Read Da'a Kaili MARKUS 6 Bible Online

MARKUS 6 - Da'a Kaili bible

MARKUS 6

¹Pade nalaimo Yesus nggari setu nanjili mpaka ri ngatana mboto mpasanggani-nggani ante anaguru-anaguruna.

²Ri tempo Eo Mpenonto nompamulamo I'a nopaguru ri sapo mpodade ri setu. Tau dea to naria ri setu natekaja mpu'u nangepe I'a. Ira nanguli, “Nggari umba tanu nipombaratana pangginjanina etu? Nggari umba tanu noto nipakena mompatuduki iwetu? Iwenu sampe I'a namala mompowia kabaraka-kabaraka?

³I'a e'i aga topowia parewa nggari kayu, ana i Maria bo tuaka Yakobus, Yoses, Yudas bo i Simon! Pade tua'ina besi wo'u naria ri tatongota ri se'i!” Etu sampe ira da'a madota momparasaya I'a.

⁴Tapi nangulimo Yesus ka ira, “Samba'a nabi nibila ntau ri umba-umba ngata ntanina. Tapi ri ngatana mboto ri tatongo sampesuwuna bo ira saongu njapo i'a da'a ria nibila.”

⁵Pade da'a namala Yesus nompowia nadea kabaraka ri setu. I'a aga namala nompakabelo bara sakuya mba'a tau naju'a ante nombadika palena ri koro ira.

⁶Natekaja mpu'umo I'a sabana tau ri setu da'a nomparasaya I'a. Naopu etu nalaumo Yesus nompebutu ngata ri bagia etu bo nompaguru tau dea.

⁷I'a nompokio sampulu romba'a anaguruna mpaka ri ja'ina pade nipakauna ira malau romba'a-romba'a sanjala. Niwaina ka ira kuasa ala ira mamala mompopalai seta-seta,

⁸pade nitewaina ka ira iwe'i: “Ne'e komi manggeni bara nuapa-nuapa riara mpolumakomu. Ne'e manggeni baku bara batutu rapomboli panggoni bara doi ri karepe. Tapi to mamala rakeni aga lembau.

⁹Komi mamala mompake sapatu, tapi ne'e manggeni baju rontonga.”

¹⁰Pade niulina wo'u ka ira, “Ane komi marata ri saongu ngata pade maria pue njapo mompopesai komi, peto'omo komi ri sapo etu sampe komi malai mompalasi ngata etu.

¹¹Tapi ane maria pue ngata da'a madota mantarima komi ri ngata ira bara mangepe pepatudukimu, palasimo ngata etu. Pade sapunaimo sowu nggari kadamu ala majadi popatora ka tau ri setu ira kana rasuku Alatala.”

¹²Naopu etu nalaumo ira sampulu romba'a nompatolele ka tau dea ira kana majea nggari silaka-silaka ira.

¹³Pade ira nompopalai nadea seta nggari ja'i ntau nipesua seta, pade nadea tau to naju'a nigese ira lana pade nompakabelo ju'a-ju'a ira.

¹⁴Kareba Yesus niepe Magau Herodes wo'umo, sabana natolelemo sanga Yesus mpaka ri umba-umba. Naria tau to nanguli, “I'a etu Yohanes Topediu to natuwu bali. Etu sampe naria kuasa ri ja'ina mowia kabaraka-kabaraka.”

¹⁵Tapi naria tau ntanina nanguli, “I'a etumo nabi Elia.” Pade naria wo'u to nanguli, “I'a etu samba'a nabi nasimbayu ewa nabi-nabi nggaolu.”

¹⁶Tapi tempo Magau Herodes nangepe tesa-tesa etu nangulimo i'a, “Natantumo I'a etu Yohanes Topediu! Bopia nipakauku tau nombatompo balenggana. Tapi we'i-we'i natuwu balimo i'a!”

¹⁷Iwe'imo sabana Magau Herodes nompekiri iwetu. Bopia i'a nomporongo i Herodias, rongo nu sampesuwuna mboto to nosanga ka i Filipus. Naopu etu nadea ngganimo Yohanes Topediu nangontiaka Magau Herodes sabana pokaingguna etu. Niulina ka i Herodes iwe'i: “Nantuki Atura-atura agamata da'a ntoto masipato komi mangala rongo nu sampesuwumu mboto!” Etu sampe Magau Herodes nompakau tantarana nanjoko Yohanes pade nombasuaraka i'a riara tarunggu.

