Read Da'a Kaili LUKAS 13 Bible Online

LUKAS 13 - Da'a Kaili bible

LUKAS 13

¹Tempona etu naria tau notesa ka Yesus ewa nuapa to najadi ri ja'i bara sakuya mba'a to Galilea. Ira nipatesi Gubernur Pilatus tempona ira nanggeni pesomba ka Alatala ri Sapo Mpepue.

²Naopu nangepe tesa etu nangulimo Yesus, “Nipekiri komi to Galilea etu nipatesi sabana silaka ira neliu nggadea nggari to Galilea ntanina.

³Tapi, da'a ntoto nakono! Toramo! Ane komi da'a majea nggari silakamu komi wo'u kana rapatesi pura.

⁴Tora komimo tau sampulu walumba'a to namate ri Siloam tempona ira nirumpi sapo to nalangana. Nipekiri komi kajadia etu nantujuraka silaka ira neliu nggadea nggari pura-pura tau ntanina to neto'o ri ngata Yerusalem etu.

⁵Tapi da'a ntoto nakono! Sangganipa kuuli ka komi, ane komi da'a majea nggari silakamu, natantumo komi wo'u kana rapatesi.”

⁶Naopu etu Yesus nombatesa wo'umo saongu porapa iwe'i: “Naria sampu'u kayu ara nituja ri tinalu ntau. Pade naria sanggani pue ntinalu etu nalau nangelo wua nggari kayu etu. Narata ri tinalu nielona wua kayu etu tapi da'a ria kamba saongu wuana niratana.

⁷Jadi niulina ka topanggatono tinalu etu, ‘Kita we'i! Tolumpae ka e'imo aku narata nangelo wua nggari kayu e'i, tapi da'a ria kamba saongu wuana nirataku. Agina ratowo kayu e'i. Da'a ria gunana, aga nompakarugi tana.’

⁸Tapi nesonomo topanggatono tinalu etu, ‘Uma, rapakambata ntani ruru kayu e'i matuwu sampaepa. Aku mombatonggo tana ri pu'una pade mombapupu mompakaboya i'a.

⁹Rakitata. Bara mpae marata i'a mowua. Tapi ane da'a mowua kayu e'i kana ratowota.’ ”

¹⁰Tempo Eo Mpenonto Yesus nopaguru riara saongu sapo mpodade.

¹¹Ri setu naria samba'a besi to naju'a sampulu walumpaemo kasaena apa nipesua seta to nompakaju'a i'a. I'a nabunggu da'a namala nekanggore nanoa.

¹²Tempona Yesus nanggita besi etu I'a nompokio pade notesa ka i'a, “Indo, we'i-we'i nabelomo ju'amu.”

¹³Pade nidikana palena ri koro nu besi etu pade kaliu-liu nanoamo koro nu besi etu, pade nompamulamo i'a nombatoiya Alatala.

¹⁴Tapi tempo topanggeniaka ri sapo mpodade etu nanggita Yesus nompakabelo tau naju'a etu ri Eo Mpenonto, naraumo rarana. Pade niulina ka todea ri setu, “Riara santipa naria aono eo to nipakatantu ka kita nanggawia. Kamaimo komi rapakabelo ri eo-eo etu, aga ne'e ri Eo Mpenonto!”

¹⁵Nangepe tesa etu notesamo Yesus ri ja'i topanggeniaka ri sapo mpodade etu, “Topebagiu tanu komi! Tempo Eo Mpenonto komi pura-pura nombakabasaka japimu bara jaramu pade nikeni nesuwu rapopoinu.

¹⁶Ri se'i we'i-we'i naria samba'a besi, muli Abraham, to nipesua seta sampulu walumpaemo kasaena. Natantumo i'a wo'u masipato rakabasaka nggari kuasa Magau nu Seta etu ri Eo Mpenonto!”

¹⁷Pesono Yesus etu nompakaeya mata pura-pura balina ri setu. Tapi pura-pura tau ntanina nadamba rara nanggita pura-pura anu nabelo to nikawia Yesus etu.

¹⁸Naopu etu nangulimo Yesus, “Pantambai kadea ntau to majadi todea riara Poparenta nu Alatala namala rapakasimbayu ewa nuapa? Porapa nuapa kupake mompakanoto etu?

