Read Da'a Kaili LUKAS 22 Bible Online

LUKAS 22 - Da'a Kaili bible

LUKAS 22

¹Tempona etu namosu ntoana posusa to niuli nto Yahudi Posusa Roti Da'a Nidika Ragi. Posusa etu to niuli ira wo'u Posusa Paska. [25]

²Balengga-balengga topanggeni agama ante guru-guru agama danangelo jala mompatesi Yesus nggalino, sabana ira naeka ri ja'i ntau dea.

³Ri tempona etu nesuamo Magau nu Seta riara nta'i Yudas Iskariot, samba'a nggari sampulu romba'a anaguru Yesus.

⁴Naopu nipesua Magau nu Seta nalaumo Yudas mpaka ri ja'i balengga-balengga topanggeni agama ante balengga-balengga topojaga Sapo Mpepue ala motesa ante ira iwenu i'a mamala mompobalu Yesus ka ira.

⁵Nangepe etu nadamba mpu'umo rara ira, pade ira nojanji mombawai doi ka i'a.

⁶Yudas wo'u nasituju ante nia ira, pade nalaimo i'a nggari setu mangelo loga to nabelona mombawai Yesus ka ira tempo da'a ria tau dea.

⁷Naratamo eo mposusa Roti Da'a Nidika Ragi, etumo tempona manjambale ana bimba rakoni ri posusa etu.

⁸Pade Yesus nompakau i Petrus bo Yohanes iwe'i: “Kalau pakasadia ka kitamo panggoni Posusa Paska ala kita manggoni mpasanggani-nggani.”

⁹Nekutanamo ira romba'a, “Ri umba rapodota Komi rapompakasadia kami panggoni etu?”

¹⁰Nesonomo Yesus, “Tempona komi mesua rara ngata samba'a langgai manggeni gumbu nu ue kana mosintomu ka komi. Tukimo i'a mpaka ri sapo to rakalauna.

¹¹Pade ulimo ka pue njapo ri setu, ‘Guru nompakau kami mompekutana komi, ri umbana tombi rapanggonina panggoni Posusa Paska mpasanggani-nggani ante anaguruna?’

¹²Pade pue njapo etu kana mompopokita ka komi saongu tombi bete ri kalangana nagana ante parewana. Ri setumo rapompakasadia panggoni Posusa Paska ka kita.”

¹³Jadi nalaumo i Petrus bo Yohanes etu nesua rara ngata. Pade to nirata ira ri setu nasimbayu pura ewa nuapa to niuli Yesus ka ira. Pade nipakasadia iramo panggoni Posusa Paska etu.

¹⁴Sangga naratamo tempona manggoni panggoni Posusa Paska etu, nekatokomo Yesus nanggoni mpasanggani-nggani ante anaguruna.

¹⁵Nangulimo Yesus ka ira, “Nabete mpu'u raraku manggoni panggoni Paska e'i mpasanggani-nggani ante komi da'apa Aku rapandasa.

¹⁶Parasayamo tesaku e'i! Aku mana manggoni panggoni Paska e'i sampe marata tempona batuana Posusa Paska to nakonona rapakadupa. Etu kana majadi tempo Pue Alatala marata momparenta manusia ri dunia e'i.”

¹⁷Naopu etu niala Yesus saongu sanggiri panginu pade niulina tarima kasi ka Pue Alatala. Naopu etu niulina ka anaguru-anaguruna, “Alamo panginu e'i, pade inu komi mpasanggani-nggani.

¹⁸Epemo! Nompamula we'i-we'i Aku mana manginu anggur sampe marata tempona banepia Alatala moparenta ri dunia e'i.”

¹⁹Naopu etu niala Yesus wo'umo roti pade niulina tarima kasi ka Pue Alatala. Pade roti etu nibingga-binggana pade nibagina ka ira ante nanguli, “E'imo koro bataku to rawai mantolo silaka komi. Kawiamo ada e'i ala mombatora Aku.”

²⁰Sangga naopu ira nanggoni, iwetu wo'u nikawiana ante panginu. Nialana saongu sanggiri pade niulina, “Panginu e'i tandai pojanji Alatala to nabouna ante manusia. Pojanji etu rapakaasa ante leiku to rapatiti ka komi.

²¹Tapi kitamo! Tau to mompobalu Aku ka baliku ngina naria mpasanggani ante Aku ri se'i.

²²Aku, Ana nu Manusia kana mamate nantuki to nipakatantu Alatala ka Aku. Tapi mandasa mpu'umo tau to mompobalu Aku etu!”

²³Pade nompamulamo anaguru-anaguru Yesus nosipekutana samba'a bo samba'a, “Isema nggari tatongota e'i to mompobalu Yesus?”

