Read Da'a Kaili MARKUS 7 Bible Online

MARKUS 7 - Da'a Kaili bible

MARKUS 7

¹Naria sanggani tau-tau to Parisi bo bara sakuya mba'a guru agama nggari ngata Yerusalem narata ri ja'i Yesus.

²Ira nanggita bara sakuya mba'a anaguru Yesus nanggoni ante da'a norama pale ntani ruru nantuki ada-ada nto Parisi.

³Ane tau-tau to Parisi bo pura-pura tau to Yahudi ntanina da'apa mamala manggoni ane ira da'apa morama pale nantuki ada-ada ntotu'a ira nggaolu.

⁴Wa'a wo'u ane ira manjili nggari potomu. Da'apa ira manggoni ira kana morama pale ntani nantuki ada-ada ntotu'a. Pade nadea wo'u ada-ada ntanina to nipasumuli nggari totu'a ira nggaolu to nituki ira. Jonjona, ira kana norama sanggiri, jolo bo parewa-parewa ntanina to nipowia nggari tambaga.

⁵Jadi etumo sabana tau-tau to Parisi bo guru-guru agama etu nekutana ka Yesus, “Nokuya anaguru-anagurumu da'a nantuki ada-ada ntotu'ata nggaolu? Nokuya ira aga nanggoni ante pale da'a nirama?”

⁶Nesonomo Yesus ka ira, “Komi tau-tau aga nabelo ri lenje! Nakono mpu'u Tesa nu Alatala to nipasimbayu nabi Yesaya nggaolu ewa komi. Nitulisina iwe'i: ‘Tau-tau e'i aga nombabila Aku ri sumba, tapi da'a ante mpu'u-mpu'u rara ira.

⁷Da'a ntoto ria gunana ira mepue ka Aku, sabana ira nompatuduki ada-ada nu manusia ante nanguli etu parenta-parenta nu Alatala.’ [8]

⁸Jadi parenta-parenta Alatala da'a nipariba'a komi tapi ada-ada nu manusia nisoko komi ante naroso.”

⁹Pade nanguli wo'umo Yesus ka ira, “Nata'u mpu'umo komi nanjapuaka parenta Alatala ala matundu riara ada-ada komi mboto.

¹⁰Jonjona, nabi i Musa nanguli iwe'i: ‘Bilamo indo umamu,’ [9] pade niulina wo'u, ‘Isema-sema manguli sinja'i umana bara indona i'a kana rapatesi.’ [10]

¹¹Tapi komi nompatuduki iwe'i: ‘Da'a mokuya ane samba'a tau manguli ka indo bo umana nuapa to masipato rapakena mantulungi ira nirekena pesomba ka Alatala.’

¹²Pade ane i'a mowia iwetu komi mana mompaloga i'a mantulungi indo bo umana.

¹³Jadi ante iwetu komi nanjapuaka Tesa nu Alatala ante nompariba'a ada-ada ntotu'a to nipasumuli ka komi. Pade nadeapa ntani-ntanina to nipowia komi nasimbayu ante etu.”

¹⁴Pade sangganipa Yesus nompokio tau dea marata ri ja'ina, pade nitesana ka ira porapa e'i: “Umba komi pura-pura, epemo tesaku e'i pade pekirimo batuana.

¹⁵Da'a ria sangele nggari sawalikuna to nesua riara manusia mamala mompakatantoru ira riara mpanggita Alatala. Tapi pokainggu to naja'a to nopu'u nggariara nta'i manusia, etumo to nompakatantoru ira riara mpanggita Alatala.

¹⁶Isema-sema naria talingana, epemo mpakabelo-belo tesaku e'i.”

¹⁷Naopu etu Yesus nompalasi tau dea pade nesua raranjapo. Tempo etu nekutanamo anaguruna ka I'a ewa batuana porapa to lako nitesana pani'a.

¹⁸Nangulimo Yesus ka ira, “Iwenumo? Komi wo'u naingu nasimbayu ewa tau dea pani'a? Da'apa nanoto ka komi batuana porapa etu? Da'a ria panggoni to nikoni manusia mamala mompakatantoru i'a riara mpanggita Alatala.