¹⁹Etu nasimbayu ewa saongu wua kayu to nakedi mpu'u to niala samba'a tau nitujana ri tinaluna. Wua kayu etu natuwu pade najadi sampu'u kayu bete. Pade nadea tonji narata nowia jumuna ri lolo nggayu etu.”

²⁰Pade nanguli wo'umo Yesus, “Porapa nuapa ntanina mamala kupake mompakanoto pantambai kadea ntau to najadi todea riara Poparenta nu Alatala?

²¹Etu nasimbayu ewa ragi to niala samba'a besi pade niposigalona ante patampulu lite labu nu gando. Kaopuna pura-pura labu nu gando etu nebombo.”

²²Tempo Yesus nompapola polumakona mpaka ri ngata Yerusalem I'a noliu ri kota-kota bo ngata-ngata pade nopaguru.

²³Ri saongu ngata naria samba'a tau narata nekutana ka Yesus, “Uma, aga sakedi lau tau to rapakasalama?” Nesonomo Yesus ka tau-tau ri setu,

²⁴“Komi pura-pura kana mompasimbuku ante mpu'u-mpu'u mesua ri pewobo to napiina. Sabana toramo! Nadea tau kana mompasimbuku mesua tapi da'a ria mamala.

²⁵Kana marata tempona pue njapo membangu mombalawa pewobo. Pade komi aga menggore ri sawalikuna mantinggede pewobo etu ante manguli, ‘Uma, bea ka kami pewobo!’ Tapi pue njapo etu kana mesono, ‘Da'a ninjaniku komi pade nggari umba komi!’

²⁶Pade komi kana manguli wo'umo, ‘Kami nanggoni nanginu mpasanggani-nggani ante komi, pade komi wo'u nopaguru ri tatongo ngata-ngata kami nggaolu!’

²⁷Tapi pue njapo etu kana mesono wo'umo ka komi, ‘Da'a ninjaniku nggari umba komi. Palaimo komi nggari se'i! Komi pura-pura tau naja'a!’

²⁸Pade tempo komi manggita Abraham, Ishak ante Yakub nosanggani-nggani ante pura-pura nabi nosusa madamba-damba ri suruga, komi kana mageo bo mosinggiki baga ante kasusa rara sabana komi aga nipasuma nggari setu.

²⁹Tau-tau ntanina da'a to Yahudi kana marata nggari umba-umba ri dunia mantuki posusa Alatala ri suruga etu. Ira marata nggari pebuluna bo kasolona, pade nggari tasina bo puluna.

³⁰Toramo! Tempona etu tau ri purina etu kana majadi ri koluna, pade tau ri koluna kana majadi ri purina.”

³¹Tempona etu wo'u naria bara sakuya mba'a to Parisi narata ri ja'i Yesus pade nanguli, “Komi kana malai nggari se'i, sabana Magau Herodes madota mompatesi Komi!”

³²Tapi nesonomo Yesus, “Kau uli ka tau topebagiu etu iwe'i: ‘Aku da'apa malai nggari se'i sabana eo e'i ante naile Aku mompopalai seta-seta pade mompakabelo tau-tau naju'a. Danepuapa Aku mompakaopu panggawiaku.’ ”

³³Pade nangulimo Yesus ka tau ri setu, “Naupa iwetu aku kana mompapola wo'u polumakoku mpaka ri ngata Yerusalem eo e'i, naile ante nepua, sabana da'a nabelo ane samba'a nabi rapatesi ri peto'o ntanina nggari ngata Yerusalem.

³⁴Umba komi to Yerusalem, pue ngata Yerusalem! Komi nompatesi nabi-nabi pade komi nombarempe ante watu tau-tau to nisuro Alatala mpaka ri ja'imu! Nadea ngganimo Aku madota manggalendu komi pura-pura nasimbayu ante manu nombaruta anana, tapi komi da'a madota.

³⁵Epemo! Alatala mana nosanggani ante komi. Kuuli ka komi, komi mana manggita Aku sampe Aku marata bali ri dunia pade komi mantotoaka Aku ante manguli, ‘Perapi Pue mombagane Magau to narata niposumba Alatala.’ ”