Read Da'a Kaili LUKAS 23 Bible Online

LUKAS 23 - Da'a Kaili bible

LUKAS 23

¹Pade nekanggoremo pura-pura Topolibu Bete Agama etu nalau nanggeni Yesus mpaka ri ja'i Gubernur Pilatus.

²Ri setu nompamulamo ira nompangadu I'a. Nitesa ira ka i Pilatus, “Kami nombarata tau e'i nanggeni todea nangewa pomarenta Roma. I'a nombatagi tau mombabayari balasitee ri ja'i Magau Kaisar, pade niulina wo'u I'a mboto Magau to Mompakasalama to nijanji Alatala.”

³Nangepe etu nekutanamo i Pilatus ka Yesus, “Komimo Magau nto Yahudi?” Nesonomo Yesus, “Ewa to niuli komi etu, Uma, nakono.”

⁴Naopu etu nangulimo i Pilatus ka balengga-balengga topanggeni agama ante tau dea etu, “Iwenumo, tau e'i niparesaku da'a ria salana!”

⁵Tapi ira nantambai nompangadu ante nanguli, “Ante pepatudukina I'a nanggeni todea ri jala to nasalana ri pura-pura ngata ri Bagia Yudea e'i. I'a nompamula nggari Bagia Galilea, sampe narata ri se'i.”

⁶Nangepe etu nekutanamo i Pilatus, “Tau e'i tau nggari Bagia Galilea?” Nesonomo tau, “Iyo, I'a etu tau nggari Galilea.”

⁷Tempona ninjanina Yesus tau nggari Bagia Galilea, etumo bagia to niparenta Magau Herodes, i Pilatus nompakau tau nanggeni Yesus ri ja'i Magau Herodes etu. Tempona etu Magau Herodes wo'u naria ri ngata Yerusalem.

⁸Tempona Magau Herodes nanggita Yesus nadamba mpu'u rarana, sabana niepenamo tesa ewa Yesus pade nasaemo i'a madota manggita I'a. Nisarumakana bara mamala i'a manggita Yesus mowia kabaraka.

⁹Sabana etu nipekutana-tanana ri ja'i Yesus, tapi Yesus da'a ria nesono.

¹⁰Naopu etu balengga-balengga topanggeni agama ante guru-guru agama to naria ri setu narau mpu'u rara ira nompangadu Yesus.

¹¹Naopu etu Magau Herodes ante tantara-tantarana nanguli sinja'i bo nompongei-ngei I'a. Pade Yesus nipopasua ka baju magau pade nipopanjilina mpaka ri ja'i Pilatus.

¹²Eona etu wo'u Magau Herodes ante i Pilatus nosimporoamo, naupa bopia ira aga nosipobali.

¹³Pilatus nompakau mompasiromu balengga-balengga topanggeni agama, totu'a-totu'a ngata ante todea etu,

¹⁴pade niulina ka ira pura-pura, “Komi nanggeni tau e'i ri ja'iku ante nanguli I'a nanggeni tau nangewa pomarenta. Tapi we'i-we'i I'a niparesakumo ri ngayo komi da'a ria nirataku salana to niuli komi ri ja'ina.

¹⁵Wa'a wo'u pombarata Magau Herodes sabana i'a wo'u nompopanjili Yesus e'i ri ja'ita ri se'i. Da'a ria powiana to naja'ana to masipato rapatesi ka I'a.

¹⁶Sabana etu aku aga mompakau tantaraku mombaboba I'a pade manggabasaka I'a.”

¹⁷Niuli i Pilatus iwetu sabana butu mpae tempona Posusa Paska i'a kana manggabasaka ka tau dea samba'a tau to nitarunggu.

¹⁸Tapi nongare-ngare puramo tau to naria ri setu, “Patesimo I'a! Kabasaka ka kamimo i Barabas!”

¹⁹Barabas etu samba'a tau to nitarunggu sabana i'a nangewa pomarenta ri ngata Yerusalem pade i'a wo'u topepatesi.

