Read Da'a Kaili MARKUS 15 Bible Online

MARKUS 15 - Da'a Kaili bible

MARKUS 15

¹Dakampadondo njiina balengga-balengga topanggeni agama, totu'a-totu'a nto Yahudi bo guru-guru agama nosanggani-nggani ante pura-pura Topolibu Bete Agama ntanina nosaongu patujumo. Ira nombaso'o Yesus pade nanggeni I'a mpaka ri ngayo Gubernur Pilatus. Ri setu Yesus niwai ira ka i Pilatus.

²Pade nekutanamo i Pilatus ka Yesus, “Komimo Magau nto Yahudi?” Nesonomo Yesus, “Ewa to niuli komi etu, Uma, nakono.”

³Naopu etu nadea mpu'u tesa-tesa pebata to nitesa balengga-balengga topanggeni agama ka Yesus.

⁴Nangepe etu nekutana wo'umo i Pilatus ka Yesus, “Iwenumo? Naria pesonomu ewa tesa-tesa pebata e'i? Epemo, nadea mpu'u tesa pebata ira ri ja'imu.”

⁵Tapi Yesus da'a ntoto nesono nau aga sambela sampe nasumara mpu'u i Pilatus.

⁶Najadi kabiasanamo butu-butu mpae tempo Eo Bete Paska Gubernur nombakabasaka samba'a tau to nitarunggu nantuki pomperapi ntau dea.

⁷Tempona etu naria samba'a tau to nitarunggu nosanga ka i Barabas. I'a nitarunggu mpasanggani-nggani ante bara sakuya mba'a tau to nepatesi tempo nangewa pomarenta.

⁸Jadi naratamo tau dea ri ja'i Pilatus nerapi ala i'a manggabasaka ka ira samba'a tau nitarunggu ewa to nipowiana butu-butu mpae.

⁹Nangepe pomperapi ira nekutanamo i Pilatus ka ira, “Rapokono komi ane aku manggabasaka ka komi Magau nto Yahudi?”

¹⁰Niulina iwetu sabana ninjaninamo balengga-balengga topanggeni agama nanggeni Yesus ri ja'ina sabana naju'a rara ira.

¹¹Tapi balengga-balengga topanggeni agama nompakapane rara ntau dea ala merapi i Barabasmo to rakabasaka ka ira.

¹²Pade nekutana wo'umo i Pilatus ka ira, “Ane iwetu, nuapa to masipato kupowia ri ja'i ntau to niuli komi Magau nto Yahudi e'i?”

¹³Nongare wo'umo ira, “Pakumo I'a ri kayu parika!”

¹⁴Pade nekutana wo'umo i Pilatus ka ira, “Nokuya? Kaja'ana nuapa ntoto to nipowiana?” Tapi ira aga nantambai nongare ante suara to neliu nggamangga, “Pakumo I'a ri kayu parika!”

¹⁵Dota i Pilatus mompakadamba rara ntau dea. Sabana etu i'a nanggabasaka i Barabas ka ira. Pade nipakauna tantarana nombaporo Yesus pade mombapaku I'a ri kayu parika.

¹⁶Pade Yesus nikeni tantara-tantara mpaka riara sapo Gubernur, etumo ri tombi mpotangara. Pade nipokio ira pura-pura roa ira nasiromu.

¹⁷Ri setu ira nompopasua ka Yesus baju nakamumu ewa to nipake magau, pade nipowia ira wo'u songgo nggari karui nipoposonggo ka Yesus.

¹⁸Pade nompamulamo ira nompongei-ngei I'a ante nanguli, “Ratoiyata Magau nto Yahudi!”

¹⁹Naopu etu ira tunggai nombaboba balenggana ante sampeka wolo pade ira tunggai nantailu I'a. Naopu etu nekadedemo ira ri ngayona ante nongei-ngei mombasomba I'a.

²⁰Naopupa ira nompongei-ngei I'a iwetu, niwonju iramo baju nakamumu etu pade nipopasua bali ka I'a pakeana mboto. Pade I'a nikeni ira mpaka ri sawaliku ngata ala rapaku ri kayu parika.

²¹Tempona etu noliumo samba'a tau nosanga ka i Simon tau nggari ngata Kirene, uma Aleksander bo i Rufus, to dako narata nggari sawaliku ngata. I'a etu nipasu'u tantara-tantara manjumbuaka kayu pomparika Yesus.

²²Pade napolamo ira sampe narata ri peto'o to nosanga ka Golgota, batuana “Peto'o Wuku Balengga.”

²³Pade ira nombawai ka Yesus ue anggur nigalo ante pakuli to niuli mur, tapi ue anggur etu nipoarana.

²⁴Pade ri setumo ira nombapaku I'a ri kayu parika. Naopu etu nibagi-bagi iramo pakeana ante nompenoa nowia nomoro ala mompakatantu bagia ira samba'a bo samba'a.

