Read Da'a Kaili MARKUS 13 Bible Online

MARKUS 13 - Da'a Kaili bible

MARKUS 13

¹Tempo Yesus nesuwu nggariara Sapo Mpepue, naria samba'a anaguruna nanguli ka I'a, “Guru, kitamo kagaya nu sapo-sapo e'i! Kitamo karoso nu watu-watuna!”

²Nangulimo Yesus ka i'a, “Nikitamu sapo-sapo to nagaya e'i. Tapi kana marata tempona banepia pura-pura to nikitamu e'i kana ragero sanggani sampe da'a mana maria watu e'i rapakamba mosisunju, nau kamba saongu. Pura-pura kana ragero.”

³Pade nalaumo Yesus nekatoko ri Bulu Zaitun ri peto'o to nantingayo Sapo Mpepue. Ri setu i Petrus, Yakobus, Yohanes bo Andreas nompekutana I'a nggalino,

⁴“Guru, tulungi uli ka kami nepia etu pura-pura majadi? Nuapa tandaina to mompakatantu namosumo kajadia to nitesa Komi pani'a?”

⁵Nesonomo Yesus ka ira, “Pakabelo-belo ala ne'e komi rabagiu!

⁶Sabana madea tau kana marata mompobalu sangaku. Ira manguli, ‘Akumo Magau to Mompakasalama!’ Madea tau kana mamala rabagiu ira iwetu.

⁷Ane komi mangepe wamba ntau mosipatesi bara mangepe lele ntau mosipatesi, ne'e komi maeka! Etu pura-pura kana majadi ntani ruru, tapi etu da'apa tandaina kaopu nu dunia.

⁸Tempo etu tau-tau nggari sangatana kana mosibali ka tau-tau to sangatana, pade magau simbau magau wo'u kana mosiewa. Pade ri umba-umba ri dunia e'i kana maria lingu pade kana maria wo'u kamateoro. Tapi etu pura-pura aga kasusa pamulana, ewa ju'a besi ntora moana.

⁹Tapi komi e'i, pakabelo-belo, sabana komi kana rasoko pade rakeni rapangadu ri ngayo ntopotangara agama. Komi kana raboba riara sapo mpodade pade komi kana rakeni ri ngayo ntopoparenta-topoparenta bo magau-magau sabana komi nomparasaya Aku. Tempo etu komi kana mompakanoto ka ira isema Aku.

¹⁰Pade Kareba Belo kana rapatolele ka pura-pura manusia ri dunia e'i ntani ruru.

¹¹Ane komi rasoko rakeni ratangara ne'e masusa pekirimu mompekiri nuapa pesono komi. Ane maratamo tempo etu tesamo nuapa to rawai ka komi, sabana da'a komi mboto to motesa tapi Nosa Nagasa nu Alatala.

¹²Pade ri tempona etu wo'u kana maria tau mombawai sampesuwuna mboto rapatesi, pade maria totu'a mombawai anana mboto rapatesi. Ngana-ngana kana mangewa indo umana pade mombawai ira rapatesi.

¹³Pade komi kana raporau rara ntau pura-pura sabana komi nomparasaya Aku. Tapi isema-sema to maroo momparasaya sampe ri kaopuna kana rapakasalama.”

¹⁴“Komi kana manggita to niuli ‘Kaja'ana to Mompakatantoru’ [23] mekanggore ri peto'o to da'a masipatona. (Isema-sema mombabasa tesa e'i pekiri mbotomo batuana.) Tempo etu majadi tau-tau to naria ri Bagia Yudea kana mangowa malai mpaka ri buluna.

¹⁵Ane tau-tau to nompamaya ka poiri ri bunggu nu sapona ne'e mana mesua mangala mbara-mbarana nggariara njapona.

¹⁶Ane tau-tau ri tinaluna, ne'e mana ira manjili ri ngata mangala pakeana. Palaimo masasinta!

¹⁷Ri eo etu mandasa mpu'umo besi-besi to matiana bo ira to danompatomi.