²⁴Pade neumbamo posinggarau ri tatongo anaguru-anaguru Yesus bara isema nggari ira nireke to neliu nggalanga katuwuna.

²⁵Nangepe etu nangulimo Yesus ka ira, “Ri dunia e'i magau-magau nabiasa aga nompakau todea ira ala mompopokita kalanga nu katuwuna. Naupa iwetu ira madota rauli tau to nabelo rarana.

²⁶Tapi da'a masipato komi moinggu iwetu. Kakonona komi kana moinggu iwe'i: to nalanga katuwuna nggari komi kana majadi nasimbayu ante to naedena, pade topanggeniaka komi kana majadi nasimbayu ante batua.

²⁷Isema to neliu nggalanga katuwuna? Tau to nekatoko nanggoni atau tau nombatande i'a? Natantumo tau to nekatoko nanggoni etu to neliu nggalanga katuwuna. Tapi Aku e'i, Pue komi, najadi nasimbayu ante tau nombatande komi.

²⁸Komimo to nosanggani-nggani ante Aku tempo Aku nipandasa.

²⁹Sabana etu nasimbayu ewa Umaku Pue Alatala mombawai ka Aku kuasa moparenta banepia, iwetu wo'u Aku mombawai ka komi kuasa moparenta banepia.

³⁰Komi kana mosusa madamba-damba ante Aku tempo Aku majadi Magau. Pade komi kana mekatoko ri sampulu rongu pekatoko magau momparenta to Yahudi, etumo muli nggari sampulu romba'a ana Israel.”

³¹Pade nangulimo Yesus ka i Simon Petrus, “Simon, epemo tesaku! Magau nu Seta niwai Alatala ka logamo mompesoba komi pura-pura. Pesobana etu nasimbayu ewa tau nombawaro pae.

³²Tapi Aku naopumo nosambaya ka iko, Simon, ala iko da'a mokanggaura momparasaya Aku. Pade tempo iko matingguli bali momparasaya Aku, iko kana mompakaroso pomparasaya roamu wo'u.”

³³Pade nesonomo i Petrus, “Pue, aku nasadia mesua riara tarunggu mpasanggani-nggani ante Komi, pade ane Komi rapatesi aku wo'u nasadia mamate mpasanggani-nggani ante Komi!”

³⁴Tapi nesonomo Yesus, “Parasayamo Petrus, da'apa manu mora'o ngina bobaya tolungganimo iko mombasapu Aku.”

³⁵Naopu etu nangulimo Yesus ka ira pura-pura, “Tempo komi nipakauku bopia nalau nompatolele Kareba Belo niuliku ne'e rakeni doi bara batutu bara sapatu. Tempona komi nalau naria to nakura ri ja'i komi?” Nesonomo ira, “Da'a ria nakura nuapa-nuapa.”

³⁶Pade nangulimo Yesus, “Nakonomo etu. Tapi we'i-we'i isema naria doi bara batutu kana rakenina. Pade isema da'a naria gumana kana rapobaluna baju rapangoli samata guma.

³⁷Etu paraluu we'i-we'i sabana kana rapakadupa nuapa to nitulisi riara Buku Nagasa ewa Aku iwe'i: ‘I'a kana rauli samba'a tau to naja'a.’ [26] Nuapa to nitulisi etu kana madupa we'i-we'i.”

³⁸Pade nangulimo ira, “Pue, kitamo. E'imo romata guma.” Nesonomo Yesus, “Naganamo etu.”

³⁹Pade nalaumo Yesus ante anaguru-anaguruna nantende ewa biasa mpaka ri Bulu Zaitun.

⁴⁰Sangga naratapa ri setu, nangulimo Yesus ka ira, “Posambayamo ala ne'e komi mawela pesoba.”

⁴¹Naopu etu nalaumo I'a nakawao sakedi nggari ja'i ira, pade notimbakotumo I'a nosambaya ka Pue Alatala iwe'i:

⁴²“Umaku, ane mupodota, pakakawaomo nggari ja'iku kasusa bo kapari e'i! Tapi ne'e dotaku to majadi, aga dotamu mboto.”

⁴³Naopu etu naratamo samba'a malaeka nggari suruga nompakaroo rarana.

⁴⁴Pade nosambaya wo'umo Yesus ante mpu'u-mpu'u, sampe inina najadi ewa lei natiti ri tana sabana nasusa mpu'u rarana.

⁴⁵Naopu nosambaya nalaumo Yesus nompakamosu anaguru-anaguruna. Niratana ira pura-pura napisi sabana naluru mata ante nasusa rara.

⁴⁶Pade niulina ka ira, “Nokuya komi napisi? Pembangumo pakanoto raramu pade posambayamo ala ne'e komi mawela pesoba!”