²⁵Tempo Yesus nipaku ira ri kayu parika, kira-kira tinti sasio mpadondona.

²⁶Ri kayu parikana naria nitulisi tesa pombabata I'a iwe'i: E'IMO MAGAU NTO YAHUDI.

²⁷Naria wo'u romba'a parampo nipaku ri kayu parika ntanina mpasanggani-nggani ante Yesus, samba'a ri pangganana pade samba'a ri panggeina. [

²⁸Ante iwetu nadupamo tesa to nitulisi riara Buku Nagasa to nanguli, “I'a nireke samba'a nggari tatongo tau-tau naja'a.”] [27]

²⁹Tau-tau to noliu ri setu nanguli sinja'i I'a pade nombawiri mata ka I'a. Niuli ira, “E, niulimu Iko mamala mombagero Sapo Mpepue pade mombabanguna mpanjili riara tolu eo.

³⁰Ane iwetu, pakasalama koromu mboto! Pana'umo nggari kayu parika etu!”

³¹Iwetu wo'u balengga-balengga topanggeni agama bo guru-guru agama nompongei-ngei I'a. Nangulimo ira samba'a ka roana, “Tau ntanina nipakasalamana. Tapi kita we'i! Korona mboto da'a namala nipakasalamana!

³²Ane I'a mpu'u-mpu'u Magau nto Israel, etumo Magau to Mompakasalama, agina I'a mana'u nggari kayu parika ala kita manggita pade momparasaya I'a!” Pade tau to romba'ana to nipaku ri kayu parika ri sinjori Yesus etu wo'u nanguli sinja'i I'a.

³³Nompamula nggari katongo nu eo narumaumo eo ri njumaongu tana etu sampe ri tinti toluongu ngguwiana.

³⁴Pade ri tinti toluongu ngguwiana etu, nongaremo Yesus ante suara namangga, “Eloi, Eloi, lama sabakhtani?” Batuana, “Alatalaku, Alatalaku, nokuya Komi nompalasi Aku?”

³⁵Sangga nangepe etu nangulimo bara sakuya mba'a tau ri setu, “Epemo! I'a nompokio nabi Elia!”

³⁶Pade nangowamo samba'a nggari tatongo ira nanggeni sangele wunga to nasimbayu ewa lumu, pade nibanggana riara anggur to napoina. Naopu etu niumpuna ante wolo pade nipopoinuna ka Yesus. Niulina, “Rapopeata sampalai ala manggita ane nabi Elia marata mombata'uraka I'a nggari kayu parika!”

³⁷Naopu etu nongare wo'umo Yesus ante suara namangga, pade nalaimo nosana.

³⁸Tempona etu wo'u naseri ntongomo kae powombo ri Sapo Mpepue nggari ba'ana narata ri wayona.

³⁹Tempo balengga tantara to nenggore nosintingayo ka I'a nanggita kamate Yesus iwetu, nangulimo i'a, “Mpu'u-mpu'u tau e'i Ana nu Alatala!”

⁴⁰Ri setu naria wo'u bara sakuya mba'a besi nenggore neantoaka nggawao. Ri tatongo ira naria i Maria Magdalena, i Salome, pade i Maria indo Yakobus muda bo Yoses.

⁴¹Iramo besi-besi to nantuki pade nantulungi Yesus tempo I'a ri Bagia Galilea. Pade naria wo'u ri setu nadea besi ntanina to narata ri ngata Yerusalem nosanggani-nggani ante I'a.

⁴²Eo etu eo mpompakasadia ka Eo Mpenonto, damo sambengipa mawela Eo Mpenonto. Tempo ntora nasolomo eo

⁴³naratamo samba'a tau nosanga ka Yusuf, tau nggari ngata Arimatea. I'a samba'a nggari Polibu Bete Agama nto Yahudi to nibila ntau dea, pade i'a wo'u nompopea tempo Alatala mompamula moparenta ri dunia. I'a netibia nalau nantingayo i Pilatus nerapi watabaku Yesus.

⁴⁴Pilatus nakandodo nangepe Yesus namatemo. Jadi nipokiona balengga tantara pade nipekutanana, “Iwenumo? Nakono mpu'u Yesus namatemo?”

⁴⁵Sangga niepenapa pantesa nggari ja'i balengga tantara to nanguli Yesus namatemo, nipaloganamo Yusuf lau mangala watabaku Yesus.

⁴⁶Jadi Yusuf nangoli kae gandisi nalusu raposompu, pade nita'urakana watabaku Yesus nggari kayu parika pade nisompuna ante kae to niolina etu. Pade nibolina watabaku Yesus etu riara dayo to nipa'a ri saongu bulu watu. Naopu etu niluliakana wo'u saongu watu bete nipombapiku pewobo dayo etu.

⁴⁷Tempo etu i Maria Magdalena bo i Maria indo Yoses nanggita peto'o nipombaboli watabaku Yesus etu.