Read Da'a Kaili LUKAS 17 Bible Online

LUKAS 17 - Da'a Kaili bible

LUKAS 17

¹Pade nangulimo Yesus ka topantuki-topantuki I'a, “Natantumo kana maria saba-sabana sampe tau mowia silaka. Tapi mandasa mpu'umo tau to mompakeni tau ntanina mowia silaka.

²Nabelopa i'a ratajiaka riara ntasi ante saongu watu bete niso'o ri tambolona pade i'a mombabagiu samba'a ngana nggedi sampe i'a mowia silaka.

³Sabana etu komi kana mainga. Ane maria sampesuwumu mowia silaka ontiakamo i'a. Pade ane i'a majea pade merapi ampu, ampungimo i'a.

⁴Ane i'a mowia maja'a ri ja'i komi pitunggani riara saeo pade butu nggani i'a marata merapi ampu ri ja'imu, komi kana mombaampungi i'a.”

⁵Pade nangulimo anaguru-anaguruna ka Yesus, “Pue, pakarosomo pomparasaya kami.”

⁶Nangepe etu nangulimo Yesus, “Ane pomparasaya komi aga sakedi lau nasimbayu ewa wua kayu to nakedi mpu'u, komi mamala manguli ka kayu bete e'i, ‘Kawukamo pade kau polinjamo mpaka ri tatongo ntasi.’ Pade natantumo kayu etu kana molinja.”

⁷“Rapana samba'a nggari komi maria samba'a batua to nopajeko bara nompoewu bimba ri karawana. Tempo batua etu manjili nggari karawana etu, natantumo komi da'a manguli ka i'a, ‘Kamaimo masasinta manggoni!’

⁸Da'a mpu'u iwetu! Natantumo komi kana manguli ka i'a, ‘Kalau poriapu ruru panggoniku. Pade ane mangongomo pomporiapumu etu pakasadia pade keni ka aku panggoni etu. Ane maopu aku manggoni manginu pade mamala iko malau manggoni.’

⁹Natantumo batua etu da'a miki ratoiya sabana i'a aga nantuki dota madikana.

¹⁰Iwetu wo'u komi. Ane komi maopu mowia pura-pura to niparenta ka komi, ulimo, ‘Kami e'i aga batua biasa. Kami aga nowia nuapa to masipato rapowia kami.’ ”

¹¹Tempo Yesus nompapola polumakona mpaka ri ngata Yerusalem, I'a nantuki pobingga Bagia Samaria ante Bagia Galilea.

¹²Tempona I'a nesua ri saongu ngata naria sampulu mba'a tau to naju'a bete nomposirata I'a. Ira nekanggore nakawao

¹³bo nongare, “Yesus, Guru, potowemo kami!”

¹⁴Pade Yesus nangantoaka ira ante nanguli, “Kalaumo komi ri ja'i topanggeni-topanggeni agama merapi ala koro komi raparesa ira.” Nangepe etu nalaumo ira nantuki tesa Yesus etu. Tempo ira danalau-lau nabelomo koro ira pura-pura.

¹⁵Tempo samba'a nggari ira nanggita korona nabelomo, natinggulimo i'a mpaka ri ja'i Yesus ante nombatoiya-toiya Alatala ante suara namangga.

¹⁶Pade notimbakotumo i'a ri ngayo Yesus ante nanguli tarima kasi ri ja'ina. Tau etu i'amo samba'a tau nggari Bagia Samaria.

¹⁷Pade nangulimo Yesus, “Naria sampulu mba'a tau pane'a to nipakabeloku. Ri umbamo ira to sasiona?

¹⁸Nokuya aga tau da'a to Yahudi e'i to narata nanguli tarima kasi ka Alatala?”

¹⁹Pade niuli Yesus ka tau etu, “Pekanggoremo bo kalaumo. Nabelomo ju'amu sabana komi nomparasaya Aku.”

