Read Da'a Kaili LUKAS 1 Bible Online

LUKAS 1 - Da'a Kaili bible

LUKAS 1

¹Teofilus to nibilaku. Nadeamo tau nompasimbuku nantulisi saongu kareba ewa nuapa to najadi ante Yesus ri tatongota.

²Isi kareba etu nantuki tesa to nipatolele ka kita nggari tau-tau to nanggita kajadia-kajadia etu ante matana mboto nggari pamulana.

³Jadi naopu aku nomparesa pura-pura kajadia etu mpakabelo-belo nompamula nggari pamula-mulana, nipekiriku nabelopa ane aku wo'u mantulisi saongu kareba to mosisunju-sunju etu ka komi.

⁴Nitulisiku kareba e'i ala komi mamala mangginjani bo momparasaya pura-pura nuapa to nipatuduki ka komi mpu'u-mpu'u nakono.

⁵Tempo Magau Herodes noparenta ri Bagia Yudea, naria samba'a topanggeni agama Yahudi to nosanga ka i Zakharia. I'a samba'a tau nggari lunu topanggeni agama to nosanga ka lunu muli Abia. Rongona nosanga ka Elisabet. I'a wo'u muli nu topanggeni agama.

⁶Katuwu ira njamboko etu nompakadamba rara nu Alatala, sabana ira natundu riara pura-pura parenta bo atura i Pue.

⁷Ira da'a noana sabana Elisabet nagampa, bo ira njamboko wo'u natu'amo.

⁸Naria sanggani, tempo lunu Abia nombarata lelena, i Zakharia nobago ewa topanggeni agama ri ngayo Alatala ri Sapo Mpepue.

⁹Pade ira nowia nomoro nantuki kabiasa ira mompakatantu isema motunju wongi ri ngayo Alatala. Nomoro etu nawela i Zakharia, jadi i'amo to nesua riara Sapo Mpepue motunju wongi.

¹⁰Tempo i'a notunju wongi riara Sapo Mpepue todea nosambaya ri sawalikuna.

¹¹Tempo etu naratamo samba'a malaeka i Pue nompopokita korona ka i Zakharia. Malaeka etu nekanggore ri sabingga nggana nu meja mpotunju wongi etu.

¹²Sangga nanggita malaeka etu natikajamo i Zakharia pade naeka mpu'u rarana.

¹³Tapi nangulimo malaeka etu ka i'a, “Ne'e maeka, Zakharia. Nitarima Alatalamo posambayamu. Rongomu Elisabet kana moana samba'a ngana langgai pade i'a kana mupoposanga Yohanes.

¹⁴Iko kana madamba mpu'u raramu pade madea tau madamba rarana tempo ngana etu mesuwu.

¹⁵I'a majadi samba'a tau to moangga riara mpanggita i Pue. I'a da'a manginu pura-pura panginu to nepakalangu. I'a kana maponu ante Nosa Nagasa nu Alatala nompamula nggariara nu indona.

¹⁶Pade ante pepatudukina nadea to Israel kana rakenina bali momparasaya Pue Alatala.

¹⁷I'a kana majadi suro i Pue Alatala to nakuasa ewa nabi Elia nggaolu. I'a mompoposinggabelo uma ante anana, pade tau da'a natundu ri ja'i Alatala rakenina mpanjili ri jala to nakonona. Pura-pura etu rakawiana ala mompakasadia todea to madota mantarima i Pue.”

¹⁸Nangepe tesa malaeka etu nekutanamo i Zakharia, “Nuapa tandaina mompakatantu etu majadi? Aku natu'amo, bo rongoku wo'u natu'amo.”

¹⁹Nesonomo malaeka etu, “Aku e'i i Gabriel to nekanggore ri ngayo Alatala! Akumo to nipakauna mompasimbayu kareba belo e'i ka komi.

²⁰Nuapa to niuliku kana majadi ri tempo to nipakatantu Alatala! Tapi sabana da'a niparasayamu tesaku, iko mana masowa mojarita. Iko kana mabobo sampe madupa nuapa to nitesaku etu!”

²¹Tempo etu tau dea nompopea i Zakharia ri sawalikuna. Naingumo ira sabana nasae gaga i'a da'a nesuwu nggariara Sapo Mpepue.

²²Tempo i'a nesuwu i'a mana nasowa nojarita ka ira. Niwiatakana palena notesa ka ira pura-pura sabana i'a nabobomo. Nanggita etu ninjani ntaumo naria panggita to nikitana riara Sapo Mpepue etu.

²³Sangga naopupa bagona ri Sapo Mpepue etu, natinggulimo i Zakharia nggari ngata Yerusalem mpaka ri sapona.

