Read Da'a Kaili LUKAS 5 Bible Online

LUKAS 5 - Da'a Kaili bible

LUKAS 5

¹Naria sanggani Yesus nekanggore nopaguru ri wiwi rano Genesaret. Tau dea nantalili I'a nangepe Tesa nu Alatala.

²Tempo etu I'a nanggita rongu sakaya ri wiwi rano etu. Pura-pura topompemala bau nana'u nggari sakaya-sakaya etu nantapasi jala ira.

³Yesus nesawi saongu sakaya, etumo sakaya i Simon Petrus, pade nipakauna i Simon nanggeni sakaya etu makawao sakedi nggari wiwi rano. Yesus nekatoko ri bunggu sakaya etu, pade nggari setu I'a nompaguru tau dea.

⁴Sangga naopupa I'a nompaguru tau dea niulina ka i Simon, “Keni mpaka ri kandalana sakayamu pade tendeaka jalamu mompemala bau.”

⁵Nesonomo i Simon, “Guru, njambengi ntuamo kami nompemala bau tapi da'a ria kamba samba'a nirata kami. Tapi sabana guru nompakau kami, kami mantendeaka jala sangganipa mompemala bau.”

⁶Sangga nituki ira panguli Yesus etu nadea mpu'u bau nirata ira sampe jala ira naponu, ntora naseri.

⁷Jadi ira nanggabe roa ira ri sakaya ntanina marata mantulungi ira. Naratamo roa-roa ira pade ira mpasanggani-nggani nangisi bau etu riara rongu sakaya etu. Naponu pura rongu sakaya etu niisi bau sampe sakaya etu sakedika natala.

⁸Tempo i Simon Petrus nanggita etu, notimbakotumo i'a ri ngayo Yesus ante nanguli, “Ne'e mamosu ri ja'iku, Pue, apa aku samba'a tau nasilaka!”

⁹Niulina iwetu sabana i'a ante tau-tau to nosanggani-nggani ante i'a nasumara nanggita kadea nu bau to namala nijala ira.

¹⁰Iwetu wo'u roa-roa i Simon, etumo Yakobus bo Yohanes, ana-ana i Zebedeus. Pade nangulimo Yesus ka i Simon, “Ne'e maeka. Komi nokolu topangelo bau, tapi mompamula we'i-we'i komi majadi topangelo manusia majadi topantuki Alatala.”

¹¹Naopu etu ira nanggeni rongu sakaya etu mpaka ri wiwi rano. Pade ira tolumba'a nompalasi pura-pura etu nalau nantuki Yesus.

¹²Naria sanggani Yesus naria ri saongu ngata. Ri setu naria samba'a langgai korona naju'a bete. Tempona i'a nanggita Yesus naratamo i'a notimbakotu ri ngayona pade nerapi mpu'u-mpu'u ka I'a, “Pue, ane Komi madota, Komi mamala mompakabelo ju'aku e'i.”

¹³Nangepe etu Yesus nangojo palena nanjoko tau etu ante nanguli, “Aku madota. Nabelomo ju'amu!” Kaliu-liu ju'a ntau etu nabelo.

¹⁴Pade Yesus nantagi tau etu, “Ne'e mutesa ka tau nuapa to najadi ri koromu. Tapi kalaumo komi mompopokita koromu ka topanggeni agama ala rakitana nabelomo ju'amu. Pade waimo ka Alatala pesomba ewa to niparenta i Musa ala mompopokita ka tau pura-pura nabelomo ju'amu.”

¹⁵Naupa tau etu nitagi iwetu, kareba Yesus natiepe ri umba-umba sampe nadea mpu'u tau narata ala mangepe tesana pade ala rapakabelo nggari ju'a ira.

¹⁶Tapi sanggani-sanggani Yesus nalau mpaka ri peto'o to nakalinoana pade nosambaya ri setu.

¹⁷Naria sanggani Yesus nopaguru. Tempo etu naria bara sakuya mba'a tau to Parisi ante guru-guru agama nekatoko nangepe I'a ri setu. Ira narata nggari pura-pura ngata to naria ri Bagia Galilea ante Bagia Yudea bo nggari ngata Yerusalem wo'u. Kuasa nggari ja'i Pue Alatala naria ri ja'i Yesus sampe I'a namala mompakabelo tau-tau to naju'ana.

¹⁸Tempona etu naratamo bara sakuya mba'a tau nombakowa samba'a tau topunggu noturu ri ompa paturuna. Ira nompasimbuku manggeni tau etu mesua rara njapo ala i'a ratu'u ri ngayo Yesus.

