Read Da'a Kaili LUKAS 11 Bible Online

LUKAS 11 - Da'a Kaili bible

LUKAS 11

¹Naria sanggani Yesus nosambaya ri saongu peto'o. Naopu I'a nosambaya naria samba'a nggari anaguru-anaguruna nanguli ka I'a, “Pue, patuduki wo'u kami mosambaya ewa Yohanes Topediu nompatuduki anaguru-anaguruna.”

²Pade nangulimo Yesus ka ira, “Ane komi mosambaya uli komi iwe'i: ‘Uma kami, rabila kami sangamu. Karatamo Komi moparenta ri dunia e'i.

³Waimo ka kami panggoni butu-butu eona.

⁴Pade ampungimo silaka kami ewa kami wo'u nombaampungi tau-tau nowia sala ri ja'i kami. Pade ne'e rapakamba kami rapesoba.’ ”

⁵Pade nanguli wo'umo Yesus ka anaguru-anaguruna, “Rapana maria samba'a nggari komi malau mpaka ri sapo roamu tempo natongomo wengina pade manguli ka i'a, ‘Sampesuwuku, wai ka aku sakedi panggoni komi,

⁶apa naria samba'a roaku dako narata nggari polumakona nesai ri sapoku. Tapi ri sapoku da'a ria panggoni kuwai ka i'a.’

⁷Natantumo roana etu da'a mesono iwe'i: ‘Ne'e mompakasusa aku, apa pewobo nilawa kamimo. Kami ntaliana naturumo. Aku da'a mamala membangu mombawai ka iko nuapa to niperapimu.’ ”

⁸Pade nangulimo Yesus, “Aku manguli ka komi, rapana i'a da'a madota membangu mombawai ka komi panggoni etu sabana komi samba'a roana, tapi natantumo i'a kana membangu mombawai ka komi nuapa to niperapimu etu sabana komi da'a naeya merapi ri ja'ina.

⁹Sabana etu kuuli ka komi, perapimo, pade komi kana rawai; elomo pade komi kana mombarata; tinggedemo pewobo pade pewobo kana rabea ka komi.

¹⁰Sabana isema-sema merapi i'a kana rawai, isema-sema mopaelo i'a kana mombarata, pade isema-sema mantinggede pewobo i'a kana rabea ka pewobo.

¹¹Iwenumo? Naria samba'a uma ri tatongo komi ane anana merapi bau rawaina ka ule? Natantumo da'a!

¹²Bara ane anana merapi tolu manu ri ja'ina, rawaina ka ndorokaa? Natantumo da'a wo'u!

¹³Naupa komi tau to naja'a ninjani komi wo'u mombawai nuapa to nabelona ka ana-ana komi mboto. Ne'epa rauli Umata to naria ri suruga. Natantumo I'a wo'u kana mombawai Nosana to Nagasa ka isema-sema to merapi ri ja'ina.”

¹⁴Naria sanggani Yesus nompakabelo samba'a tau to nipakabobo seta to nesua riarana. Sangga seta etu nipopalai Yesus namalamo tobobo etu notesa-tesa. Nanggita etu nogumaa puramo tau dea to naria ri setu.

¹⁵Tapi naria wo'u sanu tau nanguli, “I'a namala nompopalai seta-seta ante kuasa nggari ja'i Beelzebul, Magau nu Seta.”

¹⁶Naria wo'u tau to madota mompesoba Yesus. Jadi ira nerapi ala I'a mowia kabaraka mompopokita ka ira I'a nggari ja'i Alatala.

¹⁷Tapi ninjani Yesus patuju ira. Jadi niulina ka ira, “Ane maria samba'a magau pade todea riara poparentana natibagi-bagi bo nosipobali, natantumo poparentana etu kana magero. Pade ane tau-tau ri saongu njapo aga natibagi-bagi bo nosipobali, natantumo ira kana magado mosimpotatare.

¹⁸Iwetu wo'u ante Magau nu Seta. Ane seta-seta aga natibagi-bagi bo nosipobali, natantumo poparentana etu kana magero. Sampe niuliku iwetu sabana niuli komi Aku nompopalai seta ante kuasa nggari ja'i Beelzebul, Magau nu Seta. Tapi etu da'a nakono.

¹⁹Ane etu nakono uli ka Aku ante kuasa isema roa-roa komi nompopalai seta-seta? Natantumo ante kuasa nggari ja'i Alatala! Jadi powia roamu mboto etu nompakanoto pombarata komi etu nasala!