²⁴Da'a sakuya kasaena nggari setu natianamo rongona Elisabet, pade limambula kasaena i'a netabuni da'a nesuwu-suwu nggariara njapona.

²⁵Nangulimo Elisabet, “Iwe'imo tanu powia i Pue ri ja'iku. I'a nantulungi aku nompakalipo eya nu mataku nggari kagampaku.”

²⁶Tempona onombulamo ta'i Elisabet, Alatala nompakau malaekana i Gabriel malau mpaka ri saongu ngata ri Bagia Galilea to nosanga ka Nazaret.

²⁷Malaeka etu nipakau mpaka ri ja'i samba'a randoo, sangana i Maria. Randoo etu notingea ante samba'a langgai to nosanga ka Yusuf, samba'a muli Magau Daud.

²⁸Malaeka etu narata ri ja'i Maria pade nanguli, “Umba, iko Maria. Ikomo tau to nigane i Pue. Pue nosanggani ante iko.”

²⁹Natikaja i Maria nangepe tesa malaeka etu, pade nipekirina riara nta'ina, “Nuapa patujuna tesa ewa etu?”

³⁰Pade nangulimo malaeka etu ka i Maria, “Ne'e maeka, Maria, sabana iko nikonoa rara nu Alatala.

³¹Iko kana matiana pade mangote samba'a ngana langgai pade I'a kana mupoposanga Yesus.

³²I'a kana majadi samba'a tau to nalanga katuwuna pade I'a kana rauli Ana nu Alatala. Pue Alatala kana mompajadi I'a Magau ewa totu'ana nggaolu Magau Daud.

³³Pade I'a kana moparenta to Yahudi ewa samba'a magau sampe ri kasae-saena. Poparentana etu da'a ria kaopu-opuna.”

³⁴Nangulimo i Maria ka malaeka etu, “Iwenu etu majadi ri koroku? Aku e'i danarandoo.”

³⁵Nesono malaeka etu ka i Maria, “Nosa Nagasa nu Alatala kana marata ri ja'imu pade kuasa nu Alatala etu kana maria ri ja'imu. Etumo sabana ngana to mesuwu nggari ja'imu etu kana rauli Nagasa, Ana nu Alatala.

³⁶Pade kana mutora Elisabet sampesuwumu etu natianamo, e'imo kaonombulana naupa i'a etu natu'amo pade to niuli ntau i'a nagampa.

³⁷Pura-pura to niuliku ka iko kana majadi sabana pura-pura to nipodota nu Alatala kana majadi. Da'a ria anu da'a majadi ane I'a madota.”

³⁸Pade nangulimo i Maria, “Aku e'imo batua i Pue. Majadimo ri ja'iku ewa nuapa to niulimu etu.” Naopu etu nalaimo malaeka etu nompalasi i Maria.

³⁹Naopu etu nalaumo i Maria nasalisa mpaka ri saongu ngata ri buluna ri Bagia Yudea.

⁴⁰Narata ri setu i'a nalau mpaka ri sapo i Zakharia. Tempona nesua i'a nombatabe Elisabet.

⁴¹Iwetu Elisabet nangepe petabe i Maria, nonggayamo ngana riara nta'ina. Pade Elisabet nipesua Nosa Nagasa nu Alatala,

⁴²pade notesa ante suara namangga, “Ikomo to nigane Pue Alatala neliu nggari pura-pura besi ntanina, pade rasi Alatala naria ri ja'i anamu.

⁴³Mpu'u-mpu'u aku nibila Alatala ante nikarata indo nu Pueku ri ja'iku mboto.

⁴⁴Iwetu aku nangepe petabemu, nonggayamo ngana riaraku ante kadambana.

⁴⁵Iko mpu'u-mpu'u rawai ka rasi bo belo sabana niparasayamu nuapa to niuli i Pue ka iko, etu kana majadi.”

⁴⁶Naopu etu nangulimo i Maria, “Ante raraku mpu'u aku mantoiya mompakabete i Pue,

⁴⁷pade nadamba mpu'u raraku, sabana Alatala Magau to nompakasalama aku.

⁴⁸I'a nantora aku, batuana to napakasi. Mompamula nggari eo e'i pura-pura manusia kana manguli akumo to niwai Alatala ka rasi.

⁴⁹Sabana Alatala to Neliu Nggakuasa nompowia kabaraka ka aku. Nagasa mpu'u sangana.

⁵⁰Towe Alatala kana mana'u ri ja'i ntau to naeka ri ja'ina sampe muli nu mulina.

⁵¹Ante palena to nakuasa I'a nompoposimpotatare tau-tau nasombo pade nombagado nia pekiri ira.

⁵²Magau-magau to nalangana nita'urakana ri kaedena, pade tau-tau to naedena nipakalangana.

