Read Da'a Kaili LUKAS 14 Bible Online

LUKAS 14 - Da'a Kaili bible

LUKAS 14

¹Tempo Eo Mpenonto nalaumo Yesus nanggoni ri sapo samba'a topanggeniaka nto Parisi. Pura-pura tau to naria ri setu nanggita bo nompariara Yesus.

²Sampegoli naratamo samba'a tau naju'a ri ngayo Yesus. Kadana ante palena nebangga puramo.

³Nanggita tau etu nekutanamo Yesus ri ja'i guru-guru agama ante tau-tau to Parisi to naria ri setu, “Nantuki Atura-atura agama mamala kita mompakabelo tau naju'a tempo Eo Mpenonto bara da'a?”

⁴Guru-guru agama ante tau-tau to Parisi etu aga nekalino, da'a ria ira nesono. Pade Yesus nanjoko pale ntau to naju'a etu pade nipakabelona, pade nipakauna nalai.

⁵Naopu etu niulina ka guru-guru agama ante tau-tau to Parisi etu, “Ane maria ana komi bara japi komi manawu riara lowu tempo Eo Mpenonto, natantumo komi masasinta malau mangonggotaka ngana etu bara japi etu nggariara lowu eo etu wo'u, naupa eo etu Eo Mpenonto!”

⁶Naopu nangepe tesa Yesus etu, da'a ria samba'a to namala nesono.

⁷Tempona etu Yesus nanggita torata-torata ri posusa to Parisi etu nompelisi pekatoko-pekatoko to neliu nggabelona. Sabana etu I'a nompatuduki ira pura-pura ante saongu porapa iwe'i:

⁸“Ane rapana komi ragaga malau mpaka ri posusa ne'e komi malau mekatoko ri ompa to nipakasadia ka totu'a. Sabana bara maria samba'a tau ntanina ri setu to neliu nibila.

⁹Pade pue njapo to nombagaga komi romba'a kana marata pade manguli ka komi, ‘Merapi ampu, peto'o e'i nipakasadia ka torata e'i. Komi kana molinja ri peto'o ntanina.’ ” Pade niuli Yesus, “Natantu kana maeya mata komi molinja mekatoko ri talikuna.

¹⁰Sabana etu ane komi ragaga malau mpaka ri posusa, pelisimo peto'o ri talikuna ala pue njapo marata manguli ka komi, ‘Wegaku, kamai mekatoko ri ompa ntotu'a e'i.’ Ante inggumu etu komi kana rabila ri ngayo pura-pura torata ntanina.

¹¹Sabana butu mba'a tau to nompakalanga rarana kana rapakaede, tapi tau to nompakaede rarana kana rapakalanga.”

¹²Naopu etu nangulimo Yesus ka pue njapo ri setu, “Ane komi mombagaga tau marata manggoni ri posusa ntongo eo bara tempo nggawengina, ne'e komi mombagaga roa-roamu, bara sampesuwu-sampesuwumu bara tau to nosinggamosu ka komi to nasugina, sabana banepia ira kana mombagaga komi wo'umo. Ane iwetu powiamu to nabelona etu kana rabalasi ira.

¹³Jadi ane komi mowia posusa, gagamo tau to nakasiasina, tau to nakeruna, tau to napungguna pade tau to naburona.

¹⁴Ane komi mowia iwetu komi kana ragane, sabana tau-tau etu pane'a da'a mamala mombabalasi powiamu to nabelona etu. Powiamu etu kana rabalasi Alatala tempona tau-tau to nabelona rapakatuwu bali nggari kamatena.”

¹⁵Tempona samba'a tau to nanggoni mpasanggani-nggani ri posusa etu nangepe tesa Yesus pane'a i'a nanguli, “Natantu nasana mpu'umo tau to mamala manggoni mpasanggani-nggani ante Alatala ri posusa bete ri suruga.”

¹⁶Nangepe tesa ntau etu Yesus nombatesa saongu porapa iwe'i: “Sanggani tempo samba'a tau nowia posusa bete pade nadea tau nigagana.

¹⁷Naratamo tempo nompamula nosusa pade nipakauna batuana malau manguli ka pura-pura tau to nigagana iwe'i: ‘Kamaimo, nasadia puramo.’

