Read Da'a Kaili LUKAS 19 Bible Online

LUKAS 19 - Da'a Kaili bible

LUKAS 19

¹Sangga naratapa ri ngata Yerikho nesuamo Yesus nombaliunaka ngata etu.

²Ri ngata etu naria samba'a balengga topomperapi balasitee, sangana i Zakheus. Nakalumana mpu'u i'a.

³I'a madota manggita Yesus, tapi da'a namala sabana naede korona pade nadea mpu'u tau nantalili Yesus.

⁴Jadi Zakheus nokolu nangowa mpaka ri sampu'u kayu ri wiwi jala, tau dea ri purina. Narata ri setu i'a nompone kayu etu pade nekatoko ri pangana ala i'a mamala manggita Yesus tempona I'a moliu ri setu.

⁵Tempo Yesus narata ri wayo nggayu etu I'a nantingara ri panga nu kayu etu nanggita i Zakheus, pade niulina, “Zakheus, pana'umo masalisa, sabana Aku madota mpaka ri sapomu eo e'i.”

⁶Nangepe etu nompari-mparimo i Zakheus nana'u pade nikenina Yesus mpaka ri sapona ante nadamba rarana.

⁷Tapi sangga nanggita etu nokagagutu-gutumo pura-pura tau samba'a bo samba'a, “Da'a nabelo Yesus nalau nesai nosanggani ante tau to nadenggo rarana etu!”

⁸Tempo Yesus ri sapona nekanggoremo i Zakheus pade niulina ka Yesus, “Pue, santongo mbara-mbaraku kana kuwai ka tau to nakasiasi. Pade isema-sema to nibagiuku, aku kana mompopanjili ka ira patanggani kadeana.”

⁹Nangepe etu nangulimo Yesus, “Tesamu etu tandaina komi saongu njapo nipakasalamamo eona e'i, sabana nasimbayu ante Abraham totu'amu nggaolu, komi wo'u nomparasaya Alatala.

¹⁰Komi nipakasalama sabana etumo patuju Ana nu Manusia narata ri dunia. Aku narata mangelo ante mompakasalama tau-tau to nalipo riara silaka ira.”

¹¹Tempona tau-tau danangepe tesa Yesus etu, I'a nompapola tesana ka ira ante saongu porapa. Nitesana porapa e'i ka ira sabana namosumo I'a ri ngata Yerusalem pade niparasaya ntodea Pue Alatala kana kaliu-liu mompamula moparenta ri dunia.

¹²Jadi Yesus nombatesa ka ira porapa e'i: “Samba'a madika nopatuju malau mpaka ri ngata nakawao ala ralanti majadi magau, pade naopupa ralanti manjili mpaka ri ngatana mboto ala moparenta ri setu.

¹³Da'apa i'a nalau nipokiona ruru sampulu mba'a batuana pade niwaina ka ira simbau sampeka doi bulawa. Pade niulina ka ira, ‘Doi e'i rapogoli komi sampe aku manjili.’ Naopu etu nalaimo i'a.

¹⁴Tapi tau-tau ri ngatana ri setu nagigi rara ri ja'ina. Jadi nipakau ira topanggeni tesa mpaka ri ngata nakawao to nikalauna etu. Narata ri setu nangulimo topanggeni tesa etu ka magau to nakuasa ri setu, ‘Kami da'a madota madika e'i majadi magau ri bagia kami.’

¹⁵Tapi madika etu kana nilanti najadi magau ri bagia ira. Pade naopu etu nanjilimo i'a mpaka ri ngatana mboto. Narata ri sapona nipokiona sampulu mba'a batuana to niwaina ka doi bulawa etu marata ri ja'ina. Sangga naratapa ira nekutanamo i'a ka ira, ‘Sakuyamo ana nu doiku nipogoli komi?’

¹⁶Naratamo batuana pamulana ri ngayona pade nanguli, ‘Magau, doi bulawamu sampeka etu nipogoliku najadi sampulu.’

¹⁷Pade nangulimo magau etu ka batuana etu, ‘Nabelomo! Komi batua to nabelona. Komi namala niparasaya ante mbara-mbara sakedi. Sabana etu komi kana rapajadi topoparenta sampulu ngata.’

¹⁸Pade naratamo batua karomba'ana ri ngayo magau pade nanguli, ‘Magau, doimu sampeka nipogoliku najadi alima.’

¹⁹Pade nangulimo magau ka i'a, ‘Komi kana rapajadi topoparenta lima ngata.’

²⁰Pade naratamo batua ntanina nanguli, ‘Magau, e'imo doi bulawa sampeka to niwai komi ka aku. Nibunguku ante kae pade nitabuniakaku ri peto'o to nabelona.

²¹Naeka aku ri ja'i komi, sabana ninjaniku komi samba'a tau to nasoa. Komi nangala anu da'a niboli komi, pade nangala asele ri tinalu anu da'a nituja komi.’

²²Nangepe etu nesonomo magau ka batua etu, ‘Iko e'i samba'a batua to naja'a! Tesamu mboto kupake mombatangara iko. Ninjanimu aku samba'a tau nasoa. Aku nangala anu da'a niboliku pade aku nangala asele ri tinalu anu da'a nitujaku.

