Read Da'a Kaili MARKUS 14 Bible Online

MARKUS 14 - Da'a Kaili bible

MARKUS 14

¹Tempo etu damo rombengipa mawela Eo Bete Paska bo Posusa Roti Da'a Nidika Ragi. [24] Balengga-balengga topanggeni agama Yahudi bo guru-guru agama danangelo jala manjoko Yesus nggalino pade mompatesi I'a.

²Nangulimo ira, “Ne'e kita manjoko I'a tempo eo posusa etu, ala ne'e magado tau dea.”

³Naria sanggani Yesus ri ngata Betania ri sapo i Simon to naju'a bete bopia. Tempo I'a nekatoko nanggoni naratamo samba'a besi nanggeni saongu botolo to nipowia nggari watu naisi minya wongi to nasuli mpu'u olina to nipowia nggari kale to nawongi. Narata ri setu niposona tambolo botolo etu pade nitolina minya wongi etu ri balengga Yesus.

⁴Naria bara sakuya mba'a tau ri setu to narau rara nanggita powia nu besi etu. Notesamo ira samba'a bo samba'a, “Nokuya minya wongi etu nipakarugi sinja'i?

⁵Kakonona minya etu mamala rapobalu ante olina toluatu mpeka doi salaka [25] pade doi etu mamala rawai ka tau-tau nakasiasi.” Pade ira nanggarau besi etu.

⁶Tapi nangulimo Yesus ka ira, “Pakambamo i'a! Nokuya komi nompakasusa i'a? I'a nanggawia sangele to nabelona ri ja'iku.

⁷Tau to nakasiasi bate-batena maria ri tatongo komi pade ira mamala ratulungi komi ri butu-butu tempo to nipodota komi. Tapi Aku e'i da'a batena mosanggani ante komi.

⁸Besi e'i nompowia nuapa to namala nikawiana. I'a nombatoli minya wongi ri ja'iku ala mompakasadia koroku ratana banepia.

⁹Aku mpu'u-mpu'u notesa ka komi, ri umba-umba ri dunia Kareba Belo rapatolele, powia nu besi e'i kana ratesa wo'u ala mombatora i'a.”

¹⁰Naopu etu nalaumo Yudas Iskariot, samba'a nggari sampulu romba'a anaguru Yesus, mpaka ri ja'i balengga-balengga topanggeni agama ante patujuna mompobalu Yesus ka ira.

¹¹Tempo ira nangepe tesa Yudas, nadamba mpu'umo rara ira, pade ira nojanji mombawai doi ka i'a. Naopu etu nompamulamo Yudas nangelo loga to nabelona mombawai Yesus ka balina etu.

¹²Naratamo eo pamulana Posusa Roti Da'a Nidika Ragi, etumo tempo tau-tau to Yahudi nanjambale ana bimba rakoni ri Posusa Paska. Tempo etu naratamo anaguru Yesus nompekutana I'a, “Pue, ri umba peto'o mupokono rakalau kami mompakasadia panggoni Posusa Paska ka Komi?”

¹³Nangepe etu I'a nompakau romba'a anaguruna ante tewai iwe'i: “Kalaumo komi mpaka ri ngata Yerusalem. Ri setu samba'a langgai manggeni gumba nu ue kana mosintomu ka komi. Tukimo i'a

¹⁴mpaka ri sapo to rakalauna, pade ulimo ka pue njapo ri setu, ‘Iwe'imo tewai Guru ka kami: Ri umba tombi to nipakasadia ka Aku manggoni panggoni Posusa Paska ante anaguruku?’

¹⁵Pade pue njapo etu kana mompopokita ka komi saongu tombi bete ri kalangana nagana ante parewana. Ri setumo rapompakasadia panggoni Posusa Paska ka kita.”

¹⁶Pade nalaumo romba'a anaguruna etu nesua rara ngata. Pade to nirata ira ri setu nasimbayu pura ewa nuapa to niuli Yesus ka ira. Pade nipakasadia iramo panggoni Posusa Paska etu.

