Read Da'a Kaili LUKAS 18 Bible Online

LUKAS 18 - Da'a Kaili bible

LUKAS 18

¹Naopu etu Yesus nombatesa ka anaguru-anaguruna saongu porapa mompatuduki ira ala maoso mosambaya, ne'e maopu rara.

²Niulina, “Ri saongu ngata naria samba'a topotangara to da'a nekou ri ja'i Alatala pade da'a wo'u nombabila sanggamanusiana.

³Pade ri ngata etu naria wo'u samba'a besi tobalu. I'a tunggai narata ri ja'i ntopotangara etu nerapi tulungi ante nanguli, ‘Tulungimo aku mantingayo baliku!’

⁴Pamulana topotangara etu da'a nadota mantulungi tobalu etu. Tapi kaopuna nipekirina, ‘Naupa aku da'a nekou ri ja'i Alatala pade da'a wo'u nombabila sanggamanusiaku,

⁵aginamo aku mantulungi tobalu e'i sabana i'a nombabago aku. Ane aku da'a mantulungi i'a, i'a kana marata-rata mompakalenge aku.’ ”

⁶Pade nangulimo Yesus ka anaguru-anaguruna, “Epemo mpakabelo-belo nuapa to nitesa topotangara to nadenggo etu!

⁷Ane tau to nadenggo rarana madota mantulungi tobalu to nerapi-rapi ri ja'ina, ne'epa rauli Alatala. Natantumo I'a kana mantulungi todeana to nipelisina to da'a nenonto mekakai ri ja'ina. Ne'e rapekiri komi I'a nompakasae-sae pade mantulungi ira.

⁸Natantumo I'a kana masasinta mantulungi ira. Tapi tempo Aku, Ana nu Manusia marata bali ri dunia e'i, natantumo tau to mpu'u-mpu'u nomparasaya Aku da'a madea.”

⁹Pade Yesus nombatesa wo'u saongu porapa ri ja'i ntau to nompekiri aga iramo tau to nabelona pade tau ntanina da'a ria gunana.

¹⁰Niulina, “Naria romba'a tau nalau mpaka ri Sapo Mpepue mosambaya, samba'a to Parisi pade samba'a topomperapi balasitee.

¹¹Tau to Parisi etu nenggore pade nosambaya riara nta'ina, ‘Pue Alatala, aku nosukuru ri ja'imu sabana aku e'i da'a nasimbayu ante tau ntanina, etumo tau topebagiu, tau to nadenggo rarana, ante tau to nebualo. Aku nosukuru aku da'a nasimbayu ante topomperapi balasitee etu.

¹²Ronggani santipa aku napuasa pade aku nombawai ka Pue sabagia nggari sampulu bagia nggari pura-pura pombarataku.’

¹³Tapi tempo topomperapi balasitee etu nosambaya i'a nenggore nggawao. Da'a nabia i'a nakantingoa ri langi. Ante nanjoso rara i'a nanjapa-njapa bombarana ante nanguli, ‘Pue Alatala, potowemo aku, sabana aku e'i samba'a tau nasilaka.’ ”

¹⁴Pade nangulimo Yesus, “Tempona ira romba'a nanjili, natantumo topomperapi balasitee etumo to nikonoa Alatala, da'a tau to Parisi to nalanga rarana etu. Sabana isema-sema to nompakalanga rarana kana rapakaede, pade isema-sema to nompakaede rarana, kana rapakalanga.”

¹⁵Nadea tau nanggeni ana-ana ira mpaka ri ja'i Yesus ala I'a mombadika palena ri ngana-ngana etu mombagane ira. Tapi tempo anaguru-anaguru Yesus nanggita etu, ira nanggarau tau-tau etu.

¹⁶Tapi Yesus nompokio ngana-ngana etu pade niulina ka anaguru-anaguruna, “Pakambamo ngana-ngana etu marata ri ja'iku! Ne'e ratagi ira, sabana aga tau to noinggu ewa ngana-ngana e'i to masipato majadi todea riara Poparenta nu Alatala.

¹⁷Toramo! Da'a ria samba'a tau namala majadi todea riara Poparenta nu Alatala ane i'a da'a mekou ri ja'i Alatala nasimbayu ante ngana-ngana e'i.”

¹⁸Naria samba'a topanggeniaka nto Yahudi nekutana ri ja'i Yesus, “Guru to nabelona, nuapa masipato kupowia ala aku mamala mombarata katuwua mabelo sampe ri kasae-saena?”

¹⁹Nesonomo Yesus, “Nokuya komi nanguli Aku nabelo? Da'a ria ntanina nabelo, aga Pue Alatala.

