpu'u olina.

⁴³Pade Yesus nompokio anaguruna ri ja'ina, pade niulina ka ira, “Aku mpu'u-mpu'u notesa ka komi, besi tobalu to nakasiasi etumo to nadeapa pewaina nggari pura-pura tau ntanina to nombasuaraka doina riara peti mpesomba etu.

⁴⁴Sabana ira aga nombawai nggari labi nu doi ira, tapi tobalu besi etu nombawai ante kapepana. I'a nombawai pura-pura doi to naria ri ja'ina, etumo pura-pura katuwuna.”