Read Da'a Kaili LUKAS 10 Bible Online

LUKAS 10 - Da'a Kaili bible

LUKAS 10

¹Naopu etu Yesus nompelisi pitumpulu mba'a topantuki I'a ntanina. Ira pitumpulu mba'ana etu nipakauna romba'a-romba'a sanjala mokolu ka I'a mpaka ri pura-pura ngata to rakalauna.

²Niulina ka ira, “Nadea tau madota mantarima Kareba Belo. Ira nasimbayu ante pae to natasamo. Mamalamo rakato. Pae rakato nadea mpu'u, tapi tau topokato da'a nadea. Sabana etu komi kana merapi ka Pue ntinalu ala I'a mompakau tau malau mokato.

³Kalaumo komi we'i-we'i, tapi pakabelo-belo. Aku mompakau komi mpaka ri tatongo ntau to naja'a. Komi nasimbayu ka ana nu bimba nipopalai ri tatongo asulako.

⁴Ne'e komi manggeni doi bara batutu rapomboli baku bara sapatu ropasa. Naganamo sapasa. Ne'e komi motesa masae ante tau raposirata komi ri jala.

⁵Ane komi mesua ri sapo ntau kana rauli ntani ruru, ‘Tabe, perapi Pue mombagane komi saongu njapo.’

⁶Ane maria ira riara njapo etu to madota mantarima rasi bo belo etu, Alatala kana mombawai ka ira rasi bo belo madea. Tapi ane da'a ria to madota mantarima etu, Alatala da'a mombawai ka ira rasi bo belo etu.

⁷Ri umba sapo to mantarima komi, peto'omo komi ri setu. Ne'e komi molinja-linja nggari sapo etu. Konimo bo inumo nuapa-nuapa to rawai pue njapo ka komi, sabana tau nokarajaa masipato mantarima gajina.

⁸Ane komi mesua ri saongu ngata pade komi ratarima pue ngata ante nabelo, konimo panggoni nuapa-nuapa to rawai ira ka komi ri setu.

⁹Pakabelomo tau naju'a ri ngata etu pade uli ka ira, ‘Nompamulamo Alatala noparenta ri tatongo komi pura-pura.’

¹⁰Tapi ane komi mesua ri saongu ngata pade da'a ratarima pue ngata ri setu, kalaumo komi ri jala jama rara ngata etu pade pongaremo komi iwe'i:

¹¹‘Sowu e'i nggari ngata komi nentaka ri kada kami. Rasapunai kami ri ngayo komi ewa tandaina komi kana rasuku banepia. Tapi toramo! Namosumo tempo Alatala mompamula moparenta ewa magau.’ ”

¹²Pade nangulimo Yesus ka ira pitumpulu mba'a, “Toramo! Tempo Pue Alatala mombatangara pura-pura manusia banepiana, neliu nggandasapa tau-tau etu pade pue ngata Sodom to naja'ana mpu'u.”

¹³Nanguli wo'umo Yesus, “Umba komi, pue ngata Khorazim! Mandasa mpu'umo komi banepia! Pade mandasa wo'u komi to neto'o ri ngata Betsaida! Sabana ane rapana kabaraka-kabaraka to nikawiaku ri ngata komi kukawia ri ngata Tirus bo Sidon, natantu nasaemo ira tau-tau da'a to Yahudi kana majea nggari silaka ira. Nasaemo ira kana mopakea karu pade mombadika sowu ri balengga ira ewa tandaina nanjoso raramo ira mompekiri powia ira to naja'ana. Kabaraka-kabarakaku nikita komi tau to Yahudi, tapi komi da'a najea.

¹⁴Jadi tempo Pue Alatala mombatangara manusia banepia, pombasuku komi meliu nggatomo nggari pombasuku pue ngata Tirus bo Sidon.

¹⁵Pade komi pue ngata Kapernaum, komi nompekiri bara komi etu raore mpaka ri suruga! Tapi etu da'a ntoto nakono! Komi kana ratajiaka riara naraka!”

¹⁶Pade nangulimo Yesus ka pitumpulu mba'a topantuki I'a, “Isema-sema to nangepe tesa komi, etu nasimbayu ewa ira nangepe tesaku. Isema-sema da'a nantarima komi ira da'a nantarima Aku. Pade isema-sema da'a nantarima Aku ira wo'u da'a nantarima Pue Alatala to nompakau Aku.”

¹⁷Tempo pitumpulu mba'a topantuki Yesus etu nanjili nggari polumako ira, nadamba mpu'u rara ira. Nangulimo ira ka Yesus, “Pue, seta-seta wo'u natundu bo nalai tempo nipopalai kami riara sanga Komi!”

¹⁸Nangulimo Yesus ka ira, “Nakono. Nikitaku Magau nu Seta nanawu nggari langi ewa kila.

¹⁹Toramo e'i! Aku nombawai ka komi kuasa ala naupa komi mombalonggo ule bo ndorokaa da'a ria mokuya. Pade niwaiku wo'u kuasa ka komi mombadagi balita, Magau nu Seta. Da'a ria i'a namala mompandasa komi.

²⁰Naupa iwetu ne'e komi madamba sabana seta-seta natundu ri ja'i komi. Aginapa komi madamba sabana sanga komi naopu nitulisi riara buku Pue Alatala ri suruga.”