²³Ane iwetu nokuya iko da'a nombawai doiku etu ka tau to nompopoana doi ala tempona aku marata mamala kuala mpanjili doiku ante anana?’

²⁴Pade niuli magau etu ka tau-tau to naria ri setu, ‘Alamo doi bulawana sampeka etu rawai ka batua to naria doi bulawana sampulu mpeka etu.’

²⁵Tapi nangulimo tau-tau etu ka magau, ‘Magau, nariamo doina sampulu mpekana!’

²⁶Nesonomo magau etu, ‘Nakonomo etu, tapi toramo! Isema to naria nadea kana ratambai ka i'a. Tapi isema naria aga sakedi, etu wo'u kana raala mpakaopu nggari ja'ina.

²⁷Pade we'i-we'i kenimo ri ngayoku bali-baliku etu to da'a nadota mantarima aku majadi magau ira. Patesimo ira pura-pura ri ngayoku se'i!’ ”

²⁸Naopu Yesus notesa etu pura-pura nalaumo I'a nokolu ka ira ri ngata Yerusalem.

²⁹Tempo namosumo I'a ri ngata Betfage bo ngata Betania ri Bulu Zaitun, nipakauna romba'a anaguruna mokolu ka I'a.

³⁰Niulina ka ira, “Kalaumo komi mpaka ri ngata to namosumo ri ngayota etu. Tempona komi mesua ri sa'a komi kana mombarata saongu ana keledai nitataka to da'apa sanggani nipesawi ntau. Wolemo ana keledai etu nggari potatakana pade umbumo wemai.

³¹Ane maria tau mompekutana komi, ‘Nokuya komi nombawole ana keledai etu?’ tesa ka tau etu, ‘Pue paraluu mompake keledai e'i.’ ”

³²Jadi nalaumo romba'a anaguru Yesus to nipakau mokolu etu, pade nirata ira nasimbayu ewa nuapa to niuli Yesus etu.

³³Tempona ira nombawole ana keledai etu, nekutanamo puena ka ira, “Nokuya komi nombawole ana keledai etu?”

³⁴Nesonomo ira, “Pue paraluu mompake keledai e'i.”

³⁵Naopu etu niumbu iramo ana keledai etu mpaka ri ja'i Yesus. Niboli ira pakea ri bengo keledai etu, pade Yesus nitulungi ira nesawi ri bengona. Naopu etu nalaumo ira pura-pura.

³⁶Tempona Yesus noliu ante keledai etu, tau-tau nombajini buya ira ri jala nombatomunaka I'a.

³⁷Tempo Yesus ntora narata ri ngata Yerusalem ri jala to notua nggari Bulu Zaitun etu, nompamulamo pura-pura todea topantuki I'a etu nongare-ngare nantoiya Alatala ante nadamba rara sabana pura-pura kabaraka to nikita ira.

³⁸Nongare-ngaremo ira, “Perapi Pue mombagane Magau to narata niposumba Alatala! Nosinggabelomo kita ante Alatala! Ratoiyata Alatala ri suruga!”

³⁹Tempo etu naria bara sakuya mba'a to Parisi nggari olo ntau dea etu nongare ka I'a, “Guru, ne'e rapakamba topantuki-topantuki Komi notesa iwetu!”

⁴⁰Tapi nesonomo Yesus, “Parasayamo Aku, ane ira da'a motesa iwetu, natantumo watu-watu e'i kana mongare mombatoiya Alatala!”

⁴¹Tempo namosumo Yesus ri ngata Yerusalem pade nikitana ngata etu ri ngayona, notumangimo I'a nantangi pue ngata etu.

⁴²Niulina, “Nabelo mpu'umo ane eo e'i komi mangginjani nuapa to raparaluu rakawia komi ala maria posinggabelo ri ngatamu e'i. Tapi kakonona da'a ninjani komi.

⁴³Sabana etu kana marata tempona ngata komi rapatiku pade raewa balimu. Ngatamu kana rawala ntiku ira sampe komi mana mamala mesuwu. Pade komi ralawa mpii nggari umba-umba.

⁴⁴Ngatamu kana ragero pade komi pura-pura kana rapatesi ira. Da'a mana maria watu to nipake komi nowia ngata e'i rapakamba ira mosisunju nau kamba saongu, sabana da'a ninjani komi tempo Alatala narata mompakasalama komi.”

⁴⁵Naopu etu nalaumo Yesus nesua riara Sapo Mpepue. Ri setu nompamulamo I'a nompopalai topotomu to naria ri setu.

⁴⁶Niulina ka ira, “Riara Buku Nagasa naria nitulisi iwe'i: ‘Sapoku kana majadi sapo mposambaya.’ [20] Tapi komi ri se'i nompajadi Sapo Mpepue e'i peto'o parampo!”

⁴⁷Naopu etu eo-eo Yesus nesua nopaguru riara Sapo Mpepue. Balengga-balengga topanggeni agama ante guru-guru agama bo totu'a-totu'a nto Yahudi danangelo jala mompatesi I'a.

⁴⁸Tapi da'a nirata ira jala mowia etu sabana pura-pura tau mpu'u-mpu'u madota mangepe tesana.