Read Da'a Kaili LUKAS 6 Bible Online

LUKAS 6 - Da'a Kaili bible

LUKAS 6

¹Tempo Eo Mpenonto Yesus ante anaguruna noliu ri tinalu gando. Ri setu nompamulamo anaguruna nompui pae sakedi, nipioyo ira pade nionta ira.

²Nanggita powia ira etu nangulimo bara sakuya mba'a tau to Parisi ri setu, “Nokuya komi nombaliunaka Atura-atura agamata ante nowia to nitagi ri Eo Mpenonto?”

³Nesonomo Yesus, “Iwenumo? Da'apa nibasa komi tesa riara Buku Nagasa ewa powia i Daud nggaolu tempona i'a ante roa-roana naoro ta'i?

⁴I'a nesua riara Sapo Alatala pade nialana roti to nipesomba ka Alatala ri setu. Nikonina roti etu pade niwaina wo'u ka roa-roana. Tapi kakonona nantuki Atura-atura agamata roti etu aga mamala rakoni topanggeni-topanggeni agama, da'a tau ntanina.”

⁵Pade niuli Yesus wo'umo, “Aku, Ana nu Manusiamo to nakuasa ri Eo Mpenonto.”

⁶Tempo Eo Mpenonto ntanina, nesuamo Yesus ri sapo mpodade nto Yahudi pade nopaguru. Ri setu naria samba'a tau namate pale ngganana.

⁷Bara sakuya mba'a guru agama bo tau to Parisi nompariara mpakabelo-belo manggita ane Yesus mompakabelo tau naju'a etu tempo Eo Mpenonto, sabana ira madota mangelo sala ri ja'i Yesus ala ira mamala mompangadu I'a.

⁸Tapi ninjani Yesus pompekiri ira. Jadi nangulimo I'a ri ja'i ntau to namate palena etu, “Pembangumo, kamai pekanggoremo ri tatongona se'i!” Nangepe etu nembangumo tau etu nalau nekanggore ri setu.

⁹Pade nekutanamo Yesus ka ira pura-pura, “Nantuki Atura-atura agama nuapa to nipaloga ka kita rapowia ri Eo Mpenonto? Mowia to nabelona bara to naja'ana? Mompakasalama koro ntau bara mompatesi tau?”

¹⁰Naopu Yesus nekutana iwetu I'a nanggita ntalili ri ja'i ntau dea etu. Pade nangulimo I'a ka tau namate palena etu, “Ojomo palemu!” Tau etu nangojo palena, pade nabelo balimo palena etu.

¹¹Tapi naopu nanggita etu narau mpu'umo rara guru-guru agama bo tau-tau to Parisi etu. Pade nompamulamo ira nolibu mantesa nuapa mamala rakawia ri ja'i Yesus.

¹²Tempona etu Yesus nantende mpaka ri saongu bulu pade ri setu I'a nosambaya ka Umana Pue Alatala njambengi ntua.

¹³Sangga naeompadondo, nipokiona puramo tau to nantuki I'a, pade nipelisina sampulu romba'a nggari tatongo ira majadi surona.

¹⁴To nipelisina etumo: i Simon, to nidaena i Petrus, Andreas tua'i i Simon, Yakobus, Yohanes, i Filipus, i Bartolomeus,

¹⁵i Matius, i Tomas, Yakobus ana Alfeus, i Simon to Zelote,

¹⁶Yudas ana Yakobus, ante Yudas Iskariot to najadi topobalu Yesus.

¹⁷Naopu etu notuamo Yesus ante anaguruna nggari bulu etu sampe narata ri kadelena. Ri setu naria nadea topantuki I'a ntanina pade nadea tau to narata nggari umba-umba ri bagia nto Yahudi, nggari ngata Yerusalem bo nggari ngata Tirus ante ngata Sidon to ri wiwi ntasi.

¹⁸Ira narata ala mangepe tesa Yesus pade ala rapakabelo nggari ju'a ira pura-pura. Ira to nipesua seta wo'u narata pade nipakabelona.

¹⁹Pura-pura tau nompasimbuku manggabe koro Yesus sabana naria kuasa nesuwu nggari korona to nompakabelo ju'a ira pura-pura.

²⁰Yesus nanggita topantuki-topantuki I'a pade niulina, “Nasana mpu'umo komi to nakasiasina, sabana komimo to najadi todea riara Poparenta nu Alatala.

²¹Nasana mpu'umo komi to naoro we'i-we'i, sabana komi kana rapakabosu. Nasana mpu'umo komi to notumangi we'i-we'i, sabana komi kana rapakadamba.

²²Nasana mpu'umo komi ane komi raporau rara ntau, rapatani ntau, rasalai ntau, bo sanga komi rapakawau ntau sabana komi topantuki Aku, Ana nu Manusia.

²³Iwetu wo'u nikawia totu'a ira nggaolu ka nabi-nabi Alatala. Ane etu majadi, kana madamba mpu'u rara komi sabana nadea mpu'u rasi to nipakasadia ka komi ri suruga.

²⁴Tapi mandasa mpu'umo komi to nakalumana we'i-we'i, sabana nirata komi puramo nuapa to nompakadamba. Mana ria ntanina.

²⁵Mandasa mpu'umo komi to nagana panggoni we'i-we'i, sabana komi kana maoro. Mandasa mpu'umo komi to nadamba rara we'i-we'i, sabana komi kana masusa rara pade motumangi.

