Read Da'a Kaili LUKAS 12 Bible Online

LUKAS 12 - Da'a Kaili bible

LUKAS 12

¹Tempo etu nonjobu-njobu tau narata nasiromu ri ja'i Yesus sampe nosimpii nosilonggo-longgo kada. Tempo tau-tau etu danasiromu, notesamo Yesus ka anaguru-anaguruna, “Ne'e sampe komi majadi nasimbayu ante to Parisi. Ira aga nabelo ri lenje tapi naja'a riarana! Inggu ira to naja'a etu nendai nasimbayu ewa ragi newoke nompopebombo labu nu gando.

²Tapi isi rara nta'i ira etu kana ranjani ntau sabana pura-pura nuapa to nitampunisi kana rabonggaraka, pade pura-pura nuapa to nitawu kana ranjani.

³Pura-pura nuapa to nitesa komi tempo nggawengina kana raepe ri kaeona, pade nuapa to niposiwawayo komi riara ntombi kana raposilelei nggari bunggu nu ata!”

⁴“Toramo, komi to najadi wega-wegaku. Ne'e komi maeka ka tau, sabana to namala rakawia ira aga mompatesi koromu. Naopu etu da'a ria kuasa ira nuapa-nuapa.

⁵Kuuli ka komi isema masipato rapokaeka komi. Agina komi maeka ri ja'i Alatala, sabana I'amo to nakuasa mompatesi koromu pade nakuasa wo'u mantajiaka komi riara naraka! Tora mpakabelo-belo! Aga Alatala rapokaeka komi!

⁶Natantumo ninjani komi tonji rone nipobalu limamba'a rongu rupia olina. Naupa da'a nadea olina etu ka manusia da'a ria samba'a nikalinga Alatala.

⁷Da'a aga etu. Wo'o ri balenggamu wo'u naopu pura nibila Alatala. Jadi ne'e maeka, sabana neliupa oli komi riara mpanggita Alatala pade oli ntonji rone nadea.”

⁸“Toramo mpakabelo-belo! Isema-sema mompangaku Aku ri ngayo manusia, Aku, Ana nu Manusia wo'u mompangaku i'a ri ngayo pura-pura malaeka Alatala.

⁹Tapi isema-sema mombasapu Aku ri ngayo manusia, Aku wo'u mombasapu i'a ri ngayo malaeka-malaeka Alatala.

¹⁰Isema-sema notesa nangewa Ana nu Manusia mamala raampungi. Tapi isema-sema to nanguli sinja'i Nosa Nagasa nu Alatala, i'a da'a namala raampungi.

¹¹Tempo komi rakeni ntau ri ngayo ntopotangara ri sapo mpodade nto Yahudi, pade tempo komi rakeni ratangara ri ngayo Gubernur bo tau-tau to nakuasa, ne'e makini rara mantondoaka iwenu komi motesa mombasono ira.

¹²Tempo etu wo'umo Nosa Nagasa nu Alatala kana mompatuduki ka komi nuapa ratesa komi.”

¹³Naria samba'a nggari tatongo ntau dea nanguli ka Yesus, “Guru, namatemo uma kami pade nipalasina kakalumanana ka kami anana. Tapi pura-pura etu niala ntuakaku. I'a da'a madota mombabagi ka aku bagiaku nggari kakalumana uma kami etu. Jadi pakaumo i'a mombabagi ka aku bagiaku etu.”

¹⁴Nesonomo Yesus, “Sampesuwu, Aku e'i da'a totu'a ada atau to mombabagi kakalumana ka komi romba'a!”

¹⁵Pade nangulimo Yesus ka tau pura-pura, “Pakabelo-belo! Ne'e maino raramu, sabana katuwua manusia da'a nggari kasugina, naupa mbara-mbarana neliu nggadea.”

¹⁶Pade Yesus nombatesa ka ira saongu porapa iwe'i: “Naria samba'a tau nasugi asele ntanana nadea mpu'u.

¹⁷Jadi nompamulamo i'a nompekiri, ‘Nuapa kukawia we'i-we'i? Mana ria peto'o rapomboli asele ntanaku.’

¹⁸Naopu nipekirina, nitesana ka korona mboto, ‘E'imo akalaku. Logoku nakedi gaga. Jadi kana kupowia to neliu nggabetena. Ri setumo kupomboli asele ntanaku ante mbara-mbara kakalumanaku ntanina.

