Read Da'a Kaili MARKUS 2 Bible Online

MARKUS 2 - Da'a Kaili bible

MARKUS 2

¹Bara sakuya mbengi kaliuna nesua wo'umo Yesus ri ngata Kapernaum. Pade natolelemo tesa to nanguli Yesus naria rara njapona.

²Nangepe etu nadea mpu'umo tau narata nasiromu ri sapo etu sampe mana nasuka, nau aga ri ngayo pewobo mana ria peto'o. Ri setu Yesus nompatolele Tesa nu Alatala ka ira.

³Tempona I'a danotesa naratamo patamba'a tau nombakowa roa ira to napungguna.

⁴Ira da'a namala nompakamosu Yesus sabana tau-tau ri setu neliu nggadea. Jadi nalaumo ira nepone ri bunggu ata nu sapo etu, [3] pade nibongga ira ata ri ntoto Yesus. Sangga natebukapa ata etu niulunjaka iramo topunggu etu ante ompa paturuna.

⁵Tempo Yesus nanggita karoso pomparasaya ira etu, nangulimo I'a ka topunggu etu, “Anaku, silaka-silakamu niampungimo.”

⁶Nangepe etu nompamulamo bara sakuya mba'a guru agama to nekatoko ri setu nompekiri riara nta'i ira,

⁷“Nokuya tau e'i notesa iwetu? I'a nompakakedi Alatala! Da'a ria samba'a manusia namala mombaampungi silaka, aga Alatala mboto!”

⁸Tapi Yesus nangginjani nuapa to nipekiri ira. Etu sampe I'a nanguli ka ira, “Nokuya komi nompekiri iwetu?

⁹Umba to neliu nggamuda rauli, ‘Silakamu niampungimo,’ atau manguli, ‘Pekanggore, onggotakamo ompa paturumu pade polumakomo?’ Natantu neliu nggamuda manguli, ‘Silakamu niampungimo.’

¹⁰Tapi Aku mompopokita ka komi Aku, Ana nu Manusia nakuasa mombaampungi silaka manusia ri dunia e'i.” Pade nipakauna topunggu etu,

¹¹“Pekanggore, onggotakamo ompa paturumu pade patinggulimo!”

¹²Nangepe etu nekanggoremo topunggu etu. Kaliu-liu i'a nangonggotaka ompa paturuna pade nesuwumo i'a nikita mata ira pura-pura. Nanggita etu nogumaa puramo tau ri setu, pade ira nombatoiya Alatala ante nanguli, “Da'apa sanggani nikitata kajadia ewa e'i!”

¹³Naopu etu nalau wo'umo Yesus mpaka ri wiwi rano. Tempo I'a ri setu narata puramo tau dea ri ja'ina, pade I'a nompatuduki ira.

¹⁴Naopu etu tempo Yesus noliu ri setu, nikitana samba'a topomperapi balasitee to nosanga ka i Lewi, ana Alfeus, nekatoko ri kantoro topomperapi balasitee. Nangulimo Yesus ka i'a, “Kamaimo, tukimo Aku.” Nangepe etu nekanggoremo i Lewi nalau nantuki Yesus.

¹⁵Naopu etu nalaumo Yesus ante anaguruna nanggoni ri sapo i Lewi. Ri setu nadea wo'u topomperapi balasitee bo tau-tau ntanina to nasilaka nanggoni mpasanggani-nggani ante ira, sabana nadeamo ira to nantuki Yesus.

¹⁶Tempo guru-guru agama to nantuki pepatuduki to Parisi nanggita Yesus nanggoni mpasanggani ante topomperapi balasitee bo tau-tau nasilaka iwetu, nangulimo ira ka topantuki-topantuki I'a, “Nokuya gurumu nanggoni mpasanggani-nggani ante topomperapi balasitee bo tau-tau to nasilaka?”

¹⁷Sangga nangepe pompekutana etu, nangulimo Yesus ka ira, “Da'a tau to naroso korona paraluu rapakuli dokutoro, aga tau-tau to naju'ana. Patuju karataku e'i da'a ala mompokio tau nanoa rarana, tapi ala mompokio tau nasilaka.”

¹⁸Naria sanggani anaguru-anaguru Yohanes Topediu bo tau-tau to Parisi napuasa. Tempo etu naria tau narata ri ja'i Yesus pade nompekutana I'a, “Nokuya anaguru-anaguru Yohanes bo topantuki-topantuki tau-tau to Parisi napuasa tapi topantuki-topantuki Komi da'a napuasa?”

¹⁹Nesonomo Yesus ka ira ante porapa iwe'i: “Masipato torata mapuasa ri posusa mponika ane boti langgai danosanggani ante ira? Natantumo da'a! Ane boti langgai danosanggani ante ira da'a masipato ira mapuasa!

²⁰Tapi kana marata tempona boti langgai raala nggari ja'i ira. Tempo etumo ira kana mapuasa.”

²¹Nanguli wo'umo Yesus, “Da'a ria tau nombatampala baju to narantana ante kae to nabouna. Sabana ane iwetu tampala kae to nabouna kana mosimpakuru mompakaseri baju to narantana etu. Kaopuna mantambai kaja'a seri nu baju etu.

²²Iwetu wo'u ante ue anggur. Da'a ria tau nombaisi ue anggur to nabouna riara pombolina to nasae. Sabana ane iwetu ue anggur to nabouna kana morende mompakaposo pombolina etu, sampe magero puramo, nabeloka ue anggur, nabeloka pombolina. Tapi ue anggur to nabouna kana raisi riara pomboli to nabouna wo'u.” [4]

²³Naria saeo Eo Mpenonto Yesus ante anaguruna noliu ri tatongo ntinalu gando. Tempo ira noliu ri setu nompamulamo anaguru-anaguruna nompui gando sakedi.

²⁴Nanggita etu nangulimo tau-tau to Parisi ri setu, “Kitamo! Nokuya anaguru-anagurumu nombaliunaka Atura-atura agamata ante nowia anu nitagi ri Eo Mpenonto?”

²⁵Nesonomo Yesus, “Iwenumo? Da'apa nibasa komi tesa riara Buku Nagasa ewa powia i Daud nggaolu tempo i'a ante roa-roana naoro ta'i pade mana ria panggoni?

²⁶I'a nesua riara Sapo Alatala tempo Abyatar najadi Balengga Topanggeni Agama, pade nikonina roti to nipesomba ka Alatala ri setu. Pade niwaina wo'u ka roa-roana. Tapi kakonona nantuki Atura-atura agamata roti etu aga mamala rakoni topanggeni-topanggeni agama, da'a tau ntanina.”

²⁷Pade nanguli wo'umo Yesus ka ira, “Eo Mpenonto nipakatantu Alatala manggeni belo ka manusia. Manusia da'a nipajadi Alatala ala rapakasusa ada-ada Eo Mpenonto.

²⁸Jadi Aku, Ana nu Manusiamo to nakuasa ri Eo Mpenonto.”