⁵³Tau-tau naoro nipakabosuna sampe nabasa ante mpengaya anu to nabelona. Pade to nasugi nipopalaina ante pale ntoya.

⁵⁴Kita to Israel todeana nitulungina sabana nitorana pojanjina to niulina ka totu'ata.

⁵⁵Etumo, pojanji mompotowe Abraham ante pura-pura mulina sampe ri kasae-saena.”

⁵⁶Naopu etu kira-kira tolumbula kasaena i Maria neto'o mpasanggani ante Elisabet, pade naopu etu nanjilimo i'a mpaka ri ngatana mboto.

⁵⁷Naratamo ntoana Elisabet moana pade i'a nangote samba'a ngana langgai.

⁵⁸Tempo roa-roana to nosinggamosu ante i'a pade sampesuwu-sampesuwuna nangepe iwenu i Pue naasi matana nanggita Elisabet, nadamba sangganimo ira ante i'a.

⁵⁹Pade tempo nagana walumbengi umuru nu ngana nggedi etu naratamo ira mombasuna bo mompoposanga ngana etu. Ira nadota mompoposanga i'a Zakharia nantuki sanga nu umana.

⁶⁰Tapi nanguli indona, “Ne'e! I'a kana rapoposanga Yohanes.”

⁶¹Nangulimo ira, “Da'a ria sampesuwumu nosanga ewa etu!”

⁶²Jadi nekutanamo ira ka i Zakharia ante nombawiataka pale, “Isema kakono-konona rapoposanga ka ngana e'i?”

⁶³Zakharia nerapi saongu watu rapotulisina pade nitulisina, “Sangana Yohanes.” Nanggita etu natekajamo ira pura-pura.

⁶⁴Naopu i Zakharia nantulisi etu kaliu-liu namalamo i'a notesa, pade nompamulamo i'a mombabila bo mantoiya Alatala.

⁶⁵Nanggita etu naeka puramo ira to nosinggamosu ri setu. Pade natolelemo kareba etu ntiku-ntiku ngata ri bagia buluna Yudea etu.

⁶⁶Pura-pura tau to nangepe nuapa to najadina etu nompekiri riara nta'i ira, “Majadi nuapa ngana e'i banepia?” Niuli ira iwetu sabana nikita ira naria kuasa i Pue ri ja'i ngana etu.

⁶⁷Ri tempo etu i Zakharia, uma nu ngana etu, nipesua Nosa Nagasa nu Alatala sampe i'a namala nompasimbayu tesa i Pue ka ira.

⁶⁸Niulina, “Kamaimo kita mantoiya i Pue, Alatala nto Israel. Sabana naratamo I'a mantulungi todeana, pade mombakabasaka kita nggari balita.

⁶⁹I'a nombawai ka kita samba'a Magau to Mompakasalama to neliu kakuasana, etumo Muli Magau Daud, batua nu Alatala.

⁷⁰Nggari nabi-nabi to nipelisina nggaolu I'a nojanji

⁷¹mompakasalama kita nggari balita pade nggari kuasa tau-tau to nanggarau kita.

⁷²I'a wo'u nojanji mompotowe totu'ata nggaolu pade mompakadupa pojanjina to nabelona ka ira,

⁷³etumo pojanjina to niulina ka totu'a Abraham. I'a nojanji mombakabasaka kita nggari balita ala kita mamala mepue ri ja'ina ante da'a ria ekata.

⁷⁴

⁷⁵Nijanjina etu ala kita mamala mepue ri ja'ina ante rara to magasa bo manoa tempo kita danatuwu ri dunia.”

⁷⁶Pade niuli i Zakharia ka anana, “Iko, anaku, kana rauli nabi nu Alatala to Neliu Nggalanga, sabana iko mokolu ka i Pue ala mompakasadia todea nu Alatala ala ira masadia mantarima i Pue.

⁷⁷Iko kana motesa ka ira iwenu ira mamala rapakasalama, etumo silaka-silaka ira mamala raampungi Alatala.

⁷⁸Alatala mpu'u-mpu'u nompotowe kita. Karatana nggari suruga mompakasalama kita etu nasimbayu ewa eo neonga mpadondona.

⁷⁹Nasimbayu ewa eo neonga nombawanta karumauna, iwetu wo'u karatana. I'a marata mompakabelo tau-tau to nasilaka to natuwu nompopea jala nggamate ira. I'a marata mompakasalama kita pade mombanini kita mpaka ri jala kabelona.”

⁸⁰Ana i Zakharia etu nantambai eona nantambai kabete korona pade nantambai i'a nompotowe Alatala. Sangga nabete nalaumo i'a neto'o ri karawa baina nantongoraka tempona i'a mompamula mompatolele tesa Alatala ka tau-tau to Israel.