¹⁸

¹⁹Tempo etu nabilisi mpu'umo rara i Herodias ri ja'i Yohanes. I'a madota mompatesi Yohanes tapi da'a namala,

²⁰sabana Magau Herodes naeka rarana ri ja'i Yohanes. Ninjanina Yohanes samba'a tau nanoa bo nagasa rarana. Jadi Yohanes nikalendu Magau Herodes mpakabelo-belo riara tarunggu. Tempo i Herodes nangepe tesa-tesa Yohanes, naingu rarana. Tapi naupa iwetu nipokonona wo'u nangepe tesana etu.

²¹Kaopuna i Herodias nombarata loga to nabelo ala Yohanes namala rapatesi. Ri eo jadina mboto Magau Herodes nompowia posusa, pade i'a nombagaga pura-pura pangga bete bo balengga-balengga tantara bo totu'a-totu'a nggari njumaongu Bagia Galilea.

²²Tempo posusa etu nesuamo ana randoo i Herodias nojoge ri ngayo ira pura-pura. Randoo etu mpu'u-mpu'u nompakadamba rara Magau Herodes bo torata-toratana etu. Jadi nangulimo i Herodes ka i'a, “Tesamo nuapa-nuapa mupodota, etu kana kuwai ka iko.”

²³Pade i'a nojanji ka randoo etu ante netunda, “Nuapa-nuapa muperapi kana kuwai ka iko, nau sampe santongo nggari poparentaku!”

²⁴Nangepe etu nesuwumo randoo etu nalau nekutana ka indona, “Nindo, nuapa masipato kuperapi nggari ja'i Magau Herodes?” Nesonomo indona, “Perapimo balengga Yohanes Topediu!”

²⁵Jadi natinggulimo randoo etu nasasinta mpaka ri ja'i Magau Herodes pade niulina, “Magau, to kuperapi ala balengga Yohanes Topediu rawai ka aku we'i-we'i raboli riara santonga dula!”

²⁶Nangepe pomperapi randoo etu nasusa mpu'umo rara Magau Herodes. Tapi da'a nabia i'a nompoara pomperapi etu sabana i'a nojanji ante netunda ri ngayo torata-toratana.

²⁷Jadi tempo etu wo'u nipakauna samba'a tantarana malau manggeni balengga Yohanes mpaka ri ja'ina. Pade nalaumo tantara etu mpaka riara tarunggu nombatompo tambolo Yohanes.

²⁸Pade nikeninamo balengga Yohanes etu niboli riara santonga dula pade niwaina ka randoo etu. Naopu etu randoo etu nombawai balengga etu ka indona.

²⁹Sangga nangepe kareba etu, naratamo anaguru-anaguru Yohanes mangala watabakuna nggariara ntarunggu pade nitana ira ri dayo.

³⁰Anaguru-anaguru to nipakau Yesus nanggeni Kareba Belo nanjili bali pade nasiromu mpasanggani-nggani ante Yesus. Pade ira nombatesa ka I'a pura-pura nuapa to nipowia ira bo to nipatuduki ira.

³¹Naopu etu nangulimo Yesus ka ira, “Kamaimo kita mompatani ri peto'o to nakalinoana ala mamala mangosaraka sampalai.” Niulina iwetu sabana aga nosinjambei tau narata ri ja'ina sampe ira nau aga nanggoni da'a nakapo.

³²Jadi nalaumo ira nesawi sakaya mpaka ri peto'o to nakalinoana.

³³Tapi tau dea nanggita ira nosakaya nalau, pade ninjani ira patuju Yesus bo anaguruna. Jadi nalaumo tau dea nggari pura-pura ngata nantuki jala kabatana mokolu ka Yesus bo anaguruna mpaka ri peto'o to nikalau ira.

³⁴Tempo Yesus nana'u nggariara sakaya nikitana nadea mpu'u tau nasiromu ri setu. Nanggita etu naasi mpu'umo matana sabana ira nasimbayu ewa bimba-bimba da'a ria topoewuna. Jadi nompamulamo I'a nompaguru ka ira mpengele-ngele pepatuduki.