¹⁷Sangga nawengipa naratamo Yesus ante sampulu romba'a anaguruna etu.

¹⁸Tempona ira nekatoko nanggoni, nangulimo Yesus ka ira, “Aku mpu'u-mpu'u notesa ka komi, samba'a nggari tatongo komi to nanggoni mpasanggani-nggani ante Aku kana mompobalu Aku ka baliku.”

¹⁹Nangepe etu nasusa mpu'umo rara ira, pade nekutanamo ira ka Yesus samba'a bo samba'a, “Pue, da'a aku e'i to nipatuju Komi?”

²⁰Nangulimo I'a ka ira, “I'amo samba'a nggari komi sampulu romba'a e'i to mombatome roti riara tubu mpasanggani-nggani ante Aku.

²¹Aku, Ana nu Manusia kana mamate ewa to nitulisi riara Buku Nagasa. Tapi mandasa mpu'u tau to mompobalu Aku etu! Nabelopa ane tau etu da'a niote ri dunia.”

²²Tempona ira nanggoni Yesus nangala saongu roti pade nanguli tarima kasi ka Alatala. Naopu etu nibingga-binggana roti etu pade niwaina ka ira ante nanguli, “Alamo roti e'i. E'imo koro bataku.”

²³Naopupa etu nialana wo'umo saongu sanggiri panginu pade niulina tarima kasi ka Pue Alatala. Naopu etu niwaina ka ira pade ira pura-pura nanginu nggari sanggiri panginu etu.

²⁴Pade niulina wo'umo ka ira, “E'imo leiku to rapatiti ka tau dea ngina ala mompakaasa pojanji Alatala ante manusia.

²⁵Aku mpu'u-mpu'u notesa ka komi, nompamula we'i-we'i Aku mana manginu anggur sampe marata tempona banepia Aku manginu anggur to nabouna riara Poparenta nu Alatala.”

²⁶Pade naopupa ira nodade nombatoiya Alatala nalaimo ira mpaka ri Bulu Zaitun.

²⁷Nangulimo Yesus ka ira, “Komi pura-pura kana mokanggaura momparasaya Aku, sabana naria Tesa nu Alatala to nitulisi riara Buku Nagasa iwe'i: ‘Aku kana mompatesi topoewu sampe bimba-bimbana mosimpotatare.’ [26]

²⁸Tapi tempo Aku matuwu bali Aku mokolu ka komi mpaka ri Bagia Galilea.”

²⁹Nangepe etu nangulimo i Petrus, “Naupa ira pura-pura mokanggaura momparasaya aku e'i da'a!”

³⁰Tapi nangulimo Yesus ka i'a, “Aku mpu'u-mpu'u notesa ka iko, wengina e'i wo'u da'apa magana ronggani manu mora'o tolungganimo iko mombasapu Aku.”

³¹Tapi i Petrus nantambai kabiana nanguli, “Nau aku mamate mpasanggani ante Komi aku da'a ntoto mombasapu Komi!” Pade iwetu wo'u to niuli pura-pura anaguruna ntanina.

³²Pade naratamo ira ri saongu peto'o nosanga ka Getsemani. Narata ri setu nangulimo Yesus ka anaguruna, “Pekatokomo ri se'i tempo Aku malau mosambaya.”

³³Pade nikenina i Petrus, Yakobus bo Yohanes napola sakedi mpasanggani-nggani. Pade nompamulamo Yesus nasusa bo nawiora mpu'u rarana.

³⁴Niulina ka ira tolumba'a, “Nasusa mpu'umo raraku, ewa mamate nirasaiku! Popeamo Aku ri se'i pade mainga-inga.”

³⁵Pade napolamo Yesus sakedi. Notimbakotumo I'a nekadede sampe ri tana pade nosambaya ka Umana Alatala ala ane mamala I'a makabasaka nggari kasusa bo kapari to marata ri ja'ina etu.

