Read Da'a Kaili LUKAS 24 Bible Online

LUKAS 24 - Da'a Kaili bible

LUKAS 24

¹Ri eo Aka kampadondona mpu'u nalaumo besi-besi etu mpaka ri dayo Yesus nanggeni rampa-rampa to nipakasadia ira.

²Tempo ira narata ri dayo etu nikita ira nakalulimo watu to nipompiku dayo.

³Nesuamo ira riara dayo etu, tapi da'a nirata ira watabaku Yesus ri setu.

⁴Tempona ira danenggore ri setu naingu nompekiri kajadia etu, sampenjani naria romba'a malaeka to nopakea nenggila nekanggore namosu ira.

⁵Naeka mpu'u rara besi-besi etu sampe ira nekadede sampe ri tana. Pade nangulimo romba'a malaeka etu ka ira, “Nokuya komi nangelo tau to natuwuna ri peto'o tau namate?

⁶I'a mana ria ri se'i. Natuwu balimo I'a! Toramo nuapa to nitesana ka komi tempo I'a danaria ri Bagia Galilea. Niulina,

⁷‘Aku, Ana nu Manusia kana rawai ka tau-tau nasilaka, pade rapaku ri kayu parika sampe mamate, pade matuwu bali ri eo katolueona.’ ”

⁸Nangepe etu natitoramo rara besi-besi etu ewa tesa Yesus bopia.

⁹Naopu etu natinggulimo ira nggari dayo etu, pade nitesa ira ka sampulu samba'a anaguru Yesus ante pura-pura topantuki I'a ntanina nuapa pura to najadi pane'a.

¹⁰Besi-besi to notesa pura-pura etu ka topantuki-topantuki Yesus etumo: i Maria Magdalena, Yohana, i Maria indo Yakobus, ante besi-besi ntanina to nosanggani-nggani ante ira.

¹¹Tapi anaguru-anaguru Yesus da'a nomparasaya tesa nu besi-besi etu. Ira nompekiri besi-besi etu aga notesa anu da'a nakono.

¹²Tapi i Petrus nekanggore nangowa mpaka ri dayo etu. Tempona i'a nekadede nanggita riarana nikitana damo kae niposompu Yesus ri setu. Nanggita etu nasumaramo i Petrus, pade natinggulimo i'a ante nadea pompekutana riara nta'ina ewa nuapa to najadi ri setu.

¹³Tempo eo etu wo'u nalaumo romba'a topantuki Yesus mpaka ri saongu ngata nosanga ka ngata Emaus, kira-kira sampulu saongu kilo kakawaona nggari ngata Yerusalem.

¹⁴Ira notesa nggalalau ewa nuapa pura to najadi ri ja'i Yesus etu.

¹⁵Tempona ira danotesa-tesa bo nosinjula pekiri, naratamo Yesus mboto ri ja'i ira, pade nolumako mpasanggani-nggani ante ira.

¹⁶Ira nanggita Yesus tapi naria sangele nompakaingu ira sampe da'a ninjani ira I'a etu Yesus.

¹⁷Nangulimo Yesus ka ira, “Nuapa nitesa komi tempo komi nolumako pane'a?” Nenontomo ira romba'a etu ante lenje nasusa.

¹⁸Pade nangulimo samba'a nggari ira to nosanga ka i Kleopas, “Nggari pura-pura tau ri ngata Yerusalem bara aga njamba'a Komi to da'a nangginjani nuapa to najadi bara sakuya mbengi to naliuna!”

¹⁹Nekutanamo Yesus, “Nuapa to najadina?” Nesonomo ira, “To najadi ri ja'i Yesus tau nggari Nazaret. I'a samba'a nabi, tesa-tesana bo powiana nakuasa mpu'u nabeloka riara mpanggita Alatala nabeloka riara mpanggita pura-pura tau.

²⁰Tapi topanggeni-topanggeni agama bo balengga-balengga ngata kami nombawai I'a ka pomarenta ala ratangara kana mamate. Pade I'a nipaku ira ri kayu parika.

²¹Kakonona nisarumaka kami I'amo to narata manggabasaka to Israel nggari kuasa nto Roma. Pade we'i-we'i katolumbenginamo kamatena etu.

²²Ntanina nggari etu bara sakuya mba'a besi nggari mbira kami nompakatikaja kami, sabana pangane bobaya ira nalau mpaka ri dayo Yesus,

²³tapi da'a nirata ira watabakuna ri setu. Ira nanjili nanguli ka kami ira nanggita malaeka-malaeka to notesa ka ira Yesus namate natuwu bali.

²⁴Naopu etu bara sakuya mba'a tau nggari tatongo kami nalau mpaka ri dayo etu pade nirata ira nuapa to nitesa besi-besi etu nakono, tapi da'a nikita ira Yesus.”

²⁵Nangepe etu nangulimo Yesus ka ira, “Nabodo mpu'u komi! Nabungu mpu'u pekiri komi momparasaya nuapa to nitesa nabi-nabi!

²⁶Etumo Magau to Mompakasalama to nijanji Alatala kana mombarasai kasusa bo kapari ntani ruru, pade maopu etu I'a mombarata pebila.”