²⁰Tapi i Pilatus madota manggabasaka Yesus. Jadi sangganipa i'a notesa ka tau dea etu.

²¹Tapi nongare-ngare wo'umo ira, “Pakumo I'a ri kayu parika! Pakumo I'a ri kayu parika!”

²²Pade notesamo i Pilatus katolungganina ka ira, “Nokuya? Kaja'a nuapa ntoto to nipowiana? Da'a ria nirataku salana to nipowiana to masipato rasuku mate ka I'a. Aku aga mompakau tantaraku mombaboba I'a pade manggabasaka I'a.”

²³Tapi ira nantambai nongare-ngare ante suara to neliu nggamangga, “Yesus kana rapaku ri kayu parika!” Kaopuna padagimo ira, sabana ira nongare-ngare mpu'u.

²⁴Jadi i Pilatus nompakau tantarana manggeni Yesus ri sawaliku ngata ala rapatesi mantuki dota ntau dea etu. Pade nikabasakana ka ira tau to niperapi ira, etumo i Barabas, tau to nitarunggu sabana i'a nangewa pomarenta bo nepatesi.

²⁵

²⁶Naopu etu Yesus nikeni nggari setu. I'a nipasu'u nanjumbuaka kayu pomparika rapombapaku I'a. Ri tatongo jala ira nosintomu ka samba'a tau nosanga ka i Simon. I'a samba'a tau nggari ngata Kirene pade tempona etu i'a mesua mpaka riara ngata. I'a nisoko ira pade nipasu'u nanjumbuaka kayu pomparika Yesus pade nolumako nantuki purina.

²⁷Tempo Yesus nikeni ri sawaliku ngata etu nadea mpu'u tau nantuki I'a. Ri tatongo ira naria bara sakuya mba'a besi to notumangi pade nantete I'a.

²⁸Neilimo Yesus ri ja'i ira pade nanguli, “Besi-besi to Yerusalem, ne'e mana motumangi mantangi Aku. Tangimo koro komi mboto bo ana-ana komi,

²⁹sabana kana marata ntoana besi-besi motesa, ‘Nandasa mpu'umo kami! Aginamo kami nagampa, da'apa sanggani noana, bo da'apa sanggani nompatomi ngana!’

³⁰Tempona etumo tau kana motesa ka bulu-buluna, ‘Kalabumo mombarumpi kami,’ pade ira motesa ka bunggu-bunggu nggedi, ‘Iwumo kami!’

³¹Kana mandasa mpu'u komi, sabana ane ira mowia iwe'i ri ja'iku to nanoa rara, iwenu ante komi to nadenggo raramu? Natantumo komi kana meliu nggandasa rapowia ira banepia!”

³²Tempona etu naria wo'u romba'a tau naja'a to nikeni rapatesi mpasanggani-nggani ante Yesus.

³³Ira pura-pura nalau sampe narata ri saongu peto'o to nosanga ka Peto'o Wuku Balengga. [27] Ri setu tantara-tantara Roma nombapaku Yesus ri kayu parika etu. Tau-tau naja'a romba'a etu wo'u nipaku ri kayu parika ntanina, samba'a ri sabingga nggana Yesus samba'a ri sabingga njidina.

³⁴Naopu etu nosambayamo Yesus ka Pue Alatala, “Uma, ampungimo ira. Da'a ninjani ira nuapa to nipowia ira.” Ri setu wo'u tantara-tantara nombabagi-bagi pakea Yesus ante nompenoa nowia nomoro. Isema nawela nomoro i'a nombarata pakea etu.

³⁵Tau dea nekanggore ri setu nantara pura-pura nuapa to najadi etu. Pade topanggeniaka nto Yahudi to naria ri setu nombawiri mata ka Yesus. Niuli ira, “Kita we'i! Tau ntanina nipakasalamana. Ane I'a mpu'u-mpu'u Magau to Mompakasalama to nipelisi Alatala, agina I'a mompakasalama korona mboto we'i-we'i!”

