Read Da'a Kaili LUKAS 3 Bible Online

LUKAS 3 - Da'a Kaili bible

LUKAS 3

¹Riara kasampulu limampaena Kaisar Tiberius noparenta ewa Magau Roma, i Pontius Pilatus najadi Gubernur ri Bagia Yudea, pade Herodes Antipas noparenta ri Bagia Galilea. Filipus, totuaka i Herodes noparenta ri Bagia Iturea bo Trakhonitis, pade i Lisanias noparenta ri Bagia Abilene.

²Tempo etu i Hanas ante i Kayafas najadi Balengga Topanggeni Agama nto Yahudi. Riara mpae etumo naratamo Alatala notesa ka Yohanes, ana i Zakharia etu ri karawa baina.

³Naopu Alatala notesa ka i'a nalaumo Yohanes ri ngata-ngata ri bagia lemba Yordan nompatolele kareba nggari ja'i Alatala ka pura-pura tau ri setu. Niulina, “Komi pura-pura kana majea nggari silaka-silakamu pade komi kana radiu ala komi raampungi nu Alatala.”

⁴Pepatuduki Yohanes etu nompakadupa nuapa to nitulisi riara buku nabi Yesaya nggaolu, iwe'i: “Naria samba'a tau nongare-ngare ri karawa baina, ‘Pakasadiamo jala ka i Pue. Pakanoamo jala to ratukina.

⁵Lobu-lobuna kana raiwu pade to nabuntina kana rapakarano. Jala to noleko-lekona kana rapakanoa bo lowu-lowuna raiwu rapakasirano.

⁶Pade pura-pura tau ri dunia kana manggita Alatala marata mompakasalama manusia.’ ” [2]

⁷Nadea tau narata ri ja'i Yohanes ala radiuna. Jadi notesamo i'a ka ira, “Komi topebagiu nasimbayu ante ule! Isema nanguli komi mamala malai ala ne'e mawela pesuku Alatala to marata? Etu da'a nakono!

⁸Ane mpu'u-mpu'u komi najea, etu kana rapopokita komi ante pokainggumu to nabelo. Ne'e komi mompekiri, ‘Kami e'i muli Abraham. Pesuku Alatala etu da'a rapawela ka kami!’ Etu da'a wo'u nakono! Sabana kuuli ka komi, ane Alatala madota watu-watu e'i mamala rapajadina muli Abraham!

⁹We'i-we'i nasadiamo baliu rapotowo kayu sampe ri kale-kalena. Ane da'a ntoto ria wuana to nabelo, kayu etu kana ratowo pade ratajiaka riara apu.” [3]

¹⁰Pade nekutanamo tau dea ka i'a, “Ane iwetu nuapa to masipato rapowia kami?”

¹¹Nesonomo Yohanes, “Tau maria morontonga bajuna, kana rawaina santonga ka tau da'a ntoto ria bajuna. Pade tau maria panggonina kana rawaina wo'u ka roana to da'a ria panggonina.”

¹²Naria wo'u topomperapi balasitee narata ri ja'i Yohanes merapi radiu. Ira nekutana, “Guru, nuapa to masipato rapowia kami?”

¹³Nesonomo Yohanes, “Ne'e komi merapi melabi nggari kadea nu balasitee to nipakatantu topoparenta ka komi.”

¹⁴Pade naria wo'u tantara-tantara narata nekutana ka Yohanes, “Iwenu ante kami? Nuapa to masipato rapowia kami?” Nesonomo Yohanes ka ira, “Ne'e mana komi momparangga bara mompakaeka tau ala mangala doina. Ne'e komi mangelo neliu nggari gaji komi. Naganamo etu.”

¹⁵Tempona etu pura-pura tau nekutana riara nta'i ira, “Bara Yohanes e'imo Magau to Mompakasalama to nijanji Alatala.”

¹⁶Ninjani Yohanes pompekiri ira. Jadi nitesana ka ira pura-pura, “Aku mombadiu komi ante ue ewa tandaina najeamo komi nggari silaka komi. Tapi kana marata samba'a tau to neliu nggakuasa nggari aku. Aku neliu nggaede nggari I'a sampe da'a masipato aku mombawole lui sapatuna. I'a kana mombadiu komi ante Nosa Nagasa nu Alatala bo apu.

¹⁷I'a nasimbayu ante tau nombawaro pae. Nariamo tapi ri palena. I'a kana mombawaro pura-pura paena sampe magasa, pade pae to namonona kana rabolina riara logona. Tapi warana kana rapalabuna riara apu to da'a ria kapaya-payana.”

¹⁸Iwetumo Yohanes nompatuduki tau-tau ante mpengaya-ngaya akala tempona i'a nompatolele Kareba Belo.

¹⁹Naria sanggani Yohanes nangontiaka Magau Herodes to noparenta ri Bagia Galilea. Niontiakana ewa porongona ante i Herodias, rongo ntuakana mboto bo nengele-ngele anu naja'a ntanina to nikawiana.

²⁰Tapi Magau Herodes aga nantambai kaja'ana ante nombasuaraka Yohanes riara tarunggu.

²¹Da'apa Yohanes nisuaraka riara tarunggu tempo pura-pura tau dea naopumo nidiuna, Yesus wo'u nidiu Yohanes. Tempo Yesus nosambaya natebeamo langi

²²pade Nosa Nagasa nu Alatala nana'u ri ja'ina nolenje mpotonji banggebodo. Pade naria suara nggari suruga nanguli, “Ikomo Anaku to nipotoweku. Ikomo to nikonoa raraku.”

²³Tempo Yesus nompamula panggawiana to niwai Alatala ka I'a, umuruna kira-kira tolumpulu mpaemo. Nantuki pombarata ntau I'a ana Yusuf, Yusuf ana Eli; Eli ana i Matat; Matat ana i Lewi; Lewi ana i Malkhi; Malkhi ana Yanai; Yanai ana Yusuf; Yusuf ana i Matica; Matica ana Amos; Amos ana i Nahum; Nahum ana i Hesli; Hesli ana i Nagai; Nagai ana i Maat; Maat ana i Matica; Matica ana i Simei; Simei ana Yosekh; Yosekh ana Yoda; Yoda ana Yohanan; Yohanan ana i Resa; Resa ana i Zerubabel; Zerubabel ana i Sealtiel; Sealtiel ana i Neri; Neri ana i Malkhi; Malkhi ana Adi; Adi ana i Kosam; Kosam ana Elmadam; Elmadam ana Er; Er ana Yesua; Yesua ana Eliezer; Eliezer ana Yorim; Yorim ana i Matat; Matat ana i Lewi; Lewi ana i Simeon; Simeon ana Yehuda; Yehuda ana Yusuf; Yusuf ana Yonam; Yonam ana Elyakim; Elyakim ana i Melea; Melea ana i Mina; Mina ana i Matata; Matata ana i Natan;(...)