³⁶Niulina, “Uma, O, Umaku! Da'a ria to da'a namala mupowia. Ane mamala pakakawaomo nggari ja'iku kasusa bo kapari e'i! Tapi ne'e dotaku majadi, aga dotamu mboto.”

³⁷Naopu etu nanjilimo Yesus ri ja'i anaguruna tolumba'a etu. Niratana ira pura-pura napisi. Pade niulina ka i Simon Petrus, “Simon, iwenumo? Napisimo iko? Da'a nipakulemu mosanggani ka Aku nau aga sajaa?

³⁸Komi kana mainga bo mosambaya ala ne'e komi mawela pesoba! Riara nta'imu naria dota mompowia to nabelona, tapi koromu da'a nompakule.”

³⁹Pade nalau wo'umo Yesus nosambaya ewa posambayana pani'a.

⁴⁰Naopu etu narata wo'umo I'a ri ja'i anaguruna. Niratana ira aga napisi wo'umo sabana naluru mpu'u mata ira. Mana ninjani ira nuapa to rauli ira ka I'a.

⁴¹Tempo Yesus natingguli ri ja'i ira katolungganina, niulina ka ira, “Iwenumo? Danapisi bo nangosaraka komi? Naganamo! Naratamo tempona Aku, Ana nu Manusia rawai riara mpale tau-tau nasilaka.

⁴²Pembangumo! Kitamo! Naratamo tau to nompobalu Aku! Kamaimo kita mantomunaka i'a!”

⁴³Tempona Yesus danotesa, naratamo Yudas samba'a nggari sampulu romba'a anaguruna etu nituki ntau dea to nanggeni guma bo pato. Ira nipakau balengga-balengga topanggeni agama, guru-guru agama bo totu'a-totu'a nto Yahudi.

⁴⁴Da'apa ira nomai Yudas nompakatantu ka ira tandaina ala ranjani ira ri umbana Yesus. Niulina, “Isema ngina kueki, etumo I'a. Soko komimo I'a pade keni I'a nggari setu ante rajagai mpakabelo-belo.”

⁴⁵Sangga naratapa Yudas ri setu i'a kaliu-liu nompakamosu Yesus pade nanguli, “Tabe, Guru!” Pade niekina Yesus.

⁴⁶Naopu etu ira to nikeni Yudas nompakamosu Yesus pade nanjoko I'a.

⁴⁷Nanggita etu samba'a nggari anaguru Yesus to nenggore ri setu nangosu gumana nantimbe batua nu Balengga Topanggeni Agama sampe napudu talingana.

⁴⁸Nangulimo Yesus ka tau dea etu, “Iwenumo? Niuli komi Aku e'i samba'a parampo sampe komi kana marata ante guma bo pato manjoko Aku?

⁴⁹Kakonona eo-eo Aku naria ri tatongo komi nopaguru ri Sapo Mpepue. Nokuya komi da'a nanjoko Aku ri setu? Tapi etu kana majadi ala madupa tesa to nitulisi riara Buku Nagasa.”

⁵⁰Naopu etu pura-pura anaguruna nangowa nompalasi Yesus.

⁵¹Naria samba'a kabilasa aga sabala lau buya ri korona nantuki puri Yesus. I'a nisoko ntau ri setu,

⁵²tapi i'a nombawonju buyana pade nalai ante nelaya.

⁵³Pade Yesus nikeni ira mpaka ri ngayo Balengga Topanggeni Agama. Ri setu pura-pura balengga topanggeni agama, totu'a-totu'a nto Yahudi bo guru-guru agama nasiromu nolibu.

⁵⁴Petrus nantuki Yesus nggawao sampe narata ri lalowo sapo nu Balengga Topanggeni Agama. Narata ri setu nekatokomo i'a noneru mpasanggani-nggani ante topojaga-topojaga.

⁵⁵Tempo etu balengga-balengga topanggeni agama ante pura-pura Topolibu Bete Agama nto Yahudi etu nompasimbuku mangelo tau mompakanoto kasala Yesus ala I'a mamala rasuku mamate. Tapi da'a ntoto nirata ira kasalana.

