Read Da'a Kaili LUKAS 20 Bible Online

LUKAS 20 - Da'a Kaili bible

LUKAS 20

¹Naria sanggani Yesus nopaguru bo nompatolele Kareba Belo ka tau-tau riara Sapo Mpepue. Tempo etu naratamo balengga-balengga topanggeni agama, guru-guru agama ante totu'a-totu'a nto Yahudi,

²pade nangulimo ira ka I'a, “Uli ka kami ante kuasa nggari umba Komi nompopalai topotomu nggari Sapo Mpepue? Isema nombawai kuasa etu ka Komi?”

³Nesonomo Yesus, “Da'apa Aku mombasono pompekutanamu naria wo'u sangaya kupekutana ka komi. Uli ka Aku

⁴isema nombawai kuasa ka Yohanes Topediu mombadiu tau? Alatala atau manusia?”

⁵Pade nompamulamo ira nosipekutana samba'a bo samba'a, “Iwenu kita mombasono I'a? Ane kita manguli kuasa Yohanes nggari ja'i Alatala I'a kana manguli ka kita, ‘Ane iwetu nokuya komi da'a nomparasaya Yohanes?’

⁶Tapi ane kita manguli kuasana nggari ja'i manusia, natantumo pura-pura tau ri se'i kana mombarempe kita ante watu sampe mamate sabana ira pura-pura nomparasaya Yohanes mpu'u-mpu'u samba'a nabi.”

⁷Jadi nesonomo ira ka Yesus, “Da'a ninjani kami nggari umba kuasana.”

⁸Pade nangulimo Yesus ka ira, “Ane iwetu da'a wo'u kutesa ka komi ante kuasa nggari umba Aku nowia mpengele-ngele etu.”

⁹Naopu etu Yesus nombatesa ka tau dea porapa iwe'i: “Naria samba'a tau to nombatuja anggur ri tinaluna. Naopu etu nipajana tinalu etu ka bara sakuya mba'a topokarajaa pade nalaimo i'a mpaka ri ngata ntanina neto'o ri setu nasae.

¹⁰Sangga naratapa tempona mompui wua anggur nipakaunamo samba'a batuana malau mpaka ri ja'i ntopokarajaa tinalu etu ala mantarima bagiana nggari asele ntinalu etu. Tapi topokarajaa tinalu etu nombaboba batua etu pade nompakau i'a nanjili ante pale ntoya.

¹¹Naopu etu pue ntinalu etu nompakau wo'umo samba'a batua ntanina, tapi batua etu wo'u niboba pade nipakaeya ntopokarajaa etu, pade nipakau nanjili ante pale ntoya wo'u.

¹²Sangganipa pue ntinalu etu nompakau batua katolumba'ana. Tapi batua etu wo'u niboba sampe nalei pade nitajiaka ira mpaka ri sawaliku tinalu etu.

¹³Kaopuna nangulimo pue ntinalu etu, ‘Aginamo aku mompakau anaku mboto to nipotoweku malau mpaka ri ja'i ira. Natantumo ira kana mekou ri ja'ina.’

¹⁴Tapi tempona topokarajaa tinalu etu nanggita ana pue ntinalu etu, nangulimo ira samba'a ka roa ntanina, ‘E'imo i'a, ana pue ntinalu. Kamaimo kita mompatesi i'a ala tinalu e'i raalata majadi bagiata.’

¹⁵Pade i'a nikeni ira mpaka ri sawaliku tinalu etu pade nipatesi ira.” Pade nangulimo Yesus ka tau to nangepe porapa etu, “Tempo pue ntinalu etu matingguli mpaka ri tinaluna etu, nuapa rapowiana?

¹⁶Natantumo i'a kana mompatesi topokarajaa etu pura-pura, pade mombapaja tinalu etu ka tau-tau ntanina.” Nangepe etu nangulimo tau dea ka Yesus, “A, da'a mamala majadi iwetu!”

¹⁷Tapi Yesus nanggita ira ante notesa, “Kana majadi iwetu banepia sabana etumo batuana tesa to nitulisi riara Buku Nagasa iwe'i: ‘Watu to nitajiaka ntopowia sapo, watu etumo to najadi palo mpondasi to neliu nggaroso.’ ” [21]

¹⁸Pade nanguli wo'umo Yesus, “Isema-sema to manawu ri watu etu kana marege, pade isema-sema to raparumpi watu etu kana marege majadi sowu.”

¹⁹Ninjani guru-guru agama Yahudi bo balengga-balengga topanggeni agama porapa etu nipawela Yesus ka ira. Sabana etu ira madota manjoko I'a tempona etu wo'u, tapi ira naeka ka tau dea.

²⁰Jadi ira nangelo loga to nabelona ala mamala manjoko Yesus. Ira nombasogo bara sakuya mba'a tau tumoni-moni ira tau to nanoa rarana. Tapi tau-tau etu nipakau ira mangelo kasala tesa Yesus ala I'a mamala rakeni rapangadu ri ngayo Gubernur.

²¹Jadi nalaumo ira ri ja'i Yesus pade nanguli, “Guru, ninjani kami pura-pura nuapa to nitesa bo to nipatuduki Komi etu nakono. Ninjani kami wo'u Guru da'a nompoposisala tau, aga nompatuduki dota Alatala to nakonona ka pura-pura tau.