³⁶Tantara-tantara etu wo'u nompongei I'a. Ira nompakamosu Yesus pade nombawai ka I'a ue anggur to napoi.

³⁷Pade niuli ira, “Ane Iko mpu'u-mpu'u Magau nto Yahudi pakasalamamo koromu!”

³⁸Ri ntoto balenggana ri kayu parika etu naria nitulisi, E'IMO MAGAU NTO YAHUDI.

³⁹Samba'a nggari tau naja'a to nipaku ri kayu parika nanjalai Yesus. Niulina, “Ane mpu'u-mpu'u Iko Magau to Mompakasalama to nijanji Alatala, pakasalamamo koromu ante kami wo'u!”

⁴⁰Tapi tau naja'a ntanina etu nangontiaka roana etu. Niulina, “Nokuya iko da'a naeka ri ja'i Alatala? Kita pura-pura nitangara kana mamate.

⁴¹Ane kita romba'a e'i nitangara masipato ante pokaingguta. Tapi tau e'i da'a ntoto nowia to nasalana!”

⁴²Pade niulina ka Yesus, “Yesus, toramo aku tempo Komi marata ante kuasa ewa magau.”

⁴³Nangulimo Yesus ka i'a, “Aku mojanji ka iko, eo e'i wo'u iko kana mosanggani-nggani ante Aku ri suruga.” [28]

⁴⁴Kira-kira tinti sampulu rongu narumaumo eo ri njumaongu tana etu sampe tinti toluongu ngguwiana.

⁴⁵Pade naseri ntongomo kae powombo ri Sapo Mpepue.

⁴⁶Naopu etu nongaremo Yesus ante suara namangga, “Umaku, kuwaimo nosaku riara mpalemu!” Naopu notesa iwetu nalaimo nosana.

⁴⁷Tempona balengga tantara ri setu nanggita nuapa to najadi i'a nombatoiya Alatala. Niulina, “Natantumo tau e'i tau to nanoana.”

⁴⁸Tau dea to narata nantara pura-pura kajadia etu nanggita Yesus namatemo. Jadi nanjilimo ira ante nanjapa-njapa bombara sabana nasusa rara.

⁴⁹Pura-pura roa Yesus ante besi-besi wo'u to nantuki I'a nggari Bagia Galilea etu, nenggore nggawao nanggita pura-pura to najadi etu.

⁵⁰Naria samba'a tau nggari ngata Arimatea ri Bagia Yudea to nosanga ka Yusuf. I'a samba'a tau to nabelo pokaingguna bo nanoa rarana to mantongoraka tempo Alatala mompamula moparenta ri dunia. Naupa i'a samba'a nggari Polibu Bete Agama nto Yahudi i'a da'a ria nasituju ante potangara bo powia ira mompatesi Yesus.

⁵¹

⁵²Yusuf etu nalau nerapi ka i Pilatus ala watabaku Yesus rawai ka i'a.

⁵³Naopu etu nita'urakana watabaku Yesus nggari kayu parika, pade nisompuna ante kae gandisi to nalusuna. Naopu etu nibolina watabaku Yesus etu riara dayo to nipa'a ri bulu watu. Dayo etu da'apa sanggani nipake.

⁵⁴Eo etu eo Jumaa, etumo eo mpopakasadia ka Eo Mpenonto. Mana masaeka marata Eo Mpenonto etu.

⁵⁵Besi-besi to narata nosanggani-nggani ante Yesus nggari Bagia Galilea nantuki Yusuf nalau nanggita dayo etu. Nikita ira wo'u iwenu watabaku Yesus niboli riara dayo etu.

⁵⁶Naopu etu natinggulimo ira mpaka ri ngata, pade nipakasadia iramo rampa-rampa ante minya wongi ka watabaku Yesus. Pade ri Eo Mpenonto, nenontomo ira nokarajaa nantuki Atura-atura agama nto Yahudi.