Read Da'a Kaili MARKUS 4 Bible Online

MARKUS 4 - Da'a Kaili bible

MARKUS 4

¹Naria sanggani Yesus nompamula wo'umo nopaguru ri wiwi rano. Ri setu nadea mpu'u tau narata nantatiku I'a. Sabana etu I'a nalau nekatoko riara saongu sakaya to nolanto ri bunggu ue rano, pade tau dea nenggore ri kabatana.

²Pade nompamulamo I'a nompatuduki mpengele-ngele pepatuduki ka ira ante nompake porapa. Riara porapana etu niulina iwe'i:

³“Epemo! Naria samba'a tau nalau nosawu pae.

⁴Tempo i'a nosawu naria sanu pae nanawu ri wiwi jala. Pade naratamo tonji-tonji nantunggu pae etu sampe naopu.

⁵Naria wo'u sanu pae nanawu ri bunggu watu-watu to nakura tanana. Pae etu nasasinta natuwu sabana tana aga sakedi lau.

⁶Tapi sangga napanepa eo nalelemo pae lako natuwu etu. Nangau puramo sabana da'a nandalaka kalena.

⁷Pade naria wo'u sanu pae nanawu raranggarui. Natuwumo karui etu nangoo pae etu sampe da'a ria aselena.

⁸Pade naria wo'u sanu pae nanawu ri tana to naboyana. Pae etu naboya pade nowua nabelo. Naria to nowua tolumpulu nggani kadeana, naria sanu onompulu nggani pade naria wo'u nowua satu nggani kadeana.”

⁹Pade nanguli wo'umo Yesus ka ira, “Isema-sema naria talingana, epemo mpakabelo-belo tesaku e'i.”

¹⁰Tempo Yesus damo njamba'ana naratamo topantuki-topantuki I'a ante sampulu romba'a anaguruna nerapi ala I'a mompakanoto ka ira batuana porapa etu.

¹¹Nangulimo Yesus ka ira, “Komimo to nipaloga mangginjani tesa ewa Poparenta nu Alatala to nitabuniaka nggari lamba pamulana. Tapi ane tau-tau ntanina, ira kana rapatuduki ante porapa-porapa

¹²ala ‘Naupa ira bate-batena manggita da'a mesua ri pekiri ira, naupa ira bate-batena mompetalinga da'a ranjani ira batuana tesa etu. Etu majadi ala ne'e ira majea pade raampungi nu Alatala.’ ” [6]

¹³Pade nangulimo Yesus ka ira, “Ane komi da'a namala mangginjani batuana porapa e'i iwenu komi mangginjani porapa-porapa ntanina?

¹⁴Toposawu pae etu nirapaka ewa tau nompatolele Tesa nu Alatala.

¹⁵Pae to nanawu ri wiwi jala nasimbayu ewa tau-tau to nangepe Tesa nu Alatala, tapi kaliu-liu narata Magau nu Seta nangala tesa etu to lako nesua riara pekiri ira.

¹⁶Pae to nanawu ri bunggu watu-watu to nakura tanana nasimbayu ewa tau-tau to nangepe Tesa nu Alatala pade kaliu-liu nantarima tesa etu ante nadamba rara.

¹⁷Tapi Tesa etu da'a norali riara nta'i ira sampe ira da'a naroo nomparasaya. Tempo ira nombarata kasusa bo pepandasa sabana nomparasaya Tesa nu Alatala etu, kaliu-liu ira nokanggaura.

¹⁸Pade pae to nanawu raranggarui nasimbayu ewa tau-tau to nangepe Tesa nu Alatala pade nantarima Tesa etu.

¹⁹Tapi ira nakini rara nantora katuwu ira ri dunia e'i. Ira aga nompekiri kakalumana pade ira naino ka mpengele-ngele mbara-mbara ri dunia. Pura-pura etu nombalawa Tesa nu Alatala sampe da'a ria aselena riara nggatuwu ira.

²⁰Pade pae to nanawu ri tana to naboyana nasimbayu ewa tau-tau to nangepe Tesa nu Alatala pade nantarima Tesa etu riara nta'i ira. Kaopuna naria asele nggari Tesa etu riara nggatuwu ira. Naria sanu tolumpulu nggani kadeana, naria onompulu nggani kadeana pade naria sanupa satu nggani kadeana.”