²²Sabana etu uli ka kami nantuki Atura-atura agama masipato mombabayari balasitee ka Magau Kaisar bara da'a?”

²³Tapi ninjani Yesus bagiu ira etu. Jadi niulina,

²⁴“Popokita ka Aku sampeka doi salaka. Gambara ante sanga isema to naria ri doi etu?” Nesonomo ira, “Gambara bo sanga Magau Kaisar.”

²⁵Pade nangulimo Yesus ka ira, “Ane iwetu, waimo ka Magau Kaisar to masipato rawai ka Magau Kaisar, pade waimo ka Alatala to masipato rawai ka Alatala.”

²⁶Kaopuna da'a ria nirata ira nau aga sakedi kasala nggari tesa Yesus ri ngayo ntau dea. Ira aga nekalino ante nogumaa nangepe pesono Yesus etu.

²⁷Naria bara sakuya mba'a to Saduki narata ri ja'i Yesus. Ane to Saduki etu, ira to Yahudi to nomparasaya tau namate da'a mana matuwu bali nggari kamatena banepia.

²⁸Nangulimo ira ka Yesus, “Guru, nabi i Musa nantulisi atura e'i ka kita: ‘Ane rapana maria samba'a langgai norongo pade tau etu namate da'apa ria anana, sampesuwuna mboto kana momporongo baluna etu ala muli ira romba'a etu majadi muli sampesuwuna to namatena etu.’ [22]

²⁹Naria ira nosampesuwu pitumba'a langgai bayangi. Ulumbuana norongomo tapi da'apa ira njamboko noana namatemo i'a.

³⁰Jadi tua'ina karomba'ana nomporongo baluna etu, tapi da'apa ira noana i'a wo'u namate.

³¹Iwetu wo'u to najadi ante tua'ina katolumba'ana sampe ri kapapitumba'ana.

³²Pade kaopuna besi etu wo'u namate.

³³Jadi tempo tau to namate matuwu bali nggari kamatena banepia besi etu rongo isema, sabana i'a niporongo ira pitumba'a?”

³⁴Pade nesonomo Yesus ka ira, “Ane tau-tau ri dunia e'i, ira norongo bo niporongo.

³⁵Tapi ane tau-tau to masipato rapakatuwu Alatala bali pade matuwu ri suruga tempo etu, ira da'a mana morongo bara raporongo.

³⁶Ira mana morongo sabana ira mana mamate-mate. Ira kana masimbayu ante malaeka i Pue. Ira majadi ana-ana Alatala sabana ira naopu nipakatuwu bali nggari kamatena.

³⁷Pade nabi i Musa mboto nompakanoto ka kita tomate kana matuwu bali. Riara mpotulisina ewa santungu gumbu to najelana da'a nikoni nu apu nikasangaina Pue Alatala, ‘Alatala Abraham, Alatala Ishak bo Alatala Yakub.’ [23]

³⁸Ninjanita Pue Alatala da'a Alatala ntau to namatena, tapi I'a Alatala ntau to natuwuna. Jadi ane Pue Alatala nikasangai i Musa Alatala Abraham, Ishak ante Yakub, etu batuana ira da'a tau to namate tapi tau to natuwuna, sabana riara mpanggita Alatala, pura-pura tau danatuwu.”

³⁹Naopu Yesus notesa iwetu nangulimo bara sakuya mba'a guru agama ri setu ka I'a, “Nabelo mpu'u pesono Guru.”

⁴⁰Ira nanguli iwetu sabana nikita ira to Saduki etu mana nabia mekutana ri ja'i Yesus.

⁴¹Pade nangulimo Yesus ka ira, “Iwenu sampe tau nanguli Magau to Mompakasalama to nijanji Alatala aga muli Magau Daud?

⁴²Riara buku Mazmur i Daud mboto nanguli iwe'i: ‘Pue Alatala nanguli ka Pueku, kamai pekatokomo ri sabingga ngganaku,

⁴³sampe Aku mompowia pura-pura balimu mekou ri ja'imu.’ [24]

⁴⁴Jadi ane Magau to Mompakasalama niuli i Daud Puena, iwenu sampe I'a nireke aga muli i Daud?”

⁴⁵Tempo tau dea danangepe tesa Yesus, nangulimo I'a ka topantuki-topantuki I'a,

⁴⁶“Pakabelo-belo ala ne'e komi moinggu ewa guru-guru agama. Ira aga nompokono nanjayo-njayo nobaju nandoe ala rabila ntau, pade ira aga madota rabila ntau tempo ira ri potomu. Tempo ira nesua riara Sapo Mpodade ira aga madota mekatoko ri peto'o-peto'o to nibilana. Wa'a wo'u tempo ira ri posusa. Ira aga madota rabila ntodea ri setu.

⁴⁷Ira nombabagiu tobalu-tobalu besi ala mombarata sapo besi-besi etu. Pade ira nantabuniaka pokainggu ira to naja'ana ante nosambaya nasae-sae. Etu sampe meliu nggatomo pesuku to rapawela ka ira banepia!”