⁴⁷Tempona Yesus danotesa ka ira, naratamo bara sakuya mpulu mba'a tau to nikeni Yudas samba'a nggari sampulu romba'a anaguru Yesus etu. Yudas nompakamunji Yesus ala mombaeki I'a.

⁴⁸Tapi nangulimo Yesus ka i'a, “Yudas, iko nombaeki Aku ewa roamu, tapi kakonona iko mombawai Aku, Ana nu Manusia ka baliku.”

⁴⁹Tempona anaguru-anaguru Yesus to naria ri setu nanggita nuapa to majadi, nangulimo ira, “Pue, we'i-we'i kami mombatimbe ira ante guma?”

⁵⁰Pade samba'a nggari ira nantimbe batua nu Balengga Topanggeni Agama sampe napudu talinga ngganana.

⁵¹Tapi Yesus nombatagi ira, “Ne'e mana metimbe!” Pade nialana talinga to nanawu etu nipatakana bali.

⁵²Pade nangulimo Yesus ka balengga-balengga topanggeni agama, balengga-balengga topojaga Sapo Mpepue bo totu'a-totu'a ngata to narata ri setu manjoko I'a, “Iwenumo? Niuli komi Aku e'i parampo sampe komi kana marata ante guma bo pato manjoko Aku?

⁵³Eo-eo Aku naria nosanggani ante komi ri Sapo Mpepue tapi da'a nabia komi nanjoko Aku. Tapi damo wengina e'i pade narata komi manjoko Aku. Tempo rumau e'i wo'umo Magau nu Seta nakuasa.”

⁵⁴Naopu etu Yesus nikeni ira mpaka ri sapo Balengga Topanggeni Agama. Petrus nantuki ira nggari purina nakawao sakedi sampe narata ri sapo etu.

⁵⁵Ri tatongo lalowo ri setu naria apu nipakawaa ntau raponeru. Jadi nalaumo i Petrus nekatoko ri tatongo ntau noneru ri setu.

⁵⁶Tempo i'a nekatoko namosu apu etu naria samba'a batua besi nombalele mata i'a pade nanguli, “Tau e'i wo'u naria nosanggani ante Yesus!”

⁵⁷Tapi i Petrus nesapu, niulina, “Da'a nakono! Da'a ninjaniku I'a!”

⁵⁸Da'apa nasae naria wo'u samba'a tau ntanina ri setu nanggita i Petrus pade nanguli, “Iko wo'u samba'a nggari topantuki Yesus!” Tapi nangulimo i Petrus, “Da'a nakono!”

⁵⁹Kira-kira saongu jaa kaliuna naria wo'umo samba'a tau ntanina nanguli, “Natantumo tau e'i topantuki Yesus, sabana i'a wo'u samba'a tau nggari Bagia Galilea!”

⁶⁰Tapi nesonomo i Petrus, “Da'a! Da'a ninjaniku nuapa patujumu!” Tempo etu wo'u, da'apa naopu i Petrus notesa, nora'omo manu.

⁶¹Pade neilimo Yesus nanggita i Petrus. Ri setumo natitora rara i Petrus ewa nuapa to niuli i Pue ka i'a pangane iwe'i: “Da'apa manu mora'o ngina bobaya, tolungganimo iko mombasapu Aku.”

⁶²Pade nesuwumo i Petrus nggari setu nalau nageo nakanjodu-njodu.

⁶³Tau-tau nombajagai Yesus nompongei-ngei ante nombaboba I'a.

⁶⁴Ira nombalamu matana pade nombaboba I'a ante nanguli, “E, nabi! Ulimo isema to nombaboba Iko!”

⁶⁵Pade ira tunggai nanguli sinja'i I'a.

⁶⁶Naeompadondo nasiromumo totu'a-totu'a nto Yahudi, balengga-balengga topanggeni agama ante guru-guru agama, pade Yesus nikeni ri ja'i Polibu Bete Agama nto Yahudi etu.

⁶⁷Nangulimo ira ka Yesus, “Ane Iko Magau to Mompakasalama, ulimo ka kami!” Nesonomo Yesus, “Aku da'a manguli nuapa-nuapa sabana natantumo komi da'a momparasaya tesaku,

⁶⁸pade ane Aku mekutana ri ja'i komi da'a madota komi mombasono pompekutanaku.

⁶⁹Tapi nompamula we'i-we'i Aku, Ana nu Manusia kana mekatoko ri peto'o to nibila ri panggana Alatala to nakuasa.”

⁷⁰Pade nekutanamo ira pura-pura, “Ane iwetu, Iko e'i Ana nu Alatala?” Nesonomo Yesus, “Iyo, ewa to niuli komi etu, nakono.”

⁷¹Pade nangulimo ira samba'a bo samba'a, “Ane iwetu da'a mana paraluu sabi ntanina. Niepeta mbotomo tesana!”