²⁰Natantumo ninjanimu parenta Alatala to nanguli, ‘Ne'e mogau sala ante tau da'a rongomu mboto, ne'e mepatesi, ne'e mangangga, ne'e modawa ri ngayo ntopotangara, pade bilamo indo umamu.’ ”

²¹Nesonomo tau etu, “Parenta-parenta etu nitukiku puramo nggari kakediku.”

²²Sangga nangepe etu nangulimo Yesus ka tau etu, “Danariapa sangaya to masipato mupowia. Pobalumo pura-pura mbara-mbaramu pade palelemo doina etu ka tau-tau nakasiasi ala murata kakalumana ri suruga. Maopu etu kamai, tukimo Aku!”

²³Tapi sangga nangepe tesa Yesus etu nasusamo rara topanggeniaka etu, sabana i'a samba'a tau nakalumana mpu'u.

²⁴Ninjani Yesusmo nasusa rara ntau etu. Etu sampe niulina, “Nakaja mpu'u tau nakalumana majadi todea riara Poparenta nu Alatala.

²⁵Nagampapa saongu binata to nabetena ewa unta mesua ri bolo jaru pade samba'a tau nakalumana majadi todea riara Poparenta nu Alatala.”

²⁶Pade nangulimo tau-tau to nangepe tesa Yesus etu, “Ane iwetu natantumo da'a ria samba'a tau to mamala rapakasalama!” [19]

²⁷Nangulimo Yesus, “Anu da'a nipakule manusia nipakule nu Alatala.”

²⁸Naopu etu nangulimo i Petrus ka Yesus, “Kita we'i, Pue. Kami e'i nompalasi pura-pura nuapa to naria ri ja'i kami pade nantuki Komi.”

²⁹Pade nangulimo Yesus ka ira, “Aku mpu'u-mpu'u notesa ka komi, isema-sema to nompalasi sapona bara rongona bara sampesuwuna bara indo umana bara anana sabana nantuki Alatala,

³⁰i'a kana mombarata bali riara nggatuwuna we'i-we'i neliu nggadea nggari nuapa to nipalasina. Pade ri tempo nggapurina i'a kana mombarata katuwua mabelo sampe ri kasae-saena.”

³¹Yesus nompokio sampulu romba'a anaguruna nalau mpasanggani-nggani, pade niulina ka ira, “Epemo mpakabelo-belo! We'i-we'i kita mantende mpaka ri ngata Yerusalem. Pade ri setu pura-pura nuapa to nitulisi nabi-nabi ewa Aku, Ana nu Manusia kana madupa.

³²Aku kana rawai ka tau-tau da'a to Yahudi pade rapongei-ngei ira, rauli sinja'i pade ratailu ira.

³³Aku kana raporo ira mpakandasa pade kaopuna rapatesi ira. Tapi ri eo katolueona Aku kana matuwu bali.”

³⁴Pura-pura nuapa to nitesa Yesus etu da'a ninjani anaguru-anaguruna. Tempona etu nitabuniaka ka ira batuana nggari tesa etu, pade da'a ninjani ira nuapa patuju nu tesa Yesus etu.

³⁵Tempona Yesus ntora narata ri ngata Yerikho, naria samba'a tau naburo nekatoko nerapi-rapi ri wiwi jala.

³⁶Tempo niepena gosa ntau dea noliu ri setu, nipekutanana ka tau-tau to namosu i'a, “Nuapa e'i?”

³⁷Nangulimo ira, “Yesus tau nggari ngata Nazaret etu moliu ri se'i.”

³⁸Nangepe etu nongaremo tau to naburo etu, “Yesus, Muli i Daud, potowemo aku e'i!”

³⁹Tau-tau to nokolu ka Yesus nangontiaka toburo etu ante nanguli, “Ne'e makanano! Pekalinomo iko!” Tapi toburo etu nantambai nongare ante suara to namangga, “Muli i Daud, potowemo aku!”

⁴⁰Nangepe etu, nenontomo Yesus, pade nipekikenina toburo etu mpaka ri ja'ina. Tempona toburo etu narata ri ja'ina, nekutanamo Yesus ka i'a,

⁴¹“Nuapa to mupodota kupowia ka iko?” Nesonomo toburo etu, “Pue, to nipodotaku ala mataku mamala mekita!”

⁴²Pade nangulimo Yesus ka i'a, “Kitamo! Nabelomo matamu sabana iko nomparasaya!”

⁴³Kaliu-liu nabelomo mata ntoburo etu, pade nalaumo i'a nantuki Yesus ante nombatoiya Pue Alatala. Tempona pura-pura tau dea ri setu nanggita kajadia etu, ira pura-pura nantoiya Alatala.