Read Da'a Kaili MARKUS 9 Bible Online

MARKUS 9 - Da'a Kaili bible

MARKUS 9

¹Pade niulina wo'u ka ira, “Aku mpu'u-mpu'u notesa ka komi, naria bara sakuya mba'a tau ri tatongo komi ri se'i da'apa mamate ane da'apa rakita ira Alatala mompamula moparenta ante kuasana.”

²Onombengi kaliuna Yesus nanggeni i Petrus, Yakobus bo Yohanes mpasanggani-nggani nalau nantende mpaka ri saongu bulu to nalangana. Ri setu aga ira mboto, da'a ria tau ntanina. Tempo ira ri setu sampegoli nabalimo lenje Yesus ri ngayo ira.

³Pakeana nabula nju'u damo nenggila. Da'a ria samba'a tau ri dunia e'i to mamala mantapasi pakeana ewa kagasana bo kabulana pakea Yesus etu.

⁴Pade ira tolumba'a nanggita nabi Elia bo nabi i Musa nggaolu notesa-tesa ante Yesus.

⁵Nanggita etu nangulimo i Petrus ka Yesus, “Guru, nasana mpu'u kami ri se'i. Nabelopa kami mowia toluongu pakumpa ri se'i, saongu ka Komi, saongu ka i Musa bo saongu ka Elia.”

⁶Kakonona da'a ninjani i Petrus nuapa to masipato ratesana sabana naeka mpu'umo rara ira tolumba'a.

⁷Tempo etu naratamo kulimu nombabungu ira pura-pura, pade nggariara kulimu etu niepe ira suara nanguli, “E'imo Anaku to nipotoweku. Epe komimo tesana!”

⁸Sampida mata lau ira nanggita ntalili, mana nikita ira tau romba'a pani'a. To nikita ira damo Yesus njamba'ana.

⁹Tempo ira notua nggari buluna etu Yesus nompopatora ka ira, “Ne'e motesa ka isema-sema nuapa to nikita komi pani'a ane da'apa Aku, Ana nu Manusia matuwu bali nggari tatongo ntau to namatena.”

¹⁰Ira nompariara popatora Yesus etu, tapi ira nosimpekutana samba'a bo samba'a nuapa patuju Yesus nanguli, “Matuwu bali nggari tatongo ntau to namatena.”

¹¹Pade nekutanamo ira ka I'a, “Nuapa sabana guru-guru agama nanguli nabi Elia kana mokolu marata pade Magau to Mompakasalama?”

¹²Nesonomo Yesus, “Nakonomo tesa ira. Nabi Elia kana mokolu marata ala mompakasiayu mpengele-ngele. Tapi ane iwetu, nuapa patuju nu tesa to nitulisi riara Buku Nagasa to nanguli Ana nu Manusia kana mombarasai madea kasusa pade rasalai ntau dea?

¹³Tapi kuuli ka komi, kakonona naratamo nabi Elia, pade tau-tau nompowia ka i'a nantuki dota ira, nasimbayu ewa to nitulisi nggaolu riara Buku Nagasa ewa i'a.” [12]

¹⁴Tempo Yesus, i Petrus, Yakobus pade Yohanes nanjili ri ja'i anaguruna ntanina, nikita ira tau dea nantalili anaguru-anaguruna etu. Pade naria bara sakuya mba'a guru agama nosisono-sono ante anaguru Yesus.

¹⁵Tempo tau dea nanggita Yesus natekajamo ira, pade ira nangowa nantomunaka I'a.

¹⁶Nekutanamo Yesus ka ira, “Nuapa to niposinjono komi pani'a?”

¹⁷Nesonomo samba'a nggari tatongo ntau dea etu, “Guru, aku nanggeni anaku mpaka ri ja'imu sabana i'a nipesua seta to nompakabobo i'a.

¹⁸Butu nggani seta etu nesua ri ja'ina i'a nidungganakana mpaka ri tana. Pade ngangana nawura, bagana nosinggiki pade korona najadi nako'o. Niperapiku ka anagurumu ala ira mompopalai seta etu, tapi ira da'a nompakule.”

¹⁹Nangepe etu nangulimo Yesus ka ira, “Iwenu tanu komi? Komimo tau mpu'u-mpu'u da'a nomparasaya! Sakuyapa kasaena Aku kana mosanggani ante komi? Sakuyapa kasaena Aku kana mosabara ri ja'i komi? Keni wemaimo ngana etu!”

²⁰Pade nikeni iramo ngana etu ri ja'i Yesus. Tempo seta riara ngana etu nanggita Yesus, kaliu-liu i'a nombabaga ngana etu sampe i'a nadungga pade notinggaduli ante ngangana nawura.

²¹Pade nekutanamo Yesus ka uma nu ngana etu, “Sakuyamo kasaena anamu nombarasai iwe'i?” Nesonomo umana, “Da nggari kakedina.

²²Nadea ngganimo i'a nipakadungga seta etu riara apu atau ri ue ala mompatesi i'a. Tapi ane Komi mamala mowia bara nuapa ka anaku e'i, potowemo kami! Tulungimo kami!”

²³Nangulimo Yesus ka i'a, “Pangulimu, ‘Ane Komi mamala mowia bara nuapa.’ Tapi kakonona pura-pura namala majadi ka tau to nomparasaya!”