²⁰Tapi Aku nompopalai seta-seta ante kuasa nggari ja'i Alatala mboto! Pade etu nompopokita ka komi Pue Alatala nompamulamo noparenta ri tatongo komi!

²¹Ane maria samba'a tau to naroso nagana pura parewa mposibalina nanggatono sapona, natantumo mbara-mbarana da'a namala raala ntau.

²²Tapi ane maria samba'a tau to neliu nggaroso marata mebaga pade mombadagi pue njapo etu, i'a kana mangala pura-pura parewa mposibali to nisarumaka pue njapo etu. Pade mbara-mbarana ranjapo etu kana rapalele ka roa-roana.” [15]

²³Pade nanguli wo'umo Yesus, “Isema-sema da'a nosanggani ante Aku i'amo baliku. Bo isema-sema da'a nantulungi Aku, i'a etu nombagero panggawiaku.”

²⁴Pade nanguli wo'umo Yesus, “Tempo seta nesuwu nompalasi samba'a tau i'a nalai ranggarawa baina nangelo peto'o rapangosarakana, tapi da'a niratana. Sabana etu i'a nanguli, ‘Aginapa aku matingguli mpaka ri sapo to nipalasiku ria.’

²⁵Sangga nanjilipa i'a niratanamo peto'o etu naopu nipegasa bo nipakasiayumo.

²⁶Pade seta etu nalau nompokio pitumba'a roana to neliu nggaja'a nggari i'a mboto. Pade naratamo ira nesua ri ja'i ntau etu pade naroo ri setu. Kaopuna katuwu ntau etu neliu mpu'u kaja'ana nggari pamulana bopia.”

²⁷Naopu Yesus notesa etu nangulimo samba'a besi nggari olo ntau dea ka I'a, “Natantumo nadamba mpu'u indomu to noana ka Komi bo nompatomi Komi!”

²⁸Tapi nesonomo Yesus, “Nakono, tapi neliu nggadambapa tau to nangepe Tesa nu Alatala pade nompangala tesa etu.”

²⁹Tempo nadea tau nasiromu nantalili Yesus I'a nompapola tesana. Niulina, “Naja'a mpu'u tau we'i-we'i! Komi nerapi Aku mowia saongu tandai to nipogumaa ala mompopokita ka komi Aku e'i narata nggari ja'i Alatala. Tapi etu da'a kupowia ka komi! Tandai to rapopokita ka komi aga tandai ewa to najadi ri ja'i nabi Yunus nggaolu.

³⁰Nasimbayu ewa nabi Yunus najadi tandai to nipogumaa tau-tau ri ngata Niniwe nggaolu, iwetu wo'u Aku, Ana nu Manusia kana majadi tandai rapogumaa ntau we'i-we'i.

³¹Ri Eo Mpotangara banepia magau besi nggari sabingga puluna kana rapakatuwu bali mpasanggani-nggani ante komi to natuwu we'i-we'i. Pade i'a kana mompakasala komi, sabana i'a narata nggari ngata nakawao mpu'u ala mangepe pepatuduki Magau Salomo. Tapi we'i-we'i naria ri tatongo komi samba'a to neliu nggakuasa nggari Magau Salomo, tapi komi da'a madota mantarima tesana.

³²Ri Eo Mpotangara banepia pue ngata Niniwe kana rapakatuwu bali mpasanggani-nggani ante komi. Pade ira kana mompakasala komi, sabana ira najeamo tempo ira nangepe tesa nabi Yunus ka ira. Tapi we'i-we'i naria ri tatongo komi ri se'i samba'a to neliu nggakuasa nggari nabi Yunus, tapi komi da'a madota mantarima tesana.”

³³“Da'a ria poindo nitunju ntau pade nitabuniakana ranggapeo atau niladuna ante tonda. Natantumo poindo etu kana raboli ri kalangana ala pura-pura tau mesua rara njapo mamala manggita remena.

³⁴Matamu etumo poindo koromu. Ane matamu mabelo, kana mareme sanggani njumaongu koromu. Tapi ane matamu magawu, marumau mpu'u katuwumu.

³⁵Sabana etu pariara mpakabelo-belo. Ne'e sampe to niuli komi reme to naria riara nta'i komi etu, aga rumau.

³⁶Ane pura-pura pompekirimu nareme, da'a ria to narumauna, pura-pura katuwumu wo'u kana mareme nasimbayu ewa reme nu poindo nombawanta komi.”

