Read Da'a Kaili LUKAS 2 Bible Online

LUKAS 2 - Da'a Kaili bible

LUKAS 2

¹Tempona etu Kaisar Agustus noparenta ala sanga pura-pura tau riara Poparenta nto Roma ratulisi riara buku senju ri ngata totu'a ira mboto.

²Popabila pamula-mulana e'i nikawia tempona i Kirenius najadi Gubernur ri Bagia Siria.

³Pura-pura tau nalau mpaka ri ngata totu'a ira mboto ala sanga ira ratulisi riara buku senju.

⁴Iwetu wo'u Yusuf. I'a nanggaliwo nggari ngata Nazaret ri Bagia Galilea mpaka ri ngata Betlehem ri Bagia Yudea, ngata pesuwu Magau Daud, sabana Yusuf muli i Daud.

⁵Yusuf nalau mpasanggani-nggani ante tingeana i Maria to natiana etu ala sanga ira ratulisi ri setu.

⁶Tempo ira ri ngata Betlehem naratamo ntoana i Maria moana.

⁷I'a nangote samba'a ngana langgai, anana ulumbua. Ngana etu nibunguna ante buya, pade nipopaturuna riara peto'o panggoni binata ri gimpu binata, sabana ira da'a nombarata peto'o riara njapo ntau.

⁸Wengi pesuwu Yesus etu naria topoewu-topoewu nombajagai bimba-bimba ira ranggarawana namosu ngata etu.

⁹Sampegoli naratamo samba'a malaeka i Pue ri ja'i ira pade reme i Pue nombawanta ira. Nanggita etu naeka mpu'umo ira.

¹⁰Tapi nangulimo malaeka ka ira, “Ne'e komi maeka sabana karataku e'i nanggeni kareba to nabelo ka komi pura-pura, pade to mompakadamba pura-pura tau.

¹¹Wengina e'i ri ngata pesuwu Magau Daud niotemo samba'a Magau to Mompakasalama komi, etumo i Pue Yesus Kristus.

¹²Iwe'imo tandaina to mompakatantu ka komi nakono tesaku: ngana etu nibungu ante buya pade nipopaturu ri peto'o panggoni binata.”

¹³Sampegoli nadeamo roa malaeka etu pade ira nombatoiya Alatala iwe'i:

¹⁴“Ratoiyata Alatala to naria ri suruga! Pade ri dunia mosinggabelo pura-pura tau to nikonoa Alatala.”

¹⁵Sangga malaeka-malaeka etu nompalasi ira nanjili mpaka ri suruga, nosimpakenimo topoewu etu samba'a bo samba'a, “Kamaimo kita mpaka ri ngata Betlehem manggita nuapa to najadina etu to nitesa i Pue ka kita.”

¹⁶Ira nompari-mpari nalau, pade nirata ira i Maria ante Yusuf pade ngana etu danaturu riara peto'o panggoni binata.

¹⁷Sangga nikita ntopoewupa ngana etu, nitesa ira puramo nuapa to nitesa malaeka ka ira ewa ngana etu.

¹⁸Pura-pura tau to nangepe tesa ntopoewu etu nasumara mpu'u.

¹⁹Tapi i Maria nomboli riara nta'ina pura-pura nuapa to niepena ewa anana etu pade tunggai nitondoakana.

²⁰Naopu etu nanjilimo topoewu-topoewu etu mpaka ri bimba ira ante nombatoiya pade nombabila Alatala, sabana pura-pura to niepe ira pade to nikita ira etu nakono mpu'u nantuki nuapa to niuli malaeka ka ira.

²¹Sangga naganapa umuru ngana etu walumbengi, nikawiamo ada mposuna, pade I'a nipoposanga Yesus nantuki tesa malaeka ka i Maria tempona I'a da'apa nikatiana nu indona.

²²Naratamo ntoana Yusuf pade i Maria malau mpaka ri Sapo Mpepue ri ngata Yerusalem manggawia ada mompegasa koro to niwai Musa ka to Yahudi. Ngana etu nikeni wo'u mpaka ri ngata Yerusalem ala rakeni raposambaya ri ngayo Pue Alatala.

²³Etu nantuki atura to naria riara Atura i Pue to nipapola i Musa iwe'i: “Pura-pura ngana langgai ulumbuana kana rakeni raposambaya ri ngayo i Pue.” [1]

²⁴Yusuf ante i Maria wo'u nopatuju manggeni pesomba ira, etumo romba'a tonji togou atau romba'a ana ntonji banggebodo, ewa to nipakatantu riara Atura-atura i Pue.

²⁵Tempona etu ri ngata Yerusalem naria samba'a tau nosanga ka i Simeon. I'a samba'a tau nanoa rara to naeka ri ja'i Alatala bo nompopea karata Magau to Mompakasalama to nijanji Alatala. Nosa Nagasa nu Alatala naria ri ja'ina,

²⁶pade Nosa Nagasa etu naopumo nanguli ka i'a, “Da'apa iko mamate ane da'apa mukita Magau to Mompakasalama to nijanji Alatala etu.”