²⁰Naria bara sakuya mba'a to Parisi nompekutana Yesus, “Nepia Alatala marata moparenta ri dunia?” Nesonomo Yesus, “Da'a ria tandai-tandaina to namala rakita to mompakatantu nepia Alatala marata moparenta.

²¹Da'a ria to mamala manguli, ‘Kitamo, e'imo I'a,’ bara manguli, ‘Kitamo, ri setumo I'a.’ Poparenta nu Alatala da'a namala rakita ntau sabana Alatala noparenta riara nta'i manusia.”

²²Naopu etu nangulimo Yesus ka anaguru-anaguruna, “Kana marata tempona komi madota manggita Aku, Ana nu Manusia naupa aga sampalai lau, tapi komi da'a manggita Aku.

²³Kana maria tau manguli ka komi banepia, ‘Kitamo, ri setumo I'a,’ atau manguli, ‘Ri se'imo I'a.’ Tapi ne'e komi malau mantuki ira,

²⁴sabana tempo Aku marata bali ri dunia, kana ranjani komi. Nasimbayu ewa kila norea ri laerawa pade nombawanta pura-pura langi, iwetu wo'umo tempo karataku. Etu kana rakita ntau pura-pura.

²⁵Tapi da'apa marata tempona etu, pamulana Aku mpu'u-mpu'u rapandasa pade rapoara tau-tau to natuwu tempo e'i.

²⁶Tempo Aku, Ana nu Manusia marata banepia pokainggu manusia kana masimbayu ante pokainggu manusia tempo nabi i Nuh nggaolu.

²⁷Ira nanggoni nanginu pade norongo nosiporongo ewa biasa sampe nabi i Nuh nesua riara sakaya betena. Naopu etu nanggabuntu puramo ue ri dunia e'i sampe pura-pura tau ntanina etu namate.

²⁸Wa'a wo'u pokainggu manusia ri ngata Sodom tempo i Lot neto'o ri setu. Ira nanggoni nanginu, naria nobalu-balu naria neoli. Ira notuja-tuja pade nombangu sapo ewa biasa.

²⁹Tapi tempona i Lot nalai nggari ngata Sodom etu, eo etu wo'umo nana'umo apu ante watu to najelana nggari langi nompakaropu ira pura-pura ri ngata etu.

³⁰Masimbayu ka etu wo'u banepia tempo Aku, Ana nu Manusia marata bali ri dunia. [17]

³¹Tempo karataku etu tau to nompamaya ka poiri ri bunggu nu sapona ne'e mana'u mesua rara njapo mangala mbara-mbara to naria ri setu. Iwetu wo'u tau-tau to naria ri tinaluna. Ne'e mana ira manjili mpaka ri ngata. Palaimo masasinta!

³²Toramo nuapa to najadi ri ja'i rongo i Lot tempona i'a nompeili nanggita ngata Sodom. [18]

³³Tau aga nantora katuwuna mboto tapi da'a nantuki dota Alatala, da'a namala matuwu mabelo sampe ri kasae-saena. Tapi tau to nantuki Alatala ante da'a nantora katuwuna mboto, etumo tau to namala matuwu mabelo sampe ri kasae-saena.

³⁴Epemo tesaku! Ane karataku etu tempo nggawengina ane maria romba'a moturu mosaongu ranja, samba'a kana kuala pade samba'a kuboli ri setu.

³⁵Pade ane karataku tempo eona ane maria besi romba'a mogili mpasanggani-nggani, samba'a kana kuala pade samba'a wo'u kana kuboli ri setu. [

³⁶Pade ane maria langgai romba'a manggawia mpasanggani-nggani ri tinalu, samba'a kana kuala pade samba'a wo'u kuboli.”]

³⁷Pade nekutanamo anaguru-anaguru Yesus, “Pue, ri umba etu majadi?” Nesonomo Yesus, “Ane rakita komi tonji kolaa nasiromu nanggoni, natantumo nanoto ri setu naria binata namate. Iwetu wo'u ante karataku. Natantu manoto wo'u ka komi ri umba rakajadina.”