³⁵Sangga nangguwiapa da'a mana masaeka mawengi, naratamo anaguru-anaguru Yesus nanguli ka I'a, “Guru, peto'o e'i nakalinoa pade mana masaeka mawengi.

³⁶Agina tau dea etu rapakau matingguli ala ira mamala mangoli panggoni ri ngata-ngata bo boya-boya to namosuna.”

³⁷Tapi nangulimo Yesus ka ira, “Komimo mompakoni ira.” Nanguli ira ka Yesus, “Hai! Iwenu kami mowia etu? Ane kami malau mangoli roti ka ira pura-pura olina roatu mpeka doi salaka mami!” [7]

³⁸Nekutanamo Yesus ka ira, “Sakuya ongu roti to naria ri ja'imu? Kau paresamo!” Naopu ira nomparesa nangulimo ira ka Yesus, “To naria limaongu roti bo romba'a bau.”

³⁹Pade Yesus nompakau tau dea etu mekatoko mobagi-bagi ri bunggu nggawoko naramata ri setu.

⁴⁰Nangepe etu nekatokomo tau dea nobagi-bagi, naria satu mba'a sabagi, naria limampulu mba'a sabagi.

⁴¹Pade Yesus nangala limaongu roti bo romba'a bau etu pade nantingoa langi nosambaya nanguli tarima kasi ka Alatala. Naopu etu nibingga-binggana roti etu pade niwaina ka anaguru-anaguruna ala rapalele ka tau dea etu. Pade romba'a bau etu wo'u nipalelena ka ira pura-pura.

⁴²Pade tau pura-pura nanggoni sampe nabosumo.

⁴³Naopu etu anaguru-anaguru Yesus nompasiromu labi roti bo bau to nabolina, naponupa sampulu rotonda.

⁴⁴Kadea langgai to nanggoni ri setu kira-kira limanjobu mba'a.

⁴⁵Naopu etu kaliu-liu Yesus nompakau anaguru-anaguruna mesawi sakaya mokolu ka I'a mpaka ri ngata Betsaida ri sambote rano. Tapi I'a mboto nompakau tau dea etu manjili ri sapo ira.

⁴⁶Sangga noga'apa I'a ante tau dea etu nantendemo I'a mpaka ri saongu bulu ala mosambaya.

⁴⁷Tempo nawengimo sakaya to nipesawi anaguruna ri tatongo ranomo, pade Yesus njamba'ana da ri kabatana.

⁴⁸Nikita Yesus nandasamo ira nowose sakaya sabana poiri bete nantomunaka sakaya ira etu. Kira-kira tinti toluongu nggawengina naratamo I'a mpaka ri ja'i ira nolumako ri bunggu ue rano ewa madota mombaliunaka ira.

⁴⁹Tempo ira nanggita I'a nolumako ri bunggu nu ue nipekiri ira I'a etu mboa. Jadi nawaranggaamo ira

⁵⁰sabana ira pura-pura nawiora nanggita I'a. Tapi nasalisa I'a notesa ka ira, “Ne'e maeka! Pakaroo raramu! Aku Yesusmo e'i!”

⁵¹Pade nesawimo I'a riara sakaya mpasanggani-nggani ante ira. Pade nenontomo poiri bete etu. Nanggita etu nasumara mpu'umo rara ira,

⁵²sabana naupa ira nanggita kajadia ante roti pangane, da'apa nanoto ka ira isema kakonona Yesus. Danakumba pekiri ira.

⁵³Sangga naratapa ira ri sambote rano nana'umo Yesus ante anaguru-anaguruna ri Bagia Genesaret.

⁵⁴Iwetu ira nana'u nggari sakaya ninjani ntau mamimo Yesus.

⁵⁵Jadi nangowamo ira nompari-mpari nalau mpaka ri ngata-ngata namosu setu. Pade nompamula ira nombakowa tau-tau naju'a ante ompa paturu ira mpaka ri ja'i Yesus nantuki lele to niepe ira.

⁵⁶Ri umba-umba nikalau Yesus, nabeloka ri ngata-ngata, nabeloka ri kota-kota, nabeloka ri boya-boya, naria tau nanggeni toju'a mpaka ri potomu, pade niperapi ira ka Yesus ante mpu'u-mpu'u ala ane mamala tau naju'a etu nau aga manggabe tampa nu bajuna. Pade isema-sema to nanggabe tampa nu bajuna nabelo pura nggari ju'a ira.