Read Da'a Kaili LUKAS 21 Bible Online

LUKAS 21 - Da'a Kaili bible

LUKAS 21

¹Ri Sapo Mpepue Yesus nanggita tau to nakalumana nombasuaraka doi ira nadea riara peti mpesomba ri setu.

²Nikitana wo'u samba'a besi tobalu to nakasiasi mpu'u nombasuaraka rompeka doi tambaga to nakura mpu'u olina.

³Sangga nanggita etu nangulimo I'a, “Aku mpu'u-mpu'u notesa ka komi, pewai tobalu to nakasiasi etu neliu nggadea nggari pewai ntau pura-pura,

⁴sabana ira nombawai nggari labi nu doi ira. Tapi naupa tobalu e'i nakasiasi mpu'u i'a nombawai pura-pura doi to naria ri ja'ina.”

⁵Naria bara sakuya mba'a topantuki Yesus notesa ka I'a, “Sapo Mpepue e'i nipakaramba mpu'u ante watu-watu to nagaya-gaya pade ante mbara-mbara to narambana to niwai ntau ka Alatala.” Nangepe etu nangulimo Yesus,

⁶“Kana marata tempona banepia pura-pura to nikita komi e'i kana ragero sanggani sampe da'a mana maria watu e'i rapakamba mosisunju, nau kamba saongu. Pura-pura kana ragero.”

⁷Pade nekutanamo ira ka Yesus, “Guru, nepia etu pura-pura majadi? Nuapa tandaina to mompakatantu namosumo tempona pura-pura to niuli Komi etu majadi?”

⁸Nesonomo Yesus, “Pakabelo-belo ala ne'e komi rabagiu, sabana madea tau kana marata mompobalu sangaku. Maria samba'a manguli, ‘Akumo Magau to Mompakasalama!’ Pade maria wo'u to manguli, ‘Naratamo tempona Yesus marata bali ri dunia!’ Tapi ne'e komi mantuki ira.

⁹Pade ne'e komi maeka ane mangepe kareba posimpatesi ante posiewa. Etu pura-pura kana majadi ntani ruru. Tapi etu da'apa tandaina kaopu nu dunia.”

¹⁰Pade niulina wo'umo, “Tempo etu tau-tau nggari sangata kana mosibali ka tau-tau to sangatana, pade magau simbau magau kana mosiewa.

¹¹Kana maria lingu to naro'ona. Ri umba-umba ri dunia kana maria kamateoro ante ju'a mpendai njilele. Pade ri langi maria tandai-tandaina to mompakaeka tau.

¹²Tapi da'apa pura-pura etu majadi komi kana rasoko ntau ntani ruru pade rapandasa ira. Komi kana ratangara ri polibu nto Yahudi pade rasuaraka riara tarunggu. Pade komi rakeni wo'u ri ngayo magau-magau ante gubernur-gubernur sabana komi nomparasaya Aku.

¹³Etumo loga to nabelo ka komi mompakanoto ka ira isema Aku.

¹⁴Pakasaongumo raramu ne'epa ruru mompekiri nuapa rauli komi mombasono ira,

¹⁵sabana tempona etu wo'umo Aku mboto kana mombawai ka komi pompekiri to nabelona ala komi mamala motesa mombasono ira. Etu sampe balimu da'a mamala mombabali tesamu atau mombasapu nuapa to rauli komi.

¹⁶Tempona etu indo umamu, sampesuwu sararamu ante roamu kana mombasoko ante mombakeni komi ri ja'i ntopotangara. Pade maria bara sakuya mba'a nggari komi to rapatesi ira.

¹⁷Komi kana raporau rara pura-pura tau sabana komi nomparasaya Aku.

¹⁸Tapi naupa iwetu komi kana rapakasalama Alatala. Sambalaa wulu wo'o nggari balenggamu da'a malipo.

¹⁹Pakaroso pomparasayamu ri ja'iku sabana ante iwetu komi mamala mombarata katuwua mabelo sampe ri kasae-saena.”