²¹Tempona etu wo'umo Nosa Nagasa nu Alatala nompakadamba rara Yesus pade Yesus nosambaya. Niulina, “Uma, Pue nu langi bo dunia, Aku mosukuru ri ja'imu sabana pura-pura etu nitabuniakamu nggari ja'i tau-tau to naria pangginjanina ante tau-tau to napandena. Tapi etu nipopokitamu ka tau-tau to naede katuwuna, sabana etumo to nipodamba raramu, Uma.”

²²Pade niuli Yesus ka tau-tau ri setu, “Mpengele-ngele niwai Umaku ka Aku. To mpu'u-mpu'u nosinjani ante Aku, Ana nu Alatala, aga Umaku Pue Alatala. Da'a ria tau ntanina. Pade to mpu'u-mpu'u nosinjani ante Umaku Pue Alatala aga Aku, Anana bo isema-sema kupodota mompopanjani I'a ka ira.”

²³Naopu etu negolimo Yesus notesa ka anaguru-anaguruna, “Nabelo mpu'umo komi sabana komi nanggita pura-pura nuapa to nikawiaku.

²⁴Toramo! Nadea nabi ante magau nadota manggita nuapa to nikita komi we'i-we'i, tapi etu da'a nikita ira. Ira nadota mangepe nuapa to niepe komi we'i-we'i, tapi da'a ria niepe ira.”

²⁵Naria samba'a guru agama to Yahudi nekanggore mangelo kasala tesa Yesus. Nekutanamo i'a, “Guru, nuapa to masipato kupowia ala aku mamala matuwu mabelo sampe ri kasae-saena?”

²⁶Nesonomo Yesus, “Nuapa to nitulisi riara Atura-atura agama to nipapola i Musa? Nuapa to nibasamu ri setu?”

²⁷Nesonomo tau etu, “To nitulisi ri setu iwe'i: ‘Potowemo Pue Alatalamu ante mpu'u-mpu'u raramu, ante pura-pura katuwumu, ante pura-pura karoso koromu, pade ante pura-pura pekirimu wo'u, bo potowemo sanggamanusiamu nasimbayu ewa komi nompotowe koromu mboto.’ ” [14]

²⁸Nangulimo Yesus ka i'a, “Nawelamo pesonomu etu. Ane komi mowia iwetu, komi kana matuwu mabelo sampe ri kasae-saena.”

²⁹Tapi guru agama etu madota mantakono korona mboto. Jadi nekutana wo'umo i'a ka Yesus, “Isema sanggamanusiaku etu?”

³⁰Nesonomo Yesus ante porapa e'i, “Naria samba'a tau to Yahudi notua nggari ngata Yerusalem mpaka ri ngata Yerikho. Tempona i'a ri tatongo jala i'a nibaga parampo, pade pura-pura pakeana ante mbara-mbarana naopu niago ira. I'a wo'u niboba santongo mate pade nipalasi ira ri setu.

³¹Tempona etu wo'u naria samba'a topanggeni agama to Yahudi noliu ri setu. Sangga nanggita tau etu, i'a neleli nombaliunaka tau etu pade napolamo.

³²Iwetu wo'u tau to Lewi to nokarajaa ri Sapo Mpepue to noliu ri setu. Tempo i'a nanggita tau niboba parampo ri setu i'a wo'u neleli nombaliunaka tau etu ri wiwi jala.

³³Naopu etu ri purina naria wo'u samba'a tau to Samaria noliu ri setu. Tempo i'a nanggita tau etu naasi mpu'u matana.

³⁴Nalaumo i'a ri ja'i ntau etu pade nipakulina bela-bela ntau etu ante lana bo ue anggur, pade niwewena bela etu ante kae. Naopu etu nionggotakana nipopesawina ri bunggu jarana pade nikenina ri sapo ntau ri jala poliu nikatonona ri setu.

³⁵Naeompadondo to Samaria etu nangala rompeka doi salaka niwaina ka pue njou to nipesai ira etu, pade niulina, ‘Poeru ruru toju'a e'i. Manjili aku pade kubayari pura-pura to nipake komi mompoeru i'a.’ ”

³⁶Pade nipakaopu Yesus tesana ante saongu pompekutana ka guru agama etu iwe'i: “Nantuki pombaratamu, nggari tolumba'a tau etu ri umbana to nantora sanggamanusiana ri ja'i ntau nirampo etu?”

³⁷Nesonomo guru agama etu, “Tau to naasi matana nantulungi tau etu.” Pade nangulimo Yesus, “Kau kawia komi wo'u iwetu!”

³⁸Naopu etu Yesus ante anaguru-anaguruna nompapola polumako ira sampe narata ri saongu ngata. Ri setu naria samba'a besi to nosanga ka i Marta nompakeni Yesus mpaka ri sapona.

³⁹Naria samba'a sampesuwu besi i Marta, sangana i Maria. Maria etu narata nekatoko ri ngayo Yesus nangepe pepatudukina.

⁴⁰Tapi i Marta nasiwu-siwu nombatorata ira etu. Pade nalaumo i'a nanguli ka Yesus, “Nipekiri Komi nabelo ane aga aku njamba'aku nokarajaa, i Maria da'a? Pakaumo i Maria etu mantulungi aku mokarajaa.”

⁴¹Tapi nesonomo Yesus, “Marta, Marta, nikitaku komi nasusa rara ante napari nompekiri nuapa-nuapa.

⁴²Kakonona to niparaluu mpu'u mupowia aga sangele, etumo mangepe Tesa nu Alatala. Etu to nabelona to nipelisi i Maria. Pade etu da'a namala raala ntau nggari ja'ina.”