¹⁹Sabana panggoni etu da'a nesua riara pekirina tapi aga nesua riara nta'i likona, pade nggari setu aga niotena mpanjili.” Ante nanguli iwetu, Yesus nompakatantu mpengele-ngele panggoni namala rakoni, da'a ria to nipopali.

²⁰Pade nanguli wo'umo Yesus, “Nuapa to nesuwu nggari pekiri manusia etumo to nompakatantoru ira riara mpanggita Alatala.

²¹Sabana nggariarana, etumo nggariara nta'ina neumba pompekiri-pompekiri to naja'a to nanggeni tau nogau sala ante tau da'a rongona mboto, nangangga, nepatesi,

²²nebualo, da'a nabasa-basa naino ka mbara-mbara ntau, nowia kaja'ana, nebagiu, da'a nabasa-basa nantuki dota rara to naja'ana, nasiriati, nanguli sinja'i, nasombo, pade noinggu nadoyo.

²³Pokainggu to naja'a etumo to neumba nggariara manusia pade nompakatantoru ira riara mpanggita Alatala.”

²⁴Naopu etu nalaumo Yesus mpaka ri bagia namosu ngata Tirus. Narata ri setu nesuamo I'a raranjapo. Patujuna ala ne'e rakita ntau dea. Tapi karatana ri bagia etu da'a namala nitabuniaka.

²⁵Ri setu naria samba'a besi da'a to Yahudi nggari Bagia Siro Fenisia. Ana besi nggari besi etu nipesua seta. Jadi iwetu i'a nangepe lele Yesus naria ri ngata etu, naratamo i'a nekadede ri ngayona nerapi ante mpu'u-mpu'u rara, “Tulungimo aku, popalaimo seta nggari ja'i anaku!”

²⁷Tapi nangulimo Yesus ka i'a, “Pakambamo ngana-ngana manggoni ntani ruru sampe mabosu. Sabana da'a masipato mangala panggoni ngana-ngana ratajiaka ka asu.”

²⁸Nangulimo besi etu, “Nakono to niuli Komi, Pue. Tapi asu ri wayo meja wo'u nanggoni rombo-rombo mpanggoni to nanawu nggari ja'i ngana-ngana.” [11]

²⁹Pade nanguli Yesus ka i'a, “Nakonomo tesamu. Sabana etu panjilimo we'i-we'i. Nalaimo seta etu nggari ja'i anamu.”

³⁰Pade nanjilimo besi etu. Sangga narata ri sapona nikitanamo anana besi naturu ri ompa paturuna pade seta etu nalaimo nggari ja'ina.

³¹Naopu etu Yesus nompalasi Bagia Tirus pade napolamo I'a noliu ri ngata Sidon mpaka ri Rano Galilea. Riara mpolumakona I'a nantuki jala ri Bagia Sampulu Ngata.

³²Narata ri setu naria tau nanggeni roana to nabongo bo nabobo mpaka ri ja'ina. Pade ira nerapi ka Yesus ante mpu'u-mpu'u rara ala I'a mombadika palena ri koro ntau etu ala mompakabelo i'a.

³³Yesus nanggeni tau etu nggari ja'i ntau dea, pade nisuarakana koyampalena riara talinga ntau etu. Naopu etu nitailuna palena pade nituina ka jila ntau etu.

³⁴Naopu etu Yesus nantingoa langi ante nangore nosana, pade niulina ka tau etu riara Basa Ibrani, “Efata!” Batuana, katebeamo!

³⁵Pade natebeamo talinga ntau etu, pade nalulu balimo jilana sampe i'a namala notesa ante nabelo.

³⁶Pade Yesus nompakau ira pura-pura ala ne'e mombatesa kajadia etu ka tau-tau ntanina. Tapi nantambai nitagi nantambai ira nompatolele kajadia etu.

³⁷Sangga nangepe kajadia etu nogumaa mpu'umo tau dea. Ira nanguli, “Pura-pura to nipowiana nabelo! Tau nabongo nipakabelona talingana sampe namala neepe, pade tau nabobo wo'u nipakabelona sampe namala notesa ante nabelo!”