¹⁹Tapi da'a namala ira manggeni topunggu etu mesua sabana tau-tau ri setu neliu nggadea. Sabana etu nalaumo ira nepone ri bunggu ata sapo etu. Narata ri bunggu ata etu nibongga ira ata etu pade niulu ira tau naju'a etu ante parewa mpoturuna ri ngayo Yesus ri tatongo ntau dea etu.

²⁰Tempo Yesus nanggita karoso pomparasaya ira I'a nanguli, “Sampesuwu, silakamu niampungimo.”

²¹Nangepe etu nompamulamo guru-guru agama ante tau-tau to Parisi ri setu nompekiri riara nta'i ira, “Naja'a mpu'u tau e'i! I'a nompakakedi Alatala! Da'a ria tau namala mombaampungi silaka, aga Alatala mboto!”

²²Ninjani Yesus pompekiri guru-guru agama ante tau to Parisi etu. Jadi niulina ka ira, “Nokuya komi nompekiri iwetu riara nta'imu?

²³Umba to neliu nggamuda rauli, ‘Silakamu niampungimo,’ atau manguli, ‘Pekanggoremo pade polumakomo?’ Natantu neliu nggamuda manguli, ‘Silakamu niampungimo.’

²⁴Tapi Aku mompopokita ka komi Aku, Ana nu Manusia nakuasa mombaampungi silaka-silaka manusia ri dunia e'i.” Pade nipakauna topunggu etu, “Pekanggoremo, onggotaka ompa paturumu pade patinggulimo!”

²⁵Nangepe etu nekanggoremo topunggu etu ri tatongo ntau dea pade nionggotakana ompa paturuna nanjili ante nombatoiya bo nombabila sanga Alatala.

²⁶Nanggita etu nogumaa puramo tau ri setu pade ira nombatoiya bo nombabila sanga Alatala. Ante naeka mpu'u rara ri ja'i Alatala ira nanguli, “Eona e'i nikitatamo nuapa anu to nipogumaa.”

²⁷Naopu etu nesuwumo Yesus nggari sapo etu pade nikitana samba'a tau topomperapi balasitee to nosanga ka i Lewi nekatoko riara kantoro topomperapi balasitee. Nangulimo Yesus ka i'a, “Kamaimo, tukimo Aku!”

²⁸Nangepe etu nekanggoremo i Lewi pade nipalasina pura-pura panggawiana nalau nantuki Yesus.

²⁹Naopu etu i Lewi nanggawia posusa ka Yesus ri sapona. Nadea topomperapi balasitee ante tau-tau ntanina nanggoni mpasanggani-nggani ante ira ri posusa etu.

³⁰Naopu nanggita Yesus nalau ri posusa mpasanggani-nggani ante i Lewi, nonguamo bara sakuya mba'a tau to Parisi ante guru-guru agama to nantuki pepatuduki to Parisi. Nangulimo ira ka topantuki-topantuki Yesus, “Nokuya komi pura-pura nanggoni pade nanginu mpasanggani-nggani ante topomperapi balasitee bo tau-tau to nasilaka?”

³¹Nesonomo Yesus, “Da'a tau to naroso korona paraluu rapakuli dokutoro, aga tau-tau to naju'ana.

³²Aku da'a narata mompokio tau to nanoa rarana tapi aga narata mompokio tau nasilaka ala ira majea nggari silaka-silaka ira.”

³³Pade nekutanamo tau ka Yesus, “Topantuki-topantuki Yohanes naoso napuasa pade nosambaya. Iwetu wo'u topantuki-topantuki to Parisi. Tapi topantuki-topantuki Komi aga nanggoni bo nanginu. Nokuya ira da'a napuasa?”

³⁴Nesonomo Yesus ka ira ante porapa iwe'i: “Masipato komi mompakau toratamu mapuasa ri posusa mponika ane boti langgai danosanggani ante ira? Natantu da'a!

³⁵Tapi kana marata tempona boti langgai etu raala nggari ja'i ira. Pade tempo etumo ira kana mapuasa.” [9]

³⁶Naopu etu Yesus nombatesa ka ira porapa iwe'i: “Da'a ria samba'a tau manjeri baju to nabouna rapotampalana ka baju to narantana, sabana ane iwetu baju to nabouna etu kana maseri, pade kae rapotampala etu da'a wo'u nabelo rakita ri baju to narantana etu.

³⁷Iwetu wo'u ante ue anggur. Da'a ria samba'a tau nombaisi ue anggur to nabouna riara pombolina to nasae, sabana ane iwetu ue anggur to nabouna etu kana morende mompakaposo pombolina etu sampe masowe wetumo ue anggur pade marugi pombolina.

³⁸Kakonona, ue anggur to nabouna kana raboli riara pombolina to nabouna wo'u.

³⁹Tau nabiasa nanginu anggur to nasaena da'a madota manginu to nabouna, sabana niulina, ‘Nabelopa anggur to nasaena.’ ”