²⁶Mandasa mpu'umo komi to nitoiya pura-pura tau, sabana iwetu wo'u nipowia totu'a ira nggaolu ka nabi-nabi topodawa.” [10]

²⁷“Tapi kuuli ka komi to nangepe tesaku we'i-we'i: Potowemo balimu, powia belo ka tau to nomporau rara komi.

²⁸Perapi belo ka tau to nombajanjiaka komi pade posambaya wo'u ka tau to nowia naja'a ri ja'imu.

²⁹Ane maria tau mombasapa kalimpi ngganamu, wai ka i'a wo'u kalimpi njidimu. Ane maria tau mangala buyamu, wai ka i'a wo'u bajumu.

³⁰Ane maria tau merapi ri ja'imu kana rawai ka i'a. Pade ane mbara-mbaramu rapangangga ntau ne'e mana muperapi anu to nialana.

³¹Nuapa-nuapa to mupodota rapowia ntau ka komi, iwetu wo'u komi mowia ri ja'i ira.

³²Ane komi aga nompotowe tau to nompotowe komi, ne'e rasarumaka Alatala mombawai rasi ka komi, sabana tau nasilaka wo'u nowia iwetu.

³³Ane komi nowia nabelo aga ka tau to nowia anu nabelo ka komi, natantu komi da'a rareke tau to nabelo rarana, sabana tau nasilaka wo'u nowia iwetu.

³⁴Pade ane komi nompopoinda doimu aga ka tau to nompakule mompopanjili doi etu, natantu komi da'a rareke tau to nabelo, sabana tau nasilaka wo'u nompopoinda doi ira ka tau nasilaka ntanina ane ranjani ira tau etu nompakule mompopanjili doi etu.

³⁵Kakonona da'a iwetu! Komi kana mompotowe balimu, pade powia anu mabelo ka ira. Komi kana mombawai ka tau ante mana mompopea balasina. Ane komi mowia iwetu rasimu kana madea bo komi majadi ana-ana nu Alatala, sabana I'a wo'u nowia to nabelo ka tau da'a ninjanina notarima kasi bo wo'u ka tau naja'a.

³⁶Komi wo'u kana mabelo rara nasimbayu ante Uma komi Pue Alatala.”

³⁷“Ne'e komi sakedi-sakedi mompakasala tau ala ne'e komi rapakasala Alatala. Ne'e komi sakedi-sakedi mompakatantu tau nasala rasuku ala ne'e komi rasuku Alatala. Ampungimo tau ntanina ala komi wo'u raampungi Alatala.

³⁸Wai ka tau ntanina ala Alatala wo'u mombawai ka komi. Ane komi mombawai madea kana madea wo'u rarata komi. Kadeana etu masimbayu ewa posuka to naponu to niparo'o ante nigagoya ala namala raisi wo'u sampe mabubuaka. Komi kana rabalasi nantuki posuka to nipake komi ante tau ntanina.”

³⁹Naopu etu Yesus nombatesa wo'umo saongu porapa ka topantuki-topantuki I'a iwe'i: “Da'a namala samba'a toburo mombanini toburo ntanina. Natantu ira romba'a kana manawu riara lowu.

⁴⁰Da'a ria samba'a anaguru neliu nggapande nggari guruna. Tapi ane matamapa, i'a kana masimbayu ante guruna.

⁴¹Nokuya komi namala nanggita silaka roamu to nakedina ewa mpuli ri matana, tapi silaka komi mboto to nabetena ewa baloti ri matamu mboto da'a ria nikitamu?

⁴²Iwenu komi mamala manguli ka i'a, ‘Sampesuwuku, kamai kukaliaka mpuli nggari matamu,’ i'apa baloti ri matamu mboto da'a nikitamu? Komi topebagiu! Kaliaka ntani ruru baloti ri matamu mboto. Ante iwetu komi mamala manggita ante manoto ala manggaliaka mpuli nggari mata roamu etu!”

⁴³“Da'a naria kayu nabelo nowua da'a nabelo. Da'a wo'u naria kayu da'a nabelo nowua nabelo.

⁴⁴Pura-pura kayu ninjani nggari wuana. Natantu lemo ntasi da'a nowua mpolonja, bo walaa winti manu da'a nowua ntimu.

⁴⁵Iwetu wo'u manusia. Tau nalusu rarana, powiana ante tesana nabelo sabana to niboli riara nta'ina nabelo pura. Pade tau naja'a rarana, powiana ante tesana kana maja'a sabana to niboli riara nta'ina aga to naja'ana. Nuapa to nitesa ntau aga nantuki nuapa to naria riara nta'ina.”

⁴⁶Nangulimo Yesus, “Nokuya komi nanggasangai Aku Pue tapi komi da'a nantuki nuapa to niuliku?

⁴⁷Kana kupopokita ka komi kasimbayu inggu ntau to narata ri ja'iku to nangepe pade nantuki tesaku!

⁴⁸I'a nasimbayu ewa samba'a topowia sou to nombakae mpakandala pade nowia pondasi ri bunggu watu. Tempo ue nanggabuntu nombarumpa sapo etu, sapo etu da'a nogoya sabana nibangu ri bunggu pondasi to naroso.

⁴⁹Tapi ane tau aga nangepe tesaku tapi da'a nantuki tesa etu, i'a nasimbayu ewa tau to nowia sapona ri bunggu tana, da'a nipowiana pondasi. Tempo ue nanggabuntu nombarumpa sapo etu, kaliu-liu sapo etu nadungga, pade naja'a mpu'u kagerona.”