²⁷Simeon nikeni Nosa Nagasa nu Alatala nesua riara Sapo Mpepue. Tempona etu Yusuf ante i Maria nanggeni mpesua ana ira Yesus ala manggawia ada to nipakatantu riara Atura-atura agama.

²⁸Sangga nanggita ngana etu nalaumo i Simeon nanjalunggu I'a pade nombatoiya Alatala iwe'i:

²⁹“Iwe'ipa, Pue, nadupamo pojanjimu. Pakambamo batuamu e'i mamate ante mabelo,

³⁰sabana mataku mbotomo nanggita Magau to Mompakasalama to nijanjimu

³¹to niwaimu ka pura-pura manusia ri dunia.

³²I'a ewa reme to nombawanta jala ka pura-pura tau da'a to Yahudi ala ira marata ri ja'imu. Pade I'amo reme to nompakaria pebila ka todeamu to Israel.”

³³Nangepe tesa i Simeon ewa ana ira etu, nogumaamo indo uma nu ngana etu.

³⁴Pade Simeon nombagane ira bo nanguli ka i Maria indo ngana etu, “Ngana e'i nipelisi Alatala mombalalamaka nadea to Israel tapi mombasoreaka nadea to Israel ntanina. I'a majadi saongu tandai nggari ja'i Alatala to raewa ntau dea,

³⁵ala ante iwetu meumba puramo isi rara nta'i ira. Pade kasusa bo kapari ewa guma kana mantosu rara nta'imu.”

³⁶Naria wo'u samba'a nabi nu Alatala, samba'a besi to natu'a mpu'umo. Sangana i Hana, ana i Fanuel samba'a tau muli Asyer. Sangga naganapa pitumpae norongo,

³⁷nabalumo i Hana. Naopu i'a nabalu da'a ria sanggani i'a nompalasi Sapo Mpepue. Eo wengi i'a ri setu nepue ka Alatala ante nosambaya bo napuasa. Tempona Yesus nikeni ri Sapo Mpepue i Hana noumuru walumpulu bo patampae.

³⁸Ewa nisuka tempona etu wo'u i'a narata, pade nikitana Yesus etu. Tempona i'a nanggita Yesus i'a nombatoiya Alatala. Pade nitesana ewa ngana etu ka pura-pura tau to nompopea tempona Alatala mombakabasaka to Yahudi nggari bali ira.

³⁹Sangga naopu pura nuapa to niparenta Alatala riara Aturana nipowia Yusuf ante Maria, nanjilimo ira mpaka ri ngata nipeto'o ira, etumo ngata Nazaret ri Bagia Galilea.

⁴⁰Pade Yesus nantambai kasaena nantambai kabete korona pade nantambai karosona. I'a samba'a ngana to nanotona pade I'a nigane Alatala.

⁴¹Mpae-mpae indo uma Yesus nalau mpaka ri ngata Yerusalem nantuki posusa eo bete nto Yahudi to niuli Posusa Paska.

⁴²Sangga naganapa umuru Yesus sampulu rompae nalaumo ira saongu njapo mpaka ri ngata Yerusalem mantuki eo bete etu ewa kabiasa ira.

⁴³Sangga naopupa posusa etu, natinggulimo totu'a Yesus. Tapi ante da'a ntoto ninjani indo umana Yesus netiboli ri ngata Yerusalem.

⁴⁴Nipekiri indo umana I'a nolumako mpasanggani-nggani ante tau dea. Polumako ira etu saeo ntuamo pade nielo ira Yesus ri tatongo sampesuwu bo wega ira etu. Tapi da'a ria nirata ira Yesus.

⁴⁵Sabana etu natingguli bali ira mpaka ri ngata Yerusalem nopaelo I'a.

⁴⁶Nagana katolumbengina pade I'a nirata ira riara Sapo Mpepue. I'a nekatoko nangepe tesa guru-guru agama pade I'a wo'u nekutana-tana ri ja'i ira.

⁴⁷Nogumaa puramo tau to nangepe I'a sabana nata'u mpu'u I'a nombasono-sono guru-guru agama.

⁴⁸Nanggita I'a ri setu nasumara wo'u indo umana. Pade notesamo indona ka I'a, “Yesus, nokuya Iko nompowia kami iwe'i? Nasusa mpu'u aku ante umamu nopaelo Iko!”

⁴⁹Nesonomo I'a, “Nokuya komi nangelo Aku? Da'a ninjani komi Aku kana maria ri sapo nu Umaku?”

⁵⁰Tapi da'a ninjani indo umana nuapa batuana tesa to niulina ka ira etu.

⁵¹Naopu etu natinggulimo Yesus mpasanggani-nggani ante indo umana mpaka ri ngata Nazaret, pade ri setu I'a natundu ri ja'i ira. Pura-pura nuapa to najadi etu niboli nu indona riara nta'ina pade nitondoakana.

⁵²Pade Yesus nantambai eona nantambai kabetena bo nantambai kata'una, pade nantambai nipotowe Alatala ante manusia.