¹⁸Pekakaimo ka Alatala ala etu da'a majadi tempo leni.

¹⁹Sabana ri eo etu maja'a mpu'u kasusa bo kapari to mawela manusia. Da'apa sanggani najadi kasusa bo kapari ewa etu nompamula nggari lamba pamulana dunia nipajadi Alatala sampe we'i-we'i. Pade da'a mana ria kasusa bo kapari ewa etu ri tempo marata.

²⁰Ane Pue da'a masalisa mompakaopu kasusa bo kapari etu, natantumo da'a kamba samba'a mamala matuwu. Tapi nggari towe Alatala ka todea topomparasaya to nipelisina, tempona etu kana masalisa rapakaopuna.

²¹Ri tempona etu ane maria tau manguli ka komi, ‘Kitamo! Ri se'imo Magau to Mompakasalama,’ bara manguli ka komi, ‘Ri setumo I'a,’ ne'e raparasaya komi tesana.

²²Sabana kana meumba tau topodawa to mompangaku iramo Magau to Mompakasalama. Pade meumba wo'u nabi-nabi topodawa. Ira pura-pura kana mompowia tandai-tandai to nipogumaa bo kabaraka-kabaraka ante patuju ane mamala mombabagiu tau-tau to nipelisi Alatala.

²³Tapi komi kana mainga sabana da'apa etu majadi nitesaku ka komi mamimo.”

²⁴“Ri tempo etu ane maopumo kasusa bo kapari etu mata eo kana majadi marumau pade wula mana mewanta.

²⁵Betu'e-betu'e kana manawu nggari langi pade kuasa-kuasa ri langi kana ragagoya pura.

²⁶Pade ri tempo etumo pura-pura manusia ri dunia kana manggita Aku, Ana nu Manusia mana'u riara kulimu ante kuasa bo karemeku to nipogumaa.

²⁷Pade Aku kana mompakau malaeka-malaekaku malau mompasiromu pura-pura tau to nipelisiku nggari patanjulapa dunia, nggari tampa nu langi marata ri tampa nu dunia.”

²⁸“Pariaramo pepatuduki nggari kayu ara. Ane komi manggita rangga-ranggana nompamula nangura pade nompamula noroya, natantu ninjani komi namosumo tempo eo mapane.

²⁹Iwetu wo'u ane komi manggita kajadia-kajadia to nitesaku pani'a, kana ranjani komi namosumo tempo karataku. Damo mompopea tempona.

³⁰Aku mpu'u-mpu'u notesa ka komi, kajadia-kajadia etu kana majadi da'apa pura-pura tau to natuwu we'i-we'i mamate.

³¹Langi bo dunia kana malipo tapi tesaku kana maroo sampe ri kasae-saena.

³²Tapi eo bo tempo karataku etu da'a ria samba'a nangginjani, nabeloka malaeka-malaeka ri suruga, nabeloka Ana nu Alatala mboto. Aga Umaku mboto to nangginjanina.”

³³“Jadi pakabelo-belo. Komi kana mainga sabana da'a ninjani komi nepia tempo karataku.

³⁴Karataku nasimbayu ewa porapa e'i: Naria samba'a tau to nalau mpaka ri ngata nakawao. Da'apa i'a nalau niwaina kuasa ka batua-batuana mombaurusi sapona. Butu mba'a niwaina bagona samba'a bo samba'a. Pade topanggatono pewobo nitewaina mainga mompopea karatana.

³⁵Jadi iwetu wo'u komi kana mainga mompopea karataku sabana da'a ninjani komi nepia Aku manjili, bara ulungguwiana bara ri tongo wengi bara kabobayana bara ri pebulu nu eo.

³⁶Komi kana mainga ala ane Aku marata ne'e-ne'e komi aga kurata maturu.

³⁷Nuapa to nitesaku ka komi, kutesa wo'u ka pura-pura tau. Komi kana mainga!”