¹⁹Naopu etu mamala aku motesa ka koroku mboto: Nauntu mpu'umo iko. Pura-pura anu nabelo naria puramo ri ja'imu, da'a maopu-opu sampe mompae-mpae. Penontomo we'i-we'i. Panggonimo bo panginumo mpakadamba-damba.’

²⁰Tapi nangulimo Alatala ka i'a, ‘E, todoyo, ri wengina e'i iko kana mamate, pade pura-pura to nipakasadiamu mana mamala rapake komi!’ ”

²¹Pade Yesus nompakaopu tesana ante nanguli, “Iwetumo tau ane aga nompasiromu kakalumana ka korona mboto ri dunia e'i, tapi da'a nakalumana riara mpanggita Alatala.”

²²Pade nangulimo Yesus ka topantuki-topantuki I'a, “Etumo sabana Aku nanguli ka komi, ‘Ne'e makini-kini rara mompekiri katuwu komi, bara nuapa to rakoni komi atau pakea nuapa to rapake komi,

²³sabana to napoko riara nggatuwuta da'a aga panggoni atau pakea.

²⁴Kitamo tonji-tonji kolaa. Ira da'a notuja-tuja, da'a nokato, pade da'a naria logo nipomboli ira panggoni. Tapi naupa iwetu Alatala nombawai ka ira panggoni! Natantu I'a kana mompiara komi to neliu nipotowena nggari tonji-tonji etu!

²⁵Da'a ria gunana komi makini rara. Da'a ria samba'a nggari tatongo komi to nompakule mantambai umuruna nau aga sambengi ante makini-kini rarana.

²⁶Jadi ane komi da'a nompakule mowia to nanga'ana etu ante nakini-kini raramu, natantumo da'a ria gunana komi makini-kini mompekiri panggoni atau pakea!

²⁷Kitamo bunga-bunga to natuwu raranggawoko. Bunga etu natuwu nau da'a nanggawia bara nantanu. Tapi naupa iwetu kuuli ka komi, Magau Salomo to nakalumana mpu'u da'a ria pakeana to narambana ewa bunga-bunga etu!

²⁸Ane Alatala nompakaramba bunga-bunga to natuwu sampalai lau pade nalele nitajiaka riara apu, natantumo I'a kana mombawai ka komi pakea to niparaluu komi! Komi mpu'u-mpu'u tau to nakura nomparasaya!

²⁹Jadi ne'e komi makini mompekiri nuapa rakoni komi bara nuapa rainu komi!

³⁰Etu wo'u to nielo tau-tau ri dunia e'i to da'a nosinjani ante Alatala. Tapi pura-pura to niparaluu komi ninjani Umamu Pue Alatala.

³¹Jadi pekoumo ruru ri ja'i Alatala pade pura-pura etu kana rapakagana ka komi.

³²Anaguru-anaguruku, ne'e komi maeka, nau komi da'a nadea, sabana komi nipelisi Umamu Pue Alatala mombarata bagia riara Poparentana.

³³Jadi pobalumo mbara-mbara to naria ri ja'imu, pade waimo doina etu ka tau nakasiasi. Pakasadia komi karepe to da'a mamala magero, etumo kakalumana ri suruga. Kakalumana etu da'a ria kaopu-opuna, sabana ri suruga etu da'a namala rapangangga ntau, da'a namala rakoni saipa.

³⁴Jadi pakasadiamo kakalumana ri suruga, sabana ri umba kakalumana komi, ri setu wo'u pekiri komi.’ ”

³⁵Yesus nombatesa wo'u saongu porapa iwe'i: “Komi kana mainga nasimbayu ante batua-batua to nompopea karata madika ira nggari posusa mponika. Batua-batua etu bate-batena nainga pade poindo ira da'a ria nipopaya ira. Pade ane marata madika ira mantinggede pewobo, masalisa pewobo etu rabea ka i'a.

³⁶

³⁷Nabelo mpu'u batua-batua etu to nainga nompopea karata madika ira. Parasayamo! Madika ira etu kana mompakasadia korona pade mompakau ira mekatoko, pade i'a mboto mombatibo ka ira panggoni!

³⁸Nabelo mpu'u batua-batua etu to nainga nompopea karata madika ira, naupa i'a marata tongo wengi bara kabobayana.”

³⁹Pade nanguli wo'umo Yesus, “Kana ratora wo'u tesaku e'i! Ane rapana pue njapo mangginjani tinti sakuya topangangga marata, natantumo i'a kana mainga manggatono sapona. I'a da'a mompalamba topangangga mesua rara njapona.