²¹Pade nanguli wo'umo Yesus ka ira, “Natantumo poindo da'a nikeni rara njapo pade niungo riara tonda bara ri wayo ranja mpaturu. Tapi poindo etu kana raboli ri kalangana.

²²Sabana pura-pura nuapa to nitabuniaka we'i-we'i kana rapakanoto banepia, pade pura-pura nuapa anu da'apa nanoto ka tau we'i-we'i kana ranjani ntau pura-pura banepiana.

²³Isema-sema naria talingana, epemo mpakabelo-belo tesaku e'i!”

²⁴Pade nanguli wo'umo Yesus ka ira, “Pariara nta'imo nuapa to niepe komi! Ane komi mpu'u-mpu'u mompasimbuku mompariara nta'i Tesa etu, kana ratambai ka komi pangginjani ewa Tesa etu.

²⁵Sabana isema-sema mompariara nta'i Tesa nu Alatala kana ratambai ka ira pangginjani ewa Tesa etu. Tapi isema-sema da'a mompariara nta'i Tesa nu Alatala etu, pangginjani Tesa etu to naria ri ja'ina kana raala nggari ja'ina.”

²⁶Pade nangulimo Yesus, “Pantambai kadea ntau to majadi todea riara Poparenta nu Alatala nasimbayu ewa samba'a tau nosawu ri tinaluna.

²⁷Tempo nggawengina i'a naturu. Tempo eona i'a nembangu pade pae to nisawuna nantambai eona nantambai kabetena, naupa da'a ninjanina iwenu sampe etu najadi.

²⁸Tana etu mbotomo to nompowia pae etu matuwu. Pamulana nesuwu kadana pade bulina pade panggaopuna wuanamo.

²⁹Ane natasamo pae nompamula tau etu nokato sabana temponamo mokato.”

³⁰Nanguli wo'umo Yesus, “Pantambai kadea ntau to majadi todea riara Poparenta nu Alatala namala rapakasimbayu ewa nuapa? Porapa nuapa kupake mompakanoto etu?

³¹Etu nasimbayu ewa saongu wua kayu nakedi mpu'u to nituja ri tinalu ntau. Wua kayu etu to neliu nggakedina nggari pura-pura wua kayu ri dunia.

³²Tapi ane nitujamo pade natuwupa i'amo to neliu nggabetena nggari tuja-tuja ntanina. Ra'a-ra'ana majadi mabete sampe tonji-tonji marata mowia jumuna ri kauluna.”

³³Iwetumo Yesus nompaguru tau dea ante nompake nadea porapa ewa etu nantuki pompakule ira mantarima tesa etu.

³⁴I'a bate-batena nompake porapa ane notesa ka tau dea. Tapi tempo I'a nosanggani-nggani ante anaguruna I'a notarangga mpakanoto pura-pura tesana ka ira.

³⁵Ri kaede eo etu wo'u nangulimo Yesus ka anaguru-anaguruna, “Kamaimo kita mosakaya mpaka ri sambote rano e'i.”

³⁶Jadi anaguru-anaguru Yesus nompalasi tau dea pade nesawi sakaya to nipesawi Yesus. Pade nalaumo ira mpasanggani-nggani ante I'a. Naria bara sakuya ongu sakaya ntanina nosanggani-nggani ante ira.

³⁷Tempo ira nosakaya naratamo poiri naramboso mpu'u pade nompamulamo balumba-balumba bete nombarumpa sakaya ira sampe ue rano nesua riarana sakedika ira natala.

³⁸Tempo etu Yesus naturu ante nompake luna ri bagia puri nu sakaya etu. Jadi nalaumo anaguru-anaguruna nombalike I'a. Nangulimo ira ka I'a, “Guru, nokuya Komi nompalamba kita matala?”

³⁹Nangepe etu nembangumo Yesus pade nomparenta poiri bo balumba-balumba bete, “Penontomo bo kalinomo!” Naopu etu nenontomo poiri pade naotomo ue rano etu.

⁴⁰Pade nangulimo Yesus ka anaguruna, “Nokuya komi naeka? Nokuya komi da'a nomparasaya Aku?”

⁴¹Nanggita kajadia etu naeka mpu'umo anaguru-anaguruna. Nosimpekutanamo ira samba'a bo samba'a, “Isema tanu kakonona tau e'i sampe poiri bo balumba nantuki parentana?”