³⁷Naopu Yesus notesa naria samba'a to Parisi nompakeni I'a malau manggoni ri sapona. Jadi nalaumo Yesus nanggoni ri sapona etu.

³⁸Ri setu natekajamo to Parisi etu sabana Yesus da'a nantuki ada nto Parisi norama palena ntani ruru pade nanggoni.

³⁹Etu sampe Yesus nanguli ka i'a, “Komi to Parisi nabiasa nombarama tubu bo suraya bagia sawalikuna. Tapi rara nta'i komi danatantoru bo naja'a mpu'u.

⁴⁰Komi tau-tau todoyo! Pue Alatala to nompowia koromu bo rara nta'imu wo'u!

⁴¹Nuapa to naria ri ja'imu kana rawai komi ka tau-tau nakasiasi ante rara to nagasa. Ane komi mowia etu komi kana majadi nagasa pura.

⁴²Mandasa mpu'umo komi to Parisi. Komi nombabayari ka Alatala sabagia nggari sampulu bagia nggari pura-pura pombaratamu, nabeloka rampa-rampa to namura ewa kuni bo kula ante uta-uta ntanina. Tapi da'a nanoa rara komi bo komi da'a nompotowe Alatala. Kakonona kana manoa rara komi, pade komi kana mompotowe Alatala, tapi ne'e rakalinga komi atura-atura to napoko ntanina etu.

⁴³Mandasa mpu'umo komi to Parisi, sabana komi madota mekatoko ri pekatoko to nibilana ri sapo mpodade, pade komi madota rabila ntau ri potomu.

⁴⁴Mandasa mpu'umo komi, sabana komi nasimbayu ewa dayo da'a naria niboli tandaina. Tau noliu da'a ninjanina riara dayo etu nawau. Wa'a wo'u ante komi. Da'a ninjani tau ntanina riara nta'i komi etu naja'a.”

⁴⁵Naopu etu naria samba'a nggari guru agama to naria ri setu nanguli ka Yesus, “Guru, tempo Komi nanguli iwetu natantu Komi nanjalai kami wo'u!”

⁴⁶Nesonomo Yesus ka ira, “Mandasa wo'u komi guru-guru agama, sabana komi nombawai ka tau atura-atura to natomo gaga ratuki, tapi komi mboto da'a madota mantulungi ira mantuki atura-atura etu!

⁴⁷Mandasa mpu'umo komi, sabana komi nompakabelo dayo nabi-nabi Alatala nggaolu, tapi komi wo'u muli ntau to nompatesi ira!

⁴⁸Totu'a komi nggaolu to nompatesi nabi-nabi etu, pade komi to nompakabelo dayo-dayo etu. Naupa komi mowia anu nireke ntau nabelo, riara nta'i komi danaja'a nasimbayu ewa totu'a komi nggaolu to nompatesi nabi-nabi.

⁴⁹Naria tesa nu Alatala to nanguli iwe'i: ‘Nabi-nabi bo suroku kana kupakau ri ja'i ira. Maria santongo rapatesi ira, bo maria wo'u to rapandasa ira.’ Niuli Alatala iwetu sabana ninjanina komi wo'u nasimbayu kaja'ana ante totu'a komi nggaolu.

⁵⁰Jadi komi to natuwu we'i-we'i kana rasuku Alatala sabana totu'a komi nggaolu nompatesi pura-pura nabi Alatala nggari lamba kajadia nu dunia,

⁵¹nompamula nggari pompatesi i Habel sampe ri pompatesi i Zakharia to najadi ri lalowo Sapo Mpepue ri olo nu Meja Mpesomba bo Sapo Mpepue etu. Parasayamo! Komi to natuwu we'i-we'i kana rasuku sabana powia-powia etu!

⁵²Mandasa mpu'umo komi guru-guru agama, sabana komi nombalawa tau ala ira da'a mamala mangginjani jala mpaka ri ja'i Alatala! Komi mboto da'a madota mantuki jala etu pade komi nombalawa tau to madota malau mantuki jala etu!”

⁵³Naopu notesa iwetu nalaimo Yesus nggari setu. Pade nompamula nggari tempo etu naju'a mpu'u rara guru-guru agama bo tau-tau to Parisi ri ja'ina. Ira nompasimbuku manggeni Yesus motesa nengele-ngele,

⁵⁴ala mangelo kasala tesana sampe I'a mamala rapangadu ira.