²⁷Pade Yesus notarangga ka ira nuapa to nitesa ewa korona riara pura-pura Buku Nagasa, nompamula nggari buku-buku to nitulisi i Musa sampe ri buku pura-pura nabi.

²⁸Tempo ira narata ri ngata to nikalau ira Yesus tumoni-moni madota molumako mpapola.

²⁹Tapi ira nanta'amaka I'a mapola. Niuli ira, “Kana mosanggani ante kami. We'i-we'i ntora mawengimo.” Jadi nesuamo Yesus nosanggani ante ira riara njapo.

³⁰Tempo I'a nekatoko nanggoni mpasanggani-nggani ante ira nialana roti pade niulina tarima kasi ka Alatala. Naopu etu nibingga-binggana roti etu pade niwaina ka ira.

³¹Kaliu-liu nanotomo rara ira. Ninjani ira Yesusmo e'i. Pade nalipomo Yesus nggari tatongo ira.

³²Nanggita etu natitoramo rara ira pade niuli ira samba'a bo samba'a, “Natantu etumo sabana nadamba rarata tempo I'a notesa ka kita ri tatongo jala pangane bo notesa nompakanoto nuapa to nitulisi riara Buku Nagasa ka kita!”

³³Tempo etu wo'u nekanggoremo ira nanjili mpaka ri ngata Yerusalem. Narata ri setu nirata ira anaguru Yesus to sampulu samba'a etu nasiromu ante tau ntanina.

³⁴Ira to naria ri setu notesa ka ira romba'a, “Pue mpu'u-mpu'u natuwu bali! I'a nompopokita korona ka i Simon Petrus!”

³⁵Nangepe etu notesamo romba'a topantuki Yesus to dako narata etu nuapa najadi ri ja'i ira mboto ri tatongo jala mpaka ri ngata Emaus, pade iwenu ira nangginjani Yesus tempona I'a nombabingga roti.

³⁶Tempo ira danotesa-tesa, sampenjani naratamo Yesus nekanggore ri tatongo ira ri setu. Pade nangulimo I'a, “Pue mombagane komi.”

³⁷Tapi ira pura-pura natikaja pade naeka mpu'u rara. Nipekiri ira bara mboa etu.

³⁸Etu sampe Yesus nanguli ka ira, “Nokuya komi naeka bo norompenga pompekiri?

³⁹Kitamo paleku bo kita wo'u kadaku. Aku mboto e'i! Lememo bo pariaramo. Mboa da'a ria isi bo wukuna ewa to nikita komi we'i-we'i.”

⁴⁰Yesus notesa iwetu ante nompopokita ka ira palena bo kadana.

⁴¹Tempona etu ewa da'apa niparasaya ira I'a etu Yesus sabana nadamba mpu'u rara ira bo nasumara. Jadi nangulimo Yesus ka ira, “Bara naria panggoni komi ri se'i?”

⁴²Pade ira nombawai ka I'a sanggoto bau nitunu.

⁴³Yesus nangala bau etu pade nikonina ri ngayo ira.

⁴⁴Naopu etu nangulimo Yesus ka ira, “Iwe'imo to niuliku ka komi bopia tempo Aku danaria nosanggani-nggani ante komi: pura-pura tesa to nitulisi riara buku i Musa, pade to nitulisi riara buku-buku nabi-nabi ntanina, pade to nitulisi riara Buku Mazmur ewa Aku, etu pura-pura kana rapakadupa.”

⁴⁵Pade nipakanotona pekiri ira ala ira mamala mangginjani nuapa to nitulisi riara Buku Nagasa etu.

⁴⁶Niulina ka ira, “Riara Buku Nagasa naria tesa to nanguli iwe'i: Magau to Mompakasalama kana rapatesi pade ri eo katolueona I'a kana matuwu bali nggari kamatena.

⁴⁷Pade riara sangana kana rapatolele Kareba Belo to nanguli iwe'i: pura-pura tau kana majea nggari silaka-silaka ira ala Alatala mombaampungi ira. Kareba etu kana rapatolele mompamula nggari ngata Yerusalem e'i sampe ri njumaongu dunia.

⁴⁸Komimo to nanggita pura-pura kajadia etu.

⁴⁹Toramo! Aku kana mompopana'u ka komi Nosa Nagasa to nijanji Umaku. Tapi komi kana mompopea ntani ruru ri ngata Yerusalem e'i sampe kuasa nggari ja'i Alatala etu mana'u mombabungu komi pura-pura.”

⁵⁰Naopu etu Yesus nanggeni anaguru-anaguruna etu nesuwu nggari ngata Yerusalem nalau sampe namosu ri ngata Betania. Ri setu I'a nangonggotaka palena pade nombagane ira pura-pura.

⁵¹Tempona I'a danombagane ira, noga'amo I'a nggari ja'i ira, pade neore mpaka ri suruga.

⁵²Pade notimbakotumo anaguru-anaguruna nombasomba I'a. Naopu etu natinggulimo ira mpaka ri ngata Yerusalem ante nadamba mpu'u rara.

⁵³Ira bate-batena naria riara Sapo Mpepue nombatoiya bo nombabila sanga Alatala.