²⁴Kaliu-liu nongaremo uma nu ngana etu, “Aku nomparasayamo! Tapi tulungimo, pomparasayaku e'i danalente!”

²⁵Sangga Yesus nanggita tau dea nangowa nantatiku I'a, niparentana seta etu iwe'i: “Palaimo iko, seta to nompakabobo pade nompakabongo ngana e'i! Palaimo iko pade ne'e mana mesua ri ja'ina!”

²⁶Nangepe etu nesuwumo seta etu ante nongare pade nombajuanaka mpakagai ngana etu. Iwetu seta nesuwu nggari ja'ina ngana etu ewa tomate, sampe tau dea nanguli, “Namatemo i'a.”

²⁷Tapi Yesus nanjoko pale ngana etu pade nantulungi i'a nembangu. Pade nembangumo ngana etu.

²⁸Tempo Yesus nesua raranjapo ante anaguruna, nekutanamo ira ka I'a, “Pue, iwenu sampe kami da'a nompakule nompopalai seta etu pani'a?”

²⁹Nesonomo Yesus, “Seta ewa etu da'a namala rapopalai ante akala ntanina. Tapi aga ante posambaya.”

³⁰Naopu etu Yesus ante anaguruna nompalasi peto'o etu nompapola polumako ira noliu ri Bagia Galilea. Patuju Yesus ala ne'e ranjani ntau mpaka ri umba I'a,

³¹sabana I'a nompatuduki anaguru-anaguruna. Nangulimo I'a ka ira, “Aku, Ana nu Manusia kana rawai ka baliku, pade Aku kana rapatesi ira. Tapi ri eo katolueona Aku kana matuwu bali.”

³²Tapi da'a ninjani anaguru Yesus patuju nu tesana etu, pade naekamo rara ira nompekutana batuana ri ja'ina.

³³Naratamo ira ri ngata Kapernaum. Sangga nesuapa ira raranjapo nekutanamo Yesus ka anaguruna, “Nuapa to niposinggarau komi ri jala pani'a?”

³⁴Tapi ira aga nekalino sanggani, sabana ri jala pani'a ira nosinggarau ka isema to neliu nggalanga katuwuna nggari tatongo ira.

³⁵Nanggita etu Yesus nekatoko ri setu pade nipokiona anaguruna sampulu romba'a etu mpaka ri ja'ina. Pade niulina ka ira, “Isema-sema madota majadi to neliu nggalanga katuwuna i'a kana majadi to neliu nggaede nggari roana, pade i'a kana majadi batua nu roana pura-pura.”

³⁶Pade nialana samba'a ngana nggedi nikenina ri tatongo ira pura-pura. Pade nikalipuina ngana etu ante nanguli ka ira,

³⁷“Isema-sema nantarima samba'a ngana nggedi ewa ngana e'i sabana i'a topomparasaya Aku, i'a nantarima Aku. Pade isema-sema to nantarima Aku da'a aga Aku to nitarimana, tapi i'a wo'u nantarima Umaku to nompakau Aku.”

³⁸Pade nangulimo Yohanes ka Yesus, “Guru, kami nanggita samba'a tau nompopalai seta ante kuasa nggari sanga Komi. Tau etu nitagi kami sabana i'a da'a topantuki kita.”

³⁹Tapi nangulimo Yesus, “Ne'e komi mombatagi i'a, sabana da'a ria tau to nompowia kabaraka ante kuasa nggari sangaku to namala manguli sinja'i Aku.

⁴⁰Isema-sema da'a nangewa kita, ira roata.

⁴¹Aku mpu'u-mpu'u notesa ka komi, isema-sema mombawai ka komi ue inu sabana komi topantuki Kristus, natantumo i'a kana mombarata tambona banepia.

⁴²Pade isema-sema mombabagiu samba'a ngana nggedi sampe i'a mana momparasaya, nabelopa ane saongu watu bete raso'o ri tambolona pade i'a ratajiaka riara ntasi.

⁴³Ane palemu manggeni komi mowia silaka, tompomo palemu etu! Nabelopa komi mesua matuwu mabelo riara suruga ante pale mapudu pade ratajiaka riara naraka ante pale to maganana, etumo riara apu to da'a ntoto ria kapaya-payana. [

⁴⁴Ri setu kaule da'a ria kamatena pade apu da'a ria kapaya-payana.]

⁴⁵Pade ane kadamu manggeni komi mowia silaka, tompomo kadamu etu! Nabelopa komi mesua matuwu mabelo riara suruga ante kada mapudu pade ratajiaka riara naraka ante kada to maganana. [

⁴⁶Ri setu kaule da'a ria kamatena pade apu da'a ria kapaya-payana.]

⁴⁷Pade ane matamu manggeni komi mowia silaka, su'i kaliakamo matamu etu! Nabelopa komi mesua matuwu mabelo riara suruga ante momata sabingga pade ratajiaka riara naraka ante mata to maganana.

⁴⁸Ri setu kaule da'a ria kamatena pade apu da'a ria kapaya-payana.

⁴⁹Butu mba'a tau pokaingguna kana rapakagasa riara mpanggita Alatala ante apu [nasimbayu ewa pesomba nipakagasa ante gara.] [13]

⁵⁰Gara nabelo, tapi ane gara majadi nameli, iwenupa wo'u mompakapaga bali? Iwetu wo'u komi kana mompopokita belo riara nggatuwumu, pade tunggai mosinggabelo ante roa ntanina.”