Read Da'a Kaili MARKUS 16 Bible Online

MARKUS 16 - Da'a Kaili bible

MARKUS 16

¹Sangga naliupa Eo Mpenonto nalaumo i Maria Magdalena, i Maria indo Yakobus, ante i Salome nangoli rampa-rampa to nawongina rakeni raboli ri watabaku Yesus.

²Pade dakampadondo njiina ri eo pamulana minggu etu tempo eo dako neonga, nalaumo besi-besi etu mpaka ri dayo Yesus.

³Ri tatongo jala nosimpekutana ira samba'a bo samba'a, “Isema mamala mombaluliaka watu to nipompiku dayo etu ka kita?”

⁴Tapi sangga namosupa ira ri dayo etu nikita ira nakalulimo watu to nabetena mpu'u etu.

⁵Pade nesuamo ira riara dayo. Ri setu nikita ira samba'a kabilasa nobaju bula nekatoko ri sabingga nggana dayo etu. Nanggita etu naeka mpu'umo rara ira.

⁶Tapi nangulimo kabilasa etu ka ira, “Ne'e maeka! Ninjaniku komi mangelo Yesus to Nazaret to namate nipaku ri kayu parika. Natuwu balimo I'a, mana ria ri se'i. Kitamo! E'imo peto'o pombaboli watabakuna.

⁷Tapi kalaumo komi uli ka anaguruna pade ka i Petrus, ‘I'a mokolu ka komi mpaka ri Bagia Galilea. Ri setumo komi kana manggita I'a ewa to niulina ka komi bopia.’ ”

⁸Jadi nesuwumo ira nggari dayo pade nangowa nalai nggari setu sabana natekaja bo naeka mpu'umo rara ira. Da'a ria ira notesa nuapa-nuapa ka isema-sema sabana naeka rara ira. [

⁹Sangga Yesus natuwu bali nggari kamatena ri mpadondo eo Aka, pamula-mulana I'a nompopokita korona ka i Maria Magdalena, etumo besi to nikabasaka Yesus nggari kuasa pitumba'a seta bopia.

¹⁰Naopu etu nalaumo i Maria nombatesa kajadia etu ka roa-roa Yesus to danasusa-susa rara bo nageo-geo.

¹¹Tapi tempo ira nangepe tesa to nanguli Yesus natuwu bali pade I'a nikita Maria, da'a ntoto niparasaya ira tesa etu.

¹²Naopu etu Yesus nompopokita korona wo'umo ka romba'a topantuki I'a ante lenjena ntanina tempo ira nolumako ri sawaliku ngata.

¹³Nanggita etu nanjilimo ira romba'a nantesa kajadia etu ka anaguru-anaguruna ntanina. Tapi roa-roa ira etu da'a wo'u nomparasaya tesa etu.

¹⁴Kaopuna Yesus nompopokita korona ka sampulu samba'a anaguruna tempo ira nekatoko nanggoni mpasanggani. I'a nangontiaka ira sabana ira nako'o rara nomparasaya roa ira to nanggita I'a tempo natuwu bali nggari kamatena.

¹⁵Pade niulina ka ira, “Kalaumo komi mpaka ri njumaongu dunia pade patolelemo Kareba Belo ka pura-pura manusia.

¹⁶Isema-sema to momparasaya pade radiu ewa tandaina ira topomparasaya Aku kana rapakasalama. Tapi isema-sema da'a momparasaya kana rasuku.

¹⁷Tau-tau to momparasaya kana rawai ka kuasa mompowia tandai-tandai to nipogumaa iwe'i: ira kana mompopalai seta-seta ante kuasa nggari sangaku. Ira kana motesa ante basa-basa to nopu'u nggari ja'i Nosa Nagasa nu Alatala.

¹⁸Ane ira manjoko ule bara manginu panginu to mepakamate, ira da'a mokuya-kuya. Pade ira kana mombadika pale ira ri koro tau-tau naju'a pade tau etu kana mabelo bali.”

¹⁹Sangga naopupa Yesus notesa iwetu ka ira, neoremo I'a mpaka ri suruga pade nekatoko ri peto'o to nibila ri panggana nu Alatala.

²⁰Naopu etu nalaumo anaguru-anaguruna nompatolele Kareba Belo ka tau-tau ri umba-umba, pade Pue mboto nokarajaa mpasanggani ante ira. I'a nombawai ka ira kuasa mowia tandai-tandai to nipogumaa ala mompakaroso tesa to nipatolele ira etu.] [KAOPU NU BUKU MARKUS NTANINA NANTUKI TESA-TESA TO NASAE Nalaumo besi-besi etu mpaka ri ja'i Petrus ante roana, pade nitesa ira pura-pura to niuli kabilasa etu ka ira. Naopu etu Yesus nompakau anaguru-anaguruna mompatolele ka tau nggari kamataeona sampe ri kasolona Kareba to nagasana to da'a ri kabalina to nantesa katuwua mabelo sampe ri kasae-saena.]