²⁰“Ane rakita komi ngata Yerusalem e'i rapatiku tantara balina natantumo ranjani komi mana masaeka ngata e'i rapakagero.

²¹Tempona etu tau-tau to naria ri Bagia Yudea e'i kana mangowa malai mpaka ri buluna. Pade tau-tau to naria riara ngata Yerusalem kana malai nggari ngata e'i. Pade tau to naria ri sawalikuna ne'e mesua riarana,

²²sabana eo etumo tempo Alatala mombasuku to Yahudi. Etu mompakadupa pura-pura to nitulisi nabi-nabi Alatala nggaolu.

²³Ri eo etu mandasa mpu'umo besi-besi to matiana bo ira to danompatomi. Pura-pura tau ri ngata e'i kana mandasa mpu'u sabana etumo tempo Alatala marata mombasuku to Yahudi.

²⁴Kana maria to Yahudi rapatesi ante guma, pade maria ntanina to rasoko ratawani balina rakeni mpaka ri umba-umba ri dunia. Pade tempona etu ngata Yerusalem e'i kana mamala ka tau-tau da'a to Yahudi pade raparenta ira sampe nagana tempona to nipakatantu Alatala ka ira.”

²⁵“Pade kana maria tandai-tandai rakita komi ri mata eo, ri wula ante ri betu'e-betu'e. Ri dunia e'i pura-pura tau kana mawiora rarana ante maingu mangepe pogu balumba bete moruu ewa guntu.

²⁶Tempona etu tau-tau kana malipo rarana nggari eka ira mompekiri nuapa to majadi ri dunia, sabana kuasa-kuasa to naria ri langi kana ragagoya pura.

²⁷Naopu pura-pura etu majadi ira kana manggita Aku, Ana nu Manusia mana'u riara kulimu ante kuasa bo karemeku to nipogumaa.

²⁸Tempo pura-pura kajadia etu mompamula majadi, pakasadia koromu pade mantingoa ri langi, sabana sampalaipa maratamo Aku, Magau to Mompakasalama komi.”

²⁹Pade Yesus nombatesa saongu porapa ka topantuki-topantuki I'a iwe'i: “Kitamo kayu ara ante pura-pura kayu ntanina.

³⁰Ane rakita komi kayu noroya, natantumo ninjani komi namosumo eo mapane.

³¹Iwetu wo'u ane komi manggita kajadia-kajadia to nitesaku pani'a, kana ranjani komi mana masaeka Alatala marata moparenta ri dunia.

³²Aku mpu'u-mpu'u notesa ka komi, kajadia-kajadia etu kana majadi da'apa pura-pura tau to natuwu we'i-we'i mamate.

³³Langi bo dunia kana malipo tapi tesaku kana maroo sampe ri kasae-saena.”

³⁴Pade nangulimo Yesus, “Komi kana mainga. Ne'e komi makako gaga aga mosusa-susa bo manginu mpakalangu-langu pade aga mompekiri anu niparaluu komi matuwu eo-eo. Ane komi da'a mainga, ante da'a ranjani-njani komi Aku, Ana nu Manusia e'i kana marata ri ja'i komi nasimbayu ewa tonji da'a ninjani-njanina sampegoli i'a niso'o tinggolu.

³⁵Iwetu wo'u pura-pura manusia ri dunia e'i. Ante da'a ranjani-njani ira sampegoli Aku, Ana nu Manusia kana marata ri ja'i ira pura-pura.

³⁶Sabana etu komi kana mainga-inga. Ne'e menonto-nonto merapi doa ala komi mompakule manta'amaka pura-pura kajadia etu ante masalama, pade ala komi mamala mantingayo Aku, Ana nu Manusia.”

³⁷Ri tempo eona Yesus nopaguru ri Sapo Mpepue, pade tempo nggawengina I'a nalau naturu ri Bulu Zaitun.

³⁸Pade mpadondo-mpadondo pura-pura tau narata ri Sapo Mpepue ala mangepe tesana.