¹⁸Tapi nompamulamo ira pura-pura samba'a bo samba'a merapi ampu. Samba'a nanguli ka batua to narata ri ja'ina, ‘Aku dako nangoli salimpu tana. Aku kana malau momparesa tana etu. Merapi ampu, aku da'a majadi momai!’

¹⁹Pade nangulimo tau ntanina, ‘Aku dako nangoli japi sampulu onguna. Aku malau we'i-we'i mompembai mopajeko ante japi-japi etu. Merapi ampu, aku da'a majadi momai!’

²⁰Pade nangulimo tau ntanina, ‘Aku dako norongo, jadi sabana etu da'a namala aku momai!’

²¹Nanjilimo batua etu mpaka ri ja'i pue njapo etu, pade niulina ka i'a nuapa pura to nipotanje ntau to nigaga etu. Nangepe tesa batua etu narau mpu'umo rara pue njapo etu, pade niulina ka batuana etu, ‘We'i-we'i kalaumo masasinta ri jala-jala bete ante ri jala-jala nggedi ri ngata e'i pade mangelo tau to nakasiasina, tau to nakeruna, tau to naburona ante tau to napungguna. Kenimo ira pura-pura ri se'i!’

²²Jadi nalaumo batua etu nantuki pura nuapa to nipakau pue njapo etu ka i'a. Naopu etu nalaumo batua etu notesa ka pue njapo, ‘Uma, to nipakaumu naopumo nikawiaku. Nadeamo tau narata tapi danariapa peto'o to naloga to da'apa niisi.’

²³Pade nangulimo pue njapo ka batuana etu, ‘Ane iwetu, kalaumo mpaka ri jala-jala bete pade jala-jala nggedi ri sawaliku ngata. Pasu'umo tau-tau marata ala maponu sapoku!

²⁴Natantu da'a ria samba'a tau to nigagaku pangane to mamala marata manggoni mpasanggani-nggani ri posusaku e'i!’ ”

²⁵Nadea mpu'u tau nalau mpasanggani-nggani ante Yesus. Pade negolimo I'a notesa ka ira,

²⁶“Ane samba'a tau madota majadi topantuki Aku i'a kana mompotowe Aku neliupa nggari pompotowena ka indo umana, rongona ante ana-anana, sampesuwu-sampesuwuna, ante korona mboto wo'u. Ane i'a da'a nompotowe Aku neliupa nggari ira pura-pura ante korona mboto wo'u da'a mamala i'a majadi topantuki Aku.

²⁷Isema-sema da'a madota manjumbuaka kayu pomparikana pade malau mantuki Aku da'a masipato majadi topantuki Aku. [16]

²⁸Ane rapana maria samba'a nggari komi madota mowia saongu sapo to nabetena, natantumo da'apa i'a nompamula mombabangu i'a kana mekatoko mombabila ntani doina bara magana mompakatoka sapona bara da'a.

²⁹Sabana ane dako ratinjana maopumo doina mompakatoka sapona etu natantumo pura-pura tau to manggita powiana etu kana mompongiri i'a.

³⁰Ira kana manguli, ‘A, nadoyo tau e'i! I'a nompamula nowia sapona tapi da'a nipakulena mompakatoka sapo etu.’

³¹Iwetu wo'u ane samba'a magau malau mosibali ka magau ntanina to narata mosibali ante i'a. Natantumo da'apa i'a malau i'a kana mekatoko mompekiri ntani ruru ane tantarana sampulu njobu mba'ana nompakule mosibali ka tantara rompulu njobu mba'ana nggari magau ntanina etu.

³²Ane ranjanina da'a rapakule tantarana mosibali ka tantara magau ntanina etu, natantumo tempo balina etu danakawao i'a kana mombasuro tau malau mpaka ri ja'i magau ntanina etu merapi mosinggabelo.

³³Jadi iwetu wo'u ante komi to madota majadi topantuki Aku. Pekirimo mpakabelo-belo ntani ruru, sabana da'a ria tau mamala majadi topantuki Aku ane i'a da'a manggabasaka pura-pura to naria ri ja'ina.”

³⁴“Natantu ninjani komi gara nabelo. Tapi ane gara majadi nameli natantu da'a namala rapakapaga bali.

³⁵Mana ria gunana. Da'a namala rapake nabeloka mompakaboya tana, nabeloka rapajadi pupu. Kana ratajiaka wa'amo. Isema-sema naria talingana, epemo mpakabelo-belo tesaku e'i!”