Read Da'a Kaili MARKUS 8 Bible Online

MARKUS 8 - Da'a Kaili bible

MARKUS 8

¹Tempo etu naria wo'umo tau dea nasiromu ri ja'i Yesus pade mana ria panggoni ira. Jadi Yesus nompokio anaguru-anaguruna ri ja'ina pade niulina ka ira,

²“Naasi mpu'umo mataku nanggita tau dea e'i, sabana tolumbengimo ira nosanggani-nggani ante Aku ri se'i sampe mana ria panggoni ira.

³Pade ane ira kupakau manjili ante maoro, natantumo ira kana maleto pade madungga ri jala, sabana naria ira to narata nggari peto'o to nakawaona.”

⁴Nesonomo anaguru-anaguruna, “Iwenumo? Kita e'i ri peto'o nakalinoa. Nggari umbamo rapangalata panggoni rapakoni ka tau dea e'i ala mabosu?”

⁵Jadi nekutanamo Yesus ka ira, “Sakuya ongu roti to naria ri ja'i komi?” Nesono ira, “Pituongu.”

⁶Nangepe etu Yesus nompakau tau dea etu nekatoko ri tana. Naopu etu nialana roti pituongu etu pade niulina tarima kasi ka Pue Alatala. Pade nibingga-binggana roti etu pade niwaina ka anaguru-anaguruna ala rapalele ka tau dea. Pade anaguru-anaguruna nompalele roti etu ka ira.

⁷Naria wo'u bara sakuya mba'a bau ri ja'i ira. Sangga niganenapa nipakaunamo anaguruna nompalele bau etu ka tau dea.

⁸Pura-pura tau nanggoni sampe nabosu. Naopu etu nipasiromu iramo labi-labi mpanggoni etu naponupa pitu karanji.

⁹Kadea ira to nanggoni ri setu kira-kira patanjobu mba'ana. Naopupa ira nanggoni Yesus nompakau ira manjili.

¹⁰Sangga nalaipa tau dea etu Yesus ante anaguruna nesawi sakaya nalau mpaka ri Bagia Dalmanuta.

¹¹Pade naratamo bara sakuya mba'a tau to Parisi mpaka ri ja'i Yesus. Nompamulamo ira nosisono ante I'a sabana ira madota mompesoba I'a. Nangulimo ira ka I'a, “Kawiamo sangaya tandai to nipogumaa ala mompopokita ka kami Komi mpu'u-mpu'u nipakau Alatala.”

¹²Nonguamo Yesus riara nta'ina pade niulina ka ira, “Nokuya komi to natuwu we'i-we'i batena merapi tandai to nipogumaa? Aku mpu'u-mpu'u notesa ka komi, komi e'i da'a ntoto rapopokita ka tandai to nipogumaa iwetu!”

¹³Naopu etu Yesus nompalasi ira pade nalau nesawi sakaya mpaka ri sambote rano.

¹⁴Tempo nesawi sakaya da'a nitora anaguru Yesus nanggeni baku. To nikeni ira riara sakaya aga saongu lau roti.

¹⁵Nangulimo Yesus ka ira, “Pakabelo-belo! Komi kana mainga ala ne'e mawela ragi tau-tau to Parisi bo ragi Magau Herodes.”

¹⁶Nangepe etu notesamo ira samba'a bo samba'a, “Masipato I'a nanguli iwetu sabana da'a ria roti ri ja'ita se'i.”

¹⁷Ninjani Yesus nuapa to nitesa ira etu. Jadi niulina ka ira, “Nokuya komi nanguli, ‘Da'a ria roti ri ja'ita?’ Iwenumo? Da'apa nanoto rara komi? Da'apa ninjani komi batua nu tesaku pani'a? Bara nabungu pekiri komi!

¹⁸Komi nomata tapi nokuya komi da'a namala nekita? Komi notalinga tapi nokuya komi da'a namala neepe? Da'a nitora komi to najadi bopia?

¹⁹Tempo Aku nombabingga-bingga limaongu roti nipakoni ka limanjobu mba'a tau, sakuya tonda labina to nipasiromu komi?” Nesonomo ira, “Sampulu rotonda.”

²⁰Pade nanguli I'a, “Tempo pituongu roti nibinggaku nipakoni ka patanjobu mba'a tau, sakuya karanji labina to nipasiromu komi?” Nesonomo ira, “Pitu karanji.”

²¹Pade nanguli Yesus, “Ane iwetu nokuya komi da'apa nangginjani batua nu tesaku pani'a?”