⁴⁰Iwetu wo'u komi kana mainga mompopea karataku, sabana Aku, Ana nu Manusia kana marata ante da'a ranjani-njani komi.”

⁴¹Pade nekutanamo i Petrus ka Yesus, “Pue, porapa etu nipawelamu aga ka kami atau ka pura-pura tau ntanina wo'u?”

⁴²Nesonomo Yesus ante porapa iwe'i: “Rapana maria samba'a batua to nanoto to natutu nantuki dota madikana. Natantu i'amo to raonggotaka madikana majadi topanggeniaka pura-pura batua rara njapona. I'amo to mombaurusi panggoni ka batua-batua ntanina eo-eo.

⁴³Mabelo mpu'umo batua etu ane madikana manjili pade manggita i'a mompowia panggawia to niparasaya ka i'a.

⁴⁴Aku mpu'u-mpu'u notesa ka komi, batua etu kana raonggotaka madikana majadi topombaurusi pura-pura mbara-mbarana.

⁴⁵Tapi mandasa mpu'u batua etu ane i'a mompekiri riara nta'ina iwe'i: ‘Damasaepa madikaku manjili.’ Pade i'a mompamula mombaboba batua-batua ntanina, nabeloka langgai nabeloka besi, pade aga manggoni manginu sampe makalangu.

⁴⁶Tapi tempo batua etu makanjalia iwetu, madikana kana manjili ri eo bo tempo to da'a ninjanina. Pade batua etu kana rapatesi. I'a kana ratajiaka riara naraka mpasanggani-nggani ante tau da'a nomparasaya Alatala.

⁴⁷Batua to nangginjani dota madikana tapi da'a nasadia-dia pade da'a nantuki dotana etu, i'a kana rajani sampe mandasa.

⁴⁸Tapi batua to da'a nangginjani nuapa to nipodota madikana pade nikawiana to nasala sampe masipato rasuku, i'a aga raboba sakedi. Sampe niuliku iwetu sabana tau niwai ka nadea, nadea wo'u raperapi nggari ja'ina. Pade tau to niparasaya ka nadea, neliu nggadea wo'u raperapi nggari ja'ina.”

⁴⁹Nanguli wo'umo Yesus, “Patujuku narata ri dunia e'i ala manggeni apu mompalabu dunia, etumo ala manusia rasuku. Pade naino mpu'u raraku ala apu etu rapakajela.

⁵⁰Danariapa pepandasa marata ri koroku. Pade da'a wo'u nabelo raraku ane etu da'apa nadupa.

⁵¹Nipekiri komi karataku manggeni posinggabelo ri dunia e'i, tapi da'a nakono! Da'a posinggabelo tapi posinggarau to nikeniku ri dunia.

⁵²Nompamula we'i-we'i ane maria limamba'a riara saongu njapo, ira kana matibagi-bagi. Ira tolumba'a manggarau tau romba'a. Pade ira romba'a manggarau tau tolumba'a.

⁵³Uma kana mangewa anana langgai, pade anana langgai etu mangewa umana mboto. Indo kana mangewa anana besi pade anana besi etu mangewa indona. Matu'ana besi kana mangewa maniana besi, bo maniana besi etu kana mangewa matu'ana besi wo'u.”

⁵⁴Nanguli wo'umo Yesus ka tau dea, “Ane rakita komi kulimu meomba ri kasolo nu eo, natantu rauli komi: ‘Mana masaeka mauja!’ Pade mpu'u-mpu'u kana mauja!

⁵⁵Pade ane rakita komi wo'u poiri nggari puluna makantawui, natantu rauli komi: ‘Kana mapane eo!’ Pade mpu'u-mpu'u kana mapane eo!

⁵⁶E, komi todoyo! Nata'u mpu'u komi mombatandai lombona ante manggita langi bo dunia. Tapi nokuya komi da'a nangginjani batuana nuapa to nikawia Alatala tempo we'i-we'i?”

⁵⁷“Nokuya komi da'a madota mompakatantu powia to nakonona?

⁵⁸Ane komi rabata ntau pade malau mpaka ri ja'i ntopotangara komi kana mompasimbuku mosinggabelo ante tau etu tempo komi da ri tatongo jala. Ane da'a iwetu, komi kana rakenina ratangara ri ja'i ntopotangara. Pade topotangara etu kana mombawai komi ka polisi ala rasuaraka riara tarunggu.

⁵⁹Parasayamo! Da'a mamala komi rapopesuwu nggariara tarunggu etu ane da'apa rabayari mpakaopu wayamu!”