Read Da'a Kaili MARKUS 5 Bible Online

MARKUS 5 - Da'a Kaili bible

MARKUS 5

¹Naopu etu naratamo Yesus ante anaguru-anaguruna ri sambote Rano Galilea ri bagia to Gerasa.

²Iwetu Yesus nana'u nggari sakaya I'a nitomunaka samba'a langgai to nesuwu nggari tatongo dayo. Langgai etu nipakagila nu seta

³pade i'a aga neto'o ri tatongo dayo-dayo. I'a mana namala nipo'u ntau nau damo nipo'u ante rante.

⁴Nadea ngganimo kadana bo palena nipo'u ntau ante rante. Tapi rante nipompo'u i'a etu naopu pura nidapana, pade ase to nipasua nipombabalanggu kadana nikotona pura. Da'a ria kamba samba'a tau to nompakule manta'amaka i'a.

⁵Eo wengi i'a aga nalau-nalau ri dayo bo ri bulu-buluna ante nongare-ngare pade nompakabela korona mboto ante watu.

⁶Tempo Yesus danakawao nikitana, nangowamo i'a mpaka ri ja'ina pade nekadede nombasomba Yesus.

⁷Nongaremo i'a ante suara namangga, “Yesus, Ana nu Alatala to Neliu Nggalangana, nuapa urusamu ante aku e'i? Aku merapi riara sanga Alatala, ne'e mompandasa aku!”

⁸Niulina iwetu sabana Yesus nompakau seta etu iwe'i: “Seta to naja'a, pesuwumo iko nggari ja'i ntau e'i!”

⁹Pade nekutanamo Yesus ka tau etu, “Isema sangamu?” Nesonomo tau etu, “Sangaku ‘Njobu-njobu,’ sabana nadea mpu'u kami.”

¹⁰Pade mpanggani-nggani tau etu nerapi ante mpu'u-mpu'u rarana ka Yesus ala seta-seta etu ne'e rapopalaina nggari bagia etu.

¹¹Namosu ante peto'o etu nadea mpu'u wawu nangelo panggonina ri kente nu bulu.

¹²Jadi seta-seta riara ntau etu nerapi ka Yesus, “Pakaumo kami mesua riara wawu-wawu etu!”

¹³Nangulimo Yesus, “Kaumo gusa'a!” Jadi nesuwumo seta-seta etu nggari ja'i ntau pane'a pade nesuamo ira riara wawu-wawu nadea etu. Sangga nipesua seta-seta, nangowamo wawu-wawu etu notingganawu nggari wiwi bingge mpaka riara rano sampe namate natala puramo. Kadea nu wawu etu kira-kira ronjobu onguna.

¹⁴Tempo tau-tau to nombajagai wawu-wawu nanggita nuapa to najadi nangowamo ira nompatolele kajadia etu riara ngata ira pade riara ngata-ngata to namosuna. Sangga nangepe tesa etu, nalaumo tau dea nanggita nuapa to najadi.

¹⁵Tempo ira narata ri ja'i Yesus nikita ira tau to nipesua njobu-njobu seta etu nekatoko ri setu. Nopakeamo i'a pade nanoto balimo pekirina. Nanggita etu naeka puramo ira.

¹⁶Pade tau-tau to nanggita kajadia etu notesa ka tau-tau ntanina nuapa to najadi ri ja'i ntau to nipesua seta pade nuapa wo'u to najadi ri ja'i wawu-wawu.

¹⁷Naopu etu pue ngata ri setu nerapi ante mpu'u-mpu'u ka Yesus ala I'a mompalasi bagia ira etu.

¹⁸Tempo Yesus nesawi sakaya naratamo tau to nipesua seta pane'a nerapi ante mpu'u-mpu'u ala i'a mamala malau mpasanggani-nggani ante Yesus.

¹⁹Tapi Yesus da'a nompaloga i'a. Niulina, “Ne'e. Panjilimo komi mpaka ri ja'i sampesuwumu pade tesa ka ira nuapa to nipowia i Pue ka komi. Uli ka ira iwenu Pue naasi matana nanggita komi.”

²⁰Jadi nalaumo tau etu pade nompamulamo i'a mompatolele ka tau-tau ri Bagia Sampulu Ngata ewa nuapa to nipowia Yesus ka i'a. Nangepe tesana etu nasumara puramo tau.