⁵⁶Nadea tau nodawa ala mombanawusaka I'a, tapi tesa ira da'a nosirata samba'a bo samba'a.

⁵⁷Pade nekanggoremo bara sakuya mba'a tau ntanina nombabata I'a ante tesa-tesa dawa iwe'i:

⁵⁸“Niepe kami tau e'i nanguli, ‘Aku mombagero Sapo Mpepue e'i to nipowia pale manusia, pade riara tempo tolumbengi kubangu sapo ntanina anu da'a nikawia pale manusia.’ ”

⁵⁹Tapi tesa-tesa tau etu wo'u da'a nosirata samba'a bo samba'a.

⁶⁰Pade nekanggoremo Balengga Topanggeni Agama ri ngayo ira pura-pura nompekutana Yesus iwe'i: “Iwenumo? Naria pesonomu ewa tesa-tesa nu sabi e'i to nanguli Iko atau da'a?”

⁶¹Tapi naupa da'a ria salana, Yesus aga nekalino. Da'a ria nuapa-nuapa nisonona. Jadi sangganipa Balengga Topanggeni Agama nompekutana I'a, “Ulimo ka kami, Ikomo Magau to Mompakasalama, Ana nu Alatala to Nibila?”

⁶²Nesonomo Yesus, “Akumo I'a. Pade komi pura-pura kana manggita Aku, Ana nu Manusia mekatoko ri sabingga nggana nu Alatala to Neliu Nggakuasa. Pade komi kana manggita Aku mana'u riara kulimu nggari langi.”

⁶³Nangepe etu Balengga Topanggeni Agama nombaseri pakeana tandaina narau mpu'u rarana, pade niulina ka Topolibu Bete, “Rapokuya kita mangelo sabi-sabi ntanina?

⁶⁴Niepe komi mbotomo tesana nompakakedi Alatala! Iwenu pombarata komi?” Nesonomo ira pura-pura, “I'a kana rasuku mamate!”

⁶⁵Pade nompamulamo bara sakuya mba'a tau nantailu I'a. Pade ira nombatondo lenje Yesus pade nombajaguru I'a ante nanguli, “E, Nabi, ulimo isema nombajaguru Iko!” Pade topojaga-topojaga wo'u nombaboba I'a.

⁶⁶Tempona etu i Petrus danaria ri lalowo sapo etu. Naratamo samba'a besi batua Balengga Topanggeni Agama.

⁶⁷Tempo i'a nanggita i Petrus nekatoko noneru ri setu i'a nombalele mata lenje i Petrus pade niulina ka i'a, “Komi wo'u samba'a tau nosanggani-nggani ante Yesus to Nazaret etu!”

⁶⁸Tapi i Petrus nesapu. Niulina, “Da'a! Da'a ninjaniku patuju tesamu!” Pade nesuwumo i'a mpaka ri tambale ri ngayo nu sapo etu. [Pade nora'omo manu.]

⁶⁹Tempo i Petrus ri setu i'a nikita besi batua etu wo'umo. Pade niuli besi etu ka tau-tau ntanina ri setu, “Tau e'i wo'u samba'a roana.”

⁷⁰Tapi sangganipa i Petrus nesapu. Da'a nasae nggari setu nanguli wo'umo tau-tau to nenggore ri setu ka i Petrus, “Natantumo komi e'i samba'a roana, sabana komi wo'u samba'a to Galilea!”

⁷¹Tapi nompamulamo i Petrus netunda bo nojanji. Niulina, “Mpu'u-mpu'u da'a ntoto ninjaniku tau to niuli komi etu!”

⁷²Iwetu i Petrus notesa nora'omo manu karongganina. Pade natetoramo rara i Petrus tesa Yesus ka i'a pangane to nanguli, “Da'apa magana ronggani manu mora'o, tolungganimo iko mombasapu Aku.” Pade nageomo i'a nakanjodu-njodu.