²²Naopu etu naratamo ira ri ngata Betsaida. Ri setu naria tau nanggeni samba'a toburo mpaka ri ja'i Yesus pade ira nerapi ala Yesus mombadika palena ri mata ntau etu.

²³Jadi Yesus nanjoko pale ntoburo etu pade nikenina mpaka ri sawaliku ngata. Ri setu Yesus nantailu mata ntau etu pade nidikana palena ri matana. Naopu etu nekutanamo I'a ka toburo, “Namalamo komi nanggita nuapa-nuapa?”

²⁴Tau etu nanggita mpaka ri koluna pade niulina, “Iyo! Aku nanggita tau nolumako. Tapi nikitaku ira aga ewa pu'u-pu'u nggayu!”

²⁵Nangepe etu sangganipa Yesus nombadika palena ri mata ntoburo etu. Naopu etu toburo mpu'u-mpu'u nompasimbuku nanggita. Pade nabelomo matana sampe i'a namala nanggita nuapa-nuapa ante nanoto.

²⁶Naopu etu Yesus nompakau i'a manjili. Niulina, “Panjilimo, ne'e mana mesua bali rara ngata etu.”

²⁷Naopu etu nalaumo Yesus ante anaguru-anaguruna mpaka ri ngata-ngata to namosu ngata Kaisarea Filipi. Ri tatongo jala nekutanamo Yesus ka ira, “Nantuki tesa ntau dea, isema kakonona Aku e'i?”

²⁸Nesonomo ira, “Naria to nanguli Komi Yohanes Topediu to natuwu bali, pade naria wo'u sanu nanguli Komi nabi Elia to neumba bali. Pade naria wo'u to nanguli Komi samba'a nggari nabi-nabi nggaolu to natuwu bali.”

²⁹Pade nekutanamo Yesus ka ira, “Tapi nantuki pombarata komi, isema Aku e'i?” Nesonomo i Petrus, “Komimo Magau to Mompakasalama to nijanji Alatala!”

³⁰Nangepe etu nangulimo Yesus ka ira, “Ne'epa ratesa ka tau-tau ntanina isema Aku e'i.”

³¹Naliu etu nompamulamo Yesus nompatuduki anaguru-anaguruna. Niulina, “Aku, Ana nu Manusia kana mombarasai mpengele-ngele kasusa. Aku kana rapoara totu'a-totu'a nto Yahudi bo balengga-balengga topanggeni agama bo guru-guru agama. Pade Aku kana rapatesi ira. Tapi ri eo katolueona Aku kana matuwu bali.”

³²Etu pura-pura nitesa Yesus ka ira ante nanoto. Nangepe etu i Petrus nanggeni Yesus mpaka ri sabinggana pade nangontiaka I'a. Niulina, “Guru, ne'e motesa-tesa iwetu!”

³³Tapi Yesus nakampeili nanggita anaguru-anaguruna, pade niontiakana i Petrus, “Palaimo iko nggari se'i, Magau nu Seta! Pompekirimu etu pompekiri manusia, da'a pompekiri nggari ja'i Alatala!”

³⁴Naopu etu Yesus nompokio tau dea ri setu mpaka ri ja'ina nosanggani-nggani ante anaguruna pade niulina ka ira, “Isema-sema madota majadi topantuki Aku, i'a kana mombakabasaka dota rarana mboto pade masadia mantuki Aku nau sampe mamate rapaku ri kayu parika.

³⁵Sabana isema-sema da'a masadia mantuki Aku nau sampe mamate i'a da'a mombarata katuwua mabelo sampe ri kasae-saena. Tapi isema-sema to mombakabasaka pura-pura dotana mboto pade mantuki Aku bo manggeni Kareba Belo nau sampe rapatesi, i'a kana mombarata katuwua mabelo sampe ri kasae-saena.

³⁶Natantumo da'a ntoto ria gunana ane samba'a tau mombarata pura-pura nuapa to naria riara dunia e'i tapi da'a masalama, aga rasuku sampe ri kasae-saena ri naraka.

³⁷Da'a ria nuapa-nuapa to namala rasulata ante katuwua mabelo etu.

³⁸Isema-sema maeya mompangaku Aku bo tesa-tesaku ri tatongo tau-tau to nasilaka bo tau dea to da'a natutu nantuki Alatala, Aku, Ana nu Manusia wo'u maeya mompangaku i'a tempo Aku marata bali ri dunia e'i. Tempo etu Aku kana marata ante reme bo kuasa nu Umaku, nosanggani-nggani ante malaeka-malaeka to nagasana!”