²¹Pade Yesus newote bali ante sakaya mpaka ri sambote rano. Sangga narata ri setu nadea mpu'u tau nasiromu nantaguni I'a. Tempo I'a da ri wiwi rano

²²naratamo samba'a topanggeniaka ri sapo mpodade nto Yahudi to nosanga ka Yairus. Sangga nikitana Yesus naratamo i'a nekadede ri ngayona

²³pade nerapi ante mpu'u-mpu'u ri ja'ina, “Uma, anaku besi naju'a ntomo, sakedika namate. Kuperapi ane mamala kamaimo ri ja'ina pade dikamo pale Komi ri korona ala i'a mabelo bali pade da'a mamate!”

²⁴Nangepe etu nalaumo Yesus nosanggani-nggani ante Yairus. Nadea mpu'u tau nantuki ira sampe nosiaso-aso nombawinggu Yesus.

²⁵Ri setu naria samba'a besi to naju'a nangote lei sampulu rompaemo kasaena.

²⁶Mpanggani-ngganimo i'a nipakuli sando-sando sampe naopu puramo mbara-mbara to naria ri ja'ina nipobaluna nipombabayari sando-sando etu. Tapi da'a ntoto ria gunana. Ju'ana aga nantambai kaja'ana.

²⁷Tempo besi etu nangepe kareba Yesus, nalaumo i'a ri tatongo ntau dea nompakamosu Yesus nggari purina. Pade nikabena baju Yesus,

²⁸sabana nipekirina, “Nau aga bajuna kukabe, kana mabelo ju'aku.”

²⁹Sangga nanggabe baju Yesus, kaliu-liu nenontomo lei to niotena, pade nirasaina riara korona nabelomo ju'ana.

³⁰Tempo etu wo'u Yesus nombarasai naria kuasa nesuwu nggari ja'ina. Jadi I'a nompeili tau dea etu pade nekutana, “Isema nanggabe bajuku pane'a?”

³¹Nesonomo anaguru-anaguruna ka I'a, “Guru, nikita Komi mbotomo tau dea damo nosiaso e'i. Iwenu sampe Komi nekutana, ‘Isema nanggabe Aku?’ ”

³²Tapi Yesus kana nompenoto ri ntalilina mangelo tau to nanggabe I'a.

³³Besi etu ninjanina nuapa to najadi ri korona. Jadi ante nolalete bo naeka rarana nekadedemo i'a ri ngayo Yesus pade nipangakuna ka I'a pura-pura nuapa to najadi pane'a.

³⁴Nangepe etu nangulimo Yesus ka I'a, “Anaku, sabana komi nomparasaya Aku nabelomo ju'amu. Panjilimo ante mabelo. Da'a mana komi maju'a iwetu.”

³⁵Tempo Yesus danotesa, naratamo bara sakuya mba'a tau nggari sapo Yairus, topanggeniaka ri sapo mpodade etu. Nangulimo ira ka Yairus, “Uma, namatemo anamu. Nabelopa ne'e mana mompakasusa guru malau mpaka ri sapomu.”

³⁶Tapi Yesus da'a nompariara tesa ira etu. Niulina ka Yairus, “Ne'e maeka! Parasayamo Aku!”

³⁷Pade da'a nipaloga Yesus tau dea nantuki I'a mpaka ri sapo Yairus. Aga ira i Petrus, Yakobus bo Yohanes tua'i Yakobus to nipalogana mantuki I'a.

³⁸Tempo ira narata ri sapo Yairus, Yesus nanggita tau-tau nakanano mpu'u. Naria tau notumangi bo nantete ante suara namangga.

³⁹Nesuamo Yesus raranjapo pade niulina ka ira, “Nokuya komi nakanano bo nantete iwetu? Ngana etu da'a namate. I'a aga napisi.”

⁴⁰Nangepe etu ira aga nompongiri-ngiri I'a. Tapi Yesus nompopalai ira pura-pura nggariara njapo etu. Pade nipakenina indo uma nu ngana etu ante tolumba'a anaguruna to nosanggani ante I'a, pade nesuamo ira ri tombi ngana etu.

⁴¹Pade nisoko Yesus pale ngana besi etu ante nanguli, “Talita kum.” Batuana, “Ngana besi, kuuli ka iko, pembangumo.”

⁴²Kaliu-liu nembangumo ngana besi etu pade nompamulamo i'a nolumako. Umuru nu ngana besi etu sampulu rompaemo. Nanggita kajadia etu nogumaa mpu'umo ira ri setu.

⁴³Pade Yesus nombatagi ira, “Ne'e ntoto motesa ka tau ntanina nuapa to najadi ri se'i!” Pade niparentana wo'u ala ngana besi etu rawai panggoni sakedi.