Read Da'a Kaili MARKUS 3 Bible Online

MARKUS 3 - Da'a Kaili bible

MARKUS 3

¹Pade nesua wo'umo Yesus ri sapo mpodade. Ri setu naria samba'a tau to namate palena sabingga.

²Bara sakuya mba'a tau to Parisi ri setu nompariara mpakabelo-belo nanggita ane Yesus mompakabelo tau etu ri Eo Mpenonto ala ira mamala mompakasala I'a.

³Nangulimo Yesus ka tau to namate palena etu, “Kamai pekanggoremo ri tatongona ri se'i!”

⁴Pade nekutanamo Yesus ka tau-tau to Parisi ri setu, “Nantuki Atura-atura agamata nuapa to nipaloga ka kita ri Eo Mpenonto, mowia to nabelona atau to naja'ana? Mompakasalama tau atau mompatesi tau?” Tapi ira aga nekalino da'a nenjui.

⁵Yesus nanggita ira ntalili. Nasusa bo naraumo rarana sabana da'a naasi mata ira nanggita tau to namate palena. Pade nangulimo I'a ka tau etu, “Ojomo palemu!” Tau etu nangojo palena, pade kaliu-liu nabelo balimo palena etu.

⁶Naopu etu nesuwumo tau-tau to Parisi nggari sapo mpodade etu pade kaliu-liu ira nalau nolibu ante topantuki-topantuki Magau Herodes mangelo jala ala ira mamala mompatesi Yesus.

⁷Pade nalaumo Yesus ante topantuki-topantuki I'a mpaka ri Rano Galilea. Nadea mpu'u tau nggari Bagia Galilea nantuki ira mpaka gusa'a. Nadea wo'u ira to narata nggari Bagia Yudea,

⁸nggari ngata Yerusalem, nggari Bagia Idumea, nggari sambote Binangga Yordan, pade nggari bagia namosu ngata Tirus bo Sidon. Ira pura-pura narata ri ja'i Yesus sabana nangepe lele to nantesa pura-pura nuapa to nipowiana.

⁹Nadea mpu'u tau to nasiromu ri setu sampe Yesus nompakau topantuki-topantuki I'a mompakasadia saongu sakaya ka I'a ala ne'e sampe I'a rarumpa ira.

¹⁰Etu najadi sabana nadea mpu'u tau naju'a nipakabelona bopia sampe pura-pura tau naju'a nosiaso-aso mompasimbuku mompakamosu I'a ala ira mamala manggabe I'a.

¹¹Tempo tau-tau to nipesua seta nanggita Yesus, nekadedemo ira ri ngayona ante nongare-ngare, “Komimo Ana nu Alatala!”

¹²Tapi Yesus nombatagi seta-seta etu ala ne'e motesa isema kakonona I'a.

¹³Naopu etu nantendemo Yesus mpaka ri saongu bulu, pade nipokiona ri ja'ina isema tau to nipodotana. Tau to nipokiona etu narata puramo ri ja'ina,

¹⁴pade nipelisina nggari tatongo ira sampulu romba'a tau momporoa I'a riara bagona. Ira nipelisina ala rapakauna malau mompatolele Kareba Belo,

¹⁵pade ala ira mamala rawai kuasa mompopalai seta-seta.

¹⁶Sanga ira sampulu romba'a to nipelisina etumo: i Simon to nidaena wo'u i Petrus,

¹⁷Yakobus ana i Zebedeus bo tua'ina Yohanes. Ira romba'a nidaena Boanerges, to naria batuana “Ana Guntu.”

¹⁸Naria wo'u Andreas, i Filipus, i Bartolomeus, i Matius, i Tomas, Yakobus ana Alfeus, i Tadeus, i Simon to Zelote,

¹⁹pade Yudas Iskariot to mompobalu I'a.

²⁰Naopu etu nesuamo Yesus raranjapo, pade narata wo'umo tau dea ri ja'ina sampe I'a ante anaguru-anaguruna da'a ntoto naria loga manggoni.

²¹Tempo etu naria tau nanguli, “Nabayamo I'a!” Jadi sangga nangepe tesa etu naratamo indona bo sampesuwu-sampesuwuna ala mangala I'a matingguli ri sapo ira.

²²Nangulimo guru-guru agama to narata nggari ngata Yerusalem, “I'a nipesua i Beelzebul, Magau nu Seta. Ante kuasa nggari ja'i Tadulako nu seta etu I'a nompopalai seta nggari ja'i ntau!”

²³Nangepe etu Yesus nompokio guru-guru agama etu pade I'a notesa ka ira ante porapa iwe'i: “Natantumo Magau nu Seta da'a madota mompopalai roana.

²⁴Rapana maria samba'a magau pade todea riara poparentana aga matibagi-bagi pade mosipobali, natantumo poparentana etu kana magero.

²⁵Pade ane tau sanjapo matibagi-bagi pade mosipobali, natantumo ira kana magaro mosimpotatare.

²⁶Iwetu wo'u ante Magau nu Seta. Ane i'a mangewa roana pade ira matibagi-bagi, natantumo poparentana da'a maroo. Mana masaeka magero.

²⁷Da'a ria tau namala mesua riara njapo ntau to narosona ala mangago mbara-mbarana ane da'a ratipunggu ntani pue njapo to naroso etu. Ane iwetu i'a mamala mangago pura-pura isi njapona. [5]

²⁸Aku mpu'u-mpu'u notesa ka komi, mpengele-ngele silaka manusia bo tesa-tesa nanguli sinja'i namala raampungi.

²⁹Tapi isema-sema nanguli sinja'i Nosa Nagasa nu Alatala da'a ntoto mamala raampungi. Silaka ira etu da'a ria ampuna sampe ri kasae-saena.”

³⁰Yesus nanguli iwetu sabana naria tau nanguli I'a nipesua seta.

³¹Naopu etu naratamo indo bo sampesuwu-sampesuwu Yesus. Narata ri setu nenggoremo ira ri sawalikuna pade nompakau tau mompokio Yesus momai mpaka ri ja'i ira.

³²Tempo etu nadea tau nekatoko nantalili Yesus. Ira nanguli ka I'a, “Kitamo, naria indomu bo sampesuwu-sampesuwumu ri sawalikuna. Ira madota mosirata ka Komi.”

³³Nesonomo Yesus ka ira, “Isema indoku bo sampesuwuku?”

³⁴I'a nanggita ira pura-pura to nekatoko nantalili I'a, pade niulina, “E'i puramo indoku bo sampesuwu-sampesuwuku.

³⁵Sabana isema-sema to nompowia dota Alatala, ira etumo nireke indoku bo sampesuwuku.”